Yowana 7

Yeesu kaagenda Yerusareemu mu-nsikukuru ya Ebhiwuuna

1Bhunu gayo ꞉gaawooye, Yeesu ˆnaamba okwiyindaga mbaara nyafu egya Gariraaya. ꞉Ateendere okwiyinda Ebhuyawudi, kwa okubha abhatangasha bha Abhayawudi ꞉bhaariga mbeenda okumwita. 2Kabhaga kayo, insikukuru ya Abhayawudi eya Ebhiwuuna#7:2 Insikukuru ya Abhayawudi eya Ebhiwuuna. ꞉Yaariga iri nsikukuru inu Abhayawudi ꞉bhaakoraga mu-kabhaga ka okugesa giijabhiibhu na giijeyituuni, na okusaasaama Nyamuwanga abhayaane ingubha ya omwaka ogundi. Bhunu ꞉bhaakoraga insikukuru iyo, ꞉bhaariga mbeekara mu-bhiwuuna bhinu bhyumbakirwe na amanyansi na amati. Okukora kutyo ꞉kwariga nkubhayiitya kutyo bhaajaaji waabho ꞉bhaaribhatire na okwikara ku-nsi ya orukungu myaka makumi gana. Ringira Abharaawi 23:33-36, 23:39-43; Ekiyiityo kya Ebhiraagiro 16:13-16. Abhaanu bhaafu ꞉bhaariga mbaribhata okugenda Yerusareemu okukorera amwi insikukuru iyo. ꞉yaariga irebhereeye okuyika. 3Niwe bhaawaamuwaabho Yeesu abhatooto mbamubhwira ati, “Sooka anu, ugende Ebhuyawudi, insonga abheeyigira bhaawo bhoone bharore ebhiruguusho bhinu owukora. 4Omuunu akeenda abhaanu bhamumenye, atakukora emirimu gyaye bhwiyibhise. Mmbe, raabhe awe owutura okukora amangʼana gayo, genda wiiyereshe ku-bhaanu bhoone kutyo, insonga bhakumenye.” 5Bhaawaamuwaabho ꞉bhaaikaga kutyo, kwa okubha abheene bhoone ꞉bhaariga bhatakumwikirisha. 6Niwe Yeesu ˆnaabhabhwira ati, “Akabhaga kaani aka okugenda eyo, kakyari kuyika, nawe emwe omutura okugenda kabhaga koonekoone. 7Abhaanu bha ku-kyaro kinu, bhatakutura okubhabhiiyirirwa emwe. Tari abhambiiyirirwa anye, kwa okubha enibhabhwira ati, ebhikorwa bhyebhwe ni bhibhiibhi. 8Ni emwe mugende Yerusareemu okurya insikukuru. Anye nitakugenda, kwa okubha akabhaga kaani kakyari kuyika.” 9Bhunu Yeesu ꞉aamarire okubhabhwira amangʼana gayo, ˆnaasigara eekaaye Gariraaya ayo.

10Nawe bhunu bhaawaamuwaabho ꞉bhaariga bhaamarire okugenda Yerusareemu okurya insikukuru iyo, Yeesu woone ˆnaagenda-yo. ꞉Ataagendere abhaanu mbamurora, tari ꞉aagendere muna bhwiyibhise. 11Mmbe, akabhaga ka insikukuru, abhatangasha bha Abhayawudi mbaagara Yeesu. Mbabhuusha abhaanu ati, “Omuunu wurya ari aaki?” 12Abhaanu bhaafu mbaamba okwisigiinyirira Yeesu. Abhandi mbaaika ati, “Yeesu ni muunu wa mutima mujomu,” nawe abhandi mbaaika ati, “Wuri, kaajimya abhaanu.” 13Nawe atariwo omuunu unu ꞉aariga ˆnaamwaikira abhweru, kwa okubha ꞉bhaariga mboobhaya abhatangasha bha Abhayawudi.

Yeesu keeyigisha abhaanu mw-iyekaru

14Bhunu ginsiku gya insikukuru ꞉gyariga gibhutukeene, Yeesu ˆnaagenda Yerusareemu, ˆneengira mw-ibhanja rya riiyekaru, ˆnaamba okwiyigisha abhaanu. 15Niwe abhatangasha bha Bhayawudi mbaruguurira ameeyigisho gaaye, mbaaika ati, “Omuunu unu atasomere, kana amenyeeye aaki amangʼana ganu?” 16Mmbe, Yeesu ˆnaabhabhwira ati, “Ameeyigisho ganu eniiyigisha, gatari gaani, tari agasooka ku-unu ꞉aantumire. 17Omuunu woonewoone unu keenda okukora kutyo Nyamuwanga keenda, uyo niwe kaatura okusombookerwa ati, ameeyigisho gayo agasooka ku-Nyamuwanga, amwi ati ni anye era enigaaika. 18Omuunu woonewoone unu kaaika amangʼana gaaye omwene era, owubha ˆnaagara okugungibhwa omwene, tari unu kaagara unu amutumire agungibhwe, uyo niwe owa ekimari na bhubhiibhi bhutamurimo.”

19Yeesu ˆnaagenderera okwaika ati, “Angu Musa ꞉ataabhayaaye ebhiraagiro bhya Nyamuwanga? Nawe atariwo na wumwi agati weemwe unu kaagwatira ebhiraagiro bhiyo. Ndora omwagara okunyita?” 20Abhaanu bhayo mbamusubhya ati, “Awe! Uri na ekiwi awe! Ni niga unu kaagara okukwita?” 21Yeesu ˆnaabhasubhya ati, “꞉Naakorere ekiruguusho kimwi era anu, emwe bhoone kutyo muruguura.#7:21 Ringira Yowana 5:1-15. 22Mwitegeereshe, Musa ꞉aabharagiriiye okusaara abhaana bhwemwe abharume. Itari ati okusaara kuyo ꞉kwasookereeye ku-Musa omwene, tari ꞉kwasookereeye ku-bhaajaaji waanyu abha kara.#7:22 Bhaajaaji waanyu abha kara. Abhaaikira Bhurayimu, Isaaka na Yakobho. Woori emwe omusaara abhaana bheemwe na ku-nsiku gya Insabhaato. 23Mukomeeye muno okugwatira ebhiraagiro bhya Musa ku-nsaaro gya abhaana bheemwe ku-rusuku rwa Insabhaato. Ndora woori omumbiiyirirwa kwa okubha ati ꞉naawosiishe omuunu ku-rusuku rwa Insabhaato? 24Mmbe, musige okuramurira omuunu okuriingʼaana na kutyo omurora na meeso era, tari muramurire omuunu murengeresiishe.”

Abhaanu abhabhuushaanya raabhe Yeesu niwe Kiriisitu

25Mmbe, abhaanu abhandi abha Yerusareemu ayo, mbaamba okubhuushaanya ati, “Angu, omuunu unu, atari unu abhaagara insonga bhamwite? 26Ndora kaaika ari abhweru, nawe abheene bhatakumubhwira engʼana ryoneryone! Eyitura okubha ati, abhatangasha bheeswe bhoone bhamenyere kimari ati, uyo niwe Kiriisitu? 27Omuunu unu kimenyere enu kaasookerera. Nawe bhunu Kiriisitu ariija, atariwo omuunu unu arimenya enu kaasookerera.” 28Bhunu Yeesu ꞉aariga ˆneeyigisha mw-ibhanja rya riiyekaru, ˆnaamura obhuraka ˆnaaika ati, “Kimari mummenyere, na mumenyere enu nisookereeye. Anye niteejire kwa kwenda kwani, tari unu ꞉aantumire ni wa ekimari. Na emwe mutakumumenya. 29Anye nimumenyere, kwa okubha niwe nisookere-ko. Na omwene niwe ꞉aantumire.” 30Niwe abhaanu mbeenda okumugwata, nawe ꞉ataabheeye-wo omuunu unu ꞉eemusiishe okubhoko kwaye okumugwata, kwa okubha akabhaga kaaye ꞉kaariga kakyari okuyika.

31Nawe abhaanu bhaafu bhanu ꞉bhaariga bhasangire ayo, mbamwikirisha. Abhaanu bhayo mbaaika ati, “Angu bhunu Kiriisitu ariija, arikora ebhiruguusho bhyafu okukira bhinu omuunu unu aakorere?”

Abhasirikare abhatumwa okugwata Yeesu

32Kimwi Abhafarisaayo mboongwa ganu riisangi rya abhaanu ꞉ryariga ndiisigiinyira Yeesu. Mmbe Abhafarisaayo bhayo, na abhashengesi abhakuru, mbatuma abhasirikare insonga bhagwate Yeesu. 33Niwe Yeesu ˆnaabhwira abhaanu bhayo ati, “Nikyari na kabhaga kafuyi era, niri amwi na emwe. Kakawa enisubha ku-unu ꞉aantumire. 34Murinyaagara, nawe mutarindora. Na anu niribhaga, emwe mutakutura kuuja-yo.” 35Niwe Abhayawudi mbaaikana abheene na abheene ati, “Angu, omuunu unu arigenda aaki enu eswe kitakutura okumurora? Angu, keenda okugenda ku-Bhayawudi bhanu bhanyaraganiiye mu-bhyaro ebhindi, na okwiyigisha bhanu bhatari Bhayawudi? 36Kaaika engʼanaki riyo ati, ‘Murinyaagara, nawe mutarindora. Na anu niribhaga, emwe mutakutura okuuja-yo’?”

Yeesu kaaikira okuuja kwa Mwoyo Omutaakatiifu

37Orusuku rwa okumariisha insikukuru ya Ebhiwuuna, ꞉yaariga iri nsikukuru nene. Mmbe, Yeesu ˆnaayambaara mw-ibhanja rya riiyekaru, ˆnaamura obhuraka ˆnaaika ati, “Omuunu akoongwa obhwiro, aaje ku-anye, anywe! 38Makaamo Amataakatiifu agaaika ati, muunu woonewoone unu kaanyiikirisha, ‘Giinyuji gya amanji ga obhurame giriwurura okusooka mu-mutima gwaye.’”#7:38 Ringira Isaaya 44:3, 55:1, 58:11. 39Yeesu ꞉aariga ˆnaaikira Mwoyo Omutaakatiifu, unu abhaanu bhanu abhamwikirisha bhariyaanwa. Mu-kabhaga kayo, Nyamuwanga ꞉aariga akyari okutuma Mwoyo waaye okubhaaja-ko, kwa okubha Yeesu ꞉aariga akyari okugungibhwa.

Abhaanu abhaawukana ku-nsonga ya Yeesu

40Abhaanu abhandi mw-isangi riyo, bhunu ꞉bhoonguuywe amangʼana gayo, mbaaika ati, “Kimari, omuunu unu niwe omuragi unu ekirindirira okusooka ku-Nyamuwanga.”#7:40 Ringira Ekiyiityo kya Ebhiraagiro 18:15-22. 41Abhaanu abhandi mbaaika ati, “Omuunu unu niwe Kiriisitu.” Nawe abhandi mbaaika ati, “Wuri, Kiriisitu atakutura okusookerera Gariraaya. 42Angu, Amakaamo Amataakatiifu gatakwaika ati, Kiriisitu arisooka mu-ruganda rwa omukama Dawudi?#7:42a Dawudi. Ringira riingʼana rinu mu-Mangʼana Amakomeeye. Na gatakwaika ati, ariibhurirwa Bhetereemu, mw-igunguri rinu Dawudi ꞉aariga eekaaye-mo?”#7:42b Ringira 2 Samweri 7:12-16; Miika 5:2; Mataayo 2:5-6. 43Mmbe ku-nsonga ya amangʼana gayo, riisangi rya abhaanu ndyawukana. 44Abhandi mbeenda bhamugwate, nawe ꞉ataabheeye-wo omuunu unu ꞉eemusiishe okubhoko kwaye okumugwata.

Abhatangasha bha Abhayawudi bhatakwikirisha Yeesu

45Mmbe, abhasirikare bhanu ꞉bhaariga bhatumirwe okugwata Yeesu, mbasubha ku-bhakuru bha abhashengesi na Abhafarisaayo. Abhatangasha bhayo mbabhabhuusha ati, “Ndora mutaamureeta?” 46Abhasirikare bhayo mbabhasubhya ati, “Kikyariga okuungwa omuunu owundi unu kaatura okwaika rwa kutyo omwene kaaika.” 47Kimwi abhatangasha bhayo mbabhabhuusha ati, “Emwe mwone aabhajimiishe? 48Mwarorere niga mu-bhatangasha, amwi ati mu-Bhafarisaayo unu kaamwikirisha? 49Nawe abhaanu bhanu abhamwikirisha, ni bhaanu bhanu bhatakumenya ebhiraagiro bhya Musa. Bheeyiimirwe na Nyamuwanga!”

50Niwe Niikodeemu, owumwi wa abhatangasha bha Abhafarisaayo unu ꞉aagendere ku-Yeesu rusuku rumwi iri mu-ngeta, ˆnaabhuusha abheejaabho ati, 51“Angu, ebhiraagiro bhyeswe ebhiikirisha okuramurira omuunu, akyari okwitegeeresibhwa okwamba, okumenya ganu kaakora?” 52Abheene mbamusubhya ati, “Angu, awe woone usookere Gariraaya? Genda uringire kujomu Amakaamo Amataakatiifu, owuuja okusombookerwa ati, atariwo omuragi unu kaasookerera Gariraaya.”

Currently Selected:

Yowana 7: kya

Highlight

Copy