युहान्ना 12
12
मारियाम लोक् येसु
(मात्ति २६:६-१३; मारकुस १४:३-९)
1छुट्कारा चाडा उटुम् लिमा नुङ्ना ङा लेम्बा पाइले येसु बेथानिया युक्टाम्ङि होन्डा टाए॥ हिट्ना युक्ताम्ङि लाजारस युङाना डाना, उन् डोक् येसुङा सियानालाम्मा उहिङ्ग्वाट् चोगुना॥ 2येसु ओसाइबाचिङा उन् लोङ्सा हिट्ना युसाङाना चामा-ठुङ्मा टेयार ओचोगुए॥ मारथाङाम्बाक् चामा-ठुङ्मा पाक्मा घुवार फाडुचे, हिट्नुङ् लाजारसम्बाक् येसु हिट्नुङ् आरु याप्मिचिलोक् चामा चाङा युङाइसाना॥ 3हिट्नुङ् मारियामङा जाटामासिलाम्मा चोक्बालाक् ओफारा लिटार आड्डिक् माहाङ्गो बुङ्बुङ् नाम्ना आट्टार आप्टुए हिट्नुङ् येसुङाना ओलाङ्ङि नेक्टुबिडुङ् ओफ्याक्ङा टुगुबिडुए॥ हिट्नुङ् हिट्ना आट्टार बुङ्बुङ् नाम्साउङ् पाङ् डोक् इप्टुए॥#लुका ७:३७-३८ 4टरो ओचेलाचि माड्डे उन् धोका पिमा निङ्ग्वा काचोक्बा याहुदा इस्कारियोतङा माट्टुए, 5“ना आट्टार सुम्बोक् साए रुपा राङ्ङि#१२:५ सुम्बोक् साए रुपाक् राङ्– ना ओफाबाम्बाक् ठिक् सालङाना निम्याक् बोरोबोर लियुक्॥छोङ्सुम्मुङ् हिट्ना ओफाबा पाक्चा वानिगालाउङ्सा पिडुम्चिम्नाँ लिनेट्नि बे टे?” 6टरो हिट्नाङा पाक्चा ओवानिगा माया चोगुचिउङ् हिट्नाड्डे लोडुचिगा माखाक्, पोङ्भोने हिट्ना याङ्काखुट् डाना, हिट्नुङ् ओफाबा युङ्माना चाम्सुप्मा हिट्नाङा डोक् युङ्सुना, हिट्नुङ् हिट्निलाम्मा ओफाबा याङ्खुट्टुगा डागा॥
7येसुङा लोडुए, “लिसे, उन् पाक्चा लोनेनुम्, नाङा आङाना आयेम् ओहुम्पाङि हुम्मा टेयार चोक्मा लोङ्सा ना आट्टार याङ्नेक्टाबिडाङ्ना॥ 8पोङ्भोने पाक्चा ओवानिगाउम् सोरोक् खानिलोक् उलियुक्, टरो आङाम्टे सोरोक् खानिलोक् युङ्निङ्ना॥”#धारमाबिधि १५:११
9याहुदि याप्मिचिगा ठेना खिमेयाङ्मेङा येसु हिट्नि वाहेट् नुङ् ठाहा ओटोगुए॥ हिट्नुङ् हिट्नागा येसु पुमा एडोक् माखाक्, टरो उन्ङा सियानालाम्मा उहिङ्ग्वाट् चोगुना लाजारस चा पुमालाउङ्सा हिट्नागा ओटायागा डागा॥ 10हिड्नाड्डेउङ् गाडुवाडाङ्बाचिङा लाजारस चा सेप्माउङ्सा रिङ् ओटोङ्सुए॥ 11पोङ्भोने हिट्नाङा चोगुनाँ याहुदिचि माड्डे आम्टेप्मा याप्मिचिङा हिट्नागा ओनाडुचिउङ् येसुङि बिस्वास चोक्मा ठालाँ ओचोगुए॥
येसु यरुसलेमङि स्वागाट् ओचोगुना
(मात्ति २१:१-११; मारकुस ११:१-११; लुका १९:२८-४०)
12आरको लेम्बा चाडाङि ओटायागा याप्मिचिगा खिमेयाङ्मेङा येसु यरुसलेमङि आप्युगेट् नुङ् ओखेम्सुए, 13हिट्नुङ् याप्मिचि खाजुर उभुङ्माङाना ओहागेप्पाचि ओयाङुङ् नाड्डे पिक्सा उन् स्वागाट् चोक्ङा राट्सा ओहोन्डे,
“होसान्ना,#१२:१३ हिट्नागाँ ओमाट्टुना रिङ् “होसान्नाम्बाक्” आरामिक् रिङ् ए, नाङाना उटुप् “माङ्हाङ्ङाना माहिमा उलियाक्” लियुक्॥ टाङ्बा उनिङ्ङि टायाना माङ्हाङ्ङा आसिक् पिडुटु!
इस्राएलङिना हाङ्बा लाउङ्सा माङ्हाङ्ङा आसिक् पिडुटु!”#छाम्लोमा छाप्ला ११८:२५-२६; सापान्याह ३:१५
14येसुङा ठिक् गाधा उइछा टुबुङ् उन् हिट्नि ठाङे॥ ना बारेङि धारमाछाप्लाङि चा नाड्डे छेप्टेसे–
15“हाउ यरुसलेमङिगा याप्मिचि, किट्नेनिन्,
पुयानुम्, खानि हाङ्बा गाधा उइछाङि ठाङाउङ् आप्युगेट्॥”#जाकारिया ९:९
16हिट्ना बेला येसु ओचेलाचिङा नागा रिङ् बुजा ओचोग्वाट्टुन्॥ टरो येसु सियानालाम्मा उहिङ्ग्वाट् लिसाउङ् टोनालोक्ङिना माहिमाङि नोक्टा खाडाउङ् एडोक् नागा रिङ् उन्ङाना बारेङि ओछेप्टुना हिट्नुङ् उन् याप्मिचिङा पाक् ओमेट्टुएना हिट्ना रिङ् हिट्नागाँ उमिट्टुए॥
17येसुङा सियाना लाजारस ओहुम्पालाम्मा छेम्डुङ् उहिङ्ग्वाट् चोगुना उनिसुगा याप्मिचिङा उन्ङा चोगुना टोॽवा बारेङि साँचि याप्मिचि उपिडुयाक्टुचे॥ 18येसुङा ना डोङ् ठोङ्डिना टोॽवा चोगुना ओखेम्सुनाँ याप्मिचिगा खिमेयाङ्मे उन् टुब्सिङा ओखाडागा डागा॥ 19फारिसि याप्मिचि उन्चि उन्चि उपिगे, “खोलो, आनि पाक्चा चोक्मा हिनेट्निम्॥ पुयानुम्, नाराङिगा ख्वाप्पा याप्मिचि उन्लेङ् लाहाब् उलिमाइडे॥”
आम्टेप्मा गिरिक् याप्मिचिङा येसु ओकोलुना
20आम्टेप्मा गिरिक् याप्मिचि चाडा बेला माङ्ध्यान् चोक्ङा यरुसलेम ओआबाइसागा॥ 21हिट्नागाँ गालिल छेट्राङिना बेथसेदा युक्टाम्ङि युङ्ना फिलिप सोरि ओआबाउङ् ओलोडुए, “डाङ्बा, आन्याँ येसु टुप्माना निङ्ग्वा चोगुएसुम्मे॥”
22फिलिप खाडाउङ् ना रिङ् आन्दरियास लोडुए, हिटनुङ् फिलिप लोक् आन्दरियास इप्पाङ् डोक् खाडाचिउङ् येसु ना रिङ् खेम्मेटाचुए॥ 23येसुङा हिट्नागाचि लोडुचे, “हाट्ले याप्मि छाङाना माहिमा लिमाना बेला टाइसे॥ 24छेम्बा डोक्, आङा खानि लोनाँनि, गाहुँङाना ओगेडा खाम्ङि ठायुङ् सिनेट्नि भोने हिट्ना हिड्डे डोक् लियुक्॥ टरो हिट्ना सिए भोने एडोक् जोम् चालिङ् केङुटु॥ 25कोइ याप्मिङा ओचोला आड्डिक् माया चोगुटु भोने हिट्नाँ हिट्ना मासुटु, टरो ओचोला ना नाराङि पाक्चा माखाक् नुङ् माट्टुटु भोने हिट्नाँ लाट्निना चोला लोङ्सा हिट्ना जोगाँ चोगुउङ् युङ्सुटु॥#मात्ति १०:३९; १६:२५; मारकुस ८:३५; लुका ९:२४; १७:३३ 26कोइङा आङाना सेवा चोगुटु भोने हिट्नाङा आङा डोक् याङ्उरिक्याक् हिट्नुङ् आङा खोनि खोनि लिङा आङाना सेवा काचोक्बा चा हिट्नि लियुक्॥ कोइङा आङाना सेवा चोगुटु भोने पाबाङा हिट्ना मान् चोगुटु॥
येसुङा उन् सिना बारेङि माट्टुना
27“हाट्ले आनिङ्ग्वा आड्डिक् टुगाइसे, हिट्नुङ् आङा पाक् माप्माना? ‘हाउ माङ्हाङ् पाबा, आङा ना याङ्छामालाम्मा याङ्होट्टा’ नुङ् पिक्मानि? माखाक्, आङा ना याङ्छामा फोक्मालाउङ्सा डोक् नाराङि टायाङ्ना॥ 28हाउ पाबा, खान् आम्टेप्मा माङ्ठेना नुङ् खान्ङा आप्पे याप्मिचि निमेट्टुचि॥”
टब टोनालोग्लाम्मा नाड्डेना ठिक् साब्दा मुक्टे, “आङा आम्टेप्मा माङ्ठेना नुङ् याप्मिचि निमेट्टुएसुङ्चिङे, हिट्नुङ् फेरि चा चोगुङ्टुङ्॥”
29हिट्नि ओयेबाइसागा याप्मिचिगा खिमेयाङ्मेङा ना सोरा ओखेम्सुङ् उपिगे, “ना गुरुङ्बा ए!” आरुङाम्बाक् ओमाट्टुए, “माङ्हाङ् रिङ् काउग्बा उन्लोक् चेक्टाना ए!”
30येसुङा हिट्नागा लोडुचे, “ना साब्दा आङालोङ्सा माखाक्, टरो खानि लोङ्सा ए॥ 31हाट्ले ना नाराङाना न्याए चोक्मा बेला लिसाइसे॥ हाट्ले ना नारा सासान् काचोक् सासाक् माङ्हाङ्ङा भारा लेप्टुटु॥ 32हिट्नुङ् जब आङा नारालाम्मा टो फोक्ङा खाट्नाँ, आङा ख्वाप्पा याप्मिचि आङालेङ् साडुङ्चिङ्चिङ्॥” 33येसुङा उन् खोड्डे पारिक् सिमा कोन्ना लियुक्ना हिट्ना निमेप्माउङ्सा उन्ङा नाट्डे माट्टुना॥
34याप्मिचिगा खिमेयाङ्मेङा उन् उसिलाप्टुए, “खिरिस्ट सोरोक् हिङ्युयाक्युक् नुङ् आन्याँ धारमाबिधिलाम्मा खेम्सुएसुम्मे॥ याप्मि छा टो फोक्युखाट्युक् नुङ् खान्ङा खोड्डेउङ् माप्मा आहिडुटुना? ना याप्मि छाउम्बाक् साइना टे?”#छाम्लोमा छाप्ला ११०:४; यासैया ९:७; इजिकिएल ३७:२५; दानिएल ७:१४
35येसुङा हिट्नागा लोडुचे, “व्हाङ्उम् छोप्मोङ् धारि सोम्मा खानिलोक् लियुक्॥ व्हाङ् खानिलोक् लिलोक् सोम्मा खानि लाम्बोङि लाम्टियानि, हिड्डेउङ् खानि डुम्बारिक् डुम्ङा माफोप्टिन्गा॥ डुम्बारिक् डुम्ङि लाम्टिना याप्मिङा उन् खोनाइ खाट्युगेट्ना नुङ् ठाहा टोगुन्ना॥ 36खानिलोक् व्हाङ् लिलोक् डोक् हिट्ना व्हाङ्ङि खानिङा बिस्वास चोगानुम्, हिट्नुङ् खानिम्बाक् व्हाङ्ङाना छालेट्चि आलिसिटि॥”
नाट्टेप्मा माप्मा हिडुङ् येसु हिट्निलाम्मा खाडालेट्टे, हिट्नुङ् हिट्नागालाम्मा ठोबाउङ् युङे॥
याप्मिचिङा येसु बिस्वास ओचोग्वाट्टुन्
37येसुङा हिट्नागा याप्मिचिगा टोकानाङि डोक् नाट्टेप् औधि डोङ् ठोङ्डिगा टोॽवा चोगुए, टरो चा हिट्नागाँ उन् बिस्वास ओचोग्वाट्टुन्॥ 38नाड्डेउङ् माङ्काटा यासैयाङा माट्टुना ना रिङ् युदे–
“हाउ टाङ्बा, आन्याँ माट्टुम्माना खाबोर साङा बिस्वास ओचोगुएना?
हिट्नुङ् काबोल् साक्ङा उनिसुएसुएना?”#यासैया ५३:१
39हिट्डेउङ् हिट्नागाँ बिस्वास चोक्मा उहिडुवाट्टुन्, पोङ्भोने यासैयाङा फेरि नाड्डे माट्टुएसुए–
40“टाङ्बाङा हिट्नागाँगा उन्चि मिक्ङा याङ्उनिसुन्लोक् चोगुबिडुएसुचे,
हिट्नुङ् हिट्नागाँगा निङ्ग्वा काठोर चोगुबिडुएसुचे,
हिट्नाड्डेउङ् हिट्नागाँ याङ्उनिसुन्गा,
उन्चि निङ्ग्वाङा उमिट्टुन्गा,
नाभाम्टे हिट्नागा आङालेङ् ओनोक्युक्
हिट्नुङ् आङा हिट्नागा नुमानिङ् चोक्माचि कोन्युक्॥”#यासैया ६:१०
41यासैयाङा येसुङाना ठेना माहिमा लोक् हान्डेङ् लिना रिङ् निसुनाँ उन्ङा येसुङाना बारेङि नागा रिङ् माट्टुए॥
42हिट्नुङ् चा आम्टेप्मा याहुदि ओठेडोङ्चिङा चा हिट्नुङ् आरु याप्मा याप्मिचिङा चा उन् बिस्वास ओचोगुए, टरो फारिसि याप्मिचिङा याहुदिचिगा छुम्मापाङ्लाम्मा ओहोट्टुचिचि नुङ् उकिट्टाउङ् हिट्नागाँ ना रिङ् साक्चा ओलोडुवाट्टुन्चिन्॥ 43पोङ्भोने हिट्नागाँ माङ्हाङ्लाम्मा मान् नुङ्ना चा याप्मिचिलाम्मा टोग्माना मान् उन्चि निङ्ग्वा ओटासुगा डागा॥
आबिस्वासिचिङा साजाए ओटोगुटु
44येसुङा सोब्बेङा ओखेम्सुलोक् माट्टुए, “आङा बिस्वास काचोक्बाङा आङा एडोक् माखाक्, टरो आङा कापाङ्बा चा बिस्वास चोगुटु॥ 45हिट्नुङ् आङा कानिबाङा आङा कापाङ्बा चा निसुटु॥ 46आङा बिस्वास काचोक्बा साक्चा डुम्ङि उलिनि चा नुङ् आङा नाराङिना व्हाङ् लिसाउङ् टाइसाङे॥ 47कोइङा आरिङ् खेम्सुङ् पालान् चोगुन्ना भोने, आङा हिट्नाङाना न्याए चोक्निङ्ना, पोङ्भोने आङा नारा न्याए चोक्ङा माखाक्, टरो नारा हिङ्मेप्माउङ्सा टायाङ्ना॥ 48आङा इन्कार काचोक् हिट्नुङ् आङा माट्टुङ्ना रिङ् बिस्वास चोगुन्ना भोने हिट्नाङाना न्याए लियुक्॥ आङा माट्टुङ्ना रिङ्ङा डोक् आखेरि लेम्बाङि हिट्नाङाना न्याए चोगुटु॥ 49पोङ्भोने नागा रिङ् आङाना आप्पे आधिकारङा चेक्टाङ्ना माखाक्, टरो आङा कापाङ्बा माङ्हाङ् आप्पाङा डोक् आङा पाक् माप्माना हिट्नुङ् खोड्डे माप्माना हिट्ना रिङ्ङाना आग्याँ आङा याङ्पिडेसे॥ 50उन्ङाना आग्याँङा लाट्निना चोला आपियुक् नुङ् आङा ठाहा युङ्ग्वा॥ नाड्डेउङ् माङ्हाङ् पाबाङा माट्टु नुङ् लोडाङ्ना रिङ् डोक् आङा माट्टुङ्टुङ्॥”
Currently Selected:
युहान्ना 12: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
