लुका 19
19
येसु हिट्नुङ् तिरो काफोक्बा जाक्कै
1येसु यारिहो खालाङ्गा लाम्बो लिसाउङ् खाडागेट्टाना डाना॥ 2हिट्ना खालाङ्गाङि जाक्कै उनिङ् लिसाना ठिबाङ् वागाठागा याप्मि तिरो काफोग्बाङाना हाकिम डाना॥ 3जाक्कैङा येसु साइना नुङ् पुमाना निङ्ग्वा चोगुए, टरो जाक्कै उन्ना लिसाउङ् हिट्नुङ् याप्मिचिगा खिमेयाङ्मेङा चोगुनाँ येसु निमा हिडुवाट्टुन्॥ 4हिट्डेउङ् येसु पुसिङा हिट्ना पिन्सा आगाडि आगाडि खाडाउङ् ठिक् वामोखोक्पो उघुङ्माङि ठाङे॥ हिट्ना लाम्बो लिसा डोक् येसु खाडागेट्टाना डाना॥ 5येसु हिट्ना उभुङ्मा सोरि टासुनामे टो पुयुङ् हिट्ना लोडुए, “हाउ जाक्कै, खान् एला ठाया उङ्सा, पोङ्भोने हाट्ले आङा कापाङ्ङि बासा हेन्ङा॥”
6जाक्कै एला एला यो ठाया उङ्से हिट्नुङ् आड्डिक् ओचाप् टासा ओपाङ्ङि येसु खाट्टुए॥ 7ना उनिसुङ् याप्मिचि “येसुम्टे पापि याप्मिङाना ओपाङ्ङि बासा हेन्ङा खाडे” पिक्सा पुजिक् पुजिक् चोक्मा ठालाँ ओचोगे॥
8हिट्नुङ् जाक्कै येसुङाना ओटोकानाङि येबाउङ् येसु लोडुए, “आडाङ्बा, नाहि खेम्सु, आङालोक् युङ्ग्वाना आमाक्फेन्सुबेन्ङाना ओफारा पाक्चा ओवानिगालोङ्सा हान्डुङ्बिडुङ्चिङ्चिङ्, हिट्नुङ् आम्टेप्मा याप्मिचि ढाँट फोक्टुङ्चिउङ् जोम् ओफाबा फोगुएसुङे होला हिट्नागा लोङ्सा आङा टेम्बोक् गुना नोक्टुङ्बिडुङ्चिङ्चिङ्॥”
9येसुङा हिट्ना लोडुए, “हाट्ले नापाङ्ङिगा जाहान्चि माङ्हाङ्ङा हिङुएसुचे॥ पोङ्भोने ना जाक्कै चा आब्राहाम पुङ्लाङिना याप्मि डोक्॥ 10याप्मि छा ओमासागा याप्मिचि कोन्सिङा हिट्नुङ् हिङ्मेप्मा लाउङ्सा टायाना ए॥”#मात्ति १८:११
साम्मेङ् राङ्ङाना मुन्डुम्
(मात्ति २५:१४-३०)
11येसुङा माट्टुना रिङ् याप्मिचिङा ओखेम्सुएट्टुना बेला उन्ङा हिट्नागा आरको ठिक् मुन्डुम् लोडुचे॥ पोङ्भोने येसु यरुसलेम खालाङ्गा नेहेटाङ् होन्डाटाइसाना, हिट्नुङ् याप्मिचिङा येसु यरुसलेम टासुनामे माङ्हाङ् उमुलुक् हाट्ले एला टायुग् पिक्सा उमिट्टेट्टागा॥ 12येसुङा लोडुचे, “ठिबाङ् वागाठेगा याप्मिङा लाप्माङ् देसङि खाप्माना, हिट्नुङ् आप्पे ओदेसङाना हाङ्बा लिमाउङ् पाङ्ङि नोक्माटामाना निङ्ग्वा चोगुए॥#१९:१२ हिट्ना बेला रोमि साम्राटङाना उछिक्ङि खाट्टिटिउगा जोम् मुलुक्चि ओडागा॥ हिट्नागा उमुलुक् भिट्रा हाङ्बा लिमा लोङ्सा रोमि साम्राट टुब्माउङ् हाङ् लिमाना चालान् डाना॥ 13उन् खाप्मा नुङ्ना पाइला हिट्नाङा ठिमेक् ओचाकारचि छेम्डुचिउङ् सोब्बे लोङ्सा ठिक्-ठिक् साम्याङ् राङ् पिडुचिउङ् लोडुचे, ‘आङा टानिङ्लोक् सोम्मा ना राङ्लाम्मा जोम् कामाँ चोगानुम्॥’ 14टरो ओदेसङिगा याप्मिचिङाम्बाक् उन् निङ्ग्वा ओटाडुवाटुन्ना डाना॥ हिट्ना खाडालेट्टाउङ् ओदेसङिगा याप्मिचिङा ‘ना याप्मि आन्याँ लोङ्सा हाङ्बा उलिना चा’ पिक्सा खाबोर लोसिङा याप्मि ओपाङ्सुए॥
15“टरो हिट्ना याप्मि हाङ्बा लिसाउङ् डोक् नोक्टा टाए॥ हिट्नुङ् उन्ङा ओफाबा पिडुचिगा ओचाकारचि छेम्डुचिउङ् ‘खानिङा साम्याङ्ङाना राङ् लाहाब् आचोगुमुङ् खोट्टेप्मा कामाँ आचोगुम्मेगा’ पिक्सा सिलाप्टुचे॥ 16पाइलेना चाकार आबाउङ् लोडुए, ‘आडाङ्बा, खान्ङा आपिडाङ्ना साम्याङ्ङाना राङ्लाम्मा आरु ठिमेक् राङ् कामाँ चोगुएसुङे॥’
17“हिट्नुङ् हाङ्बाङा हिट्ना लोडुए, ‘होहोबास्! आड्डिक् ओचेट्नुलोक् लिसा! आङाना नुना आचाकार, खान् खाट्टियुना येम्बोक्ङि चा बिस्वासिलो आलिसे, हाट्ले आङा खान् ठिमेक् खालाङ्गाङिना सासान् चोक्माना आधिकार पिनाँ॥’
18“आरको टोॽवा काचोक्बा चा आबाउङ् माट्टुए, ‘आडाङ्बा, खान्ङा आपिडाङ्ना राङ्लाम्मा आरु लेम्बोक् राङ् कामाँ चोगुङे॥’
19“हाङ्बाङा हिट्ना चा लोडुए, ‘खान्ङा चा लेम्बोक् खालाङ्गाङि सासान् चोक्मा आटोगुटु॥’
20“हिट्नुङ् फेरि आरको चाकार आबाउङ् लोडुए, ‘आडाङ्बा, खान्ङा आपिडाङ्ना राङ् नाहि युङ्ग्वा, कोए॥ आङा पाक्चा मिचोक्ङे जाबेङि ठोबुङु युङ्सुङे॥ 21खान्लोक् आङा किट्टाङे, पोङ्भोने खान् आड्डिक् छिचोरे याप्मि टे॥ जे खान्ङाना माखाक् हिट्ना खान्ङा आफोगुगा, हिट्नुङ् जे खान्ङा आहिसुन्गा हिट्ना डोक् आछुम्सुगा॥’
22“हिट्डेउङ् हाङ्बाङा हिट्ना लोडुए, ‘हाउ दुस्टा चाकार! खान् ओचाफेन्ना टोॽवा काचोक्बा नुङ् आमाट्टुना कारिङ्लाम् डोक् आङा साजाए पिनाँ॥ जे आङाना माखाक् हिट्ना आङा नाक्टुङ्चिङ्गा हिट्नुङ् जे आङा हिनिङ्ना हिट्नालाम्मा छुम्सुङ्नाँ छिचोरे याप्मि नुङ् खान्ङा ठाहा आटोगुना रैछो, 23हिट्डेउङ् पोङ् खान्ङा ओफाबा नाॽवा कालोग्चिङि लाहाब् आचोग्वाट्टुन्ना टे? हिट्डे आचोगुनाँ बे आङा नोक्ङा आप्ङानाँ ओफाबाङाना ओब्याजउम्टे टोगुङे बे॥’
24“हिट्ना हाङ्बाङा हिट्नि ओयेबागा याप्मिचि लोडुचे, ‘हिट्नाँ काप्टुना राङ् नाप्टानुमुङ् ठिमेक् राङ् काप्टुनालोङ्सा पिडानुम्॥’ 25हिट्नुङ् हिट्नागाँ हाङ्बा ओलोडुए, ‘आन्याँ डाङ्बा, उन्ङाउम्टे ठिमेक् राङ् पाइले डोक् कामाँ चोगुएसुए॥’ 26हाङ्बाङा लोडुचे, ‘नाहि खेम्सानुम्, खोनालोक् युङ्ग्वा हिट्नाँ आझै जोम् टोगुटु, टरो खोनालोक् पाक्चा वाइना, टरोचा हिट्नालोक् लिसाना चा हिट्नालाम्मा नाप्युक्॥#मात्ति १३:१२; मारकुस ४:२५; लुका ८:१८ 27हाट्ले आङा हाङ्बा लिसाङ्ना निङ्ग्वा ओटानिङ्गा आसाट्टुरचि नाहि आप्टानुम्चिउम् आटोकानाङि सेडानुम्चिम्॥’”
येसु यरुसलेमङि लिग्युक्
(मात्ति २१:१-११; मारकुस ११:१-११; युहान्ना १२:१२-१९)
28येसुङा ना मुन्डुम् लोमा हिडुचिउङ् उन् यरुसलेमलेङ् लाहाब् लिसे॥ 29हिट्नुङ् उन् बेथफागे लोक् बेथानिया ओलोडुचिगा युक्ताम्ङिना नेहेट्टाङ् जैतुन ओलोडुना झोन्झोबाङि टासुए॥ हिट्नुङ् ओचेलाचि माड्डे इप्पाङ् छेम्डुचिउङ् नाड्डे पिक्सा पाङ्सुचे, 30“या याना युक्ताम्ङि खाडाचि॥ हिट्नि खान्चिङा खोना चा ओठाङ्निगेट्निना गाधाङा उइछा ओरेक्टुएसुना आटुब्चुचु॥ हिट्नुङ् हिट्ना फेन्डाचुङ् नाहि आप्टाचु॥ 31याप्मिचिङा ‘ना गाधाङा उइछा पोङ् आफेन्डाचुएना?’ पिक्सा मासिलाप्टाचे भोने ‘ना टाङ्बा लोङ्सा चाहाब् लिसाइसे’ पिक्सा लोडाचु॥”
32हिट्नुङ् हिट्नागाचि इप्पाङ् डोक् हिट्ना युक्ताम्ङि खाडा चे हिट्नुङ् येसुङा लोडुचिगा गाड्डे डोक् गाधा उइछा ओरेक्टुएसुना टुबाचुए॥ 33हिट्नागाचिङा गाधा उइछा फेन्डालाबाचुनाङा हिट्ना ओडाङ्बाचि ओआबाउङ् “पोङ् ना गाधा उइछा आफेन्डाचुएना” पिक्सा उसिलाप्टुचे॥
34हिट्नागाचिङा लोडाचुए, “ना आन्याँ टाङ्बा लोङ्सा चाहाब् लिसाइसे॥” 35हिट्नुङ् हिट्नागाचिङा गाधा उइछा येसुङि आप्टाचुए॥ हिट्नुङ् हिट्नागाँ उन्चि रेडिखास्टो गाधा उठुङ्ङि उठिसुए, हिट्नुङ् येसु हिट्ना गाधा उइछा उठुङ्ङि ठाङे॥ 36येसु खाडागेट्टाना बेला याप्मिचिङा उन्चि लोट्लिङ् लाम्बोङि उठिसुङ् स्वागाट् ओचोगुए॥
37हिट्नुङ् येसु यरुसलेमङाना नेट्टाङ् जैतुन झोन्झोबाङाना पेसोक् पेसोक्ना डेन्ङि होन्डा टाए॥ हिट्नुङ् येसुङा डोङ् ठोङ्डिना टोॽवाचि चोगुना उनिसुङ् ख्वाप्पा याप्मिचिङा उन्चि चाप् टासा ठेलोक् उन्चि सोरा ओचोगुङ् माङ्हाङ्ङाना उनिङ् नाड्डे पिक्सा चोन्मा ठालाँ ओचोगुए–
38“टाङ्बा उनिङ्ङि टायाना हाङ्बा
माङ्हाङ्ङा आसिक् पिडुटु॥
टोनालोग्ङि हाङ्हाङ् उलियाक्,
हिट्नुङ् माङ्हाङ्ङाना माहिमा उलियाक्॥”#छाम्लोमा छाप्ला ११८:२६; १४८:१
39हिट्नुङ् याप्मिचिगा खिमेयाङ्मेलाम्मा आम्टेप्मा फारिसि याप्मिचिङा येसु ओलोडुए, “हाउ काहिसिक्बा, काचेलाचि राट्नेनिन् पिक्सा खेमा लाप्टुचि॥” 40येसुङा हिट्नागा लोडुचे, “आङा खानि लोनाँनि, नागा मिचेक्ङे उयुङे भोने, नागा लुङ्गेॽवाचि गोलो चेक्मा ठालाँ ओचोगुटु॥”
येसु यरुसलेम खालाङ्गा लोङ्सा हाब्युक्
41जब येसु यरुसलेम नेहेट्टाङ् होन्डा आबे उन्ङा हिट्ना खालाङ्गा निसुङ् हाबे, हिट्नुङ् नाड्डे पिक्सा माट्टुए, 42“हाट्ले खानि यरुसलेमङिगा याप्मिचिङा हाङ्हाङ् टोक्मालोङ्सा पाक् चोक्मा कोन्युक्ना नुङ् ठाहा आटोगुम्नाम्बे ओचेट्नु लिसे बे, टरो हाट्ले आड्डिक् ढिलो लिसे, टरो हिट्ना हाङ्हाङ् खानि मिक्लाम्मा ठोबाडाना॥ 43हाट्ले नाड्डेना बेला टायुक्, कासाट्टुरचिङा याम्बा-नायाम्बालाम् माखोप्युङ् माछाक्युक्॥ 44हिट्नुङ् हिट्नागाँ खान्लोक् हिट्नुङ् खानि चा जाखाम् माचोगिटि॥ हिट्नागाँ ठिक् लुङ्गेॽवाधारि चा उनाडुन्ना, पोङ्भोने माङ्हाङ् खानि हिङ्मेप्मा लोङ्सा टायाचा खानिङा मिसेन् आनिनेट्निम्॥”
येसु माङ्ठानाङि खाट्युक्
(मात्ति २१:१२-१७; मारकुस ११:१५-१९; युहान्ना २:१३-२२)
45हिट्नुङ्ना येसु माङ्ठानाङिना टेल्लाङ्ङि लिगे हिट्नुङ् हिट्नि बेपार काचोक्बाचि नाड्डे पिक्सा रिक्टुचे, 46“धारमाछाप्लाङि नाड्डे छेप्टेसे, ‘आपाङ् बिन्टि चोक्माना पाङ् लिमा कोन्युक्॥’ टरो खानिङाम्टे याङ्काखुट्चिगा लुम्भुक् आचोगुएसुम्मे॥”#यासैया ५६:७; यारमिया ७:११
47हिट्नुङ् येसुङा सोरोक् माङ्ठानाङि हिसिक्टुचिगा डागा॥#लुका २१:३७ टरो गाडुवाडाङ्बाचि, धारमाबिधि काहिसिक्बाचि हिट्नुङ् आरु ओठेडोङ्चिङा येसु सेप्मा ओकोलुए॥ 48टरो हिट्नागाँ खोना उपाया चा उटुबुवाट्टुन्, पोङ्भोने उन्ङा हिसिक्टुचिगा रिङ्चि याप्मिचिङा आड्डिक् उन्चि निङ्ग्वा ओटासुए॥
Currently Selected:
लुका 19: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
