मात्ति 25
25
ठिमेक् जाना कान्नेएचिगा मुन्डुम्
1येसुङा फेरि लोडुचे, “टोनालोग्ङिना मुलुक् ठिमेक् जाना कान्नेए मेन्झेमाचिलोक् टोङ्मा हिडुम्टुम्॥ हिट्नागाँ आप्पे-आप्पे उन्चिगा कुपि ओयाङुङ् बेउला टुब्सिङा ओखाडे॥ 2हिट्नागा ठिमेक् जाना माड्डेङि लेम्बोक् जाना ठोना उलिसागा हिट्नुङ् लेम्बोक् जाना ठोनाबा मेन्झेमाचि ओडागा॥ 3पोङ्भोने ठोनाबा मेन्झेमाचिङा कुपिउम् ओखाट्टुए, टरो हिट्नागाँ आरु क्या भोने ओखाट्टुवाट्टुन्॥ 4टरो ठोना उलिसागा मेन्झेमाचिङाम्बाक् आरु क्या चा ओखाट्टुए॥ 5बेउला टामा ढिलो चोगाउङ् हिट्नागा सोब्बे मिक्युमाङा ढुङ्गुप्पा ओचाए हिट्नुङ् हिट्नागा उइम्से॥
6“टरो माध्ये युसा हिट्नागाँ ‘खेम्सानुम्, हाट्ले बेउला टायुगेट्, कोबानि, हिट्नुङ् उन् टुब्सिङा काडानि’ पिक्सा ओमाट्टुना ओखेम्सुए॥ 7हिट्नुङ् हिट्नागा सोब्बे कान्नेएचि ओचेन्डे, हिट्नुङ् आ-आप्पे उन्चि कुपि टेयार ओचोगुए॥ 8ठोनाबा कान्नेएचिङा ठोना उलिसागा कान्नेएचि ओलोडुचे, ‘खानिलोक् युङ्ग्वागा क्या आन्याँ चा खाटिटि याप्मि पिडालो, पोङ्भोने आन्याँ कुपिचिउम् उसिया लाबे॥’
9“टरो ठोना उलिसागाँ नाड्डे पिक्सा ओलोडुचे, ‘खानि चा मायुडिलोक् आन्याँलोक् क्या वाइना, दोकानङि खाडानिउङ् खानिलोङ्सा इना आप्टानुम्॥’
10“हिट्नुङ् हिट्नागा ठोनाबा कान्नेएचि क्या इन्सिङा ओखाडानाँ बेउला होन्डा टाए॥ हिट्नागा टेयार उलिसाउङ् उयुङ्गा लेम्बोक् जाना ठोना उलिसागा कान्नेएचि बेउलालोक् भ्याबारिङाना भातेरङि भिट्रा उलिगे, हिट्नुङ् ढुवारिक् चा छुप्टे॥
11“छोप्मो एङ्स्वा हिट्नागा आरु ठोनाबा कान्नेएचि होन्डा ओटाए हिट्नुङ् नाट्डे माप्मा ठालाँ ओचोगुए, ‘टाङ्बा, टाङ्बा, आन्याँ लोङ्सा चा ढुवारिक् याप्मिओङ्साबिडा॥’ 12टरो बेउलाङा हिट्नागा लोडुचे, ‘छेम्बा आङा खानि लोनाँनि, आङा खानि मिसेन् निनेनिन्गा॥’”#लुका १३:२५
13हिट्नुङ् येसुङा माट्टुए, “हिट्नाड्डेउङ् खानि ओछेक्छेक् लिसानिउङ् युङानि, पोङ्भोने आङा नोक्ङा उङ्ङाना हिट्ना लेम्बा हिट्नुङ् बेला खानिङा ठाहा आटोक्निम्ना॥
सुम्बाङ् चाकारचिगा मुन्डुम्
(लुका १९:११-२७)
14“फेरि माङ्हाङ् उमुलुक्उम्बाक् ठिबाङ् डाङ्बा लाप्माङ् आरको देस खाडाना गाड्डेना ए॥ हिट्ना डाङ्बाङा पारदेस खाट्मा नुङ्ना पाइले ओचाकारचि छेम्डुचिउङ् उन्ङाना माक्फेन्सुबेन् हिट्नागा जिम्मा पिडुचे॥ 15उन्ङा ख्वाप्पा लोङ्सा उन्चि गाच्छे आनुसार ठिबाङ् लोङ्सा लेम्बोक् हाजार साम्याङ्ङाना राङ्, आरको इप्पोक् हाजार साम्याङ्ङाना राङ् हिट्नुङ् आरको ठिबाङ् लोङ्सा ठिक् हाजार साम्याङ्ङाना राङ् पिडुढोचिउङ् खाडालेट्टे॥ 16हिट्नुङ् लेम्बोक् हाजार साम्याङ्ङाना राङ् टोगुनाङा हिट्ना बेला डोक् खाडाउङ् बेपारङि लाहाब् चोगुएट्टुए हिट्नुङ् हिट्नालाम्मा आरु लेम्बोक् हाजार साम्याङ्ङाना राङ् कामाँ चोगुए॥ 17हिट्डेउङ् इप्पोक् हाजार साम्याङ्ङाना राङ् काटोक्बाङा चा आरको इप्पोक् हाजार साम्याङ्ङाना राङ् कामाँ चोगुए॥ 18टरो ठिक् हाजार साम्याङ्ङाना राङ् काटोक्बाङाम्बाक् खाडाउङ् खाम् टोयुङ् ओडाङ्बाङाना ओफाबा ठोबुङ् युङ्सुए॥
19“याप्मा बारखा लिसाउङ् हिट्नागा चाकारचिगा डाङ्बा नोक्टा टाए, हिट्नुङ् हिट्नाँ हिट्नागालोक् हारहिसाब नाक्टुचे॥ 20हिट्नुङ् लेम्बोक् हाजार साम्याङ्ङाना राङ् काटोक्बा चाकारङा आरको लेम्बोक् हाजार साम्याङ्ङाना राङ् टाडुङ् नाट्डे लोडुए, ‘आडाङ्बा, खान्ङा आङा लेम्बोक् हाजार साम्याङ्ङाना राङ्ङाना जिम्मा याङ्आपिडाइसाङ्ना॥ पुयुटे, आङा आरु लेम्बोक् हाजार साम्याङ्ङाना राङ् कामाँ चोगुएसुङे॥’
21“ओडाङ्बाङा हिट्ना लोडुए, ‘होहोबास्, आङाना ओचेट्नुना हिट्नुङ् बिस्वासिलो चाकार! खान् खाट्टिप्मा रिङ्ङि बिस्वासिलो आलिसे, हाट्ले आङा खान् जोम् रिङ्ङाना जिम्मा पिनाँ॥ खान् चा आङालोक् हारका लिसा॥’
22“हिट्नुङ्ना इप्पोक् हाजार साम्याङ्ङाना राङ् काटोक्बा चा आबाउङ् लोडुए, ‘आडाङ्बा, खान्ङा आङा इप्पोक् हाजार साम्याङ्ङाना राङ् याङ्आपिडाइसाङ्ना॥ पुयु, आङा आरु इप्पोक् हाजार साम्याङ्ङाना राङ् कामाँ चोगुङ् टाडुएसुङे॥’
23“ओडाङ्बाङा हिट्ना लोडुए, ‘होहोबास्, आङाना ओचेट्नुना हिट्नुङ् बिस्वासिलो चाकार! खान् खाट्टिप्मा रिङ्ङि बिस्वासिलो आलिसे, हाट्ले आङा खान् जोम् रिङ्ङाना जिम्मा पिनाँ॥ खान् चा आङालोक् हारका लिसा॥’
24“हिट्नुङ् ठिक् हाजार साम्याङ्ङाना राङ् काटोक्बा चा आबाउङ् लोडुए, ‘आडाङ्बा, खान्ङा आलेट्टुन्गेट्टुन्ना स्वाँरालाम्मा काहेग्बा हिट्नुङ् आहिसुन्गेट्टुन्गा चासोङ् चा काछुम्बा खान् काठोर याप्मि नुङ् आङा ठाहा टोगुङ्ना॥ 25हिट्नाड्डेउङ् आङा किट्टाङे, हिट्नुङ् आङा खाडाउङ् खान्ङा आपिडाङ्ना ठिक् हाजार साम्याङ्ङाना राङ् खाम्ङि ठोबुङुङ् युङ्सुङे॥ पुयुलो, ना खान्ङाना काराङ् टाक्टुवाक्॥’
26“टरो ओडाङ्बाङा हिट्ना लोडुए, ‘हाउ दुस्टा, आल्से चाकार! आङा आप्पे ठेन्निङ्गेट्निङ्गा डेन्ङि हेगुङ्टुङ्, हिट्नुङ् लालिक् हिनिङ्गेट्निङ्ना डेन्लाम्मा छुम्सुङ्गा नुङ् खान्ङा ठाहा आटोगुना भोने, 27खान्ङा आङाना माक्फेन्सुबेन् माहाजानङि युङ्मा कोन्नि नै? खान्ङा हिड्डे आचोगुनाँ बे आङा नोक्ङा टाङाना आमाक्फेन्सुबेन् ख्वाप्पा ओब्याजलोक् फिरता टोगुङे बे॥’
28“हिट्नुङ् डाङ्बाङा माट्टुए, ‘हिट्नालाम्मा ठिक् हाजार साम्याङ्ङाना राङ् नाप्टानुम् ठिमेक् हाजार साम्याङ्ङाना राङ् लिसाना लाउङ्सा पिडानुम्॥ 29पोङ्भोने जुन्लोक् युङ्ग्वा हिट्नाङा आझै झान् याप्मा टोगुटु हिट्नुङ् हिट्नालोक् झान् याप्मा लियुक्॥ टरो जुन्लोक् वाइना, हिट्नालोक् खाट्टिप्मा लिसाना चा हिट्नालाम्मा नाप्युक्॥#मात्ति १३:१२; मारकुस ४:२५; लुका ८:१८ 30हाट्ले ना आल्से चाकारउम्बाक् भारा डुम्बारिक् डुम्ङि लेप्टानुम्, हिट्नि याप्मिचि ओहाप्युक् हिट्नुङ् उन्चि केङ् ओचान्डुटु॥’#मात्ति ८:१२; २२:१३; लुका १३:२८
आन्तेङिना न्याए
31“याप्मि छा ख्वाप्पा माङ्हाङ् रिङ् काउग्बाचिलोक् उन्ङाना माहिमाङि उङ्युक्, हिट्नुङ् उन् हाङ्बा युङ्ना सिङासान्ङि युङ्युक्॥#मात्ति १६:२७; १९:२८ 32हिट्नुङ् सोब्बे छोङ्चि उन् सोरि उछुम्युक्, हिट्नुङ् गोठालेङा उठुँबाचि मेरबाचिलाम्मा साम्डुचि गाड्डे डोक् उन्ङा हिट्नागा याप्मिचि ठिबाङ् ठिबाङ् साम्डुचिचि॥ 33उन्ङा उछुप्टाङ् उमुक्लेङ् ठुँबाचि हिट्नुङ् ओफेङ्साङ् उमुक्लेङ् मेरबाचि साम्डुचिउङ् युङ्सुचिचि॥ 34हिट्नुङ् हाङ्बाङा उछुप्टाङ् उमुक्लेङ्गा लोडुचिचि, ‘आबानि, आङाना माङ्हाङ् पाबालाम्मा आसिक् आटोगुम्गा याप्मिचि, नारा उटुम् नुङ् डोक् खानि लोङ्सा टेयार चोग्बालाक् मुलुक् आधिकार चोगानुम्॥ 35पोङ्भोने आसाक्वासानाँ खानिङा आङा चामा याङ्आपिडिङे॥ आवेप्मा काडानाँ खानिङा चुवा ठुङ्मा याङ्आपिडिङे॥ आङा पारदेसि लिसाङ्नाँ खानिङा स्वागाट् याङ्आचोगिङे॥ 36आङा एकेलिपोट् लिसाङ्नाँ खानिङा आङा लोट्लिङ् याङ्आमेट्टिङे॥ आङा टुगाङ्नाँ खानि आङा ठोम्सिङा आटाइए॥ आङा खाम्बाङ्ङि ठायाङ्नाँ खानि टुब्सिङा आटाइए॥’
37“हिट्नुङ् ना रिङ् ओखेम्सुङ् धारमोति याप्मिचिङा उन् ओलोडुटु, ‘हाउ टाङ्बा, खोना बेला कासाक्वासाना आन्याँ निनेना, हिट्नुङ् खान् चामा पिनेना? आथाबा खोना बेला कावेप्मा काडाना आन्याँ निनेना, हिट्नुङ् खान् चुवा ठुङ्मा पिनेना? 38खोना बेला आन्याँ खान् पारदेसि निनेना, हिट्नुङ् खान् स्वागाट् चोक्नेना? आथाबा खोना बेला एकेलिपोट् आवासाना निनेना, हिट्नुङ् लोट्लिङ् वाप्मा पिनेना? 39हिट्नुङ् खोना बेला खान् आटुगाना आन्याँ निनेना, हिट्नुङ् खान् ठोम्सिङा टाइङेगा? हिट्नुङ् खोना बेला खान् खाम्बाङ्ङि आठाएना, हिट्नुङ् खान् टुब्सिङा टाइङेगा?’
40“टब हाङ्बाङा हिट्नागा लोडुचिचि, ‘छेम्बा, आङा खानि लोनाँनि, खानिङा नागा भुम्भु-झान्झाचि माड्डेङि सोब्बे नुङ्ना ओखाट्टिउगालोङ्सा खानिङा जे जे आचोगुम्मे, हिट्ना खानिङा आङा लाउङ्सा डोक् आचोगुम्मे॥’
41“हिट्नुङ्ना उन्ङाना ओफेङ्साङ्लेङ् उलिसागा याप्मिचि लोडुचिचि, ‘हाउ माङ्हाङ्ङाना साराप् आठायिगा याप्मिचि! आङालाम्मा खाडालेट्टानि, हिट्नुङ् दियाबालास लोक् उदुतचि लोङ्सा टेयार चोक्बालाक् खोना बेला चा सिनिना मिङि खाडानि॥ 42पोङ्भोने आसाक्वासानाँ खानिङा आङा चामा चामा आपिडेट्टिन्ना॥ आवेप्मा काडानाँ खानिङा चुवा ठुङ्मा आपिडिएट्टिन्ना॥ 43आङा पारदेसि लिसाङ्नाँ खानिङा स्वागाट् याङ्आचोगेट्टिन्ना॥ आङा एकेलिपोट् लिसाङ्नाँ खानिङा लोट्लिङ् याङ्आमेट्टिएट्टिन्ना॥ आङा टुगाङ्नाँ हिट्नुङ् आङा खाम्बाङ्ङि ठायाङ्नाँ खानि टुब्सिङा आटायाट्टिन्॥’
44“हिट्नुङ् हिट्नागाँ चा नाट्डे पिक्सा ओलोडुटु, ‘टाङ्बा, खोना बेला आन्याँ खान् कासाक्वासाना, कावेप्मा काडाना, पारदेसि लोक् एकेलिपोट् आलिसाना, कायेम् टुगाना, खाम्बाङ्ङि आठायाना निसुम्मेना, हिट्नुङ् खान् घुवार फानेट्निम्माना?’
45“हिट्नुङ् उन्ङा हिट्नागा नाड्डे लोडुचिचि, ‘छेम्बा, आङा खानि लोनाँनि, खानिङा नागा भुम्भु-झान्झाचि माड्डेङि सोब्बे नुङ्ना ओखाट्टिउगालोङ्सा खानिङा जे जे आचोग्नेएट्निम्, हिट्ना खानिङा आङा लाउङ्सा आचोग्नेयाट्निम्॥’
46“हिट्नुङ् हिट्नागाँम्बाक् लाट्निना साजाए ओटोगुटु, टरो धारमोति याप्मिचिउम्बाक् खोना बेला चा लाट्निना चोलाङि उलिक्युक्॥”
Currently Selected:
मात्ति 25: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
