Ebhikorwa bhya Abhatumwa 4

Peetero na Yowana bhari mw-ibharaja

1Bhunu Peetero na Yowana ꞉bhaariga bhakyaraasisha abhaanu Riingʼana rya Nyamuwanga, abhashengesi,#4:1a Abhashengesi. Ringira riingʼana rinu mu-Mangʼana Amakomeeye. Abhasadukaayo,#4:1b Abhasadukaayo. Ringira riingʼana rinu mu-Mangʼana Amakomeeye. na omukuru wa abhariisi bha riiyekaru mbabhaaja-ko. 2Abhakuru bhayo ꞉bheejire bhabhiiyiiywe muno, kwa okubha Peetero na Yowana ꞉bhaariga mbaraasisha na okwiyigisha abhaanu ati, Nyamuwanga ꞉aasuurire Yeesu, na ku-nsonga iyo abhafuuye bharisuuka. 3Okuriingʼaana na amangʼana gayo, mbagwata Peetero na Yowana. Kwa okubha ꞉yaariga yaayikire keegoro, mbabheegarira mu-jeera ngeta yoone kutyo na anu bhwakyereeye. 4Nawe mu-bhaanu bhanu ꞉bhoonguuywe amangʼana ganu Peetero na Yowana ꞉bhaariga mbabhwira abhaanu, abhaafu ꞉bhaageekirisiishe. Na obhukumi bhwa abharume era, ꞉bhwariga bhubheeye muna bhiwumbi bhitaanu kutya.

5Mwejo, abhatungi, abhakaruka bha Abhayawudi, na abheeyigisha bha ebhiraagiro bhya Musa#4:5 Abhatungi, abhakaruka bha Abhayawudi, na abheeyigisha bha ebhiraagiro bhya Musa. Abhaanu bhayo nibho ꞉bhaariga bhari abhatangasha bha Abhayawudi, na nibho ꞉bhaariga bhari abharamusi bha mw-ibharaja riikuru. Ringira riingʼana Riibharaja rya Abhayawudi mu-Mangʼana Amakomeeye. mbasangira Yerusareemu ayo. 6Mw-isangi rya abhaanu muyo, ꞉aariga arimo Anaasi omukuru wa abhashengesi, Kayafa, Yowana, Arekijanda, na abhaanu bhandi abha mu-ruganda rwa abhakuru bha abhashengesi. 7Mbaragirira Peetero na Yowana bhareetwe, mbabhayambaasha agati weebhwe mw-ibharaja, mbabhabhuusha mbaaikaga ati, “Mukibhwire! Emwe omukora gayo kwa obhuturoki, na omukora kw-isiina ryaga?”

8Niwe Peetero, enu eejuuywe Mwoyo Omutaakatiifu, ˆnaabhabhwira ati, “Emwe abha ekibharo abhatangasha bha abhaanu na bhakaruka bha Ijirayeeri anu! 9Raabhe reero omukibhuusha iiguru ya amangʼana amajomu ganu unu aariga ari murema akoreeywe, na kutyo gabheeye ˆnaawora, 10mmbe, emwe na abhaanu bhoone kutyo abha Ijirayeeri mumenye ati, omuunu unu ayambaaye imbere weemwe anu, abheeye omuworu kwa obhuturo bhwa riisiina rya Yeesu Kiriisitu owa Naajareeti. Yeesu unu niwe urya emwe ꞉mweetiiye ku-musarabha, nawe Nyamuwanga ˆnaamusuura okusooka mu-bhafuuye. 11Yeesu unu niwe Amakaamo Amataakatiifu agaaikira ati,

‘Emwe abhoombaki ꞉mwaremere riigina rinu,

mwaikaga ati ni ebhiibhi,

nawe woori, riigina rinu niryo ribheeye

riigina riinene erya mu-rufuka.’#4:11 Riigina riinene erya mu-rufuka. Abhayawudi abhoombaki ꞉bhaariga mbagega riigina riinene mbarituura ku-bhukoti bhwa omusingi gwa iinyumba ndigwatirira mbaara ebhiri egya indugu, na iinyumba yoone kutyo. Ringira Ijabhuri 118:22.

12“Na bhutariwo bhwerusha ku-bhundi, kwa okubha mu-kyaro anu kiyaaywe esiina rya Yeesu Kiriisitu era, niryo eritura okwerusha abhaanu!”

13Abhakuru bhayo ꞉bheejire okurora Peetero na Yowana kutyo ꞉bhaariga bhayaarire okwaika, mbaruguura muno. ꞉Bhaariga bhamenyere ati bhaaPeetero bhatasomere, na bhwenge bhwone bhatari nabhwo. Riingʼana riyo ndikora mbamenya ati Peetero na Yowana ꞉bhaariga bhari amwi na Yeesu ku-kabhaga karya. 14Abhakuru bhayo ꞉bhaariga mbarora omuunu unu awosiibhwe ayambaaye amwi na Peetero na Yowana, ku-nsonga iyo, mbabhurwa riingʼana rya okwaika. 15Kimwi mbasiiga Peetero na Yowana bhawuruke anja wa riibharaja. Abheene mbasigara mbaaikanaga 16na okubhuushaanya ati, “Kikorereki abhaanu bhanu? Abheekasi bhoone kutyo abha Yerusareemu anu bhamenyere ati bhaakorere ekigwa kinene kinu, na eswe kitakutura okukirema. 17Nawe kibhagonye era ati, bhasige kwaika kweki na omuunu woonewoone iiguru ya riisiina rya Yeesu, insonga riingʼana rinu risige okuswerana muno mu-bhaanu.”

18Kimwi abhakuru bhayo mbabhirikira Peetero na Yowana. Mbabhagonya bhururu mbaaikaga ati, “Mutaaja okusubhira kweki okwaika, na okwiyigisha abhaanu kw-isiina rya Yeesu!” 19Nawe Peetero na Yowana mbabhabhwira ati, “Emwe abheene muramure, raabhe ni kujomu mu-meeso ga Nyamuwanga okubhoongwa emwe okukira okumuungwa omwene. 20Nawe eswe kitakutura okusiga okwaika amangʼana ganu ꞉kyarorere na okuungwa!”

21Bhunu ꞉bhaamarire okubhagonya mbabhataatira bhagende. ꞉Bhaabhataatiiye kwa okubha abhakuru bhayo ꞉bhaabhurirwe injira ya okubhayaana ebhirusho, kwa okubha abhaanu bhoone kutyo ꞉bhaariga mbakumangya Nyamuwanga muno ku-kigwa kinu ꞉bhaarorere. 22꞉Bhaariga bhamenyere ati omuunu unu awosiibhwe ꞉aariga ari murema okusooka okwibhurwa kwaye, na mu-kabhaga kayo ꞉aariga aambusiishe myaka makumi gana.

Abheeyigira bha Yeesu abhasabha Nyamuwanga abhasimbiishe

23Bhunu Peetero na Yowana ꞉bhaataatiiywe, mbasubha ku-bheeyigira bheejaabho. Mbabhatondera amangʼana goone kutyo ganu ꞉bhaabhwiriiywe na abhashengesi abhakuru, na bhakaruka bha Abhayawudi. 24Na bhunu abheejaabho ꞉bhoonguuywe amangʼana gayo, bhoone kutyo mbabha na kiina kimwi, mbaamba okusaasaama Nyamuwanga amwi mbaaikaga ati, “Ee Raatabhugenyi Nyamuwanga, awe ni awe omubhumbi. Awe ꞉waabhumbire orwire, na ekyaro, iinyanja, na ebhiinu bhyende-mo bhyone kutyo. 25Ni awe ꞉waaikiiye mu-kanwa ka jaaji Dawudi omujuuma waawo, ku-njira ya Mwoyo Omutaakatiifu ati,

‘Ndora abhaanu bha ebhyaro ebhindi bhabhiiyiiywe?

Na amayito ga abhaanu agakora ganu gatari na bhwera?

26Abhakama bha mu-kyaro na abhatungi bhasangiiye amwi,

insonga bhareme Raatabhugenyi Nyamuwanga,

na Kiriisitu waaye.’#4:25-26 Ringira Ijabhuri 2:1-2.

27“Ni kimari Yerode Antipa, Pontiyo Piraato, abhaanu bha mu-bhyaro, na amayito ga Ijirayeeri, ꞉bhaasangiiye Yeesu omujuuma waawo Omutaakatiifu mu-musi gunu, uyo niwe awe omwene ꞉waariga usorere. 28Ganu abhakuru bhayo ꞉bhaakorere, nigo awe ꞉waariga ukenere okusooka ku-bhwambiro gakoreke, na amangʼana gayo ꞉waagatangasiishe na bhuturo bhwawo. 29Woori Raatabhugenyi Nyamuwanga, ringira ebhikangyo bhyebhwe, ukisakire eswe abhajuuma bhaawo, kibhe na riibhaasi muno okuraasha riingʼana ryawo. 30Iimya okubhoko kwawo ukikore kiture okuwosha abhaanu, ukisakire okukora ebhimenyegesho na ebhiruguusho okuturira kw-isiina rya Yeesu, omujuuma waawo Omutaakatiifu!”

31Bhunu ꞉bhaamarire okusaasaama Nyamuwanga, iinyumba inu ꞉bhaariga bhasangiiye-mo niirigima. Abhaanu bhoone kutyo mbeejurwa Mwoyo Omutaakatiifu, mbaamba okuraasisha abhaanu Riingʼana rya Nyamuwanga bhari na riibhaasi muno.

Obhumwi bhwa abheeyigira

32Abheeyigira bhoone kutyo ꞉bhaariga bhari na obhumwi, na omugambirano gwebhwe ꞉gwariga guri gumwi. Atariwo omuunu unu aaikire ati ebhiinu bhyaye ni bhyaye omwene era, tari ebhiinu bhya owumwi ꞉bhyariga bhiri bhyebhwe bhoone kutyo. 33Abhatumwa bha Yeesu mbagendereraga okubhwira abhaanu amangʼana ga okusuuka kwa Raatabhugenyi Yeesu kwa amanaga maafu. Na iinema ya Nyamuwanga, ꞉yaariga iri amwi nabho nyafu muno. 34Mu-kabhaga kayo, atabheeye-wo muunu agati weebhwe unu ꞉aasuuyiiywe ekiinu, kwa okubha, bhanu ꞉bhaariga bhari na amasambu amwi ati nyumba, ꞉bhaabhigusiishe,#4:34 Agushaga owumwi, akabhaga akandi, oweejaabho ˆnaagusha, akabhaga akandi, owundi woone ˆnaagusha, na okugenderera kutyo. mbareeta giiyera, 35mbagiyaana abhatumwa. Abhatumwa mbagabhira abhaanu wumwiwumwi okuriingʼaana na obhukene bhwebhwe, ku-bhanu ꞉bhaariga bhari na obhukene.

36꞉Aariga ariwo Omuraawi wumwi riisiina ryaye Yuusufu, omwibhurwa wa ekyaro kya Kiipuro. Yuusufu unu abhatumwa bha Yeesu ꞉bhaamutogere riisiina ati Bharinaabha insonga yeende-ko ati, “Owa okukomeesha emitima.” 37Bharinaabha woone ꞉aagusiishe riisambu ryaye. Na giiyera ginu ꞉aanyoorere, ˆnaagiyaana abhatumwa bhayo.

Currently Selected:

Ebhikorwa bhya Abhatumwa 4: kya

Highlight

Copy