Matɨyo 19

Gɨle kɔl gɨ da Jesu gɨ ojɨ cay puyoŋ da tama dan̰ bara

(Marg 10:1-12; Lug 16:18)

1Jesu gɨlɨn̰ kalaŋ kɔl nɔm coŋ ɨni na, kardi nee ban say a cay gɨsəŋ ga Galile gaŋ or a cay gɨsəŋ ga Jude gaŋ kardi kuray gɨ Jurdḛ. 2Dɨmdɨrdi kalaŋ kobɨge kardi bɨ, a kɨɗɨn̰ ga nee gaŋ le ban poɗɨ ka-hɔmɨn̰ɛ kage. 3Parɨsɨn̰an̰əŋ ga pɨna wo̰ ɨrgage gusii dan̰ ɨrɨme gɨ ni gɨybii. Kan ɨngɨriige yege hɨn̰: «Kɛ gasɨn̰-kɔl kona bɨn̰ ban̰aŋ gɨyəŋ gɨ ni tayɨn̰ kandiige kɨya cay kɔl gɨ ani ani hayi ga?» 4Ɨni na, Jesu dɨbɨge cay nee yege hɨn̰: «Kɛ kɔl gɨ walge duroy Magtubu di da Kumu dɨŋ le, kɛ kɨŋ ɗɨngɨsa naŋ ga? Walge yege hɨn̰: “Tumɔ ɓɨragɨ le ba-se hɨnga, si na bara dan̰ tama”#19:4 Ayge na duroy: Genèse 1:27; 5:2. 5bɨ yege hɨn̰: “Na toy di hɨn̰ wo̰ ma, bara kɨya ɗɔɔ bayi coŋ bɨ ƴoyi coŋ bɨ, kɨya bugoŋge pɨna dan̰ tamdi bɨ kan sɔɗɨmɔŋ kɨya bɨləŋge kuyoŋ-gusu gɨ pɨna.”#19:5 Ayge na duroy: Genèse 2:24. 6Hɨn̰ wo̰ le, kan na sɔɔ naŋ ɨni, ama kan bɨləŋge na ungo gɨ pɨna hayi ƴɔbɨ. Na toy di hɨn̰ wo̰ ma, hɨnga ga Kumu saɗɨ pɨna le, uja gɨ ungo kɨya pɨndɨre dugo naŋ ɨni.» 7Ɨni na, kalaŋ ga ni Parɨsɨn̰a dɨbiige cay nee hɨn̰: «Ma naa hɨn̰ wo̰ na, na kɨya wa ma Moyis ye hɨn̰ gɨ ungo na taya tama na, ba-gulondo na boo magtubu di ni puyoŋ le ga?»#19:7 Sɨlagɨŋ: Deutéronome 24:1. 8Ɨni na, Jesu dɨbɨge cay nee yege hɨn̰: «Moyis bɨgɨŋ gɨyəŋ gɨ ni tayɨn̰ kandɨgɨŋ na kɨya kuduroy-dɨmbɨrwa kogɨŋ. Ama toy dɨŋ ɓɨragɨ na, wɨya na hɨn̰ wo̰ naŋ. 9Leen̰ cɨndi na, aŋ yəgɨŋ daa waŋ: Hɨn̰ gɨ tama na yɨya yɔyɛ gɨ dan̰ gangɨ caa naŋ ƴee ma kudurɔɔ na taya coŋ ƴan̰ di ɗaŋ na, ban yoyi na yɔyɛ dan̰ gangɨ cayi.»

10Ka-aye-cay-tɨbayi yeyige hɨn̰: «Hɨn̰ gɨ kɔl gɨ a cay ungo gɨ bara kɨya cay tamdi na wɨya hɨn̰ wo̰ na, ƴɔɔ tama naŋ golgo.» 11Ɨni na, Jesu yege hɨn̰: «Kalaŋ nɔm sɨlage duroy kɔl gɨ kɛ le naŋ, ama na kan ga Turnɔ haŋgɨ cayi bɨge le ba sɔlɛge ƴɔbɨ. 12Ƴɔɔ tama naŋ da kan ga pɨna na andɨn̰ge na kuduroy ƴoyge gɨŋ. Ga pɨna, na kan ga kan torge toyge, na kalaŋ ba lɔɔ gɨ kan ɓala ƴɔɔ kandɨ naŋ. Ga pɨna ɗaŋ coŋ, ƴage kandɨ naŋ na kɨya cay kuduroy geye koge, kɨya cay dɔɔ-ƴaa di daa nii. Ungo gɨ na ɓala sɔlɛ duroy kɔl gɨ nee le na, kuɗa gɨ ban sɨla duroy.»

Jesu tor-kɨbi cay karɨn̰aŋ

(Marg 10:13-16; Lug 18:15-17)

13Lam kardi nee na, kalaŋ ɨrgan̰ge dan̰ karɨn̰aŋ gusi Jesu ɗe na dɨbɨ kobi cayge torɨn̰-kɨbi cayge bɨ, ol Kumu kol cayge bɨ. Ama ka-aye-cay-tɨbayi san̰ge danage. 14Ɨni na, Jesu yege hɨn̰: «Ɗagɨŋ dan̰ karɨn̰aŋ ɗe ɨrgage gusɨnɨ, bɨ nargegɨŋ naŋ, kɨya wa dɔɔ-ƴaa di daa nii le, woy na kɨya cay kalaŋ ga woy hɨn̰ kan le wo̰.» 15Kardi nee na, ban dɨbɨ kobi cayge bɨ say ɗe kɨɗɨn̰ ga nee le coŋ.

Marɨna ba-wɔɔ hɨnga

(Marg 10:17-31; Lug 18:18-30; 13:30)

16Bɨ ga ma gɨlmi gɨ pɨna wo̰ ɨrga gusi Jesu bɨ, ɨngɨrii ye hɨn̰: «Ba-gɨlɨn̰ kalaŋ hɨnga, hɨnga ga kuɗa ga ɨŋ kɨya lɔɔ pa dɨm ma, ɨŋ kɨya wan̰ sɔmɛ-bɨra gɨ dan̰ tumoyi le na wa ga?» 17Ɨni na, Jesu yeyi hɨn̰: «Ji ɨngɨrəŋ kɨya cay hɨnga ga kuɗa na kɨya wa ga? Ungo gɨ kuɗa na pɨna hayi ƴɔbɨ. Ma hɨn̰ gɨ ji na gey andaŋ a boy sɔmɛ-bɨra gɨ dan̰ cɨndi gɨŋ na, ji bɨga kɔl a cay te tumɔ di da Kumu.» 18Ban jɨga ɨngɨrii ye hɨn̰: «Na te tumɔ di ani ga?» Jesu jɨga dɨbii cay nee yeyi hɨn̰: «Ji kɨya dɨɗe ungo naŋ, ji kɨya yɔyɛ tam mɨgan̰ wala bara gɨ da mɨgɛɛ naŋ, ji kɨya hase naŋ, ji kɨya lɔɔ tɨmon̰ di dan̰ gɨyəŋdo naŋ cay mɨgan̰ naŋ. 19Ji kɨya aye cay ban̰ dan̰ ƴon̰ daa. Ji kɨya geye mɨgan̰ hɨn̰ kuyoŋdi-gusɨn̰ kon̰ wo̰ bɨ.»#19:19 Ayge na duroy: Exode 20:12-16; Deutéronome 5:16-20; Lévitique 19:18. 20Marɨna le yen̰ Jesu ye hɨn̰: «Hɨnga ga nee le nɔm ɨŋ lee coŋ hɨnge ɨni, ma na wa ba bɔɔŋ coŋ ƴee ga?» 21Ɨni na, Jesu dɨbii cay nee ye hɨn̰: «Hɨn̰ gɨ ji na gey bɨləŋ ungo gɨ kuɗa duroŋ cɨrɛɗ na, sa ɨra kɨle hɨnga-wɔɔdɨn̰ nɔm coŋ bɨ, aya gursudɨge gusɨnan̰ kan ga wɔɔdɨge unɔ ɨni na, ji kɨya wɔɔ hɨnga wɔɔ a daa nii. Kardi nee ɨni na, man̰ ɨre kɨba karɨnɨ.» 22Kɨɗɨn̰ ga marɨna le je kɔl gɨ nee le ɨni na, ban say or dan̰ cɨn̰-n̰age kɨya gɨ ban orɨn̰ dan̰ hɨnga wɔɔ tɔgɨ.

23Ɨni na, Jesu yen̰ ka-aye-cay-tɨbayi yege hɨn̰: «Aŋ yəgɨŋ daa waŋ na cɨndi: Andaŋ a boy dɔɔ-ƴaa di daa nii, na hɨnga ga dojɨ tɔgɨ kɨya cay ba-wɔɔ hɨnga. 24Aŋ yəgɨŋ ɗaŋ coŋ: Osu tɔgɨ ɗe jambal na andaŋ boy umboŋ libɨra gɨŋ, ama ɗe ba-wɔɔ hɨnga na andaŋ boy dɔɔ-ƴaa di da Kumu dɨŋ na, na hɨnga ga osu cɨla ƴee.» 25Kɔl gɨ nee le, dor turnoy ka-aye-cay-tɨbayi, lee gɨ kan yege hɨn̰: «Naa hɨn̰ wo̰ na, na waŋ ba kɨya ɓale wɔɔ pɔɗɛ le ga?» 26Jesu ɗe cɨndi cayge solge bɨ, yege hɨn̰: «Kɨya mɨn̰ɨn̰ kalaŋ hage ama hɨnga ga kɨya mɨn̰ɨn̰ Kumu unɔ.» 27Bɨ ga ma, Pɨyɛr ay kɔl yen̰ Jesu ye hɨn̰: «Kɛ ni-gandi ga ni ɗe hɨnga nɔm coŋ bɨ ni kobɨn̰ kardɨn̰ le, koni gɨ wɔyɛ na mɨna ga?» 28Jesu dɨbɨge cay nee yege hɨn̰: «Aŋ yəgɨŋ daa waŋ na cɨndi: Kɨɗɨn̰ ga hɨnga nɔm kɨya bɨləŋ ga hɨrɨwa na, Kurɨn̰-ungo kɨya sɔmɛ cay kali-tɨrɨmbala toyi di ni gusoŋ-tɔgɛ dɨŋ ɨni na, kɨŋ ga kɨŋ kobɨ karɨnɨ le, kɨŋ kɨya sɔmɛ a cay kali-tɨrɨmbala ga mɔjɨ-cayge-sɔɔ gaŋ, kɨya bon̰ kɔl a cay te wɨn̰je ga mɔjɨ-cayge-sɔɔ gɨ da karɨn̰ Ɨsɨrayɛl. 29Bɨ waŋ waŋ gɨ na ɗa ƴaadi nɔm wala karmii ga ban̰aŋ wala, ga kandɨ wala, bayi wala ƴoyi wala, karɨndii wala, yage koyi coŋ kɨya canɨ na, ungo gɨ nee le kɨya wɔɔ ɗɨn̰ kan ga nee le tɨba aru bɨ, kɨya wɔɔ sɔmɛ-bɨra gɨ dan̰ tumoyi kardi nee bɨ. 30Ama kondɨwadi kalaŋ duroy kan ga cay wase kɨya bɨlege wɔyɛ kalaŋ ga karu bɨ, kondɨwadi kalaŋ duroy kan ga karu, kɨya bɨlege wɔyɛ kalaŋ ga cay wase bɨ.

Currently Selected:

Matɨyo 19: gab

Highlight

Copy