मुलिचेला टोॽवा 7
7
इस्तिफानासङाना हिसिक्मा
1हिट्नुङ् सानिङ्डाङ्बाङा इस्तिफानास सिलाप्टुए, “पाक् खान् नागा याप्मिचिङा फाट्टुर मालाबाना रिङ् छेम्बा डोक् इ टे?” 2हिड्डेउङ् उन्ङा हिट्नागा लोडुचे, “आप्पोचि, आम्भु-आन्झाचि, खेम्सानुम्, आनि टुबाठेबा आब्राहाम हारान खालाङ्गाङि युङ्मा खाप्मा पाइले उन् मेसोपोटामिया छेट्राङि वासाना बेला माङ्हाङ्ङाना माहिमा उन्ङि ठेट्टे, 3हिट्नुङ् माङ्हाङ्ङा उन् नाड्डे लोडुए, ‘ना देस हिट्नुङ् कानातेदारचि नाडुढोचिउङ् जुन् देस आङा खान् निमेट्नाँ हिट्नि खाडा॥’#उत्पति १२:९
4“हिट्नुङ् उन् काल्दि ओलोडुचिगा उयुङागा देसलाम्मा होन्डाउङ् हारानङि खाडाउङ् युङे॥ हिट्नि उप्पा ठायाडे हिट्नुङ् माङ्हाङ्ङा उन् हिट्ना देसलाम्मा हाट्ले खानि आयुङिगा ना देसङि आप्टुए॥ 5हिट्नाडे लिसा चा माङ्हाङ्ङा आब्राहाम खाट्टिप्मा स्वाँरा धारि ओपाइला युङ्मा लोङ्सा चा ना देसङि पिडुवाट्टुन्, टरो माङ्हाङ्ङा आब्राहाम ‘ना देस खान् हिट्नुङ् काछालेट्चि पिनाँ’ पिक्सा माङ्हुप् चोगुए॥ माङ्हाङ्ङा माङ्हुप् चोगुना बेला आब्राहामङाना ठिबाङ् चा उइछाचि ओवानेट्निगा॥ 6माङ्हाङ्ङा आब्राहाम फेरि नाड्डे लोडुए, ‘काछालेट्चि आरुङाना देसङि ओखाट्युङ् उयुङ्युक्, हिट्नुङ् हिट्नागा याप्मिचिङा कामारा ओचोगुचिउङ् टेम्बोक् साए बारखा टेप्मा ओचाफेन्ना चाट्ला ओमेट्टुचिचि॥ 7टरो कापुङ्लाचि कामारा चोक्मा कामेप्बाचि हिट्नागा याप्मिचि आङा साजाए पिडुङ्चिङ्चिङ्॥ हिट्नुङ् कापुङ्लाचि हिट्ना देसलाम्मा ओहोन्युक् हिट्नुङ् ना डेन्ङि आङा माङ्ध्यान् याङ्ओचोक्युक्॥’#उत्पति १५:१३,१४ 8हिट्नुङ् माङ्हाङ्ङा आब्राहामलोक् माङ्हुप् रेक्टुए हिट्नुङ् हिट्ना माङ्हुप् मिप्मा लोङ्सा खाताना चोक्माना आग्याँ आब्राहाम पिडुए॥ हिट्नुङुना आब्राहामङाना उइछा इसाहाक पोङ्से॥ आब्राहामङा उइछा इसाहाकङाना साङ् लेम्बा खाताना चोगुबिडुए॥ इसाहाकङा उइछा याकुब हिट्नुङ् याकुबङा चा बारो जाना उइछाचिगा खाताना चोगुबिडुचे॥ नागा डोक् आनि बारो छोङ्बाचिगा टुबाठेबा उलिसे॥#उत्पति १७:१०-१४; २१:२-४; २५:२६; २९:३१-३५ 9टरो याकुबङा उइछाचिङा उन्चि झान्झा योसेफ सिसा उहिडुवाट्टुन्, उन् मिस्रा देसङिना याप्मिलोक् ओछोङ्सुडिसुए हिट्नुङ् उन् चाकार काचोक्बा लिसे॥ टरो माङ्हाङ् योसेफलोक् लिसे#उत्पति ३७:११,२८; ३९:२,२१, 10हिट्नुङ् माङ्हाङ्ङा ख्वाप्पा उदुखेसोलाम्मा होट्टुए॥ मिस्रा देसङाना हाङ्बा फारोङाना ओटोकानाङि माङ्हाङ्ङा उन् नुना निङ्ग्वा हिट्नुङ् ठोना पिडुए, हिट्नुङ् फारो हाङ्ङा उन् मिस्रा देसङि सासान् चोक्ङा हिट्नुङ् सोब्बे उन्ङाना माक्फेन्सुबेन् पुमा नियुक्ता चोगुए॥#उत्पति ४१:३९-४१
11“मिस्रा देस हिट्नुङ् कानान देसङि आड्डिक् ठेना आनिकाल ठाए हिट्नुङ् ठेना रुडि ठाए॥ हिड्डेउङ् आनि टुबाठेबाचिङा पाक्चा चामा-ठुङ्मागा थोक् ओटोग्वाट्टुन्॥#उत्पति ४२:१-२ 12टरो याकुबङा मिस्रा देसङि जोम् चासोक् युङ्ग्वा नुङ् खेम्सुङ् उइछाचि पाइलेना खेप् चासोङ् इन्सिङा हिट्ना देसङि पाङ्सुचे॥ 13हिट्डेउङ् हिट्नागा दोस्रो खेप् चासोङ् इन्सिङा ओखाडाना बेला योसेफङा उम्भु-उन्झाचि ‘आङा योसेफ’ पिक्सा लोडुचे, हिट्नुङ् फारोङा चा योसेफङाना ओपाङ्ठाङ्ङिगा याप्मिचि नुङ् ठाहा टोगुए॥#उत्पति ४५:१,१६ 14हिट्नुङ् योसेफङा उप्पा याकुब हिट्नुङ् ख्वाप्पा ओपाङ्ङिगा याप्मिचि मिस्राङि आबानि पिक्सा खाबोर हाङ्सुए॥ हिट्नागा ख्वाप्पा पाचाहात्तार जाना ओडागा॥#उत्पति ४५:९-१०,१७-१८; ४६:२७ 15हिट्नुङ् याकुब मिस्रा देसङि खाडे, हिट्नुङ् उन् हिट्नि डोक् सिए, हिट्नुङ् आनि टुबाठेबाचि चा हिट्नि डोक् उसिए॥#उत्पति ४६:१-७; ४९:३३ 16हिट्नुङुना उन्चिङा सियाना याप्मि साकेम ओलोडुना डेन्ङि ओखाट्टुए, हिट्नुङ् आब्राहामङा हामोरङा उइछाचिलाम्मा इनुना उहुम्पाडाम्ङि उहुमुचे॥#उत्पति २३:३-१६; ३३:१९; ५०:७-१३; याहोसु २४:३२
17“जब माङ्हाङ्ङा आब्राहामलोक् चोगुना माङ्हुप् युमा बेला, मिस्रा देसङि जोम् आनि याप्मिचि ओपोए॥ 18हिट्ना बेला हिट्नि आरको हाङ्बाङा मिस्रा देसङि सासान् चोक्मा उटुम् चोगुए हिट्नुङ् हिट्नाङा योसेफङाना बारेङि खेम्सुन्गेट्टुन्ना डाना॥#पारस्थान १:७-८ 19हिट्नाङा आनि टुबाठेबाचि बिरोधङि योजाना चोगुए हिट्नुङ् आड्डिक् ओचाफेन्लोक् मेट्टुचे हिट्नुङ् इस्राएलि याप्मिचिगा येम्बेछा ओओचि उसियाक् नुङ् ओपोङ्नामे पाङ्लाम् भारा लेप्मामेट्टुचे॥#पारस्थान १:१०-११,२२
20“हिट्ना बेला मोसा ओलोडुना याप्मि पोङ्से॥ उन् आड्डिक् ओचेट्नुना ओओ डाना॥ उप्पा-उमाङा ना ओओ सुम्बोक् माइना सोम्मा पाङ्ङि ठोबाचुङ् युङ्साचुए॥#पारस्थान २:२ 21टरो उन् ठोप्मायाक्मा टुगाउङ् पाङ् भारा उयुङ्सुनाँ हिट्नि फारो हाङ्बाङा मेन्झेमा उइछा हाङ्माङा टुबुए हिट्नुङ् उइछा गाड्डे चोगुङ् ओम्डुए॥#पारस्थान २:३-१० 22हिट्डेउङ् मोसा मिस्राङि उहिसिक्टुचिगा सोब्बे हिसिक्माचि सिकाँ लिसे॥ हिट्नुङ् उन् रिङ् लोक् टोॽवाङि आड्डिक् बोल्लेउ लिसा खाडे॥
23“जब मोसाङा चालिस बारखा टासुए, उन्ङा ओनातेदार इस्राइलिचि टुब्सिङा खाप्माना निङ्ग्वा चोगुए॥ 24ठिक् लेम्बा ठिबाङ् मिस्रि याप्मिङा ठिबाङ् इस्राएलि याप्मि लेम्सुएट्टुना मोसाङा निसुए॥ हिट्नुङ् उन् इस्राएलि याप्मि घुवार फाडुए हिट्नुङ् मिस्रि याप्मि सेडुए॥ 25माङ्हाङ्ङा उन्ङाना ‘आप्पे इस्राएलि उम्भु-उन्झाचि छुट्कारा पिमाचि आङा याङ्पाङ्साना रिङ्’ हिट्नागाँ बुझा ओचोगु नुङ् मोसाङा मिट्टुएसुना, टरो हिट्नागाँ हिट्ना रिङ् बुजा ओचोग्वाट्टुन्॥ 26हिट्नुङ् हान्डेङ् फेरा इप्पाङ् इस्राएलि याप्मिचि चुङेट्टाचिगा निसुचे हिट्नुङ् उन्ङा चुङ्नेन्चिन् पिक्सा नाड्डे लोडुचे ‘हाउ साइबाचि, खान्चिउम्टे उम्भु-उन्झा गोलो टे, पोङ् आखेचिचिगा?’
27“टरो हिट्ना ओटाक्लुङ् कालेम्बाङा मोसा याम्बालेङ् इन्डुङ् लोडुए, ‘खान् साङा आन्याँना सासाक् हिट्नुङ् न्याए काचोक्बा माचोगेना? 28खान्ङा आसेन् मिस्रि याप्मि आसेडु गाड्डे डोक् आङा चा आसेट्ङानि?’#पारस्थान २:१४ 29ना रिङ् खेम्सुङ् मोसा मिस्रा देसलाम्मा पिन्डा खाडाउङ् मिद्यान देसङि खाडे हिट्नुङ् हिट्नि डोक् युङे॥ हिट्नि भ्या लिसाउङ् इप्पोक् येम्बेछा उइछाचि ओपोङ्से॥#पारस्थान २:११-१५; १८:३-४
30“चालिस बारखा काक्टुङ्, मि हाट्टेट्टाना झोराङाना ओसाङ्ङि माङ्हाङ् रिङ् काउग्बा मोसा सोरि ठेट्टे॥ हिट्ना बेला मोसा सिनाइ ओलोडुना झोन्झोबा नेहेट्टाङ् खुसुना डेन्ङि डाना॥ 31ना निसुङ् मोसा डोङ् ठोङ्डाउङ् ‘पाइना टे’ पिक्सा नुलोक् पुसिङा हिट्ना सोरि खाडानाँ उन्ङा माङ्हाङ्ङाना उरिङ् खेम्सुए, 32‘आङा काटुबाठेबाचि आब्राहाम, इसाहाक, हिट्नुङ् याकुबङाना माङ्हाङ् ए॥’ हिट्ना खेम्सुङ् मोसा किट्टाउङ् योक्टे हिट्नुङ् हिट्ना पुमा किट्टे॥#पारस्थान ३:६
33“हिट्नुङ् टाङ्बाङा लोडुए, ‘कालाङ्सुप् फेन्डु, पोङ्भोने खान् आयेबेसाना डेन् सेङ्सेङ्ना ए॥ 34आयाप्मिचिङा मिस्रा देसङि याङ्छामा ओटोगुना आङा निसुङे हिट्नुङ् हिट्नागा सानिङ्ग्वा ओलोसागा रिङ् आङा खेम्सुङे॥ हिड्डेउङ् आङा इस्राइलिचि मिस्रा देसङिगा याप्मिचिलाम्मा छुट्कारा पिमा उङ्सेसाङे॥ हाट्ले हिट्नागा घुवार फासिङा मिस्रा देसङि आङा खान् पाङ्नाँ हिट्नि खाप्मा टेयार लिसा॥’#पारस्थान ३:१-१०
35“ना मोसा डोक् इस्राएलिचिङा ‘खान् साङा सासाक् हिट्नुङ् न्याए काचोक्बा माचोगेना?’ पिक्सा इन्कार ओचोगुना डाना, टरो झोराङि ठेट्टाना माङ्हाङ् रिङ् काउग्बालाम्मा माङ्हाङ्ङा मोसा डोक् हिट्नागाँगा सासाक् हिट्नुङ् छुट्कारा कापिबा चोगुङ् पाङ्सुए॥#पारस्थान २:१४ 36मोसाङा डोक् इस्राएलि याप्मिचि मिस्रा देसलाम्मा भारा होट्टुचे, हिट्नुङ् मिस्राङि, लाल सामुन्दराङि, हिट्नुङ् चालिस बारखा सोम्मा खुसुना डेन्ङि याप्मा डोङ् ठोङ्डिगा टोॽवाचि चोगुए॥#पारस्थान ७:५; १४:२१; गान्ति १४:३३
37“ना मोसाङा डोक् इस्राएलि याप्मिचि नाड्डे लोडुएसुचिगा, ‘माङ्हाङ्ङा आङा गाड्डेना माङ्काटा खानिगा आप्पे याप्मिचिलाम्मा खानि लोङ्सा ठिबाङ् माङ्काटा पाङ्सुटु॥’#धारमाबिधि १८:१५ 38ना मोसा डोक् इस्राइलि याप्मिचि खुसुना डेन्ङि ओवासानाँ हिट्नागालोक् डाना, हिट्नुङ् सिनाइ झोन्झोबाङि माङ्हाङ् रिङ् काउग्बा उन्लोक् हिट्नुङ् आरु आनि टुबाठेबाचिलोक् चेक्टे हिट्नुङ् उन्ङा डोक् चोला टोगुम्ना माङ्हाङ् रिङ् टोगुङ् आनि आखेम्मेट्टे॥#पारस्थान १९:१–२०:१७; धारमाबिधि ५:१-३३
39“टरो आनि टुबाठेबाचिङा मोसा इन्कार ओचोगुङ् हिट्नागा ओटेन्नेएट्नि हिट्नुङ् हिट्नागाँ मोसा इन्कार ओचोगुङ् मिस्रा देसङि डोक् नोक्माना निङ्ग्वा ओचोगुए॥ 40हिट्डेउङ् हिट्नागाँ मोसाङा उम्भु हारुन नाड्डे ओलोडुए, ‘आनिलोङ्सा लाम्बो कानिमेब्बा साम्माङ्चि याप्मिचोगाबिडा॥ मिस्रालाम्मा आन्याँ याप्मि होट्टाना मोसा पाक् लिसेना नुङ् आन्याँ ठाहा वाइना॥’#पारस्थान ३२:१ 41हिड्डेउङ् हिट्नागाँ पिट्चिलेट्ङाना मुरति उठुबुए हिट्नुङ् हिट्नि भोक् चा ओचोगुए॥ हिट्नागाँ ओचोगुना टोॽवाङि उन्चि चाप् टासा मुरति आदार पिमा हारकाङाना रिङ् ओचोगे॥#पारस्थान ३२:२-६ 42टरो माङ्हाङ्ङा हिट्नागा चिम्मा फुट्टुचे हिट्नुङ् टाङ्साङ्, नाम्, लालिप्माङ्, चोक्चिङ्गेट्चि साम्माङ् ओचोगुचियाक् नुङ् हिट्नागा नाडुचे॥ ना रिङ् माङ्काटाचि छाप्लाङि छेप्टेसे–
‘हाउ इस्राएलि याप्मिचि, खानि खुसुना डेन्ङि चालिस बारखा आवासिनाँ
भोक् आठाङ्सुमे हिट्ना आङालोङ्सा माखाक्॥
43टरो खानिङाम्टे मोलेख ओलोडुना साम्माङ्ङाना पाल
हिट्नुङ् रेफान ओलोडुना साम्माङ्ङाना चोक्चिङ्गेट् आखुयुम् आखाट्टुम्गा॥
खानिङा आप्पे आचोगुम्गा मुरति साम्माङ् आचोगुम्नाँ
आङा खानि कैदि चोक्नानिउङ् बेबिलोन नुङ्ना चा याहाँपारा पाङ्नाँनि॥’#आमोस ५:२५-२७
44“आनि टुबाठेबाचिङा माङ्ध्यान् ओचोगुनाँ माङ्हाङ्ङाना सेङ्सेङ्ना पाल उन्चिलोक् खुसुना डेन्ङि डाना॥ हिट्ना सेङ्सेङ्ना पाल माङ्हाङ्ङा मोसा निमेट्टुना गाड्डे डोक् हिट्नागाँ ओचोगुए॥#पारस्थान २५:९,४० 45हान्डेङ्म्बाक् माङ्हाङ्ङा ना देसङि उयुङागा आरु छोङ्बा याप्मिचि रिक्टुचिए हिट्नुङ् याहोसुङा ना देस मेट्टुङ् हिट्नागाँ हिट्ना सेङ्सेङ्ना पाल उन्चिलोक् उखुयुङ् ओआप्टुए॥ हिट्नुङ् दाउद हाङ्बाङाना बेला सोम्मा हिट्ना सेङ्सेङ्ना पाल हिट्नागालोक् डाना॥#याहोसु ३:१४-१७ 46दाउद हाङ्बाङा माङ्हाङ्ङाना दाया टोगुए हिट्नुङ् याकुबङा सेवा चोगुना माङ्हाङ् लोङ्सा ठिक् पाङ् चोक्मा ओटोगुङ् नुङ् बिन्टि ठाङ्सुए॥#२ सामुएल ७:१-१६; १ इतिहास १७:१-१४ 47टरो माङ्हाङ्ङाना पाङ्म्बाक् दाउदङा उइछा सोलोमानङा एडोक् चोगुए॥#१ हाङ् ६:१-३८ 48टरो माङ्हाङ् आड्डिक् माङ्ठेना हिट्नुङ् उन् याप्मिचिगा मुक्ङा ओचोगुना पाङ्ङि युङ्निना॥ माङ्काटाङाना छाप्लाङि नाड्डे पारा छेप्टेसे–
49माङ्हाङ्ङा माट्टुए, ‘टोनालोग् आङाना सिङासान् हिट्नुङ् ना नारा आलाङ्घेप्पा युङ्माना डेन्॥
हिट्डेउङ् खोड्डे पारिक्ना आङा याङ्खान्ना युङ्माना पाङ् खानिङा आचोगुम्टुम्ना?
आङाना युङ्मासिङ् ठोङ् खोनाइ युङ्ग्वाना?
50नागा ख्वाप्पा थोक्चिम् टे आङा डोक् चोगुङ्ना माहि?’#यासैया ६६:१-२
51“हाउ आड्डिक् निङ्ग्वा भेन्गा ओमाक्पाचि, खानि माङ्हाङ्ङाना नुना खाबोर खेम्मा आटेन्डिन्गा॥ खानि टुबाठेबाचिङा ओचोगुगा गाड्डे डोक् खानिङा चा आचोगुम्गा हिट्नुङ् खानिङा जाइले चा सेङ्सेङ्ना हाङ्सा इन्कार आचोगुम्ना॥#यासैया ६३:१० 52खानि टुबाठेबाचिङा ख्वाप्पा माङ्काटाचि ओचाफेन्लोक् ओमेट्टुचे॥ हिट्नागाँ माङ्हाङ्ङाना सेङ्सेङ्ना धारमोति हाङ्बा टायुगेट् पिक्सा खाबोर कालो माङ्काटाचि चा हिट्नागाँ ओसेडुचे॥ हाट्ले खानिङा टायाना सेङ्सेङ्ना सेवाक्ङाना बिरुद्दाङि आकोबिउङ् उन् आसेडुमे॥ 53माङ्हाङ्ङाना धारमाबिधि माङ्हाङ् रिङ् काउग्बाचिङा खानि मापिडिए, टरो खानि आटेन्डेट्टिन्॥”
इस्तिफानास लुङ्गेॽवाङा ओलेप्टुना
54इस्तिफानासङा माट्टुना रिङ् ओखेम्सुङ् काचाहारि-कुन्डालङिगा सादास्सेचिगा आड्डिक् टुक्लोक् उन्चि याक्लेडाउङ् उन्चि केङ् ओचान्डुए॥ 55टरो सेङ्सेङ्ना हाङ्साङा इप्टुउङ् इस्तिफानासङा टोनालोग्लेङ् पुयुए॥ हिट्नुङ् उन्ङा माङ्हाङ्ङाना माहिमा हिट्नुङ् माङ्हाङ्ङाना उछुप्टाङ्लेङ् येसु येबैसाना निसुए॥ 56हिट्नुङ् नाड्डे माट्टुए, “पुयानुम्, आङा टोनालोग् ओङ्साना निसुङे, हिट्नुङ् याप्मि छा येसु माङ्हाङ्ङाना उछुप्टाङ् उमुक्लेङ् येबाना निसुएट्टुङ्॥” 57टरो हिट्नागा आड्डिक् टुक्लोक् ओराट्टे हिट्नुङ् उन्चि नुभेक्चि उन्चि मुक्ङा उछुप्टुए हिट्नुङ् सोब्बेङा ठिक्ए उलिसाउङ् ओपाट्टुए॥ 58हिट्नागाँ खालाङ्गा भारा ओसाडुङ् ओहोट्टुए हिट्नुङ् लिङ्गेॽवाङा लेप्मा ठालाँ ओचोगुए॥ हिट्नुङ् इस्तिफानास फाट्टुर कालाप्बा याप्मिचिङा उन्चि लोट्लिङ् ओफेन्डुङ् सावाल ओलोडुना ठाङ्बेन् याप्मि ओलाङ्ङि उयुङ्सुए॥
59हिट्नागाँ लुङ्गेॽवाङा ओलेप्टुगेट्टुना बेला इस्तिफानासङा नाड्डे पिक्सा बिन्टि चोगुए, “हाउ येसु डाङ्बा, आहाङ्सा खान्ङा डोक् लाडु॥” 60हिट्नुङ् उन् उटुम्बुट्ङि युङाउङ् ठेना रिङ्ङि नाड्डे पिगे, “हाउ टाङ्बा, ना पापङाना साजाए नागा पिडुन्चिन्॥” नाड्डे माट्टुङ् ओसोक्मा खाडे॥
Currently Selected:
मुलिचेला टोॽवा 7: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
