Ruuka 11

Ameeyigisho iiguru ya okusaasaama Nyamuwanga

(Mataayo 6:9-13, 7:7-11)

1Orusuku rumwi, Yeesu ꞉aariga ˆnaasaasaama ku-Nyamuwanga ari arebhe. Bhunu ꞉aamarire, owumwi wa abheeyigira bhaaye ˆnaamubhwira ati, “Ee Raatabhugenyi, nuukiiyigishe okusaasaama ku-Nyamuwanga, rwa Yowana Omubhatiisha kutyo ꞉eeyigisiishe abheeyigira bhaaye.”

2Yeesu ˆnaabhabhwira ati, “Mukeenda okusaasaama Nyamuwanga, mwaikega kutya,

‘Raata [unu uri mu-rwire],

riisiina ryawo rigungibhwe.

Na obhukama bhwawo bhuuje.

[Ganu oweenda, gakuumishwe mu-kyaro anu,

rwa kutyo agakuumira mu-rwire.]

3Ukiyaane ebhyokurya bhyeswe ku-nsiku.

4Na ukyabhire ebhikayo bhyeswe,

kwa okubha kyone ekyabhira abhaanu bhakakikayira.

Kweki Raata, waasiga okukingisha mu-masakyo.

[Nawe ukyerushe okusooka ku-mukayi.]’ ”

5Kimwi Yeesu ˆnaabhabhwira ati, “Kyaike, owumwi weemwe akagenda ku-musaani waaye mu-bhwire agati, ˆnaamubhwira ati, ‘Ee musaani waani! Enisabha emikaate esatu, 6kwa okubha, musaani waani eengira okusooka mu-rugendo rwaye, woori anye nitari na ekyokurya kya okumuyaana.’ 7Nawe, omusaani uyo weeki ˆnaamusubhya ati, ‘Siga kuunyansha! Anye neegaaye orwigi! Anye na abhaana bhaani kyamaamire ku-bhuriri, nitakutura okwimuka okukuyaana kiinu kyonekyone.’ 8Enibhabhwira ati, raabhe omuunu uyo akarema okwimuka okuyaana oweejaabho omukaate, raabhé kutyo ni musaani waaye, nawe keemuka okumuyaana bhinu keenda bhyone kutyo, kwa okubha ꞉aamusabhire aremeeye-ko.

9“Mmbe, anye noone enibhabhwira ati, musabhe Nyamuwanga, kaaja okubhayaana kinu omusabha. Mwagare ku-Nyamuwanga, omwene kaaja okubhayaana kinu omwagara. Mukonoone orwigi, Nyamuwanga kaaja okubheegurira. 10Kwa okubha, abhasabhi, nibho abhayaanwa. Na abhaagasi nibho abhanyoora. Na abhakonooni bha orwigi nibho abheegurirwa.

11“Angu, ariwo mwibhusiki agati weemwe unu kaatura okuyaana omwana waaye ekisoro enu omwana waaye amusabhire inswi?#11:11 Ku-makaamo agandi aga kara aga Ekiyunaani agoongesha-ko ati omwana waaye akamusabha omukaate, kaamuyaana riigina, amwi ati omwana waaye akamusabha inswi kaamuyaana ekisoro. 12Amwi kyaike ati ni mwibhusiki kaatura okuyaana omwana waaye ekitoromooni enu omwana waaye amusabhire riigi? 13Mmbe ikabha ati, emwe abhakayi mwone mumenyere okuyaana abhaana bheemwe emisanga emijomu, angu, Esomwana unu ari mu-rwire atakutura okuyaana Mwoyo Omutaakatiifu bhanu abhamusabha?”

Obhuturo bhwa Yeesu obhukira obhwa omukuru wa ebhiwi

(Mataayo 12:22-30; Maariko 3:22-27)

14Orusuku rumwi, Yeesu ꞉aariga ˆnaasoosha ekiwi mu-muunu. Ekiwi kiyo ꞉kyariga kikorere omuunu uyo abheeye mujibhi. Bhunu ekiwi ꞉kyamusookere-ko, omuunu uyo ˆnaamba okuroma. Abhaanu ꞉bhaariga bhariwo bhasangire, okurora iingʼana iyo mbaruguura muno. 15Nawe, agati wa abhaanu bhayo, abhandi mbaaika ati, “Kaabhirimya ebhiwi mu-bhaanu ku-bhuturo bhwa Bherijebhuri,#11:15 Bherijebhuri. Ni riisiina erindi rya Sitaani. omukuru wa ebhiwi!” 16Abhandi mbasaka Yeesu, mbeenda akore ekimenyegesho niwe bhamenye ati asookere ku-Nyamuwanga.

17Nawe, Yeesu kwa okubha ꞉aariga amenyere obhwiganiirisha bhwebhwe, ˆnaabhabhwira ati, “Abhaanu mu-bhukama obhumwi bhakarema okuungwana, obhukama bhuyo obhugwa. Na, abhayiiri bhakarwana abheene na abheene oruganda ruyo rutakubha-wo. 18Ni kutyokutyo na Sitaani woone, raabhe akeerema omwene, obhukama bhwaye bhuriyambaara kutiki? Naabhabhuusha riibhuusho riyo, kwa okubha omwaika ati enibhirimya ebhiwi ku-bhuturo bhwa Bherijebhuri. 19Mmbe! Ikabha ati anye enibhirimya ebhiwi ku-bhuturo bhwa Bherijebhuri, abhaanu bheemwe bheeki, abhabhisoosha-ko ku-bhuturo bhwaga? Ku-nsonga iyo abhaanu bheemwe nibho bharyeresha ati muyabhire. 20Nawe, raabhe anye enibhirimya ebhiwi ku-bhuturo bhwa Nyamuwanga, mmbe mumenye ati, obhukama bhwa Nyamuwanga bhwabhayikiriiye.

21“Mwitegeereshe ekirengekanyo kinu! Omuunu unu ari na amanaga na ebhigwato, akaangarira ebhiinu bhya iika ewaaye, ebhiinu bhyaye bhitakukunibhwa-ko. 22Nawe, omuunu owundi owa amanaga okumukira, akaaja okumurwana, ˆnaamuyiga, kaamuteesha ebhigwato bhyaye bhinu ꞉aariga ˆneesiga, ˆnaagega ebhiinu bhyone kutyo mu-nyumba, ˆnaabhigabha ku-bhandi. 23Omuunu woonewoone unu atari ku-rubhaara rwani, uyo niwe omusoko waani. Na woonewoone unu atakukumanya amwi na anye, uyo kaanyaraganya.”

Kutyo ekiwi ekisubha mu-muunu

(Mataayo 12:43-45)

24“Bhunu ekiwi ekisooka mu-muunu, ekiiyindayinda anu atari na manji, nkyagara owa okumuunyira. Kikabhurwa owa okumuunyira, nkyaika ati, 25‘Enisubha mu-muunu unu ꞉naasookere-mo.’ 26Kikasubha kweki mu-muunu, nkinyoora ari rwa iinyumba inu yeyereeywe iroosiibhwe kujomu, ekisubha-yo okugenda okureeta ebhiwi ebhindi mungati#11:26 Ebhiwi ebhindi mungati. Abhasomi abhandi abhaaika ati bhitari bhiwi mungati era. Bhiwi mungati ebhitura okubha kirengekanyo kya bhwafu era. ebhibhiibhi muno okukira ekyene. Mbiija mbiingira bhyone kutyo mu-muunu uyo. Mmbe omuunu uyo, obhuteero bhwaye obhubha bhubhiibhi muno okukira kutyo ꞉aariga ari ku-bhwambiro.”

Nyakara bhaaya?

27Bhunu Yeesu ꞉aariga akyaaika gayo, mw-isangi rya abhaanu ayo ꞉aariga arimo omugasi wumwi. Omugasi uyo ˆnaamura obhuraka ˆnaabhwira Yeesu ati, “Nyakara omugasi unu ꞉aakwibhuuye na okukuneenʼya!” 28Nawe Yeesu weeki ˆnaaika ati, “Nyakara muno abhaanu bhanu abhoongwa Riingʼana rya Nyamuwanga na okurigwatira!”

Abhaanu abheenda ekimenyegesho ku-Yeesu

(Mataayo 12:38-42; Maariko 8:12)

29Bhunu abhaanu ꞉bhaagendereeye okumusangira, Yeesu aaikire ati, “Abhaanu bha orwibhuro runu ni bhabhiibhi muno! Abheenda ekimenyegesho, nawe nitakubheeresha kimenyegesho kyonekyone, tari abhaaja okurora ekimenyegesho kya Yoona. 30Rwa kutyo Yoona ꞉aabheeye ekimenyegesho ku-Bhaninawi, nikwo kutyo Omwana wa Adaamu woone, aribha ekimenyegesho ku-bhaanu bha orwibhuro runu.

31“Orusuku rwa indamuro, omugore wa ebhurimbe ariyambaara na abhaanu bha orwibhuro runu, na aribharamurira ati muri bhakayi. Iribha kutyo kwa okubha omwene ꞉aasookere mu-kyaro kya areera insonga aaje eetegeereshe amangʼana ga obhwenge aga omukama Seremaani. Woori enibhabhwira ati, anu kiri, ariwo omukuru okukira Seremaani!#11:31 Ringira 1 Abhakama 10:1-13; 2 Amangʼana ga Nyakati 9:1-12.

32“Ku-rusuku rwa indamuro abhaanu bha mu-musi gwa Ninawi, bhariyambaara na abhaanu bha orwibhuro runu mu-meeso ga Nyamuwanga, mbabharamurira ati muri bhakayi. Kwa okubha, abheene bhunu ꞉bhoonguuywe omuragi Yoona ˆnaaraasha Iingʼana ya Nyamuwanga ꞉bhaanugire ebhikayo bhyebhwe. Woori enibhabhwira ati, anu kiri, ariwo omuunu omukuru okukira Yoona, nawe mutakwenda okumwikirisha.”

Intara ya omubhiri

(Mataayo 5:15, 6:22-23)

33“Omuunu atakukongeesha intara, kimwi ˆnaayifundikira na ekiinu. Nawe kaayituura iiguru ku-kisiri, insonga abhaanu bhaakeengira mu-nyumba muyo, bharore obhweru. 34Eriiso niryo intara ya omubhiri. Raabhe eriiso ryawo erirora kujomu, omubhiri gwawo gwone kutyo ogubha na obhweru. Nawe, ameeso gaawo gakabha mawofu, omubhiri gwawo gwone ogubha guweereeye mu-kisuute. 35Ku-gayo, mwiyangarire muno obhweru bhwa mu-mitima gyemwe bhutaaja okuyinduka mbubha kisuute. 36Kwa okubha, omubhiri gwawo mugima gukabha na obhweru gutari na kisuute kyonekyone, oguuja okungʼara, rwa intara kutyo eyimirika obhweru bhwayo.”

Yeesu kaagonya Abhafarisaayo na abheeyigisha bha ebhiraagiro

(Mataayo 23:1-36; Maariko 12:38-40; Ruuka 20:45-47)

37Yeesu okumara okwaika gayo, Omufarisaayo wumwi ˆnaaraarika Yeesu okurya ebhyokurya iika ewaaye. Yeesu ˆneekirisha, ˆnaagenda ˆneengira owa Omufarisaayo uyo, ˆneekara okurya ebhyokurya. 38Omufarisaayo uyo, ˆnaaruguura muno okurora Yeesu ˆnaarya akyari kwisaabha.#11:38 Abhayawudi ꞉bhaariga bhari na gintungwa gyebhwe ku-bhwisaabhi bhwa amabhoko bhakeenda okurya. ꞉Bhaariga mbeesaabha kutyo insonga bheesooshe-ko obhunaabhi. Ringira riingʼana Obhunaabhi mu-Mangʼana Amakomeeye. 39Nawe, Yeesu ˆnaamubhwira ati, “Emwe Abhafarisaayo, omwosha anja wa ekikombe na orutubha. Nawe mu-mitima gyemwe mwijuuye obhwifi na obhukayi. 40Abhatengʼo emwe! Mutakumenya ati unu ꞉aabhumbire iiguru ku-kikombe, niwe ꞉aabhumbire na munsi ya ekikombe? 41Muyaane abhatobhu obhusakisi emitima gyemwe gyerere, niwe amangʼana goone kutyo gariima kw-imwe.

42“Garibhanyoora, emwe Abhafarisaayo! Omusoosisha Nyamuwanga iijaaka#11:42 Iijaaka. Ni mbaga ya mugabho. Kw-ikumi owusoosha-ko ekiinu ekimwi, kiyo ni kya Nyamuwanga. Owusoosha-ko riibhaara kw-ikumi gibhe ni yera amwi ati bhibhe bhiinu. Ringira Abharaawi 27:30. ya ebhiinu ebhitooto rwa ebhirungo bhya ebhyokurya, rwa omuunyu, ebhitunguru, na ebhindi, enu musiga okukora amangʼana ga obhurengeresi ku-bhaanu, musiga na okwenda Nyamuwanga. Eyeendwa mugenderere okusoosisha Nyamuwanga iijaaka, na mutaaja okusiga okukora amangʼana ga obhurengeresi ku-Nyamuwanga. 43Garibhanyoora, emwe Abhafarisaayo! Kwa okubha omwenda okwikara ku-bhitebhe bhya ekibharo mu-masunagoogi, omwenda okukeesibhwa na okuyaanwa ekibharo mu-maguriro. 44Garibhanyoora emwe! Kwa okubha omususana na gimbiiyira ginyarageene abhaanu abhagitura-ko bhatakugirora.”

45Kimwi, omwiyigisha wumwi owa ebhiraagiro ˆnaabhwira Yeesu ati, “Omwiyigisha, okwaika amangʼana gayo, owaaika ati eswe kyone ekikora gayo.” 46Yeesu ˆnaamusubhya ati, “Emwe abheeyigisha bha ebhiraagiro mwone, garibhanyoora! Omwitwikya abhaanu mijigo misito,#11:46 Mijigo misito. Anu Yeesu kaasusanya ebhiraagiro bhinu abheeyigisha bha ebhiraagiro bhya Musa na Abhafarisaayo ꞉bhaatuuye-wo. Ebhiraagiro bhiyo ꞉bhyariga bhiri bhikomeeye ku-bhaanu okubhigwata, okubhikorera emirimu na okubhiseeta. enu emwe abheene mutakusaka na kugikuunʼya-ko okubhasakira! 47Garibhanyoora emwe! Omuumbaka gimbiiyira gya abharagi kujomu enu bhaajaaji waanyu nibho ꞉bhaabheetire! 48Ku-gayo, omweresha ati omwikirishaanya na gayo bhaajaaji waanyu ꞉bhaakorere. Kwa okubha abheene ꞉bheetire abharagi bhayo, woori emwe okuumbaka gimbiiyira giyo omugenderesha ganu bhaajaaji bhaanyu ꞉bhaakorere.

49“Kyakora Nyamuwanga aaikire kutya, ku-bhwenge bhwaye, ‘Eniija okubhareetera abharagi na abhatumwa. Nawe, abhaanu abhaaja okubheeta-mo abhandi, abhandi mbabhabhirimya.’ 50Ku-gayo, abhaanu bha orwibhuro runu Nyamuwanga aribhabhuusha iiguru ya amaanyinga ga abharagi bhoone kutyo bhanu ꞉bheetire, okwambira ku-bhwambiro bhwa ekyaro. 51Gayo, agambira ku-kabhaga kanu Kaayini ꞉aakomeeye Abheeri, okuyikira bhunu Jaakariya ꞉aakomeeywe mw-iyekaru, agati wa riishengero na orubhaara orutaakatiifu orwa Nyamuwanga.#11:51 Ringira Obhwambiro 4:8; 2 Amangʼana ga Nyakati 24:20-22. Ekimari, enibhabhwira ati abhaanu bha orwibhuro runu nibho abhaaja okubhuusibhwa iiguru ya amangʼana gayo goone kutyo.

52“Garibhanyoora, emwe abheeyigisha bha ebhiraagiro! Mwigariiye abhaanu anja bhaasiga okumenya gayo Nyamuwanga keenda. Emwe abheene mutakwingira, abhandi bhakaaja okwingira omubhayinga.”

53Bhunu Yeesu ꞉aasookere ayo, abheeyigisha bha ebhiraagiro bhya Musa, na Abhafarisaayo, mbaamba okumubhiiyirirwa muno na okumubhuusha amabhuusho maafumaafu, 54insonga bhanyoore iingʼana ya okumusitaakisha-ko ku-mangʼana gaaye.

Currently Selected:

Ruuka 11: kya

Highlight

Copy