मात्ति 19
19
छुटानाम् चोक्माना बारेङि हिसिक्मा
(मारकुस १०:१-१२)
1येसुङा नागा रिङ् लोमा हिडुचिउङ् उन् गालिल नाडुङ् यारदान होङ्ङाना याहाँपारा याहुदा छेट्रालेङ् खाडे॥ 2याप्मिचिगा ठेना खिमेयाङ्मे उन् ओएङ् ओखाडे हिट्नुङ् उन्ङा उटुगागा याप्मिचि नुमानिङ् चोगुचे॥
3हिट्नुङ् आम्टेप्मा फारिसि याप्मिचि उन् सोरि ओआबाउङ् उन् रिङ्ङि रेक्मा ओकोलुङ् नाड्डे पिक्सा उसिलाप्टुए, “कोइङा ओटालिमाङ् नामा कोन्ना ठिक् रिङ् लिसे भोने, पाक् धारमाबिधिङा ओटालिमाङ् नामा लाउङ्सा पिडुटुनि, पिडुन्नै?”
4टरो येसुङा हिट्नागा लोडुचे, “पाक् खानिङा धारमाछाप्ला पोढाँ आचोग्निम्गेट्निम्गै? उटुम्ङि सिरिस्टि काचोक्बाङा सिरिस्टि चोगुनाँ याप्मि येम्बेछा लोक् मेन्झेमा चोगुचे#उत्पति १:२७; ५:२, 5‘हिट्डेउङ् याप्मिङा उप्पा-उमा नाडुचिउङ् ओटालिमाङ्लोक् टोङ्युक्, हिट्नुङ् हिट्नागाचि इप्पाङ् ठिक्ए येम् लिचिचि॥’#उत्पति २:२४ 6हाट्ले हिट्नागाचि इप्पाङ् माखाक्, टरो ठिक् येम् लिचिचि॥ हिट्डेउङ् माङ्हाङ्ङा ठिक्ए चोगुचिगा खोना याप्मिङा ओसाम्डुन्चिन् चा॥”
7हिट्नागाँ उन् उसिलाप्टुए, “हिट्डे भोने पोङ् मोसाङा छुटानाम् कागाता छेप्टुङ् ओटालिमाङ् नामा हिडिटु नुङ् माट्टुएना टे?”#धारमाबिधि २४:१-४; मात्ति ५:३१
8येसुङा हिट्नागा लोडुचे, “खानि निङ्ग्वा आड्डिक् ठेक्टाउङ् मोसाङा टालिमाङ्चि खानिङा नामा आहिडुम्टुम् पिक्सा खानि मालोडिगा॥ टरो उटुम्लाम्मा हिट्डे वानेट्निना॥ 9आङा खानि लोनाँनि, जुन्ङा इम्मेप्माजामा टोॽवा माले ओटालिमाङ् नाडुङ् आरको मेन्झेमा भ्या चोगुटु भोने, हिट्नाँ इम्मेप्माजामा टोॽवा चोगुटु॥ हिट्नुङ् जुन्ङा ओनाडुना मेन्झेमा भ्या चोगुटु हिट्नाङा चा इम्मेप्माजामा टोॽवा चोगुटु॥”#मात्ति ५:३२; मारकुस १०:११-१२; १ कोरिन्थि ७:१०-११
10ओचेलाचिङा ओलोडुए, “पाङ्डाङ्बालोक् टालिमाङ्ङाना रिङ् नाट्डेना एरोक् भोनेम्टे भ्या मिलिमा डोक् नुना लियुक्॥”
11येसुङा हिट्नागा लोडुचे, “सोब्बे याप्मिचिङा आङा माट्टुङ्ना रिङ् लाट्मा उहिडुन्ना, टरो खोना लाउङ्सा माङ्हाङ्ङा पिडुटु हिट्ना लोङ्सा एडोक् लियुक्॥ 12भ्या मिलिमाना याप्मा पारिक् पारिक्ङागा पारा लियुक्॥ पोङ्भोने आम्टेप्मा ओपोङ्सानाँ नुङ् डोक् नापुङ्साक् उलियुक्, कोइम्बाक् याप्मिचिङा नापुङ्साक् ओचोगुचिगा उलियुक्, हिट्नुङ् आम्टेप्माम्बाक् टोनालोग्ङिना मुलुक् लोङ्सा भ्या उलिनिगा चा उलियुक्॥ जुन्ङा नागा रिङ् लाट्मा हिडुटु, हिट्नाङा हिट्ना रिङ् ओलाडुवाक्॥”
येसुङा पिच्छाचि आसिक्-मुसिक् पिडुचिगा
(मारकुस १०:१३-१६; लुका १८:१५-१७)
13ठिक् लेम्बा आम्टेप्मा याप्मिचिङा उन्चि छाचिङि येसुङा उमुक् युङ्सुङ् माङ्हाङ्ङा आसिक् उपिडुच्याक् नुङ् बिन्टि ठाङ्ङा ओआप्टुचे॥ टरो चेलाचिङा हिट्नागा याप्मिचि खेमा ओलाप्टुचे॥ 14टरो येसुङा लोडुचे, “नागा पिच्छाचि आङि आप्मा पिडानुम्चिम्, हिट्नागा छाक्नेनुम्चिम्, पोङ्भोने टोनालोग्ङिना मुलुक् नागा पिच्छाचि गाड्डे उलिगा याप्मिचिगा लोङ्सा एरोक् ए॥”
15हिट्नुङ् उन्ङा हिट्नागा उठुङ्ङि उमुक् युङ्सुङ् आसिक्-मुसिक् पिडुचिउङ् उन् हिट्नालाम्मा खाडे॥
वागाठागा याप्मि
(मारकुस १०:१७-३१; लुका १८:१८-३०)
16एक्खेप् ठिबाङ् ठाङ्बेन् याप्मि येसु सोरि आबाउङ् नाड्डे पिक्सा सिलाप्टुए, “हाउ काहिसिक्बा, आङा लाट्निना चोला टोक्माउङ्सा खोड्डेना नुना टोॽवा चोक्मा कोन्युक्ना टे?”
17येसुङा हिट्ना लोडुए, “नुना पाइना नुङ् हिट्ना बारेङि पोङ् खान्ङा याङ्आसिलाप्ङाना? नुनाउम् ठिबाङ् एडोक् वाहेट्॥ खान्ङा लाट्निना चोला टोग्मा निङ्ग्वा आचोगुटु भोने आग्याँचि पालान चोगु॥”
18हिट्नाङा सिलाप्टुए, “धारमाबिधिङिना खोना खोना आग्याँचिम्बाक् पालान् चोक्माना?”
येसुङा हिट्ना लोडुए, “खान्ङा याप्मि सेप्मा लिनिना, इम्मेप्माजामा टोॽवा चोक्मा लिनिना, याङ्खुट्मा लिनिना, माङ्जोना साँछि पिमा लिनिना, 19पाबा-मामा मान् चोगुचि, हिट्नुङ् काटाक्लुङ्चि आप्पे गाड्डे डोक् माया चोगुचि॥”#पारस्थान २०:१२-१६; धारमाबिधि ५:१६-२०; लेबि १९:१८
20हिट्ना ठाङ्बेन् याप्मिङा लोडुए, “नागा सोब्बे आग्याँचिउम् टे आङा पालान् चोगुएट्टुङ्॥ आरु पाक् आङा चोक्मा कोन्युक्ना?”
21येसुङा हिट्ना लोडुए, “खान् माङ्हाङ् ओनाजारङि नुना लिमा आकोन्युक् भोने, खाडाउङ् खान्लोक् लिसागा ख्वाप्पा थोक्चि छोङ्सुङ् पाक्चा ओवानिगा लोङ्सा पिडुचि हिट्नुङ् खान्ङा टोनालोग्ङि माक्फेन्सुबेन् आटोगुटु॥ हिट्नुङ् आबाउङ् आचेला लिसा॥”
22ना रिङ् खेम्सुङ् हिट्ना ठाङ्बेन् याप्मिङाना उनिङ्ग्वा टुगाउङ् खाडालेट्टे, पोङ्भोने हिट्ना जोम् माक्फेन्सुबेन् लिसाना याप्मि डाना॥
23हिट्नुङ् येसुङा ओचेलाचि लोडुचे, “छेम्बा डोक्, आङा खानि लोनाँनि, टोनालोग्ङिना मुलुक्ङि वागाठागा याप्मि लिग्मा आड्डिक् टुक्ना॥ 24फेरि आङा खानि लोनाँनि, वागाठागा याप्मि माङ्हाङ् उमुलुक्ङि लिक्मा नुङ्ना उँटा छोमेट् उनाभुक्लाम्मा लिग्मा टुक्निना॥”
25ना रिङ् ओखेम्सुङ् चेलाचि आड्डिक् डोङ् ओठोङ्डाउङ् उसिलाप्टुए, “हिट्डे भोने साक्ङाम्बाक् मुक्टि टोगुटुना टे?”
26येसुङा हिट्नागा पुयुचिउङ् लोडुचे, “याप्मिचिङा ना रिङ् चोक्मा डोक् उहिडुन्ना, टरो माङ्हाङ्ङा सोब्बे थोक् चोक्मा हिडुटु॥”
27हिट्नुङ् पाटरुसङा उन् लोडुए, “खेम्सु टे, आन्याँ ख्वाप्पा थोक् नाडुमुङ् काचेला लिसेसिङे॥ आन्याँम्बाक् पाक् टुबुम्टुम्माना टे?”
28येसुङा हिट्नागा लोडुचे, “छेम्बा डोक्, आङा खानि लोनाँनि, खानि जो आचेलाचि आलिसिएसिए, जब ओछोङ्ग्वाट् मुलुक्ङि याप्मि छा उन्ङाना माहिमाङाना सिङासान्ङि युङ्युक्, हिट्नुङ् खानि चा बारो सिङासान्ङि आयुङिटि, हिट्नुङ् इस्राएलि याप्मिचिगा बारो छोङ्बाचि डोक् सासान् आचोगुम्चिम्चिम्॥#मात्ति २५:३१; लुका २२:३० 29जुन्ङा आनिङ् लाउङ्सा पाङ्ठाङ्, भुम्भु-झान्झा, नाना-झान्झा, पाबा-मामा, छाचि, स्वाँरा नाडुटु, हिट्नाँ साए गुना टोगुटु, हिट्नुङ् लाट्निना चोला टोगुटु॥ 30टरो याप्मा पाइले उलिसागा, हिट्नागा एङ्स्वा उलियुक्, हिट्नुङ् एङ्स्वा उलिगाउम्बाक् पाइले उलियुक्॥”#मात्ति २०:१६; लुका १३:३०
Currently Selected:
मात्ति 19: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
