DANIEL 7

Daniel in Ganhing Li Maangin Mu

1Belshazzar, Babylon kumpi a suahzawh a kum masa kumin keimah Daniel in mang khat ka man a, zanin maang ka mu hi. Ka mangmat lai-in ka gelh a, tua zan a ka maangmuhnate ka ciaptehna hih bang ahi hi: 2Mun khempeuh panin huihpi hong nungin tuipi tung a seemgawp hi. 3Tua ciangin tuipi sung panin a kibang lo sa golpi li hong pusuakto uh hi.#Mang 13:1; 17:8. 4A masa pen humpinelkai tawh kibang a, ahi zongin muvanlai kha tawh a kibang kha a nei hi. Ka et laitakin a kha tegel a hong kibotkhia hi. Leitung panin tua ganhing kidomkaang to-in, mihing bangin a khe nihin kidingsak a, mihing lungsim ama tungah a kipia hi. 5Tua ciangin a nihna sapi vompi tawh a kibang khat ka mu hi. A nunglam khe tawh dingin a ha tawh nakguh thum pet a, “Na duh zahzah sa tampi ne in,” cihna aw khat a hong ging hi. 6Ka et lai leh kamkei tawh a kibang sapi dang khat ka mu hi. A nungzangah vasa kha tawh a kibang kha li a nei hi. Tua sapi in lutang li nei a, ukna aana ama tungah a kipia hi.#Mang 13:2. 7Ka et lai leh sapi lina ka mu hi. Tua sapi kihtakhuai mahmah a, lipkhaphuai-in a thupi mahmah hi. Amah in a gol mahmah sik-ha a nei hi. Amah in nene-in a nek valteng a khe tawh a tuancilgawp hi. Sapi dangte tawh kibang loin amah in ki sawm a nei hi.#Mang 12:3; 13:1. 8Tua kite ka et laitakin tuate’ lakah adang ki neu khat hong po a, a omsa sung pan ki thumte a botkhia hi. Tua ki’ tungah mihing mittang tawh a kibang mittang le kam om a, kiphatsakna kam tampi a pau hi.#Mang 13:5-6.

9Ka et laitakin kumpi tokhomte a hong kikoih hi. A nungta tawntung mipa tua tokhomte khat tungah a tu hi. A puante vuk bangin ngo a, a samte tuumul hoih tawh a kibang hi. A tokhom pen meikuang leengpei tungah kinga-in mei kuang zuazua a,#Mang 20:4; 1:14. 10tua sung panin meikuang a hong leengkhia niloh hi. Ama nasem ding mihing tul za tampi om a, a mai-ah mihing tul za sawm tampi a ding uh hi. Thukhenna ding hun kipan a, laibute a kiphen hi.#Mang 5:11; 20:12.

11Ka et laitakin tua ki neu in kiphatsakna kamsia a pau ka za hi. Ka et lailai leh tua sapi lian a lina kithat a, a pumpi meikuang sungah kikhulin a kisusia hi. 12Sapi dangte ahihleh a vangliatna uh kilak khiatsak a, ahih hangin a nuntak laina ding uh hun ciangtan khat a kipia hi. 13Zan ka maangmuh hun sungin ka khuadak leh mihing tawh a kibang mi khat meii tungah a hong pai ka mu hi. A nungta tawntung mipa kiangah pai-in, ama kiangah a kipia hi.#Mat 24:30; 26:64; Mrk 13:26; 14:62; Luk 21:27; Mang 1:7,13; 14:14. 14Amah in vangliatna, minthanna, le kumpi za ngah ahih manin minam kimte, minam tuamtuamte, paunam tuamtuamte khempeuh in ama na a sem ding uh ahi hi. Amah in a tawntungin uk ding a, a kumpi gam a bei ngei kei ding hi.#Mang 11:15.

15Ka maangmuhnate in hong linglawng sakin a hong patausak mahmah hi. 16Ka pama ding mite khat kiangah pai-in hihte khempeuh a khiatna hong hilh in, ci-in ka thum hi. Tua ciangin amah in a khiatna a hong hilh hi. 17“Hih sapi lite pen leitung panin a hong khangkhia ding kumpi gam li ahi hi. 18Ahih hangin a Lianpen Pasian’ mite in kumpi za ngah ding uh a, a tawntungin a nei paisuak ding uh hi,” hong ci hi.#Mang 22:5.

19Tua ciangin a dangte tawh a kibang lo a kihtakhuai sik-ha le sumngo khecin a nei sapi lina thu ka thei nuam hi. Amah in nene-in na khempeuh tuancilgawp hi. 20Tua ciangin a lu tungah ki sawm le, a nung ciangin ki khat hong po a, a omsa kite sung pan ki thum a kitanna thu ka thei nuam hi. Amah in mittang le kiphatsakna kamsia pauna ding kam a nei hi. A dangte sangin nakpitakin kihtakhuai zaw hi. 21Ka et laitakin, tua ki in Pasian’ mite galin do a, amaute a zogawp hi.#Mang 13:7. 22Tua ciangin a nungta tawntung mipa hong pai a, a Lianpen Pasian’ mite a’ ding a hoih thukhenna a hong gen hi. Pasian’ mite in kumpi za a ngahna ding uh hun a hong tung hi.#Mang 20:4.

23Hih bangin hilhtelna kei a hong kipia hi: “Sapi lina pen leitung a hong om ding kumpi gam lina ding hi a, kumpi gamdangte tawh kilamdang mahmah ding hi. Amah in leitung buppi valhtum ding a, tuancil gawpin a sukham ding hi.

24“Ki sawmte pen tua kumpi gam sung panin a hong piang ding kumpi sawmte ahi uh hi. Tua ciangin kumpi dang khat hong piang leuleu ding a, amah in a omsate tawh a kilamdang mahmahin kumpi thum a nuaisiah ding hi.#Mang 17:12.

25“Amah in a Lianpen Pasian langpangin thu gen ding a, Pasian’ mite a bawlsia ding hi. Amah in amaute’ biakna tawh kipawl thukhamte le pawi bawlna hunte kheelsak ding hanciam ding a, ama khut sungah kum thum le alang sung Pasian’ mite a om ding uh hi.#Mang 12:14; 13:5-6.

26“Tua ciangin thukhenna hun hong kipan ding a, ama vangliatna lakkhiat sakin, amah a kisusia maimang ding hi.

27“Hih leitung kumpi gam, vangliatna, le liatna khempeuh a Lianpen Pasian’ mite tungah a kipia ding hi. Amau’ kumpi za cikmah hunin bei ngei lo ding a, leitung ukna za a nei khempeuhte in a thu uh mangin amaute’ na a sem ding uh hi,” hong ci hi.#Mang 20:4; 22:5.

28Hih tangthu a beina hita hi. Hih thu ka ngaihsut ciangin keimah Daniel ka lau mahmah a, ka mel a daanggawp hi. Ahih hangin hih thu keima lungsim sung bekah ka koih hi.

Currently Selected:

DANIEL 7: TDB

Highlight

Copy