SAWLTAK 7

Stefen A Kihutna

1Tua ciangin siampi lianpen pa in Stefen kiangah, “Tu-a amaute’ gen bang takpi mah ahi hiam?” ci-in a dot ciangin 2Stefen in, “Ute pate aw, ka thugen hong ngai un. I pupi Abraham, Haran khua-ah a tenma, Mesopotamia gamah a om lai-in, ama kiangah a minthang Pasian kilang a, 3‘Na gam na lei, na beh na phungte kiang panin paikhia inla, nangma tungah kong lah ding gamah pai in,’ ci hi.#Pian 12:1. 4Amah zong Khaldea gam panin paikhia-in Haran khua-ah teng hi. A pa a sih khit ciangin Pasian in tu-a na tenna uh hih gamah amah na lalsak leuleu hi.#Pian 11:31; 12:4. 5Pasian in Abraham tungah ama aituam dingin leitang khutpeek cia nangawn pia lo napi-in, amah le a suan a khakte tungah hih gam a piak nading thu a ciam hi. Pasian in tua thuciamna a piak laitakin Abraham in ta nei nai lo hi.#Pian 12:7; 13:15; 15:18; 17:8. 6Tua bang hinapi-in, Pasian in Abraham kiangah, ‘Na suan na khakte gam dangah tengin salin om ding uh a, kum zali sung nakpitakin gimna thuak ding uh hi.#Pian 15:13-14. 7Ahi zongin sila-in a nei gam mite tungah thu ka khen ding a, na suan na khakte tua gam panin paikhia-in hih lai gamah kei hong bia ding uh hi,’ ci hi.#Pai 3:12. 8Tua ciangin Pasian in Abraham tungah kiciamna limin vun-atna ngeina na pia hi. Tua ahih manin Abraham in a tapa Isaac a suahzawh nipikal khat khit ciangin a vun at a, Isaac in a tapa Jakob’ vun at leuleu a, Jakob in eite’ pupite ahi a tapa sawm le nihte’ vun na at leuleu hi.#Pian 17:10-14; 21:2-4; 25:26; 29:31-35:18.

9“I pupi dangte in Josef na haza uh a, mi tungah na zuakin, a leite in Egypt gamah sal dingin a na zuaksawn uh hi. Ahi zongin Pasian in i pupi Josef na huh a,#Pian 37:11,28; 39:2,21. 10a thuakna khempeuh panin na honkhia hi. Egypt kumpipa Faro’ mai-ah Josef a tun ciangin Pasian in ama tungah pilna le a deihhuai gamtat hoih na guan hi. Tua ahih manin Faro in ama khutnuai-ah a gam a uksawn ding le a kumpi innsung khempeuh a van dingin a koih hi.#Pian 41:39-41. 11Tua ciangin Egypt gam le Kanaan gam khempeuhah kialpi tung a, mi khempeuh in haksatna thuak uh ahih manin i pupite in zong annek ding muzo nawn lo uh hi.#Pian 42:1-2. 12Tua ahih manin Egypt gamah an om hi, ci-in Jakob in thu a zak ciangin i pupite ahi a tapate a khatveina na na paisak hi. 13A nihveina a pai uh ciangin a sanggamte tungah i pupi Josef na kipulak a, tua hun a kipanin Faro in zong Josef innkuansung thu na thei hi.#Pian 45:1,16. 14Tua ciangin Josef in a pa Jakob kiangah mi sawl a, amah a kipan a innkuan mi khempeuh Egypt-ah a pai nadingun a gensak hi. Tua hun laitakin Jakob innkuan mi sawmsagih le nga pha uh hi.#Pian 45:9-10,17-18; 46:27. 15Tua ahih manin Jakob zong Egypt gamah pai a, amah a kipan i pupite khempeuh tua gamah a si uh hi.#Pian 46:1-7; 49:33. 16Amau’ luanghawmte, Shekhem khua-ah kipua a, Abraham in Hamor-te beh tung panin han dingin sum tawh a lei leitangah kiphum hi.#Pian 23:3-16; 33:19; 50:7-13; Josh 24:32.

17“Pasian in Abraham tungah a thuciamna a tunsak ding a nai kuan ciangin Egypt gamah ei mite tampi tak na pha ta uh hi. 18A tawpna-ah Josef a thei lo kumpi dang khat, Egypt gam sung a uk dingin hong kipan hi.#Pai 1:7-8. 19I mipihte na khemgawpin na khelbawl a, a ta ngeekte uh a sih nadingin inn panin mun dangah a koihkhia sak hi.#Pai 1:10-11,22. 20Hih hunin naungek melhoih mahmah khat na suak hi. Inn-ah kha thum sung kikem a,#Pai 2:2. 21inn panin a kikoihkhiat ciangin Faro’ tanu in a ta dingin la a, ama tapa bang teekteek mahin bawlin a khansuah hi.#Pai 2:3-10. 22Egypt gam sunga pilna om khempeuh ama tungah kihilh a, thugenna le nasepna-ah milian mahmah khat a suak hi.

23“Amah kum sawmli a phak ciangin Israel’ suan a mipihte lakah painopna lungsim a nei hi.#Pai 2:11-15. 24Tua bangin a mipihte lakah a va pai ciangin Egypt mite khat in a Israel mipihte khat a bawlsiatna mu a, a mipih pa a hutna-in Egypt mipa a satlum hi. 25Amah pen eite hong honkhia dingin Pasian in a zat ding mipa hi, ci-in a mipihte in a thei ding sa a, ahi zongin a mipihte in na thei lo uh hi. 26A zing ciangin Israel mi nih a kilai mu leuleu a, amaute a phelh dingin kipanin, ‘Lawmte aw, minam khat hi lo na hi uh hiam? Bang hangin khatlekhat tuaci kibawl na hi uh hiam?’ ci hi. 27A lawmpa a bawlsia pa in Moses sawnkhia-in, ‘Kote a hong uk ding le thu a hong khen dingin kua in nang hong koih ahi hiam? 28Zan-a Egypt mipa na thah bangin kei zong a hong thatnuam na hi hiam?’ a na ci hi. 29Moses in hih thu a zak ciangin Egypt gam panin taikhia-in Midian gamah ten ding kipan a, tua gamah tapa nih a nei hi.#Pai 18:3-4.

30“Tua gamah kum sawmli a ten khit ciangin, Sinai Mual tung gamlakah sawlpang lak a meikuang sungah vantungmi khat ama kiangah hong kilang hi. 31Moses in a muh ciangin lamdangsa a, a nai takin a muhtheih nadingin sawlpang kuang kiangah a va pai hi. Ahi zongin Topa’ awging za a, 32‘Kei pen na pu na pate uh ahi Abraham, Isaac, le Jakob-te’ Pasian ka hi hi,’ a na ci hi. Moses zong lau-in linggawp a, en ngam lo hi. 33Tua ciangin Topa in Moses kiangah, ‘Na dinna mun pen a siangtho leitang ahih manin na khedap suah in. 34Ka mite in Egypt gamah bawlsiatna a thuaknate teltakin ka mukhin hi. Amaute’ tauna awging ka za a, amaute a honkhia dingin a hong paisuk ka hi hi. Hih lai-ah hong pai in; Egypt gamah nang ka hong paisak ding hi,’ na ci hi.#Pai 3:1-10.

35“Moses pen Israel mite in deih loin, ‘Kote a hong uk ding le thu a hong khen dingin kua in hong koih ahi hiam?’ a cih pa uh ahi hi. Ahi zongin Moses pen sawlpang kuang sung pan ama kiangah a kilang vantungmi’ huhna tawh ukpa le honkhia pa ahi dingin Pasian in a sawl pa ahi hi.#Pai 2:14. 36Amah in Egypt gam le San Tuipi-ah lim le na lamdangte bawlin, Egypt gam panin Israel mite paikhiatpih a, gamlakah kum sawmli sung amaute a makaih hi.#Pai 7:3; 14:21; Gam 14:33. 37Hih Moses pen Israel mite tungah, ‘Pasian in kei hong sawl mah bangin, i mipihte sung mah panin note a’ ding kamsang khat hong sawl ding hi,’ a ci pa ahi hi.#Thkna 8:15,18. 38Amah pen Israel mite tawh gamlakah a om pa hi a, Sinai Mual tunga ama kiangah thu a gen vantungmi le i pute tawh a kikhawlpa ahi hi. Eite tungah hong gensawn dingin Pasian kiang panin a tul ngei lo thu a ngah ahi hi.#Pai 19:1-20:17; Thkna 5:1-33.

39“Ahi zongin i pute in ama thu na mang nuam loin, amah na nawlkhin uh a, Egypt gamah ciahkik nopna lungsim na nei uh hi. 40Tua ahih manin amaute in Aaron kiangah, ‘Egypt gam panin eite a hong paikhiatpih tua Moses tungah bang thu piang hiam cih thei lo ihih manin, eite’ mai-ah i paisak ding milim pasian pawlkhat hong bawlsak in,’ ci uh hi.#Pai 32:1. 41Tua ahih manin amaute in bawngno tawh a kibang lim khat bawl uh a, ganhing tawh tua milim bia-in, amaute’ bawltawm pasian hangin lungdamin pawi a na bawl uh hi.#Pai 32:2-6. 42-43Tua ahih manin kamsangte laibu sungah,

‘Israel mite aw,

gamlakah kum sawmli sung,

gan go-in biakna na piakte uh

kei tunga nong piak uh hi lo hi.

Note in na puak uh puanbuk pen

Molok pasian milim puanbuk le

note’ aksi pasian

Refan’ puanbuk ahi hi.

Tuate pen na biak dingun

note’ bawltawm milim ahih manin

Babylon khuapi khen pekah

salin ka hong paisak ding hi,’

ci-in a kigelh mah bangin Pasian in amaute nungngat a, vana om aksite a bia dingin amaute a sawlkhia hi.#Amos 5:25-27.

44“Gamlakah a omlai-un i pute in Pasian’ ompihna puanbuk nei uh a, Pasian in Moses tungah a gensa, a lim ding a lahsa bang teekteekin a kibawl ahi hi.#Pai 25:9,40. 45Tua khit ciangin i pute in amau’ pate tung panin a ngah uh tua puanbuk pen amau’ ten nading gam a la dingin a kuan uh ciangin na pua uh a, Pasian in amaute’ mai-ah tua gam mite hawlkhiatsak ahih manin tua gam a luah uh ciangin a puanbuk zong a na tunpih uh hi. Tua ahih manin David’ hun ciang dong tua puanbuk na om hi.#Josh 3:14-17. 46David in Pasian’ maipha ngah ahih manin, Jakob Pasian a dingin biakinn khat a vaihawm sak nadingin Pasian kiangah a ngen hi.#2Sam 7:1-16; 1Khang 17:1-14. 47Ahi zongin Pasian a dingin biakinn a lamsak pen David hi loin a tapa Solomon ahi hi.#1Kum 6:1-38; 2Khang 3:1-17. 48-50Ahi zongin kamsangpa in,

‘Topa in hih bangin ci hi:

Vantung pen keima tokhom hi a,

leitung zong

ka khe ngakna mun ahi hi.

Kei a’ ding bang biakinn

hong lamsak thei ding a,

ka om nading

koi lai mun hi thei ding ahi hiam?

Hih nate khempeuh

keima bawlsa hi lo ahi hiam, ci hi,’

ci-in a gen mah bangin mihingte’ lamsa inn sungah a Lianpen Pasian a teng hi lo hi.#Isa 66:1-2.

51“Na lungsim uh khauh mahmah a, lawki lungsim paii-in, Pasian’ thu-ah bilngong na bang uh hi. I pu i pate mah bangin Kha Siangtho thu na mang nuam kei uh hi.#Isa 63:10. 52I pu i pate in kamsang a bawlsiat loh khat beek om lo hi. Pasian’ deihna bangin a gamta a Nasempa a hong pai nading thu a genkhol Pasian’ kamtaite na that uh a, tu-in note in tua nasempa lehhekin na that leuleu uh hi. 53Note in vantungmi tungtawnin Pasian’ hong piak thukham ngah napi-in na mang nuam kei uh hi,” a ci hi.

Suang tawh Stefen a Kidenna

54A kikhawm uliante in Stefen’ thugen a zak uh ciangin nakpitakin heh uh a, a ha uh gawisan uh hi. 55Ahi zongin Stefen ahihleh Kha Siangtho tawh kidimin vantung lam ento a, Pasian’ minthanna vang le Pasian’ taklamah Jesuh a ding mu ahih manin, 56“En un! Vantung kihong a, Pasian’ taklamah Mihing Tapa a ding ka mu hi,” a ci hi. 57Ahi zongin amaute in a bil uh humsanin nakpitakin kiko-in Stefen bawhhuan uh a, 58khua pualamah kaikhia-in suang gol pipi a khiat uh hi. Hih thu-ah teci pangin Stefen a deng mite in a puantungsilh uh suahin Saul a kici tangval khat kiangah lawnin a kemsak uh hi. 59Tua bangin suang a khiat thuahthuah laitakun Stefen in thu ngen a, “Topa Jesuh aw, ka kha hong la in,” a ci hi. 60Tua ciangin amah kunin nakpitakin kiko a, “Topa aw, hih mite’ mawhna na maisak in,” a cih khit ciangin a si ta hi.

Currently Selected:

SAWLTAK 7: TDB

Highlight

Copy