Ebhikorwa bhya Abhatumwa 5

Obhubheeyi bhwa Ananiya na Safira

1꞉Aariga ariwo omuunu wumwi, riisiina ryaye ˆnaatogwa Ananiya. Mukaaye ꞉aariga ˆnaatogwa Safira. Ananiya na mukaaye mbagusha riisambu ryebhwe. 2Bhunu ꞉bhaagusiishe mbabhisa-ko giiyera egindi ku-ginu ꞉bhaanyoorere. Omugasi waaye woone, ꞉aariga eekirishaanyiishe nawe okukora kutyo. Giiyera ginu ꞉gyasigaaye, Ananiya ˆnaagireeta ˆnaayaana abhatumwa bha Yeesu, ˆnaaikaga ati nigyo gyone kutyo.

3Peetero ˆnaamubhwira ati, “Awe Ananiya! Ndora Sitaani#5:3 Sitaani. Ringira riingʼana rinu mu-Mangʼana Amakomeeye. aatunga mutima gwawo, nuubhwira Mwoyo Omutaakatiifu orurimi. Waaika ati giiyera nigyo gyone kutyo, enu wiibhiikiiye egindi ku-ginu waanyoora ku-bhugusi bhwa riisambu ryawo. 4Ukyari okurigusha, toga ryariga riri ryawo? Na bhunu ugusiishe, toga giiyera gyone kutyo gyariga giri gyawo omwene? Mmbe! Kubhaki woori waaramura okukora riingʼana rwa rinu? Utaajimya eswe era, tari waaika orurimi ku-Nyamuwanga!”

5Bhunu Ananiya ꞉oonguuywe amangʼana gayo, ˆnaagwa ansi, ˆnaafwa. Na abhaanu bhoone kutyo bhanu ꞉bhoonguuywe kinu ꞉kyanyoorere Ananiya ꞉bhoobhayire muno. 6Kimwi abhamura mbaaja, mbamufwafya insanda, mbamuwurusha mbamusira iibhara, mbamubhiika eyo.

7Akabhaga muna ka nsa esatu kutya, omugasi wa Ananiya woone ˆneengira, enu atakumenya amangʼana ganu gaabha-wo. 8Peetero ˆnaamubhuusha ati, “Awe muka Ananiya angu, giiyera ginu nigyo mugusiishe riisambu ryemwe?” Safira woone ˆnaamusubhya ati, “Yee! Obhugusi bhuyo nibhwo kigusiishe!” 9Peetero ˆnaamubhwira ati, “Ndora awe na omurume waawo mwikirishaanyiishe okusaka Mwoyo Omutaakatiifu wa Raatabhugenyi Nyamuwanga? Ringira! Abhamura bhanu abhasooka okubhiika murume waawo bhaayikire ku-muryango ayo, awe woone abhakusira woori anu kutya!”

10Kimwi ayoayo, Safira woone ˆnaagwa ansi ayeeyi na amaguru ga Peetero, ˆnaafwa. Niwe abhamura mbeengira, mbanyoora Safira woone afuuye. Mbamusira iibhara, mbamubhiika ayeeyi na murume waaye. 11Amangʼana gayo ngakora riikanisa ndyubhaya muno, na abhandi bhanu ꞉bhoonguuywe amangʼana gayo bhoone mboobhaya.

Abhatumwa bha Yeesu abhakora ebhigwa bhyafu

12Okuturira ku-bhatumwa bha Yeesu, Nyamuwanga ˆnaakoraga ebhimenyegesho na ebhiruguusho bhyafu mu-bhaanu. Na abheeyigira mbabha bhamwi, omugambirano gwebhwe ngubha gumwi ku-bhoone kutyo bhanu ꞉bhaariga mbasangiraga mw-Igaragaanja rya Seremaani.#5:12 Mw-Igaragaanja rya Seremaani. Riigaragaanja riyo ꞉ryariga riri mw-iyekaru. 13Mu-bhaanu bhanu ꞉bhaariga bhatakwikirisha Yeesu, atariwo unu ꞉aasakire okubha amwi nabho. Nawe, abhaanu bhayo, ꞉bhaayaaye abheeyigira bhayo ekibharo muno. 14Nawe, abhaanu abhandi abharume na abhagasi, ꞉bheekirisiishe Raatabhugenyi Yeesu, na obhukumi bhwebhwe mbugendereraga okwiyongesha muno.

15Okuriingʼaana na ebhigwa bhya abhatumwa, abhaanu ꞉bhaariga mbasira abharwaye mbabhamaamya ku-mararo geebhwe ku-njira, insonga Peetero akatura, riirengeesi ryaye ribhakuunʼye-ko, bhawore. 16Ku-nsiku abhaanu okusooka mu-misi gya ayeeyi na Yerusareemu ꞉bhaariga mbasangira Yerusareemu ayo. Abhaanu bhayo ꞉bhaariga mbareeta abharwaye na abhaanu bhanu abhanyansibhwa na ebhiwi, na abharwaye bhayo bhoone kutyo mbawosibhwa.

Abhatumwa bha Yeesu abhanyansibhwa

17Kimwi omushengesi omukuru na abheejaabho bhoone kutyo, bhanu ꞉bhaariga bhari iamati ya Abhasadukaayo, mbakorera orwango abhatumwa bha Yeesu. 18Kimwi mbagwata abhatumwa bhayo, mbabheegarira mu-jeera. 19Nawe mu-ngeta maraayika#5:19 Maraayika. Ringira riingʼana rinu mu-Mangʼana Amakomeeye. wa Raatabhugenyi Nyamuwanga ˆneegura giinyigi gya iinyumba iyo, ˆnaabhawurusha anja. Kimwi ˆnaabhabhwira ati, 20“Mugende muyambaare mw-ibhanja rya riiyekaru, mubhwire abhaanu amangʼana goone kutyo iiguru ya obhurame obhuyaaya bhunu!” 21Abhatumwa bhayo bhunu ꞉bhoonguuywe amangʼana gayo, mbagenda mw-ibhanja rya riiyekaru bhukyeye katondo, mbaamba okwiyigisha abhaanu.

Mu-kabhaga kayo omushengesi omukuru, ˆnaaja ari amwi na abheejaabho bharya, mbabhirikira abhakuru bhoone kutyo abha Abhaijirayeeri bhanyookane muna Ebharaja Ekuru. Mbatuma abhaanu mu-jeera, insonga bhareete abhatumwa bhayo. 22Nawe bhunu ꞉bheengiiye-mo bhabhagege, mbanyoora abhatumwa bhatarimo. Mbasubha ku-bhakuru bhayo mbabhabhwira ati, 23“Kyanyoora giinyigi giigaaye kujomu, na abhariisi bhayambaaye ku-nyigi mbaangariraga. Nawe bhunu kyeegura giinyigi, kitanyoora-mo muunu woonewoone!” 24Omukuru wa abhariisi wa riiyekaru na abhashengesi abhakuru bhunu ꞉bhoonguuywe gayo, mbeetimaata, mbabhuushaanyaga ati, “Iingʼana inu eyiija okubha kutiki?”

25Kimwi omuunu wumwi ˆnaaja, ˆnaabhabhwira ati, “Munyiitegeereshe! Abhaanu bhanu mwariga mwigariiye, woori anu kutya bhari mw-ibhanja rya riiyekaru abheeyigisha abhaanu!” 26Niwe omukuru wa abhariisi na abhariisi bhaaye, mbagenda ku-bhatumwa bhayo, mbabhagwata mbabhasubhya. Nawe ꞉bhataabhagwatire managa, kwa okubha ꞉bhoobhayire ati abhaanu bhakaturire okubhabhuma na amagina.

27꞉Bheejire bhaabhayikya mw-ibharaja, mbabhayambaasha imbere wa abhakuru bhoone kutyo. Omushengesi omukuru ˆnaabhabhuusha ati, 28“Kitabhagaanyiishe ati musige okwiyigisha abhaanu iiguru ya riisiina rya omuunu uyo? Nawe omugenderera okwiyigisha abhaanu amangʼana gaaye mbarika gyone kutyo egya Yerusareemu, mwaikaga ati ni eswe ꞉kyeetiiye amaanyinga ga omuunu uyo.”

29Peetero na abhatumwa bheejaabho mbabhwira abhakuru bhayo ati, “Kiisire kyungwe aga Nyamuwanga, okukira okuungwa aga abhaanu! 30Emwe ꞉mwasungire Yeesu ku-musarabha, nawe Nyamuwanga wa bhaajaaji ˆnaamusuura. 31Yeesu unu Nyamuwanga amugungiishe ˆnaamutuura orubhaara rwaye orwa ebhuryo abhe Mutungi na Omwerusi. Na Nyamuwanga ꞉aakorere Yeesu kutyo, insonga abhaanu bha Ijirayeeri bhanuge ebhikayo bhyebhwe. Bhakamara okunuga ebhikayo, Nyamuwanga abhaabhire. 32Ni eswe kiri bharori na abhaaiki bha amangʼana gayo goone kutyo, na Mwoyo Omutaakatiifu unu Nyamuwanga ayaaye abhoongwani bhaaye bhoone kutyo.”

33Bhunu abhakuru bhayo ꞉bhoonguuywe amangʼana gayo, riisungu ndibheeta. Okwambira ayo mbaagara injira ya okwita abhatumwa bhayo. 34Mw-ibharaja ayo ꞉aariga ariwo Omufarisaayo#5:34 Omufarisaayo. Ringira riingʼana Abhafarisaayo mu-Mangʼana Amakomeeye. wumwi, riisiina ryaye ˆnaatogwa Gamariyeri. Gamariyeri uyo ꞉aariga ari mwiyigisha wa ebhiraagiro bhya Musa, na ꞉aariga ˆnaayaanwa ekibharo na abhaanu bhoone kutyo. ˆNaayambaara, ˆnaasiiga ati abhatumwa bhawuruke anja kutooto. 35Niwe ˆnaabhwira abhakuru bheejaabho ati, “Emwe abhaanu bha Ijirayeeri, mwangarire muno ku-gayo omwenda okukorera abhaanu bhanu. 36Omuyiita nsiku gitari nyafu, ꞉aabheeye-wo omuunu wumwi, riisiina ryaye Tewuda. Tewuda uyo ꞉aariga ˆneeyaana ati ni muunu mukuru, na abhaanu magana gana kutya mbaseetana nawe. Nawe ku-bhuteero, ˆneetwa, na abhaanu bhanu ꞉bhaariga mbamuseeta mbanyaragana bhoone kutyo mbawa-wo. Na amangʼana geebhwe goone kutyo ngabhurwa obhwera. 37Tewuda okuwa-wo kweki ˆnaaja-wo Yuuda Omugariraaya bhunu abhaanu ꞉bhaariga mbabharwa. Woone ˆnaabha na omureeto ku-bhaanu bhaafu mbaamba okumuseeta, nawe omwene woone bhunu ꞉eetirwe, bhanu ꞉bhaamuseetaga mbanyaragana bhoone kutyo. 38Mmbe woori enibhabhwira ati mubhasige abhaanu bhanu! Musige okubhakorera ryoneryone, kwa okubha raabhe amangʼana geebhwe na goone kutyo ganu abhakora agasooka ku-bhaanu era, agaaja okuwa-wo ageene era. 39Nawe ikabha ati guyo ni murimu gwa Nyamuwanga, mutakuuja okutura okubhayinga, itaaja okubha ati ni emwe omwagara okurwana na Nyamuwanga.”

40Abheejaabho Gamariyeri, mbeekirisha amangʼana gaaye. Mbabhirikira abhatumwa bheengire. Mbasiiga abhatumwa bhabhumwe ebhibhooko, mbabhumwa. Kimwi mbabhagaanya bhasige okubhwira abhaanu iiguru ya riisiina rya Yeesu, mbabhataatira bhagende iika.

41Abhatumwa bhayo mbasooka mw-ibharaja enu bhajomeeywega, kwa okubha nikwo kutyo Nyamuwanga abhabhariiye okujeerwa ku-nsonga ya riisiina rya Yeesu. 42Ku-nsiku mw-ibhanja rya riiyekaru na mu-misi gya abhaanu, ꞉bhataasigire okwiyigisha abhaanu na okuraasha Amangʼana Amajomu#5:42a Amangʼana Amajomu. Ringira riingʼana rinu mu-Mangʼana Amakomeeye. ati Yeesu niwe Kiriisitu.#5:42b Kiriisitu. Ringira riingʼana rinu mu-Mangʼana Amakomeeye.

Currently Selected:

Ebhikorwa bhya Abhatumwa 5: kya

Highlight

Copy