HEBRU 5
5
1Siampi lianpen ahi peuhpeuh mipa pen a mite’ mawhna hangin Pasian’ tungah biakna le letsong a piaksak dingin ama mipihte lak panin kiteelin nasep a kiguan’ ahi hi. 2Amah zong lam tampi-ah a ginalo thei mi mah ahih manin thu thei lo mite le a khial mite tungah lungnem takin na sem thei hi. 3Amah zong miginalo mi mah ahih manin mite’ mawhna hangin biakna a pia hi bek loin ama mawhna mahmah hangin zong biakna a pia ahi hi.#Siam 9:7. 4Tua bangin pahtawina a nei siampi lianpen nasep pen a sem dingte amau utthu tawh a kisehtawm mawk hi lo hi; siampi lianpen a sem dingin amahmah a kisehtawm hi lo a, Aaron a kisap mah bangin Pasian in amah a seh ahi hi.#Pai 28:1.
5Tua mah bangin Khrih zong, amahmah in siampi lianpen nasep a semtawm mawk hi loin Pasian in ama kiangah,
“Nang, ka Tapa na hi hi.
Tuni-in na Pa ka suak hi,”
na ci hi.#La 2:7. 6Mun dang khatah zong,
“Melkhizedek siampi gui zui-in
a tawntungin siampi na hi ding hi,”
na ci lai hi.#La 110:4.
7Leitungah mihingin Jesuh a omlai-in sihna panin amah a honkhia thei ding Pasian tungah thu ngenin khitui naptui tawh thumin na kiko hi.#Mat 26:36-46; Mrk 14:32-42; Luk 22:39-46. 8Amah, Pasian’ Tapa hinapi-in a thuakna tawh thumang ahih theih nading a na kisin hi. 9Tua bangin a cingtaak mi a suahkhit ciangin ama thu a mang mite khempeuh a dingin tawntung hotkhiatna a kipatna hong suak a, 10Melkhizedek gui zui-in siampi lianpen dingin Pasian in a bawl hi.
Tawpkik loh ding Hilhkholhna
11Hih thu tawh kisai-in i gen ding tampi a om hangin note in thu thei hak mahmah na hih manun i gentel theih nading haksa hi. 12Tu-in note pen midang a hilh dingin sia na suahtheih ding uh hun hikhin napi-in note mahmah pen Pasian’ thu a bulpite hilh ding na kisam lai uh hi. Antak nethei nai loin nawi bek a nethei lai na hi uh hi. 13Nawi bek a ne laite pen naungek ahih manin a man le a man lo thu bangmah phawkthei nai lo uh hi.#1Kor 3:2. 14Ahi zongin antak i cih pen a sia le a pha a khenthei, a lim le a lim lo a khentheita, a khangham khinsa mite a’ ding ahi hi.
Currently Selected:
HEBRU 5: TDB
Highlight
Share
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
