Late 32
32
Mawh Maisakna hanga Thupha
1Ama khialhna kimaisak a,
ama mawhna a kiselcipsak mi,
thupha ngah ahi hi.
2 Topa in mawhna a khuksak loh mi,
a lungsim sungah khemna a om lo mi, thupha ngah ahi hi.#Rom 4:7-8.
3Ka mawhna ka pulak loh ciangin,
sunthapai ka tautauna hangin
ka pumpi a thaneem hi.
4Sun le zan tawntung
gim nong piakna ka thuak a,
khuakhal nisa’ kat bangin
ka thahatna a keucip hi.
5Keima khialhnate
nangma tungah kong pulak a,
ka mawhna ka im kei hi.
“Ka khialhnate khempeuh
Topa’ tungah ka pulak ding hi,”
ka ci hi.
Tua ciangin ka mawhna nin
nong maisak hi.#2Sam 12:13.
6Tua ahih ciangin
nang hong kimuh theih lai-in
mihoih khempeuh,
nang tungah thu kingensak in.
Tua hileh tuikhang in
amaute ban lo ding hi.
7Nang pen kei a dingin
ka bukna mun na hi a,
haksatna pan kei hong kemin
hotkhiatna kicing nong pia hi.
8Na pai nading lampi lakin
ka hong hilh ding a,
ka mit tawh hong enin
thu kong hilh ding hi.
9A kamkaih tawh uk lohin a phamawh,
thutheihna a nei lo,
sakol le la bang kei in.
10Migilote in gimna tampi thuak uh a, Topa a muangte ahihleh
itna kip in a hu hi.
11Thumante aw,
Topa tungah lungdamin
kipak un.
Lungsim man mi khempeuh aw,
lungdamin awng un!
Currently Selected:
Late 32: TDB
Highlight
Share
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
