युहान्ना 4
4
येसु हिट्नुङ् सामारि मेन्झेमा
1युहान्ना नुङ्ना येसुङा याप्मा चेलाचि चोगुएट्टुचि हिट्नुङ् बाप्टिस्मा चा हिट्नागा पिडुएट्टुचि नुङ् फारिसि याप्मिचिङा ओखेम्सुए॥ 2(टरोचा येसु आप्पेङाम्बाक् माखाक्, ओचेलाचिङाम्बाक् बाप्टिस्मा उपिडुचिगा डागा॥) 3फारिसि याप्मिचिङा ना रिङ् ओखेम्सुए नुङ् ठाहा टोगुङ् येसु याहुदिया छेट्रा पोक्टुङ् फेरि गालिल छेट्रालेङ् नोक्टे॥ 4ना बेला उन् सामारिया छेट्राङिना लाम्बो लिसा खाप्मा कोलाना डाना॥ 5हिट्नुङ् उन् सामारिया युक्टाम्ङिना सुखार ओलोडुना डेन्ङि होन्डा टाए॥ हिट्ना युक्टाम्बाक् याकुबङा उइछा योसेफ पिडुना स्वाँरा छेउङि डोक् डाना॥#उत्पति ३३:१९; याहोसु २४:३२ 6हिट्नि याकुबङा चोगुना इनार डाना॥ येसु लाम्टियाउङ् होगोप् पोप्टाउङ् हिट्ना इनार छेउङि युङे॥ हिट्ना बेला लेन्ना लिसागेट्टाना डाना॥
7हिट्ना बेला ठिबाङ् सामारि मेन्झेमा चुवा इप्मा हिट्नि होन्डा टाए॥ येसुङा हिट्ना लोडुए, “आङा चुवा ठुङ्मा याङ्पिडा लो॥” 8हिट्ना बेला ओचेलाचिम्बाक् चामा-ठुङ्मागा थोक्चि इन्सिङा खालाङ्गा ओखाडाइसागा॥
9हिट्नुङ् सामारि मेन्झेमाङा उन् लोडुए, “खान् याहुदि याप्मि आलिसाउङ् चा खोड्डेउङ् आङा सामारि मेन्झेमाङाना मुक्लाम्मा चुवा आठुङुटुना?” (पोङ्भोने याहुदिचिङा सामारिचिलोक् पाक्चा साम्बान्धा उयुङ्सुन्गा॥)#एज्रा ४:१-५; नाहेम्याह ४:१-२
10येसुङा हिट्ना लोडुए, “खान्ङा खान् लाउङ्सा माङ्हाङ्ङाना उपाहार हिट्नुङ् खान्लोक् चुवा ठुङ्मा कानाक्बा याप्मि मिसेन् आनिसुना बे खान्ङा गोलो उन् आनाक्टुए, हिट्नुङ् उन्ङा खान् चोला आपिना चुवा मापिडेए बे॥”
11सामारि मेन्झेमाङा लोडुए, “काहिसिक्बा, खान्लोक् चुवा वाक्माना याङ्ढाङ् डोक् वाइना, इनार चा गाइरो युङ्ग्वा॥ टब खान्ङा खोनालाम्मा हिट्ना चोला आपिना चुवा आटाडुटुना? 12ना इनारउम् आन्याँ टुबाठेबा याकुबङा चोगुना॥ उन् आप्पेङा, ओछालेट्चिङा हिट्नुङ् उपिट्चिङा ना इनारङिना चुवा उठुङुए॥ पाक् खान् आन्याँ टुबाठेबा याकुब नुङ्ना चा आठेना इ?”
13येसुङा हिट्ना लोडुए, “ना चुवा काठुङ्बाचिगा फेरि उन्चि वेॽमा काड्युक्॥ 14टरो जुन् जुन्ङा आङा पिडुङ्चिङ्गा चुवा उठुङुटु, हिट्नागा खोना बेला चा वेॽमाङा उसिनिगा॥ आङा ठुङ्मा पिडुङ्चिङ्गा चुवाम्बाक् हिट्नागा भिट्रा पुन्युयाक्ना चुवाङाना उपुन् लियुक् हिट्नुङ् नाङा हिट्नागा खोना बेला चा लाट्निना चोला पिडुचिचि॥”
15हिट्ना मेन्झेमाङा उन् लोडुए, “काहिसिक्बा, आङा हिट्ना चुवा डोक् ठुङ्मा याङ्पिडा, हिट्नुङ् आङा वेॽमाङा सिनिङ्ना, हिट्नुङ् नाहि चुवा इप्मा चा आप्मायाक्मा कोन्निना॥”
16येसुङा लोडुए, “खाडा हिट्नुङ् कायेम्बिछा छेम्डुङ् नाहि आप्टु॥”
17हिट्ना मेन्झेमाङा लोडुए, “आङानाम्टे आटालिबाङ् डोक् वाइना॥”
येसुङा हिट्ना लोडुए, “काटालिबाङ् वाइना नुङ् खान्ङा ठिक्का डोक् आमाट्टुए॥ 18पोङ्भोने खान्ङाना लेम्बोक् जाना काटालिबाङ्चि उलिमाइडे, हिट्नुङ् हाट्ले खान्लोक् युङ्ग्वाना येम्बिछा चा काटालिबाङ् माखाक्॥ खान्ङा ना रिङ् छेम्बा डोक् आमाट्टुए॥”
19हिट्ना सामारि मेन्झेमाङा लोडुए, “काहिसिक्बा, खान्उम्टे माङ्काटा नुङ् आङा ठाहा टोगुङ्टुङ्॥ 20आन्याँ टुबाठेबाचिङा ना झोन्झोबाङि माङ्ध्यान् ओचोगुए, टरो खानिम्बाक् माङ्ध्यान् चोक्माना डेन् यरुसलेम डोक् नुङ् आमाट्टुम्गा॥”#४:२० याहुदिचिम्बाक् यरुसलेमङिना माङ्ठानाङि याप्मिचिङा माङ्हाङ् बिन्टि ठाङ्मा कोन्युक् उपिगे, टरो सामारिचिङा गिरिज्जिम झोन्झोम्बाङि आरको माङ्ठाना ओचोगुए, हिट्नि बिन्टि ओचोगुए॥ छाम्लोमा छाप्ला १२२:१-४
21येसुङा हिट्ना लोडुए, “हाउ आमो, आङा बिस्वास याङ्चोगा, हिट्ना बेला टायुगेट्, याप्मिचिङा माङ्हाङ् पाबाङाना माङ्ध्यान् ना झोन्झोबाङि चा ओचोगुन्ना, यरुसलेमङि चा ओचोगुन्ना॥ 22खानि सामारिचिङा साक् माङ्ध्यान् चोक्माना मिसेन् डोक् मिनिङे आचोगुएट्टुम्॥ आन्याँ साक् माङ्ध्यान् चोक्माना नुलोक् निसुमाउङ् चोगुएट्टुम्मा, पोङ्भोने मुक्टिम्बाक् याहुदिचिलाम्मा टायुक्॥ 23टरो बेला टायुगेट्, हिट्नुङ् हिट्ना ना बेला डोक्, छेम्बा डोक् माङ्ध्यान् काचोक्बाचिङा माङ्हाङ् पाबा हाङ्सा लोक् छेम्बाना रिङ्ङि माङ्ध्यान् ओचोगुटु॥ नाड्डेगा डोक् माङ्ध्यान् काचोक्बा याप्मिचि पाबाङा कोलुचिचि॥ 24माङ्हाङ् हाङ्सा ए, हिट्नुङ् उन् माङ्ध्यान् काचोक्बाचिङा हाङ्सा लोक् सात्तेङि माङ्ध्यान् चोक्मा कोन्युक्॥”
25ना रिङ् खेम्सुङ् हिट्ना मेन्झेमाङा लोडुए, “आङा ठाहा टोगुएसुङे, मासिह टायुक्, उन् खिरिस्ट चा ओलोडुटु, हिट्नुङ् जब उन् टायुक्, टब उन्ङा डोक् आन्याँ सोब्बे रिङ् याप्मि लोयुक्॥”
26येसुङा लोडुए, “खान्लोक् चेक्येट्ना, हिट्ना डोक् आङा ए॥”
27हिट्ना बेला डोक् ओचेलाचि ओहोन्डा ओटाए, हिट्नुङ् उन् ठिबाङ् मेन्झेमालोक् मुन्डुप्टेट्टाना उनिसुङ् डोङ् ओठोङ्डे, टरो खोनाङा चा “खान् पाक् चाहाब् आलियुक्ना?” आथाबा “पोङ् खान् हिट्ना मेन्झेमालोक् आचेक्येट्ना?” पिक्सा उसिलाप्टुवाट्टुन्॥
28हिट्नुङ् हिट्ना सामारि मेन्झेमाङा चुवाङाना गाक्रो हिट्नि पोक्टुढोङ् खालाङ्गालेङ् खाडे, हिट्नुङ् याप्मिचि लोडुचे, 29“आबानि, ठिबाङ् याप्मि पुयानुम्, उन्ङा आङा चोगुङ्ना सोब्बे टोॽवा बारेङि याङ्लोडे॥ उन् डोक् खिरिस्ट लिमा हियुक् ए?” 30ना रिङ् ओखेम्सुङ् खालाङ्गाङिगा याप्मिचि येसु लिसाना डेन्ङि ओखाडे॥
31हिट्ना घाट्ना लिसानाँ ओचेलाचिङा नाड्डे ओलोडुङ् बिन्टि ओचोगुए, “काहिसिक्बा, पालोवालो चुवाक्॥”
32टरो येसुङा हिट्नागा लोडुचे, “आङालोक् चामाना थोक् युङ्ग्वा हिट्ना बारेङि खानिङा पाक्चा बुजा आचोक्निम्ना॥”
33हिट्डेउङ् चेलाचि उन्चि उन्चि उपिगे, “कोइङा उन् चामागा थोक् उखुट्टुएनि पाइना हाउ?”
34येसुङा हिट्नागा लोडुचे, “आङा कापाङ्बाङाना उनिङ्ग्वा गाड्डे चोक्मा, हिट्नुङ् ओटोॽवा चोक्मा हिमा डोक् आङाना चामाना थोक् ए॥ 35पाक् खानि आपिगिन्गै, आझै ‘चासोङ् हेग्माना टेम्बोक् माइना टेप्मा केङ्गुवा’? टरो आङा खानि लोनाँनि, खानि मिक् फोगानुमुङ् बेङ्सिङि पुयानुम्, चासोङ् सोङ्डाउङ् हेग्मा बेला लिसे॥ 36चासोङ् काहेक्बाङा उनिम्याक् टोगुटु, हिट्नुङ् उन्ङा लाट्निना चोला लोङ्सा चासोङ् छुम्सुटु, हिट्डेउङ् लालिक् काहिबा लोक् चासोङ् काहेग्बा इप्पाङ् डोक् एक्केउ हारका लिचिचि॥ 37पोङ्भोने ‘ठिबाङ्ङा चासोङ् हिसुटु हिट्नुङ् आरकोङा हेगुटु’ नुङ् माप्बालाक् रिङ् छेम्बा डोक् ए॥ 38खानिङा टोॽवालासि आचोगिन्गेट्टिन्गा डेन्ङि आङा खानि चासोङ् छुम्मा पाङ्नाने॥ आरुङा टोॽवालासि ओचोगुएसुए, हिट्नुङ् हिट्नागाँ ओचोगुना टोॽवाङाना फाइदा खानिङा आटोगुएसुम्मे॥”
39सामारि मेन्झेमाङा “आङा चोगुङ्ना सोब्बे टोॽवा उन्ङा याङ्लोडे” पिक्सा साँचि पिडुचिनाँ हिट्ना खालाङ्गाङिगा सामारि याप्मिचि माड्डे याप्माङा येसुङि बिस्वास ओचोगुए॥ 40हिड्नाड्डेउङ् सामारि याप्मिचि येसु सोरि ओटाए, हिट्नुङ् हिट्नागाँ “आन्याँलोक् युङा” पिक्सा नुङ् बिन्टि ओचोगुए, हिट्नुङ् उन् हिट्नि इप्पोक् लेम्बा सोम्मा युङे॥ 41हिट्नुङ् उन्ङा माट्टुना रिङ् ओखेम्सुङ् आरु जोम् याप्मिचिङा चा उन्ङि बिस्वास ओचोगुए॥ 42हिट्नागाँ हिट्ना मेन्झेमा ओलोडुए, “हाट्ले खान्ङा आमाट्टुना रिङ्ङा एरोक् माखाक्, टरो आन्याँ आप्पेङा खेम्सुम्माउङ् बिस्वास चोगुम्टुम्मा॥ उन् छेम्बा डोक् नाराङिना काहिङ्मेप्बा डाङ्बा नुङ् आन्याँ ठाहा टोगुएसुम्मे॥”
येसुङा सारकारङि टोॽवा काचोक्बा याप्मिङाना उइछा नुमानिङ् चोगुना
43येसु हिट्नि इप्पोक् लेम्बा सोम्मा युङाउङ् गालिल छेट्रालेङ् खाडे॥ 44माङ्काटा आप्पे ओदेसङि मान् ओचोगुन्ना पिक्सा येसु आप्पेङा माट्टुए॥#मात्ति १३:५७; मारकुस ६:४; लुका ४:२४ 45जब उन् गालिलङि होन्डा टाए, हिट्नुङ् हिट्निगा गालिलि याप्मिचिङा उन् स्वागाट् ओचोगुए, पोङ्भोने यरुसलेमङि छुट्काराङाना चाडा मानाँ चोक्मा ओखाडानाँ हिट्नागाँ येसुङा चोगुना डोङ् ठोङ्डिना टोॽवाचि उनिसुएसुगा॥#युहान्ना २:२३
46हिट्नुङ्ना येसु फेरि गालिलङिना काना खालाङ्गाङि खाडे॥ हिट्ना खालाङ्गाङि डोक् उन्ङा चुवा इङा चोगुना डाना॥ काफारनाहुमङि ठिबाङ् सारकारि कारेलाएङिना हाकिम डाना, हिट्नाङाना उइछा टुगाइसाना॥#युहान्ना २:१-११ 47येसु याहुदिया छेट्रालाम्मा गालिलङि होन्डा टाए नुङ् खेम्सुङ् हिट्ना येसु सोरि खाडे, हिट्नुङ् “आबाउङ् आइछा नुमानिङ् याङ्चोगाबिडा” नुङ् बिन्टि ठाङ्सुए, पोङ्भोने हिट्नाङाना उइछा सिया लाबाना डाना॥ 48येसुङा हिट्ना लोडुए, “खानिङा चिन्ना लोक् डोङ् ठोङ्डिगा टोॽवा मिनिए सोम्मा खोना बेला चा बिस्वास आचोक्निम्ना॥”
49हिट्ना ठेना हाकिमङा उन् लोडुए, “काहिसिक्बा, आइछा सिमा पाइले डोक् एला आबा लो॥”
50येसुङा हिट्ना लोडुए, “खाडा, काइछा हिङ्युक्॥” येसुङा लोडुना रिङ्ङि हिट्ना याप्मिङा बिस्वास चोगुए, हिट्नुङ् हिट्ना ओलाम्बो खाडे॥
51हिट्नुङ् हिट्ना खाडागेट्टाना बेला लाम्बोङि डोक् ओचाकारचिङा उटुबुङ् “काइछा नुमानिङ् लिसे” पिक्सा ओलोडुए॥ 52हिट्नुङ् हिट्नाङा खोना बेलाउङ् पिच्छा नुमानिङ् लिसेना पिक्सा सिलाप्टुचिनाङा हिट्नागाँ ओलोडुए, “आसेन् लेम्बा ठिक् बाजेलाम्मा हिट्ना ओजोरोङा लेडुए॥” 53येसुङा हिट्ना “काइछा हिङ्युक्” पिक्सा लोडुना बेलाउङ् डोक् रैछो नुङ् उप्पाङा ठाहा टोगुए॥ हिट्नुङ् उन् आप्पेङा लोक् ख्वाप्पा ओजाहान्चिङा येसुङि बिस्वास ओचोगुए॥
54नाम्बाक् याहुदियालाम्मा गालिलङि टायाउङ् येसुङा दोस्रो खेप् चोगुना डोङ् ठोङ्डिना चिन्ना डाना॥
Currently Selected:
युहान्ना 4: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
