मात्ति 24
24
माङ्ठाना जाखाम् लिना बारे
(मारकुस १३:१-२; लुका २१:५,६)
1हिट्नुङ् येसु माङ्ठानालाम्मा होन्डाउङ् खाडागेट्टाना बेला ओचेलाचिङा पारिक् पारिक्गा माङ्ठाना पाङ्चि निमेट्मा उन् सोरि ओआबे॥ 2टरो उन्ङा हिट्नागा लोडुचे, “खानिङा नागा सोब्बे आनिसुएट्टुम्, छेम्बा, आङा खानि लोनाँनि, नाहिगा ठिक् लुङ्गेॽवाधारि चा लिनिना, नागा ख्वाप्पा ओहोडुटु॥”
याङ्छामा लोक् खेदो
(मारकुस १३:३-१३; लुका २१:७-१९)
3येसु जैतुन झोन्झोबाङि युङैसाना बेला ओचेलाचि सोगोप् उन् सोरि ओआबाउङ् उसिलाप्टुए, “काहिसिक्बा, आन्याँ याप्मिलोडा लो, नागा रिङ् खोना बेला लियुक्ना, हिट्नुङ् खान् फेरि आनोक्युउङ्ना रिङ् हिट्नुङ् ना जुगङाना आन्तेङाना चिन्नाम्बाक् पाक् लियुक्ना?”
4येसुङा हिट्नागा लोडुचे, “ओछेक्छेक् चोगानि, साङा चा खानि माबान्डिन्चा॥ 5पोङ्भोने जोम् याप्मिचि आनिङ्ङि ‘खिरिस्ट आङा डोक्’ पिक्सा ओटायुक्, हिट्नुङ् हिट्नागाँ याप्मा याप्मिचि ओबान्डुचिचि॥
6“जब खानिङा खेमाबुङ्मा लिसे नुङ् हिट्नुङ् खेमाबुङ्मा लिना रिङ् ओमाट्टुगा आखेम्सुम्टुम्, टरो हिट्ना बेला खानि किट्नेनिन्॥ पोङ्भोने नाड्डेगा रिङ्उम् लिमा डोक् कोन्युक्, टरो आन्तेम्बाक् हिट्ना बेला डोक् लिनिना॥ 7पोङ्भोने ठिक् छोङ्बाङाना बिरुद्दाङि आरको छोङ्बाङि खेमाबुङ्मा लियुक्, हिट्नुङ् ठिक् मुलुक् बिरुद्दाङि आरको मुलुक्ङि खेमाबुङ्मा लियुक्॥ हिट्नुङ् ठोङ्-ठोङ्ङि चामा-ठुङ्मागा थोक्चि चा लाट्युक् हिट्नुङ् लुट्लेमा काट्युक्॥ 8टरो नागा सोब्बेउम् टे छाडाङ्मा बेथा लिना बेला गाड्डे डोक् नागाउम् याङ्छामा लिना उटुम् एरोक् ए॥
9“हिट्ना बेला याप्मिचिङा खानि मालाबिटि हिट्नुङ् साजाए पिमा माखाट्टिटि, हिट्नुङ् खानि मासेडिटि, हिट्नुङ् आनिङ्ङि बिस्वास आचोगुम्नाँ सोब्बे छोङ्चिङा खानि चिम्मा माफुट्टिटि॥#मात्ति १०:२२
10“हिट्ना बेला याप्माङा बिस्वास ओनाडुटु हिट्नुङ् ठिबाङ्ङा आरको लाउङ्सा धोखा पिडुटु हिट्नुङ् चिम्मा फुट्टुटु॥ 11जोम् माङ्जोगा माङ्काटाचि ओहोन्युक्, हिट्नुङ् जोम् याप्मिचि फाम्लेङ् ओचाट्टुचिचि॥
12“सोब्बेलेङ् ओचाफेन्गा टोॽवा पोसा खाट्नाँ जोम् याप्मिचिगा माया चा मासा खाट्युक्॥ 13टरो आन्ते सोम्मा बिस्वास चोगुयाक्टुनाम्बाक् हिङ्युक्॥#मात्ति १०:२२ 14हिट्नुङ् सोब्बे छोङ्बाचिगा याप्मिचिलोङ्सा साँचि उलि नुङ् ना मुलुक्ङाना नुना खाबोर नारा टेप् पारचार चोक्युक्, हिट्नुङ् नाराङाना आन्ते लियुक्॥
आड्डिक् किट्टिना याङ्छाडिना बेला
(मारकुस १३:१४-२३; लुका २१:२०-२४)
15“नाड्डेउङ् जब माङ्काटा दानिएलङा माङ्ठानाङाना सेङ्सेङ्ना डेन्ङि ‘चिम्मा फुट्टुम्ना थोक्’#दानिएल ९:२७; ११:३१; १२:११ येबाइसाना नुङ् माट्टुना रिङ् खानिङा आनिसुम्टुम्॥ (नाङाना उटुप् पोढाँ काचोक्चिङा बुजा ओचोगुवाक्)॥ 16हिट्ना बेला याहुदिया छेट्राङि उलिसागा याप्मिचि झोन्झोबालेङ् पिन्युओखाट्याक्॥ 17कौसिङि उलिसागा याप्मिचि उन्चि माल्माट्टा होट्सिङा पाङ् भिट्रा खाप्मा चा ओखाट्न्याक्॥#लुका १७:३१ 18टोॽवालासिङि उलिसागा याप्मिचि उन्चि सोबाक् लोहोट्ना पाङ्ङि आनोक्नि ओआप्न्याक्॥ 19हिट्ना बेला माभोक् उखुयुगा लोक् ओओ ओकाप्टुचिगा मामाचि लाउङ्सा आड्डिक् टुक्ना याङ्छामा लियुक्॥ 20चुङ्ग्वामा बेला आथाबा युङ्माना लेम्बा खानिङा पिम्मा खाप्मा ओकोन्नेयाक् नुङ् माङ्हाङ्ङि बिन्टि ठाङ्सानुम्॥#२४:२० चुङ्ग्वामा बेला इस्राएलङि आड्डिक् व्हेट् टाना हिट्नुङ् चुङ्ग्वामा लिना हिट्नुङ् लाम्टिमा आड्डिक् टुग्ना॥ हिट्नुङ् याहुदिचिगा युङ्माना लेम्बा हिट्नागा ठिक् किलो मिटार नुङ्ना लाप्माङ् ओलाम्टिनिगा॥ हिट्डेउङ् चुङ्गुवामा बेला आथाबा याहुदिचिगा युङ्माना बेला इस्राएलि याप्मिचि उन्चि साट्टुरचिलाम्मा पिम्मा खाप्मा आड्डिक् टुक्ना लिना॥ 21पोङ्भोने हिट्ना बेला माङ्ठेना किप्माडुङ् याङ्छामा लियुक्॥ नाड्डेना याङ्छामा नारा उटुम्लाम्मा हाट्ले सोम्मा लिनिगेट्निना, हिट्नुङ् फेरि खोना बेला चा लिनिना॥#दानिएल १२:१; पारकास ७:१४ 22माङ्हाङ्ङा हिट्ना याङ्छामा लिना लेम्बा उन्ना चोग्वाट्टुन्ना बे खोना याप्मि चा हिङ्मा उहिङ्नेयाट्नि बे, टरो उन्ङा सेगुचिगा याप्मिचिगा खातिर हिट्ना याङ्छामा लिना लेम्बा घाटाँ चोगुटु॥
23“टब खानि कोइङा ‘पुयानुम्, खिरिस्ट नाहि वाहेट्’ आथाबा ‘हिट्नि वाहेट्’ नुङ् ओमाट्टुए भोने, खानिङा बिस्वास चोक्नेनुम्॥ 24पोङ्भोने नाड्डेगा माङ्जोगा खिरिस्ट लोक् माङ्जोगा माङ्काटाचि ओठेट्युक्॥ हिट्नागाँ उहिडुलोक् सोम्मा माङ्हाङ्ङा सेगुचिगा याप्मिचि चा माङ् ठे-ठेगा चिन्ना लोक् डोङ् ठोङ्डिगा टोॽवा ओचोगुङ् ओबान्डुचिचि॥
25“खेम्सानुम्, आङा ना रिङ् पाइले डोक् खानि लोनाइनाने॥ 26याप्मिचिङा खानि ‘पुयानुम्, उन् साक्चा उयुङ्निगा डेन्ङि वाहेट्’ मालोडिए भोने हिट्नि खाट्नेनिन्॥ हिट्नुङ् हिट्नागाँ ‘पुयानुम्, उन् उम्टे पाङ् भिट्रा युङ्ग्वा’ मालोडिए भोने चा खानिङा बिस्वास चोग्नेनुम्॥#लुका १७:२३-२४ 27पोङ्भोने खोड्डेउङ् टाङ्साङ्ङि झालाक् झिलिक् लिनाँ पुरबालाम्मा पास्चिम् सोम्मा व्हाङ् चोगुटु, हिड्डेडोक् याप्मि छा उङ्ना बेला ख्वाप्पाङा उनिसुटु॥ 28सिनो लिसाना सोरि डोक् सेम्माङ् भेम्माङ्चि उछुम्युक्॥#२४:२८ सेम्माङ् भेम्माङ्चि सिनो लिसाना ठोङ्ङि ओठेट्टा गाड्डे डोक् याप्मि छा चा उङ्ना बेला सोब्बेङा उनिसुलोक् ठेट्युक्॥ लुका १७:३७
याप्मि छा उङ्ना बारे
(मारकुस १३:२४-२७; लुका २१:२५-२८)
29“हिट्नागा याङ्छामा लेम्बा लाट्नामे नाम् डुम्बारिक् डुम् लियुक्, हिट्नुङ् लालिप्माङ्ङा व्हाङ् पिमा नाडुटु, टाङ्साङ्लाम्मा चोक्चिङ्गेट्चि ओठायुक्, हिट्नुङ् टाङ्साङ्ङिगा सोब्बे साक्तिचि ओवान्युक्॥#यासैया १३:१०; ३४:४; योएल २:१०
30“हिट्नुङ्ना याप्मि छा उङ्ना चिन्ना टाङ्साङ्ङि ठेट्युक्, हिट्नुङ् नाराङिगा सोब्बे छोङ्चि सानिङ्ग्वा ओलोयुक्॥ हिट्नुङ् हिट्नागाँ याप्मि छा टाङ्साङ्लाम्मा खिमेमाङि साक्ति हिट्नुङ् ठेना माहिमालोक् उङ्युगेट्ना उनिसुटु॥#दानिएल ७:१३; पारकास १:७ 31हिट्नुङ् उन्ङा उन्ङाना माङ्हाङ् रिङ् काउग्बाचि धुटुरिबाङाना ठेना ओसोरालोक् पाङ्सुचिचि, हिट्नुङ् हिट्नागाँ नाराङिगा सोब्बे कुनालाम्मा उन्ङा सेगुचिगा उछुम्सुचिचि॥
वामाखोक्पोङाना उभुङ्मालाम्मा हिसिक्मा
(मारकुस १३:२८-३१; लुका २१:२९-३३)
32“हाट्ले वामाखोक्पो उभुङ्मालाम्मा ना रिङ् सिकाँ लिसानि– जब ना उभुङ्माङाना ओहागेप्पा उपाट्छाट् लियुक् हिट्नुङ् हिट्ना ओहागेप्पालाम्मा उलिङ् होट्मा ठालाँ चोगुटु, टब हुटुॽवामा बेला एला डोक् लियुक् नुङ् खानिङा ठाहा आटोगुम्टुम्॥ 33नाड्डेरोक् खानिङा नागा सोब्बे रिङ् उलिसागा आनिसुम्टुम्, हिट्नुङ् उन् एला डोक् उङ्युक्ना रैछो, ढुवारिक्ङि डोक् वाहेट् नुङ् ठाहा टोगानुम्॥ 34छेम्बा डोक्, आङा खानि लोनाँनि, नागा सोब्बे रिङ् मियुङे सोम्मा ना टालाङिगा याप्मिचि उसिनिगा॥ 35टोनालोग् हिट्नुङ् नारा मेग्युखाट्युक्, टरो आङा लोनानिगा रिङ्उम्बाक् मेग्निखाट्निना॥
ओछेक्छेक् लिमाना हिसिक्मा
(मारकुस १३:३२-३७; लुका १७:२६-३०,३४-३६)
36“हिट्ना लेम्बा हिट्नुङ् घाडि खोना बेला लियुक्ना नुङ् साङा चा ठाहा ओटोगुन्ना॥ हिट्नाउम् टोनालोग्ङिगा माङ्हाङ् रिङ् काउग्बाचि हिट्नुङ् छाङा चा ठाहा टोगुन्ना, टरो माङ्हाङ् पाबाङा एडोक् ठाहा टोगुटु॥ 37हिट्नुङ् याप्मि छा उङ्ना लेम्बा नोआ ओलोडुना याप्मि ओपालाङि लिसाना गाड्डे डोक् लियुक्॥ 38पोङ्भोने हिट्ना बेला चुवा ओभोल उङ्मा पाइले नोआ चुवाखोङ्डाङ्ङि लिक्ना लेम्बा सोम्मा याप्मिचि चामा-ठुङ्मा ओचोगेट्टागा, हिट्नुङ् भ्याबारि उलिसेट्टागा॥ 39हिट्नुङ् ठेना चुवा ओभोल टायाउङ् हिट्नागा फ्याङ् चुवा ओभोल्ङा खुयुचिउङ् ओखाट्टुन्चिन्लोक् सोम्मा हिट्नागाँ पाक् लिसेना नुङ् ठाहा डोक् ओटोग्वाट्टुन्॥ याप्मि छा उङ्नाँ चा हिड्डे डोक् लियुक्॥#उत्पति ७:६-२४ 40हिट्ना बेला स्वाँराङि टोॽवा काचोक्बाचि इप्पाङ् याप्मिचि माड्डे ठिबाङ् माङ्हाङ्ङा खाट्टुटु हिट्नुङ् आरको नाडुढोटु॥ 41झाँटा रुट्चेट्चिगा इप्पाङ् मेन्झेमाचिङि माङ्हाङ्ङा ठिबाङ् खाट्टुटु हिट्नुङ् आरको नाडुढोटु॥
42“हिट्नाड्डेउङ् खानि ओछेक्छेक् लिसानिउङ् युङानि, पोङ्भोने खोना लेम्बा खानि टाङ्बा उङ्युक्ना हिट्ना खानिङा ठाहा आटोक्निम्ना॥ 43टरो ना रिङ् खानिङा ठाहा टोगानुम्, पाङ् ओडाङ्बाङा याङ्काखुट् खोना बेला टायुक्ना नुङ् ठाहा टोगुना बे उन् ओछेक्छेक् युङे बे हिट्नुङ् याङ्काखुट् ओपाङ् होप्मा पिडुवाट्टुन् बे॥#लुका १२:३९-४० 44हिट्डेउङ् खानि जाइले चा टेयार लिसानिउङ् युङानि, पोङ्भोने याप्मि छा खोना बेला टायुक्ना खानिङा ठाहा डोक् आटोक्निम्ना॥
बिस्वासिलो हिट्नुङ् आबिस्वासिलो चाकार
(लुका १२:४१-४८)
45“बिस्वासिलो चाकार हिट्नुङ् कानिबा याप्मि साइना टे? बिस्वासिलो चाकार हिट्ना लियुक्, जुन् पाङ् ओडाङ्बाङा ओपाङ्ङिगा आरु चाकारचि ठिक्का बेलाङि डोक् चामा-ठुङ्मागा थोक्चि उपिडुचियाक् नुङ् जिम्मा पिडुटु॥ 46हिट्नुङ् पाङ् ओडाङ्बा नोक्युङ् टानाँ ओचाकारङा हिट्डेडोक् चोगुएट्टुना टुबुए भोने, हिट्ना लोङ्सा आड्डिक् ओचेट्नुना लियुक्॥ 47छेम्बा डोक्, आङा खानि लोनाँनि, हिट्ना चाकार ओडाङ्बाङा ख्वाप्पा ओपाङ्ङिना माक्फेन्सुबेन्ङाना जिम्मा पिडुटु॥ 48टरो हिट्ना दुस्टा चाकारङा ‘आडाङ्बा एला टानिना’ पिक्सा उनिङ्ग्वाङि मिट्युङ्, 49उन्लोक् एक्केउ टोॽवा काचोक्बा चाकारचि लेम्सुचिचि हिट्नुङ् टेडुबाचिलोक् चामा लोक् ठुङ्मा ठालाँ चोगुटु भोने, 50हिट्नाँ ओडाङ्बा उन्ङा मिट्टुन्गेट्टुन्ना लेम्बा हिट्नुङ् आसा चोगुन्गेट्टुन्ना बेला होन्युटायुक्॥ 51हिट्नुङ् डाङ्बाङा हिट्ना टुक्लोक् साजाए पिडुटु, हिट्नुङ् हिट्ना निङ्ग्वा ओमाक्पाचिलोक् युङ्सुटु॥ हिट्नि याप्मिचि ओहाप्युक् हिट्नुङ् केङ् ओचान्डुटु॥”
Currently Selected:
मात्ति 24: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
