Marg 15

Jesu tumoy Piladɨ

(Matɨyo 27:1-2,11-14; Lug 23:1-5; Ja̰ 18:28-38)

1Dan̰ te jogɗu cururu na, ka-cay ka-bɔgɛ kɨbar bɨ, ka-muɗɔlɛ ga da Jubɨn̰əŋ bɨ, ka-gɨlɨn̰ kalaŋ gasɨn̰-kɔl gɨ da Moyis bɨ, teege gusɨge dan̰ ka-bɔyɛ kɔl cay Jubɨn̰əŋ ga gɨmdəŋ daa nɔm. Kan saɗɨdiige bɨ orɨn̰ge danayi dobii kobɨ Piladɨ. 2Ɨni na, Piladɨ ɨngɨrii hɨn̰: «Kɛ ji na kɨlma gɨ da Jubɨn̰əŋ le ga?» Jesu dɨbii cay nee yeyi hɨn̰: «Na ji-bandi ba yɔ dan̰ kɨbɨn̰ han̰.» 3Ka-cay ka-bɔgɛ kɨbar poyge kɔl dan̰ kondi hay sige cayi 4Ɨni na, Piladɨ ɨngɨrii ɗaŋ coŋ ye hɨn̰: «Ji gey dɨbɨge nee naŋ ga? Kɔl nɔm gɨ kan ba poyge nɔm sin̰ge can̰ le ji je han̰ ga!» 5Ama Jesu dɨbii kɔl pɨna nee naŋ bɨrɨŋ. Lee gɨ kɔl kay Piladɨ sɛl sɛl.

Bɔyɛ kɔl tɨma cay Jesu

(Matɨyo 27:15-26; Lug 23:13-25; Ja̰ 18:39–19:16)

6Dan̰ cay wɔlɛ gɨ ni kɨdɨrɛ gɨ da Pakɨ gɨ da Jubɨn̰əŋ nɔm nɔm na, Piladɨ dor ba-dangay pɨna gɨ kalaŋ ɨngɨriige ɗey daa bɨge. 7Gɨlmi gɨ pɨna wo̰ gɨ gusondi na Barabas woy dangay dɨŋ le bɨ. Ƴomiige pɨna dan̰ kalaŋ ka-dɨbe do̰ a cay ƴaa-di-gumu dɨŋ ga dɨɗɨge ungo pɨna kɨɗɨn̰ dɨbe do̰ dɨŋ le. 8Dɨmdɨrdi kalaŋ orge wan̰ Piladɨ bɨ, ayge te ɨngɨrii hɨnga ga ban ba leede daa daa bɨge, kɨɗɨn̰ ga kɨdɨrɛ gɨ nee le ba bugoŋ le. 9Piladɨ dɨbɨge cay nee yege hɨn̰: «Kɛ kɨŋ gey gɨ ɨŋ na dɨra kɨlma gɨ da Jubɨn̰əŋ daa bɨgɨŋ ga?» 10Ban ye kɔl gɨ nee le kɨya wa ban sol kuɗa gɨ naa cɨn̰-pɨɗɨma na ba lɔɔ ka-cay ka-bɔgɛ kɨbar ma kan na ayɨn̰ge cay Jesu bii le. 11Ama ka-cay ka-bɔgɛ kɨbar gosɨrge dɨmdɨrdi kalaŋ ɗe na ɨngɨrge Piladɨ gɨ na ɗa Barabas daa bɨge ban̰di Jesu. 12Piladɨ ay kɔl ɨngɨrɨn̰ dɨmdɨrdi kalaŋ ɗaŋ coŋ yege hɨn̰: «Ma kɛ ban gɨ kɨŋ teeyi naa kɨlma gɨ da Jubɨn̰əŋ le ɨŋ laayi na wa ga?» 13Kan wɨlalge ɗaŋ coŋ yege hɨn̰: «Dɨɗii a cay sɨya-gɨ-dagɨli gɨŋ.» 14Piladɨ ɨngɨrge yege hɨn̰: «Na ɨsɨna gɨ ni wa ma ban lee ga?» Ama kan wɨlalge jɨn̰ nee nee dan̰ togɨyge yen̰ge hɨn̰: «Dɨɗii a cay sɨya-gɨ-dagɨli gɨŋ.» 15Piladɨ gey gɨ dɨmdɨrdi kalaŋ gusɨge na mooge lee gɨ ban dor Barabas ɗey daa bɨge. Bɨ ɗe kan somdege Jesu dan̰ bɨraw bɨ dobii kobɨ kalaŋ ɗe na gagɨlige a cay sɨya-gɨ-dagɨli dɨŋ.

Asɨgarn̰əŋ sogɨge Jesu

(Matɨyo 27:27-31; Ja̰ 19:2-3)

16Asɨgarn̰əŋ ga da Piladɨ tolge Jesu orɨn̰ge danayi duroy gulɔŋ gɨ da kɨɗɨn̰ bɔyɛ kɔl gɨŋ gɨ da ba-kɨbɨ kɨlma gɨ gumu. Bɨ kan teege te asɨgarn̰əŋ ga baa nɔm cayi. 17Kan dobiige badɨge ga yɨle gusii bɨ gaɗɨge jagɨwa ga ni tɨrɨmbala ga ni gɨsɨm dobiige cayi bɨ. 18Ayge te looyige lapɨya yen̰ge hɨn̰: «Lapɨya ton̰ kɨlma gɨ da Jubɨn̰əŋ.» 19Kan teeyige a cayi dan̰ kɨlɛŋ bɨ tɨbiige kale cayi bɨ, poyge gɨbayge kɨya nɨŋdɨgɨn̰ge dugo kuɗa tumoyi bɨ. 20Kɨɗɨn̰ ga kan sogiige hɨn̰ wo̰ coŋ ɨni na, kan dorge badɨge ga ni cay kamdɨge ga yɨle le gusi coŋ bɨ, jogɨge tobiige badɨge kayi gusi ban̰di nee. Kardi nee ɨni na, kan orɨn̰ge danayi doŋ kɨya gagɨliige a cay sɨya-gɨ-dagɨli gɨŋ.

Gagɨlge Jesu a cay sɨya-gɨ-dagɨli gɨŋ

(Matɨyo 27:33-44; Lug 23:36-43; Ja̰ 19:16-24)

21Gɨlmi gɨ pɨna wo̰ gɨ teeyige Simo, ban na ungo gɨ kan wooyge na a cay ƴaa-di-gumu di Sirɛn dɨŋ, ban na Alegjandɨr dan̰ kurɨndi Rupus, bayge. Ban sayga yage gɨŋ kɨya ɔrɛ jɨn̰ ɨndi ɨni na, asɨgarn̰əŋ usboŋge danayi bɨ ƴomiige dan̰ dɔnɔ gɨ ban na aya sɨya-gɨ-dagɨli gɨ da Jesu le. 22Ɨni na, orɨn̰ge dan̰ Jesu a kɨɗɨn̰ ga teegege Golgota. Golgota le duroy na «kɨɗɨn̰ ga ni Isi-ca.» 23Kan geyge bii cɛrɛ di suru gɨ polge dan̰ hɛɗɨmɛ ga ɗan̰i ga teegege mir#15:23 hɛɗɨmɛ ga ɗan̰i ga teegege mir le, bɨn̰ge na kalaŋ ga kan gagɨldɨge a cay sɨya-gɨ-dagɨli gɨŋ, ɗe kan na sɨlan̰ gusɨge naŋ bɨ, gusɨge na laage tɔgɨ naŋ bɨ. ɗe na si, ama ban kan̰ coŋ. 24Kardi nee ɨni na, kan gagɨliige a cay sɨya-gɨ-dagɨli gɨŋ bɨ, asɨgarn̰əŋ lobge badɨge kayi gosɨnɨn̰ge gusɨge dan̰ te gɨyəŋ gɨ da jɨbe ɓɛlɛ, kɨya solɨn̰ge ungo gɨ kɨya ƴɔɔ badɨge kayi le.#15:24 Sɨlagɨŋ: Psaumes 22:19. 25Gagɨlge Jesu a cay sɨya-gɨ-dagɨli gɨŋ dan̰ jogɗɨ, hɨn̰ tɨwa dɨngɛsɨ wo̰. 26Ɗe kalaŋ na solɨn̰ge te kɔl gɨ kan ba dɨɗɨn̰ Jesu na, kan walge kɔl boy sɨya-gɨ-habɨli gɨŋ yege hɨn̰: «Na kɨlma gɨ da Jubɨn̰əŋ.» 27Gagɨldege ka-kuduroy-ɨndɨwa won̰ge sɔɔ a cay sɨya-gɨ-dagɨli gɨŋ kɨway Jesu. Gɨ pɨna a cay kobi gɨ bara gɨŋ bɨ, gɨ pɨna a cay kobi gɨ masa gɨŋ bɨ. 28[Na toy di hɨn̰ wo̰ ma kɔl gɨ kan walge duroy Magtubu di da Kumu dɨŋ ye hɨn̰: «Kan ɗoŋgɨsiige pɨna dan̰ ka-lɔɔ ɨsɨna le»#15:28 Ayge na duroy: Esaïe 53:12. kɨya ɔrɛ kɨɗɨn̰dɨge gaŋ.] 29Kalaŋ ga gorge te gɨyəŋ gɨŋ yagɨdiige bɨ, teege cayge nɨngɨm nɨngɨm yen̰ge hɨn̰: «Hɨn̰ wo̰ le kɔ an̰ sol! Ji gɨ ba male dɔsɛ ƴaa-di-da-Kumu coŋ bɨ, jɔgɛ gaɗe daa duroy wɔlɛ sɨbɨ le,#15:29 Sɨlagɨŋ: Psaumes 22:8; 109:25. 30pɨɗa gusɨn̰ kon̰ bɨ gɨsɨn a cay sɨya-gɨ-dagɨli gɨŋ dugo.» 31Ka-gɨlɨn̰ kalaŋ gasɨn̰-kɔl gɨ da Moyis bɨ, ka-cay ka-bɔgɛ kɨbar bɨ, kalɨn̰ ma sogiige yen̰ge gusɨge hɨn̰: «Ban poɗɨ kalaŋ ga ɗaŋ, ma ɓala pɔɗɛ gusi koyi naŋ! 32Kuɗa gɨ Kɨris ban gɨ Kumu dorii, kɨlma gɨ da kalaŋ ga Ɨsɨrayɛl le, gɨsɨn a cay sɨya-gɨ-dagɨli gɨŋ dugo haw kɛ, ɗe ani sol bɨ been̰ kuduroyni cayi bɨ.» Kan ga kan gagɨldɨgege a cay sɨya-gɨ-dagɨli gɨŋ kɨwayi le kalɨn̰ ma, yagɨdiige bɨ.

Jesu ma

(Matɨyo 27:45-56; Lug 23:44-49; Ja̰ 19:28-30)

33Dan̰ duroy tɨwa di ɨni ɗɨrɨj na, kɨɗɨn̰ buyoŋ ɨndi tɨlɨm. Lee gɨ dɨlɨm ƴee cay gɨsəŋ nɔm bɨrɨŋ gɨsɨn̰ tɨwa sɨbɨ di ni borundo.#15:33 Sɨlagɨŋ: Exode 10:22; Amos 8:9-10. 34Tɨwa sɨbɨ di ni borundo bugoŋ ɨni na, Jesu wɨlal dan̰ togii daa pəŋ hɨn̰: «Eloyi Eloyi, lama sabaktani»#15:34 Sɨlagɨŋ: Psaumes 22:2. duroy na: «Kumu hɨnge Kumu hɨnge, ji ɗəŋ coŋ na kɨya wa ga?» 35Kalaŋ ga pɨna duroy kalaŋ ga ɨrege nee kɨɗɨn̰ ga kan jege kɔl koyi hɨn̰ wo̰ ɨni na, kan yege hɨn̰: «Jagɨŋ, ban tee na Eli!» 36Ɨni na, ungo gɨ pɨna wo̰ duroyge gɨre or mɔnɛ hɨnga ga gɨlɨn̰ hɨn̰ ja̰a̰ wo̰ duroy cɛrɛ di suru gɨ dasi gɨŋ#15:36 Sɨlagɨŋ: Psaumes 69:22. bɨ, saɗɨ kɨbɨ kɨlɛŋ gɨŋ, ay si kɨbɨ Jesu ɗe ban na ƴɨbe. Bɨ ban ye hɨn̰: «Gamanagɨŋ sɨm ana solgɨŋ kɛ, Eli le kɨya ɨrga dorii a cay sɨya-gɨ-dagɨli gɨŋ le hayi ga?» 37Ama Jesu wɨlal dan̰ togii bɨ, hɨmbɨn̰. 38Ɨni na, badɨge ga kan bon̰ge te kɨɗɨn̰ ga woy dan̰ cɨndɨge duroy ƴaa-di-da-Kumu dɨŋ le, sagaŋ car duroy nee kɨɗɨn̰ sɔɔ a daa bɨrɨŋ andaŋ dugo. 39Gumu gɨ da asɨgar gɨ da kalaŋ ga Rɔm gɨ ɨre nee bɨle cɨndi bɨn̰ Jesu le, kɨɗɨn̰ ga ban sol te gɨyəŋ gɨ Jesu marɨn̰ na, ban ye hɨn̰: «Ungo gɨ kɛ le, na Kurɨn̰-Kumu leen̰ cɨndi.» 40Kandɨ ga pɨna wo̰ kalɨn̰ ma ɨrege nee, ɨrɨn̰ge sɛdɨ solɨn̰ge hɨnga ga ba lee gusɨge le. Mari di cay gulondo na Magɨdala bɨ, Salomɛ bɨ, Mari di ni Jag gɨ dḛ dan̰ Josɨ ƴoyge bɨ, woyge duroy kandɨ ga nee le bɨ. 41Kandɨ ga nee le na ga tumɔ ayge te kɔbɛ kardi Jesu bɨ, leen̰ge gɨye bii bɨ, kɨɗɨn̰ ga ban ban̰ a cay gɨsəŋ ga Galile gaŋ. Kandɨ ga ɗaŋ dan̰ kondiige ga orge danayi a cay ƴaa-di-gumu di Jerusalɛm dɨŋ kalɨn̰ ma ɨrege nee bɨ.

Ɨmgege Jesu

(Matɨyo 27:57-61; Lug 23:50-56; Ja̰ 19:38-42)

42Tɨwa le borundo ɨni, na wɔlɛ gɨ ni ƴomɨn̰ cay-tɨba, duroy na wɔlɛ gɨ ni dorɨn̰ gɨlale gɨ ƴomɨn̰ge cay tɨbay hɨnga ga ni wɔlɛ gɨ ni dɔrɛ gɨlale gɨ da Jubɨn̰əŋ. 43Gɨlmi gɨ pɨna wo̰ gusondi na Jɨsɛb, ban na ungo gɨ a cay ƴaa-di-gumu di Arimate dɨŋ bɨ, ban na ungo gɨ a duroy kalaŋ ga ka-bɔyɛ kɔl ga gɨmdəŋ ga kalaŋ hɨramge gɨ bee kuduroyi a cay dɔɔ-ƴaa di da Kumu di ba kɨya ɨrga. Ban ƴom kuduroy osu orɨn̰ a da Piladɨ kɨya ɨngɨrii gundi Jesu. 44Kɨɗɨn̰ ga Piladɨ je gɨ Jesu na ma coŋ ɨni na, kɔl kayi sɛl sɛl. Lee gɨ ban te gumu gɨ da asɨgarn̰əŋ ɨngɨrii hɨn̰ kɛ Jesu le ma leen̰ cɨndi ga? 45Kɨɗɨn̰ ga ban je kɔl gɨ da gumu gɨ da asɨgarn̰əŋ le ɨni na, ban ɗen̰ Jɨsɛb gɨyəŋ ɗe na ay gun le. 46Jɨsɛb kɨl bagɨda bɨ, gɨsɨn gundi Jesu a cay sɨya-gɨ-dagɨli gɨŋ dugo bɨ, nongɨrii dan̰ bagɨda bɨ, dibii boy umboŋ kamɨn̰aŋ gɨ kan hɨrɨmge gasɨbi garma gɨŋ bɨ, ban nongɨl garma gɨ gumu ɗe kɨbɨ kamɨn̰aŋ gaŋ le lɨgɨn̰ kɨbɨge daa. 47Mari di cay gulondo na Magɨdala bɨ, Mari di ni Josɨ ƴoyi bɨ, solge kɨɗɨn̰ ga kan dɨbɨn̰ge gundi Jesu nee.

Currently Selected:

Marg 15: gab

Highlight

Copy