मात्ति 28
28
येसु उहिङ्ग्वाट् लिसाना
(मारकुस १६:१-११; लुका २४:१-१२; युहान्ना २०:१-१८)
1युङ्माना लेम्बा एङ्स्वा, आइताबार भ्यानिक् कुरिक्वारिक् व्हाङ् लिसानाँ मारियाम माग्दालिनि हिट्नुङ् आरको मारियाम येसु उयुङ्सुना ओहुम्पा पुसिङा खाडाचे॥ 2हिट्ना बेला ठेना लुक्लेमा खाडे, पोङ्भोने माङ्हाङ् डाङ्बाङाना ठिबाङ् माङ्हाङ् रिङ् काउग्बा टोनालोक्लाम्मा यो उङ्से, हिट्नुङ् ओहुम्पा टेप्बालाक् लिङ्गेॽवा सोन्डुङ् हिट्ना उठुङ्ङि युङे॥ 3हिट्नाङाना ओनाभाक् बिजुलि गाड्डे डोक् ओम्से हिट्नुङ् लोट्लिङ्उम्बाक् हिउँ गाड्डे डोक् फुटुम्बुरि डाना॥ 4हिट्नुङ् उहुम्पा काकोबाचिम्बाक् उन्चि किट्माङा पिलिम् पिलिम् ओयोक्टे हिट्नुङ् उसियागा याप्मिचि गाड्डे डोक् उलिसे॥
5टरो माङ्हाङ् रिङ् काउग्बाङा हिट्नागा मेन्झेमाचि लोडुचे, “किट्नेनिन्, पोङ्भोने आङा ठाहा टोगुएसुङे, खान्याँ खाप्चेङि उछुडुना येसु आकोलुएट्टुम्॥ 6उन् नाहि वाइना॥ उन्ङा माट्टुना गाड्डे डोक् उन् सियानालाम्मा उहिङ्ग्वाट् लिसाउङ् कोबे॥ आबानिउङ् उन्ङाना ओलास युङ्बालाक् डेन् पुयानुम्॥ 7हिट्नुङ् एला खाडानिउङ् ओचेलाचि लोडानुम्चिम्, ‘टाङ्बाम्टे सियानालाम्मा उहिङ्ग्वाट् लिसाउङ् कोबे, हिट्नुङ् उन् खानि नुङ्ना पाइले गालिलङि खाट्युगेट्, हिट्नि खानिङा उन् आनिसुम्टुम्॥’ खेम्सानुम्, आङा खानि लोनाइनाने॥”
8हिट्नुङ् हिट्नागा मेन्झेमाचि उकिट्टे चा हिट्नुङ् आड्डिक् हारका चा उलिसे॥ हिट्नुङ् हिट्ना बेला डोक् हिट्नागा ओहुम्पालाम्मा ओहोन्डाउङ् ओचेलाचि खाबोर लोमा उपिन्डे॥
9हिट्नागा ओखाडागेट्टाना बेला, येसुङा टुबुचिउङ् लोडुचे, “खानि लाउङ्सा हाङ्हाङ् उलियाक्!” हिट्नुङ् हिट्नागा उन् सोरि ओखाडाउङ् गुङ् ओचोगाउङ् ओलाङ् ओखोट्टुङ् माङ्ध्यान् ओचोगुए॥ 10येसुङा हिट्नागा लोडुचे, “किट्नेनिन्, खाडानिउङ् आचेलाचि गालिलङि खाडानि नुङ् लोडानुम्चिम्, हिट्नुङ् हिट्नि डोक् हिट्नागाँ आङा याङ्उनियुक्॥”
टिलिङ्गाचिगा खाबोर
11जब हिट्नागा मेन्झेमाचि लाम्बोङि उखाडागेट्टागा डागा, आम्टेप्मा टिलिङ्गाचि खालाङ्गालेङ् ओखाडाउङ् हिट्नि लिसागा सोब्बे घाटाना बारेङि सानिङ्डाङ्बाचि ओलोडुचे॥ 12हिट्नुङ् गाडुवाडाङ्बाचि ओठेडोङ्चिलोक् उटुबाउङ् हिट्नागा उमुन्डुप्टे, हिट्नुङ् टिलिङ्गाचि जोम् ओफाबा उपिडुचे, 13हिट्नुङ् ओलोडुचे, “खानिङा ‘युसा आन्याँ इम्सेइसिङाना बेला येसुङा ओचेलाचि ओटायाउङ् ओलास याङ्उखुट्टुङ् ओखाट्टुएना रैछो’ पिक्सा लोडानुम्चिम्॥ 14ना रिङ् रोमि उपिङ्बाचिगा हाकिमङा खेम्सुए भोने, आन्याँ उन्लोक् रिङ् टोङ्सुङ्टुम्मा॥ खानिङा नाङाना बारेङि पाक्चा चिन्टा चोक्मा कोन्निना॥” 15टब हिट्नागा टिलिङ्गाचिङा हिट्ना ओफाबा ओलाडुए, हिट्नुङ् सानिङ्डाङ्बाचिङा उहिसिक्टुचि गाड्डे डोक् ओचोगे, हिट्नुङ् याहुदिचिगा माझाङि हाट्ले सोम्मा चा ना मुन्डुम् डोक् ओमाट्टुगा॥
माङ्ठेना आग्याँ
(मारकुस १६:१४-१८; लुका २४:३६-४९; युहान्ना २०:१९-२३; मुलिचेला टोॽवा १:६-८)
16हिट्नुङ् एघार चेलाचि येसुङा खाडानि लोडुचिगा गालिलङिना झोन्झोबाङि ओखाडे॥#मात्ति २६:३२; मारकुस १४:२८ 17हिट्नागाँ येसु उनिसुनामे स्या ओमेट्टुए, टरो हिट्नागा माड्डेङि आम्टेप्माङा साङ्का ओचोगुए॥ 18टब येसु हिट्नागा सोरि आबाउङ् लोडुचे, “टोनालोग् हिट्नुङ् नाराङि सोब्बे आधिकार माङ्हाङ्ङा आङा याङ्पिडैसे॥ 19हिड्डेउङ् खाडानि, हिट्नुङ् सोब्बे देसङिगा छोङ्बाचि चेला चोगानुम्चिम्, माङ्हाङ् पाबा, छा हिट्नुङ् सेङ्सेङ्ना हाङ्सा उनिङ्ङि बाप्टिस्मा पिडानुम्चिम्॥ 20आङा खानि आग्याँ पिनानिगा सोब्बे रिङ् पालान् चोक्मा हिट्नागा हिसिक्टानुम्चिम्॥ खेम्सानुम्, आङा जुगङाना आन्ते सोम्मा सोरोक् खानिलोक् एक्केउ लिङा॥”
Currently Selected:
मात्ति 28: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
