MATTHAI 20

Leenggah Lo-ah Nasemte

1“Bang hang hiam cih leh vantung ki-ukna sung omzia pen a leenggah lo-ah na a sem ding a cial dingin zing tungin a kuankhia leenggah lo nei pa tawh kibang hi. 2Ni tha ngeina ngun peek khat piak dingin a kithukim khit uh ciangin a leenggah lo-ah na a sem dingin pawlkhat a kuansak hi. 3Zingsang nai kua hun ciangin mihon omna sumbukah pai leuleu a, mi pawlkhat bangmah sem loin a mawk om a muh ciangin, 4‘No zong leenggah lo-ah va kuan un; a kilawm zah khat ka hong pia ding hi,’ a cih ciangin pawlkhat a kuan uh hi. 5Tua ciangin sun sawm le nih ciangin pawlkhat cial leuleu a, nitak nai thum ciangin pawlkhat a cial lai hi. 6Nitak nai nga ciangin mihon omna sumbukah a pai leh mi pawlkhat a mawk om mu ahih manin, ‘Bang hangin bangmah sem loin sunthapai mawk om na hi uh hiam?’ ci-in a dot ciangin 7amaute in, ‘Kuamah in nasem dingin hong cial lo hi,’ ci-in a dawng uh hi. Tua ciangin amaute kiangah, ‘No zong leenggah lo-ah va kuan un,’ a ci hi.

8“Nitak ciangin lo nei pa in a nuai-a nasem ukpa kiangah, ‘Lo khote sam inla, a kicial nunung pen a kipanin a kicial masa pente dongin a ni tha uh pia in,’ a ci hi.#Siam 19:13; Thkna 24:15. 9Nitak nai nga hunin a kipan nasemte ngun peek khat ciat kipia hi. 10A kuan masa pente, ni tha sang dingin hong pai uh ciangin adangte sangin tam ngahzaw ding ci-in amau kilamen napi-in amaute zong ngun peek khat ciat mah kipia veve hi. 11A sum a san uh ciangin lo nei pa tungah phun uh a, 12‘A nunungte in nai khat sung bek sem napi-in, sunthapai-in nisa thuakin na a sem kote tawh na kikimsak hi,’ a ci uh hi. 13Tua ciangin lo nei pa in amaute khat kiangah, ‘Lawm aw, nang ka hong khem het kei hi. Ni khat sung nasep thaman dingin ngun peek khat piak dingin na thukimsa hi lo ahi hiam? 14Hih na thalawhsa sum la inla ciah in. Nang ka hong piakzah mah, hih a kicial nunungte tungah zong ka pia nuam hi. 15Keima sum pen keima ut bangin ka zattheih ding hi lo ahi hiam? Tua ahih kei leh kei ka cit manin na heh suak ahi hiam?’ a ci hi. 16Tua ahih manin a neute lian ding a, a liante neu ding hi,” a ci hi.#Mat 19:30; Mrk 10:31; Luk 13:30.

Jesuh in A Sih ding A Thumveina Genkhol

(Mrk 10:32-34; Luk 18:31-34)

17Jerusalem khua manawhin Jesuh a paitoh laitakin, a paikawmun sawm le nihte tawh tuamtonin thu genpih a, 18“Tu-in Jerusalem khua-ah a paito ding ihi hi. Siampi liante le Thukham hilh siate tungah Mihing Tapa kiheek ding a, amaute in a si dingin thu a khenkhit uh ciangin 19Gentail mite in simmawh bawlin, satin, singlamteh tungah a khai dingin amaute khut sungah a pia ding uh hi. Ahi zongin a ni thum ni-in kihing kiksak ding hi,” ci-in a tuamin thu a hilh hi.

Nupi Khat’ Ngetna

(Mrk 10:35-45)

20Tua ciangin Zebedi tate James le Johan’ nu, a ta tegel tawh Jesuh kiangah hong pai-in a mai-ah khukdinin hong thum hi. 21Jesuh in tua nupi kiangah, “Bang deih na hi hiam?” ci-in a dot ciangin amah in, “Kumpi-in na om ciangin hih ka tate khat na taklamah, khat na veilamah a tut nadingin thu pia lecin ka ut hi,” a ci hi. 22Ahi zongin Jesuh in, “Na nget uh na thei kei uh hi. Ka thuak ding gimna note in thuakzo ding na hi uh hiam?” ci-in a dot ciangin amaute in, “Ka thuakzo ding uh hi,” a ci uh hi. 23Jesuh in amaute kiangah, “Keima thuak mah bangin note in na thuak takpi ding uh a, ahi zongin ka taklam le ka veilama tutding pen kei’ hong piaktheih hi lo hi. Ka Pa in a sehsa mite a’ ding bek ahi hi,” a ci hi.

24Nungzui dang sawmte in hih thu a zak uh ciangin hih unau nihte tungah a heh uh hi. 25Ahi zongin Jesuh in amaute sam a, “Mi a uk Gentail-te in mite tungah aana nei uh a, mi a makai Gentail-te in thuneihna tawh a ukna thu na thei uh hi. 26Ahi zongin note lakah tua bang hi lo ding hi. Note lakah a lian ahi dingte note’ nasem hi ding a,#Luk 22:25-26. 27note’ lakah a lianpen ahi dingte note’ sila hi ding hi.#Mat 23:11; Mrk 9:35; Luk 22:26. 28Mihing Tapa zong nasem nei dingin hong pai hi loin mi dangte a’ ding na semin, mi tampi tat nading a si dingin a hong pai ahih mah bangin note zong a tuaci ding na hi uh hi,” a ci hi.

Mittaw Mi Nih in Khua Mukik

(Mrk 10:46-52; Luk 18:35-43)

29Jerikho khua panin a paikhiat uh ciangin mi tampi in Jesuh a zui uh hi. 30Lampi gei-ah a tu mittaw mi nih in tua lampi tawnin Jesuh hong pai hi, ci-in a zak uh ciangin nakpitakin kiko uh a, “David’ suan Topa aw, kote hong hehpih in,” a ci uh hi. 31Mihonpite in tua mi tegel a kikoko loh nadingun a taii uh hi. Ahi zongin amaute kiko pha semsem uh a, “David’ suan Topa aw, kote hong hehpih in,” a ci teitei uh hi. 32Tua ciangin Jesuh khawlin amaute sam a, “Bang ka hong hihsak ding deih na hi uh hiam?” a cih ciangin 33amaute in, “Topa aw, ka mit uh khua hong musakkik in,” a ci uh hi. 34Jesuh in amaute hehpihhuai sa ahih manin a mit uh lawnsak a, thakhat thu-in a mit un khua a mukik pah hi. Tua ciangin amau tegel in zong Jesuh nung a zuipah uh hi.

Currently Selected:

MATTHAI 20: TDB

Highlight

Copy