Yowana 4

Yeesu kaaikana na omugasi Omusamaariya

1Mmbe, Yeesu ꞉oonguuywe ati Abhafarisaayo bhabhwiriiywe ati kaabhatiisha ˆnaanyoora abheeyigira bhaafu okukira Yowana. 2Nawe Yeesu omwene ꞉ataabhatiishaga, tari abheeyigira bhaaye nibho ꞉bhaariga mbabhatiisha. 3Bhunu Yeesu ꞉oonguuywe kutyo, ˆneemuka Ebhuyawudi ayo na abheeyigira bhaaye, mbasubha Gariraaya. 4Bhunu ꞉bhaariga mbagenda Gariraaya, ꞉yaariga niyendwa Yeesu ature mu-kyaro kya Samaariya. 5Mmbe, mbayika mu-musi gumwi gunu ꞉gwariga ngutogwa Sikaari, Samaariya eyo. Omusi guyo, ꞉gwariga guri ayeeyi na riisambu rinu Yakobho ꞉aariga ayaaye omwana waaye Yuusufu.#4:5 Ringira Obhwambiro 48:21-22. 6Ayo niwe ekitaaro kya Yakobho ꞉kyariga kiri. Yeesu ˆneekara ku-mbarika wa ekitaaro kiyo insonga amuunye, kwa okubha ꞉aariga ayigirwe na orugendo. Ku-kabhaga kayo riisuubha ꞉ryariga riri rya mu-ruwotoosi.

7Kimwi, omugasi wumwi Omusamaariya ˆnaaja okutaya amanji mu-kitaaro ayo. Yeesu ˆnaamubhwira ati, “Maayi, naana-ko amanji ninywe.” 8Ku-kabhaga kayo, abheeyigira bhaaye ꞉bhaariga bhagendere mu-musi agati okugura ebhyokurya. 9Mmbe, omugasi uyo ˆnaamusubhya ati, “Awe uri Muyawudi, anye niri mugasi wa Ekisamaariya. Eyibha kutiki wunsabhe amanji?” Aaikire kutyo, kwa okubha Abhayawudi ꞉bhateengiriranaga na Abhasamaariya. 10Yeesu ˆnaamusubhya ati, “Raabhe ukamenyere kinu Nyamuwanga keenda okukuyaana, na unu kaakusabha amanji ni niga, ukamusabhire omwene, na akakuyaaye amanji ga obhurame.” 11Omugasi uyo ˆnaasubhya Yeesu ati, “Raatabhugenyi, awe utari na kitayiro kya amanji, na ekitaaro kinu ni kireera, woori owuuja okunyoora aaki amanji ga obhurame gayo? 12Angu awe uri mukuru okukira jaaji Yakobho unu ꞉aakiyaaye ekitaaro kinu, omwene woone ˆnaanywaga amanji gaakyo na abhaana bhaaye, na emyandu gyaye gyone nginywa?” 13Niwe Yeesu ˆnaamusubhya ati, “Omuunu woonewoone unu kaanywa amanji ga mu-kitaaro munu, kaaja okubha na obhwiro kweki. 14Nawe omuunu unu kaanywa amanji ganu enimuyaana, ataryungwa kweki obhwiro kajaanende. Tari amanji ganu nirimuyaana, garibha rwa ekijegeje kya amanji mu-mutima gwaye, nkiwururaga obhurame bhunu bhutakuweera.”#4:14 Ringira Isaaya 58:11. 15Niwe omugasi uyo ˆnaabhwira Yeesu ati, “Raatabhugenyi, naana-ko amanji gayo, insonga nisige okuungwa obhwiro kweki, na nisige okuuja okutaya amanji kweki mu-kitaaro munu.”

16Yeesu ˆnaamusubhya ati, “Genda ubhirikire omurume waawo, uuje nawe anu.” 17Omwene ˆnaamusubhya ati, “Anye nitari na omurume.” Yeesu ˆnaamubhwira ati, “Waaika ekimari ati utari na omurume, 18kwa okubha waamarire okubha na bharume bhataanu, na omurume unu wiikaaye nawe woori, atari murume waawo. Waaika ekimari.” 19Omugasi uyo ˆnaamusubhya ati, “Raatabhugenyi, enirora ati awe uri muragi. 20Bhaajaaji ꞉bhaariga mbaramya Nyamuwanga mu-kiima kinu, nawe emwe omwaika ati owa okuramisha Nyamuwanga ni Yerusareemu.”#4:20 Ringira Ekiyiityo kya Ebhiraagiro 11:29; 2 Amangʼana ga Nyakati 6:6. 21Yeesu ˆnaamubhwira ati, “Maayi, nyiikirisha, akabhaga kariija kanu mutariramya Raata Nyamuwanga mu-kiima kinu, amwi ati Yerusareemu erya. 22Emwe Abhasamaariya omuramya kinu mutakumenya. Nawe eswe ekiramya Nyamuwanga unu kimenyere, kwa okubha omwene aryerusha abhaanu okuturira ku-Bhayawudi.#4:22 Ringira Obhwambiro 12:3. 23Nawe insa eyiija, na yaamarire okubha-wo, inu abhaanu bhanu abheenda okuramya Raata Nyamuwanga, okuramya okwenekwene, bharimuramisha mu-myoyo gyebhwe na ku-kimari. Raata Nyamuwanga kaagara abhaanu rwa bhayo bhamuramye. 24Nyamuwanga ni Mwoyo. Abhaanu bhanu abhamuramya, abheendwa bhamuramishe mu-myoyo gyebhwe na ku-kimari.” 25Omugasi uyo ˆnaabhwira Yeesu ati, “Nimenyere ati Masiya unu kaatogwa Kiriisitu ariija. Na nimenyere ati, akabhaga kanu ariija, arikituurira abhweru amangʼana goone kutyo.” 26Niwe Yeesu ˆnaamusubhya ati, “Anye, unu eniroma na awe, niwe Masiya.”

27Mmbe, akabhaga kayo, abheeyigira bhaaye mbasubha. Mbaruguura muno ati Yeesu ꞉aariga ˆnaaroma na omugasi.#4:27 Mbaruguura muno ati Yeesu ꞉aariga ˆnaaroma na omugasi. Abheeyigisha bha Bhayawudi ꞉bhaariga bhatakuroma na abhagasi bhakabha bhari abheene era, munomuuno abhagasi bhagenyi. Nawe atariwo na wumwi unu ꞉aabhuusiishe Yeesu ati, “Owumwenda-koki?” Amwi ati, “Kubhaki owuroma nawe?”

28Mmbe, omugasi uyo ˆnaasiga ayo ekituumo kyaye ekya amanji, ˆnaagenda mu-musi agati. Bhunu ꞉aayikire eyo, ˆnaabhwira abhaanu ati, 29“Kigende, murore omuunu unu aambwira amangʼana ganu nirakorere goone kutyo! Angu, eyitura okubha ati uyo niwe Kiriisitu?” 30Bhunu abhaanu ꞉bhoonguuywe amangʼana gayo, mbasooka mu-musi ayo, mbagenda enu Yeesu ꞉aariga ari.

31Bhunu abhaanu bhayo ꞉bhaariga bhakyari kuyika anu Yeesu ꞉aariga ari, abheeyigira bhaaye mbamusabha ati, “Mwiyigisha, nuurye ebhyokurya.” 32Nawe omwene ˆnaabhasubhya ati, “Anye niri na ebhyokurya bhinu emwe mutakumenya.” 33Niwe abheeyigira bhaaye mbaamba okubhuushaanya ati, “Kana, ariwo omuunu aamureetera ebhyokurya?” 34Yeesu ˆnaabhasubhya ati, “Ebhyokurya bhyani ni okukora ganu Raata unu ꞉aantumire keenda, na okukuumisha emirimu gyaye. 35Emwe munarire okwaika ati, ‘Gaasigaaye meesi gana era abhaanu bhagese.’ Nawe anye enibhabhwira ati, muringire amasambu kutyo geerere, ebhigeswa bhyabheeye-wo okugeswa. 36Omugesi kaanyoora omuyeero gwaye, na kaakumanya amatwasho ku-nsonga ya obhurame bhunu bhutakuweera. Okubha kutyo, omuyambi na omugesi, bhoone kutyo bhajomerwe amwi. 37Bhuriwo obhwaiki bhunu obhwaika ekimari ati, ‘Omuunu owumwi kaayamba, na owundi kaagesa.’ 38Anye ꞉naabhatumire okugesa ganu ꞉mutaanyankiriiye. Abhaanu abhandi ꞉bhaanyankiriiye emirimu gyone kutyo, woori emwe omunyoora omuyeero gwa emirimu gyebhwe.”

39Mmbe, Abhasamaariya bhaafu abha mu-musi gwa Sikaari ayo, ꞉bheekirisiishe Yeesu, ku-nsonga ya amangʼana ganu ꞉bhoonguuywe ku-mugasi wurya ati, “Muunu uyo aambwira amangʼana ganu nirakorere goone kutyo.” 40Mmbe, bhunu Abhasamaariya ꞉bhaayikire ku-Yeesu, mbamusabha eekare amwi nabho. Yeesu woone ˆneekara mu-musi muyo nsiku ebhiri. 41Abhaanu bhaafu muno mbeekirisha Yeesu ku-nsonga ya amangʼana ganu ꞉aariga ˆnaaika. 42Mbabhwira omugasi wurya ati, “Woori kyamwikirisha, itari ku-nsonga ya ganu waakibhwira era, tari kwa okubha kyamuungwa eswe abheene. Woori kyamenya ekimari ati, unu niwe Omwerusi wa ekyaro.”

Yeesu kaawosha omwana wa omutangasha

(Mataayo 8:5-13; Ruuka 7:1-10)

43Bhunu nsiku ebhiri ꞉gyaturire, Yeesu ˆneemuka ayo, ˆnaagenderera na orugendo rwaye okuja Gariraaya. 44Yeesu ꞉aariga aaikire ati, “Omuragi atakunyoora ekibharo mu-kyaro kya ewaabho.” 45Bhunu ꞉aayikire Gariraaya eyo, abhaanu mbamuramira, kwa okubha bhoone ꞉bhaariga bharorere amangʼana goone kutyo ganu Yeesu ꞉aariga akorere Yerusareemu mu-nsikukuru ya Paasaka. Abheene bhoone ꞉bhaariga bhariyo.

46Yeesu ˆnaagenda kweki mu-musi gwa Kana ya Gariraaya, anu ꞉aayinduuye amanji okubha iidivaayi. Kana ayo, ꞉aariga ariwo omusakisi wumwi owa omukama, asookere Kaperinawumu. Omusakisi uyo ꞉aariga ari na omumura waaye iika, ari murwaye muno. 47Bhunu omusakisi uyo ꞉oonguuywe ati Yeesu asubhire Gariraaya okusooka Ebhuyawudi, ˆnaamuuja-ko ˆnaamwisaasaama ati, agende nawe Kaperinawumu, awoshe omumura waaye, kwa okubha omumura uyo ꞉aariga ari murwaye asingire. 48Yeesu ˆnaamubhwira ati, “Emwe, mukarema okurora ebhimenyegesho na ebhiruguusho, mutariikirisha kimwi.” 49Omusakisi uyo ˆnaamubhwira ati, “Raatabhugenyi, enikusabha, kigende omumura waani akyari okufwa.” 50Nawe Yeesu ˆnaamubhwira ati, “Genda, omumura waawo aawora.” Omusakisi uyo ˆneekirisha riingʼana rinu Yeesu ꞉aamubhwiriiye, ˆneemuka okugenda ewaaye.

51Mwejo, bhunu ꞉aariga ari mu-njira, abhagaya bhaaye mbaaja okumuramira, mbamubhwira ati, omumura waaye aaworere. 52Niwe ˆnaabhabhuusha giinyinga ginu ꞉aambiiye-mo okuwora. Mbamusubhya ati, “Omuswija gumuwooye-ko iigoro mu-mwisi.” 53Mmbe, omusakisi uyo ˆnaasombookerwa ati omumura waaye aawora okwambira akabhaga kanu Yeesu aaikire ati, “Omumura waawo aawora.” Okwambira ayo omusakisi uyo, na abhaanu bhoone kutyo abha iika ewaaye, mbeekirisha Yeesu. 54Kiyo ꞉kyariga kiri kimenyegesho kya akabhiri kinu Yeesu ꞉aakorere Gariraaya, bhunu ꞉aariga asookere Ebhuyawudi.#4:54 Ringira Yowana 2:11.

Currently Selected:

Yowana 4: kya

Highlight

Copy