MATTHAI 13

Khaici Vawhpa Thugentehna

(Mrk 4:1-9; Luk 8:4-8)

1Tua ni mahin tua inn panin Jesuh paikhia a, tuili gei-ah pai-in thuhilh dingin a tu hi. 2Ama kiimah a hong kikhawm mi tamlua ahih manin amah gunkuang tungah pai-in tu a, mihonte ahihleh tuili gei-ah a omsak hi.#Luk 5:1-3. 3Amah in thugentehna a tuamtuam zangin thu tampi hilhin a genin-ah: “Khaici vawhpa khaici vawh dingin a kuankhia hi. 4Khaici a vawh ciangin pawlkhatte lo lai lam dungah tu a, vasate hong leengin a ne uh hi. 5Pawlkhatte, suang a kitawphahna leidaina mun a tu hi. Lei thuk loin lum ahih manin a khaici popah hi. 6Ahi zongin ni hong sat ciangin ankungte in zung thuk kha zo lo uh ahih manin tua ankungnote vulin a keu hi. 7Pawlkhatte, lingbulsum a omna mun leilak tu a, lingbulsumte hong selin hong khang ahih manin ankungte a depgawp hi. 8Ahi zongin pawlkhatte, lei hoihna mun tu-in hong khang hi. Pawlkhatte in a zah zakhat, pawlkhatte in a zah sawmguk, adangte in a zah sawmthum a gah hi,” ci-in a gen khit ciangin, 9“Zak nading bil a neite in hih thu na za ta un,” ci-in Jesuh in a thugen a khum hi.

Thugentehna A Deihna

(Mrk 4:10-12; Luk 8:9-10)

10Tua ciangin nungzuite in Jesuh va naihin ama kiangah, “Bang hangin thugentehna zangin amaute tungah thu gen na hi hiam?” ci-in a dong uh hi. 11Jesuh in, “Vantung ki-ukna tawh kisai thusim note tungah hong kihilh a, ahi zongin amaute tungah kihilh lo hi. 12Bang hang hiam cih leh a neisate tungah kipia thuahin hau semsem ding a, a nei lote tung panin a neihsa sunsun nangawn kilaksak ding hi.#Mat 25:29; Mrk 4:25; Luk 8:18; 19:26. 13Amaute in enen napi-in mu thei lo uh a, ngaingai napi-in za thei lo, tel thei lo uh ahih manin thugentehna zangin thu a gen ka hi hi. 14Kamsang Isaiah’ thugenkholhna, hih thu tawh kisai-ah amau a dingin tung taktak hi. Tua a genna-ah,

‘Na zakzak uh hangin na tel kei ding uh a,

na etet uh hangin na mu kei ding uh hi.

15Hih mite’ lungsim mawl mahmah hi;

a bil uh bingsak uh a, a mit uh a si uh hi.

Tua bang hi kei le-uh, a mit uh tawh mu-in,

a bil uh tawh za-in,

a lungsim un tel ding a,

kei lamah amaute hong kihei-in,

amaute ka damsak ding hi,

ci-in Pasian in gen hi,’

ci-in kigelh hi.#Isa 6:9-10. 16Ahi zongin note’ mit in mu-in na bil un za ahih manin a hampha mahmah na hi uh hi. 17Ahi taktakin note kiangah kong genin-ah: Kamsangte le Pasian’ mi tampite in note’ muhte munuam mahmah napi-in mu lo uh a, note’ zakte zanuam mahmah napi-in za lo uh hi.#Luk 10:23-24.

Jesuh in Khaici Vawhpa Thugentehna Telgen

(Mrk 4:13-20; Luk 8:11-15)

18“Tua ahih ciangin tu-in khaici vawhpa thugentehna thu na ngai un. 19Mi pawlkhat in Pasian’ hong ukna tawh kisai a lungdamhuai thu za napi-in a thu theitel lo uh ahih manin Dawimangpa hong pai-in amau lungsim sunga a kivawh thu a lakkhiatsak hi. Hih bangte pen lolai lampi dung a tu khaicite tawh kibang hi. 20Suang kitawphah leilak a tu khaicite pen Pasian’ thu a zak ciangun lungdam takin a sangpahte a cihnopna ahi hi. 21Ahi zongin amaute sungah thuktum zo lo ahih manin tawlkhat sung bek um uh hi. Tua ahih manin Pasian’ thu hangin haksatna ahi a, bawlsiatna ahi zongin khat peuhpeuh a tun ciangin tawpkikpah uh hi. 22Lingbulsum omna leilakah a tu khaicite pen Pasian’ thu za napi-in amau nuntakna sung uhah leitung lunghihmawhna le hauh nopnate in Pasian’ thu vuknelh ahih manin bangmah a suakkhia zo lote a cihnopna ahi hi. 23Lei hoihna munah a tu khaicite pen Pasian’ thu a zak ciangin a tel mite a cihnopna ahi hi. Tua bang mite a dingin Pasian’ thu in man nei a, pawlkhatte a dingin a zah zakhat, pawlkhatte a dingin a zah sawmguk, pawlkhatte a dingin a zah sawmthumin Pasian’ thu in man a nei hi,” a ci hi.

Taang Lakah Tahum

24Tua ciangin Jesuh in thugentehna dang khat gen a, “Vantung ki-ukna pen bang tawh kibang hiam cih leh: A lo-ah taangci hoih a vawhpa tawh kibang hi. 25Ahi zongin zan khat, mite a ihmut kalun galte khat hong pai-in taang lakah tahum tang vawhin a paikhia hi. 26Taangte hong po-in a vuih hun ding ciangin tahum kungte zong hong lianin hong kilang hi. 27Tua ciangin lonei pa’ nasemte ama kiangah hong pai-in, ‘Na lolai-ah na vawh khaici pen taangci hoihte ahi hi. Hih tahumte koi pana hong piang ahi hiam?’ a cih ciangin 28amah in, ‘Galte’ vawh ahi hi,’ ci-in a dawng hi. A nasemte in ama kiangah, ‘Tua ahihleh kote va kuanin ka va bot ding uh hiam?’ ci-in a dong uh hi. 29Ahi zongin amah in, ‘Va bot kei un. Tahumte bot le-uhcin taang tawh na botkhawm kha ding uh hi. 30Anlak hun mateng a nam nihin tuaci om phot hen. Anlak hun ciangin anlate kiangah, “Tahumte bot masa unla, meikhukah khul dingin lomhen un. Ahi zongin taangte la-in ka ansal-ah hong sung un,” ka ci ding hi,’ ci hi,” a ci hi.

Ankam Tang Thugentehna

(Mrk 4:30-32; Luk 13:18-19)

31Tua ciangin Jesuh in thugentehna dang khat gen leuleu a, “Vantung ki-ukna pen bang tawh kibang hiam cih leh, mi khat in a lo sungah a vawh ankam tang tawh kibang hi. 32Khaici khempeuh lak panin ankam tang a neupen ahi hi. Ahi zongin a khankhit ciangin ankung lakah a golpen suak ahih manin vasate in a hiang tungah bu a tomtheihna zah ding ciang hong suak thei hi,” a ci hi.

Silngo Thugentehna

(Luk 13:20-21)

33Tua ciangin thugentehna khat mah gen leuleu a, “Vantung ki-ukna pen bang tawh kibang hiam cih leh, nupi khat in annel seu thum dim meek manin silngo sawh a, a vekpi-in silngo in zelin a pawmsak tawh kibang hi,” a ci hi.

Jesuh in Thugentehna A Zatna

(Mrk 4:33-34)

34Jesuh in hih thute khempeuh, thugentehna vive zangin thu hilh a, thugentehna zang loin thu khat beek a gen kei hi. 35Hih bangin thugentehna a zatna pen kamsang Isaiah in,

“Thugentehna zangin

thu ka gen ding a,

leitung piancil a kipan

a kithei lo thute ka gen ding hi,”

ci-in a genkholhsakna thu a tun nading ahi hi.#La 78:2.

Jesuh in Taang Lakah Tahum Thugentehna Telgen

36Tua ciangin mihonte lak panin Jesuh paikhia-in inn sungah a lut hi. A nungzuite ama kiangah hong pai uh a, “Lolai-a om Tahum Thugentehna a khiatna hong gen in,” a cih uh ciangin 37Jesuh in, “Taangci hoih a vawhpa pen Mihing Tapa ahi hi. 38Lolai pen leitung hi a, taangci hoih i cih pen Pasian’ ukna sungah a om mite ahi uh hi. Tahumte pen Gilopa tawh a kipawl mite hi a, 39tahum tang a vawh gal pa pen Dawimangpa ahi hi. Anlak hun pen leitung bei nading hun hi a, anla nasemte pen vantung mite ahi hi. 40Tahumte kikaikhawmin meikhuk sungah a kikhultum mah bangin leitung bei hun ciangin tua bangmahin kihih ding hi. 41Mihing Tapa in a vantung mite hong sawl ding a, ama ukna sungah a om migilote le mi a mawh nadingin a bawl mi khempeuh kaikhawmin 42meikhukpi sungah tua bang mite lawn ding uh a, tua lai-ah amaute kapin a hagawi ding uh hi. 43Tua hun ciangin Pasian’ mite ahihleh a Pa uh Ukna sungah ni bangin a taang ding uh hi. Zak nading bil a neite in hih thu na za ta un.

A Kiseel Sum

44“Vantung ki-ukna pen lolai-ah a kiseel sum tawh kibang hi. Mi khat in a muh ciangin limtakin a seelpha hi. Amah lungdam mahmahin a inn-ah ciahpah a, a neih khempeuh a zuak khit ciangin tua lo a lei hi.

Kep Hoihpente

45“Vantung ki-ukna pen sumbawlpa in a zon kep hoihpente tawh zong kibang hi. 46Sumbawlpa in a manpha diak pawl kep khat a muh ciangin ciahpahin a neih khempeuh a zuak khit ciangin tua kep a lei hi.

Ngen tawh Thugentehna

47“Vantung ki-ukna pen tui sungah kipaai-in ngasa namkim a awkna ngen tawh zong kibang hi. 48Ngasa tampi tak a awk ciangin ngabengte in tui gei-ah a ngen uh kaikhia-in tusuk uh a, nektheih ding ngasate, paipel sungah guangin, nektheih loh ding ngasate, a lawnkhia uh hi. 49Leitung hun bei ciangin zong tua bangmah hi ding hi. Vantung mite hong pai-in mihoihte lak panin migilote lakhia-in, 50meikhukpi sungah tua migilote a khul ding uh hi. Tua lai-ah kapin a hagawi ding uh hi.

Sumkhol A Lui le A Thak

51“Hih ka thugente khempeuh a khiatna na thei uh hiam?” ci-in Jesuh in a dot ciangin amaute in, “Ka thei uh hi,” ci-in a dawng uh hi. 52Tua ciangin Jesuh in amaute kiangah, “Vantung ki-ukna sungah a hong lut Thukham hilh siate khempeuh pen, a sumkholna panin a thak le a lui, a ut utin a lakhia thei ziauziau sumnei pa tawh kibang uh hi,” a ci hi.

Nazareth khua-ah Jesuh Kisang lo

(Mrk 6:1-6; Luk 4:16-30)

53Jesuh in hih thugentehnate a gen khit ciangin tua lai panin paikhia-in 54ama khua-ah pai a, kikhopna inn sungah thu a hilh hi. Ama thugen a za mite in lamdangsa mahmah uh a, “Hih mipa in hih bang pilna koilai panin ngah a, bang hangin hih bang na lamdangte bawlthei ahi hiam? 55Khutsiam pa’ tapa hi lel a, a nu zong Mary a kici nu hilel hi lo ahi hiam? Ama naute zong James, Josef, Simon le Judas hi lo ahi uh hiam? 56A nau numeite zong hih lai mah a om hi lo ahi uh hiam? Tua bang hinapi-in hih mipa in koi lai panin hih bang thuteng ngahthei ahi hiam?” a ci uh hi. 57Tua ahih manin amah a sangzo kei uh hi. Tua ciangin Jesuh in amaute kiangah, “Kamsang khat pen, ama khua, ama behte, le ama innsung longal-ah kizahtakin pahtawina a ngah hi,” a ci hi.#Joh 4:44. 58Nazareth khuamite in amah a up lohna hangin tua khua-ah nalamdang tampi a bawl kei hi.

Currently Selected:

MATTHAI 13: TDB

Highlight

Copy