Lug 5

Jesu te ka-aye-cay-tɨbayi ga cay wase

(Matɨyo 4:18-22; Marg 1:16-20; Ja̰ 21:1-11)

1Wɔlɛ gɨ pɨna wo̰, kɨɗɨn̰ ga Jesu ɨre gɨlɨn̰ kalaŋ kɔl gɨ da Kumu kɨbɨ kaŋ ga gumu ga Jenejarɛt gaŋ na, dɨmdɨrdi kalaŋ dayge gusi jɨŋ jɨŋ, age na jen̰ kɔl gɨ da Kumu. 2Jesu sol koburon̰əŋ won̰ sɔɔ a kɨbɨ kuray gɨŋ, gɨ ka-ure gusa gɨsɨnge ɗege dugo bɨ, ɨrege kɨway nee bɨjege dan̰ boy toge di ni ƴomɨn̰ gusa. 3Duroy koburon̰əŋ ga won̰ sɔɔ kɛ le, gɨ pɨna na gɨ da Simo. Jesu nayi som duroy nee bɨ, Simo nayi danayi nee bɨ, Jesu ɨngɨri gɨ ban na nɨnga dḛ jɨn̰ duroy kaŋ gaŋ. Kɨɗɨn̰ ga ban som duroy koburo gɨŋ ɨni na, ban ay te gɨlɨn̰ dɨmdɨrdi kalaŋ ga ba somge kɨbɨ tagɨ di gumu dɨŋ le, kɔl gɨ ojɨ cay Kumu.

4Kɨɗɨn̰ ga Jesu ba dɨɗɨ kɨbɨ gɨle kɔl na, ban yen̰ Simo hɨn̰: «Ɨra na hen̰ lam duroy kaŋ ga gumu gaŋ bɨ, bɨgagɨŋ boy togɨŋ agɨŋ ƴomɨn̰ gusa.» 5Simo dɨbi nee yeyi hɨn̰: «Kɨlma, ni ur gusa duroy son̰do dɨŋ bɨrɨŋ gɨlalɨn̰, ama ni ƴɨma gusa pɨna nɛŋ naŋ. Ma hɨn̰ gɨ ji ba yɔ na, ni kɨya jɔgɛ bɔgɛ ɗaŋ sɔlɛ ƴee.» 6Pɨyɛr dan̰ ka-pogɨn̰i beege dan̰ boy le bɨ, ƴomge dan̰ gusa walɨn̰ boy le daa tɨb tɨb ba lam wo̰ gɨ boy le kɨya araŋ. 7Ɨni na, kan leege kobɨge ten̰ge kamdɨge ga a koburo gɨ ɗaŋ gɨŋ, ɗe kan na jogɨge sɨre boy le daa. Kan ɨrgage bɨ, kan donge gusa le pɨna walɨn̰ dan̰ koburo ga sɔɔ le tɨb tɨb. Koburo le walɨn̰ tɨb tɨb, baa tɨlɛŋ wo̰ gɨ ni kɨya ɗɨrme kaŋ gaŋ. 8Kɨɗɨn̰ ga Simo Pɨyɛr ba sol gusa gɨ kan ba ur le na, ban poy gɨbay tumoy Jesu bɨ, ye hɨn̰: «Ba-gulɔŋ, ƴɨma gusɨn̰ coŋ gusɨnɨ, kɨya gɨ ɨŋ na ba-lɔɔ ɨsɨna!» 9Simo dan̰ kalaŋ nɔm ga danayi turnoyge gɨre kayaŋ kɨya cay kondɨwadi gusa gɨ kan ƴomge le. 10Jag dan̰ Ja̰ kurɨn̰ Jebede dan̰ ka-pogɨn̰ɨge ka-ure gusa le kalɨn̰ ma, turnoyge gɨre kayaŋ nee bɨ. Ama Jesu yen̰ Simo hɨn̰: «Hundɔrɔ naŋ! Ay toy haw kɛ na, ji kɨya ure gusa gɨ ji udɨrde naŋ ɨni, ama na kalaŋ mɨn̰ kɨya dayge ɗe kan ayge cay tɨbanɨ.» 11Kɨɗɨn̰ ga Simo dan̰ kamdi ka-ure gusa le, jɨgage kɨbɨ kaŋ ga gumu gaŋ dan̰ koburon̰əŋ kage na, kan bɨlege kardɨge bɨn̰ hɨnga wɔɔdɨge nɔm, ayɨn̰ge gɨyəŋ kardi Jesu.

Jesu dor mada gusi ungo

(Matɨyo 8:1-14; Marg 1:40-45)

12Wɔlɛ gɨ pɨna wo̰, kɨɗɨn̰ ga Jesu bugoŋ a cay ƴaa-di-gumu di pɨna wo̰ dɨŋ na, ungo gɨ pɨna wo̰ gɨ mada ƴee gusi nɔm woy a cay ƴaa di nee dɨŋ le, andaŋ cayge. Kɨɗɨn̰ ga ban bee cɨndi hug solɨn̰ Jesu bɨ na, ban poy gɨbay dugo tumoyi bɨrɨŋ gɨ jɨndi ɨsɨbɨ gɨsəŋ bɨ, ban ol Jesu yeyi hɨn̰: «Ba-gulɔŋ, kɔgɨɗɔ, hɨn̰ gɨ ji na gey na, ji kɨya ɓale dɔrɛ mada le gusɨnɨ coŋ. Kɨya wa ji orɨn̰ dan̰ dɔnɔ di ni loon̰ gɨ ɗe gusɨnɨ ləŋ mɨra.» 13Jesu ay kobi ɨsɨbɨn̰ ungo le bɨ, yeyi hɨn̰: «Ho’o, ɨŋ gey gɨ mada le duroŋ gusɨn̰ coŋ! Ɗe gusɨn̰ leen̰ mɨra.» Kɨɗɨn̰di ga nee gaŋ le bɨ, mada le duroŋ gusi ungo le coŋ. 14Jesu ay noyi bii yeyi hɨn̰: «Yɔ koldi bɨn̰ ungo haw kɛ ɗe sol gɨ mada le na duroŋ gusɨn̰ naŋ, ama ɨra gɨle gusɨn̰ a da ka-bɔgɛ kɨbar ɗe kan kobɨge sol kɛ mada le duroŋ gusɨn̰ leen̰ cɨndi haa ga. Ɨni na, mɨn̰ da orɨn̰ dan̰ hɨnga ga ni n̰ɨre bɨn̰ ka-bɔgɛ kɨbar hɨn̰ gɨ gasɨn̰-kɔl gɨ da Moyis ba ye ojɨn̰ cay kalaŋ ga mada toge ba duroŋ gusɨge le bɨ, ba-bɔgɛ kɨbar le kɨya bɔgɛ kɨbar bɨn̰ Kumu. Hɨn̰ wo̰ na, kalaŋ nɔm kɨya sɔlɛge hɨn̰ gɨ mada le na duroŋ gusɨn̰ coŋ bɨ, kan kɨya ɓale bugoŋ pɨna danan̰ bɨ.» 15Ama kalaŋ ga ba solge hɨnga ga ba pɨde le, yege Kol Jesu orɨn̰ tumɔ tumɔ. Dɨmdɨrdi kalaŋ ɨrgage wayige kɨya jɔɔge kɔl kɨbi bɨ, ɗe ban na dor hɔmɨn̰ɛ gusɨge coŋ bɨ. 16Ama daa daa Jesu gor kan̰di hay a duroy caa gɨŋ kɨya ɔlɛ Kumu.

Jesu poɗɨ ungo gɨ mɨray

(Matɨyo 9:1-8; Marg 2:1-12)

17Wɔlɛ gɨ pɨna wo̰, gɨ Jesu ɨre gɨlɨn̰ kalaŋ kɔl gɨ ojɨ cay Kumu na, Parɨsɨn̰an̰əŋ dan̰ ka-gɨlɨn̰ kalaŋ gasɨn̰-kɔl gɨ da Moyis kalɨn̰ ma ɨrgage somge a kɨwayi kɨya jɔɔge kɔl kɨbi bɨ, kan saygage nɔm na jɨn̰ cay karɨn̰ ƴaan̰əŋ gaŋ pɨna pɨna boy cay gɨsəŋ ga Galile bɨ, dan̰ Jude bɨ, ga pɨna saygage na a Jerusalɛm bɨ. Dɔnɔ di da Ba-gulɔŋ Kumu baa dan̰ Jesu, lee gɨ ban poɗɨn̰ ka-hɔmɨn̰ɛ. 18Sɨlagɨŋ! Kalaŋ ɨrgan̰ge dan̰ bara gɨ mɨray a cay gasɨlaŋ-jala gaŋ. Kan malge gɨyəŋ age na orɨn̰ danayi a duroy ƴaa dɨŋ tumoy Jesu, 19ama kan waage gɨyəŋ gɨ ni orɨn̰ danayi naŋ, kɨya gɨ dɨmdɨrdi kalaŋ walɨn̰ge kɨɗɨn̰ jɨŋ jɨŋ daa. Ɨni na, kan ayige nan̰ge danayi cay ƴaa dɨŋ bɨ, Kan gɨbge cay ƴaa le bɨ, saɗɨge gasɨlaŋ-jala le dan̰ gangɨ gɨsɨnɨn̰ge danayi duroy dɨmdɨrdi kalaŋ le tumoy Jesu. 20Kɨɗɨn̰ ga Jesu sol aye kudurɔ koge na, ban yen̰ ungo gɨ ba mɨraye le hɨn̰: «Ba-pogɨnɨ, ɨsɨnan̰əŋ kan̰ duroŋ can̰ coŋ ɨni.» 21Kalaŋ ga ka-gɨlɨn̰ kalaŋ gasɨn̰-kɔl nɔm gɨ da Moyis dan̰ Parɨsɨn̰an̰əŋ ɨrɨmge kuduroyge yege hɨn̰: «Gɨlmi le, lee gusi leen̰ na Kumu ga? Kɨya wa ban yagɨde na Kumu. Ungo gɨ Kumu si le kɨya ɓale dɔrɛ ɨsɨna gɨ da ungo naŋ. Na Kumu pɨna hayi kəɗ kəɗ ba orɨn̰ dan̰ dɔnɔ di ni dorɨn̰ ɨsɨna.» 22Ama Jesu sol ɨrɨme kɔl koge lee gɨ ban yege hɨn̰: «Na kɨya wa ma magɨŋ ɨrɨm hɨn̰ gɨ ɨŋ na yagɨde naa Kumu ga?» 23Yɔ: «Ɨsɨnan̰əŋ kan̰ duroŋ can̰ coŋ le.» Hɨmbaɗɨ ɗɨn̰ yɔ hɨn̰: «Sa daa bɨ, ɨran̰ daa.» 24Ama ɨŋ kɨya lɔɔ hɨnga pɨna haw kɛ, gɨ kɨya gɨle hɨn̰ gɨ Kumu na bɨn̰ Kurɨn̰-ungo le dɔnɔ di ni dorɨn̰ ɨsɨna cay kalaŋ bɨ. Ɨni na, Jesu yen̰ dan̰ ba-mɨraye le hɨn̰: «Na ɨŋ-bandi ba yon̰: Sa daa, aya gasɨlaŋ-jala kan̰ ɨra ɨndi.» 25Kɨɗɨn̰di ga nee gaŋ le bɨ, ba-mɨraye le gusi ɗey! Ban say daa tumoy kalaŋ nɔm bɨ, ay dan̰ kuyo koyi gɨ ban ba won̰ nee tumɔ le bɨ, jogɨn̰ tayi hɨramɨn̰ Kumu. 26Kan nɔm ga ba ɨrege nee le kɔl kayge yɔd bɨ, hundɔrɔ gɨ gumu leege bɨ. Kan hɨramge Kumu yege hɨn̰: «Hɨnga ga ni ba sol labɨde le, ɗɨn̰ cayni.»

Jesu te Lebi ɗe na kobɨ kardi

(Matɨyo 9:9-13; Marg 2:13-17)

27Kardi nee na Jesu andaŋ or bɨ, sol ungo gɨ pɨna wo̰ gɨ kan teeyige Lebi. Ban na ba hɔgɛ lambo bɨn̰ ka-dɔɔ cay ƴaa di Rɔm. Ban som na boy kɨɗɨn̰ ga kalaŋ hogɨn̰ lambo nee gaŋ. Jesu yeyi hɨn̰: «Kɨba karɨnɨ!» 28Lebi de say daa cud bɨ, ɗe hɨnga kayi nɔm coŋ bɨ, kobɨn̰ kardi.

29Kardi nee na, Lebi lee dɔɔ dan̰ kondi hayi leen̰ Jesu tɨrga a tayi. Ka-hɔgɛ lambo dan̰ kondige dan̰ kalaŋ ga ɗaŋ somge danage kɨbɨ dɔɔ gɨŋ nee bɨ. 30Parɨsɨn̰an̰əŋ dan̰ ka-gɨlɨn̰ kalaŋ gasɨn̰-kɔl gɨ da Moyis, ga duroy kan ga beege toyge pɨna, solge gɨ Jesu di dɔɔ dan̰ ka-hɔgɛ lambo bɨ, dan̰ kalaŋ ga ɗaŋ ga ka-lɔɔ ɨsɨna ga laage gasɨn̰-kɔl gɨ da Moyis naŋ bɨ. Kan yen̰ge ka-aye-cay-tɨbay Jesu yege hɨn̰: «Na kɨya wa ma magɨŋ dii bɨ sii bɨ, dan̰ ka-hɔgɛ lambo bɨ, dan̰ ka-lɔɔ ɨsɨna ga ɗaŋ bɨ ga?» 31Jesu jɨga yege hɨn̰: «Na kalaŋ ga gusɨge woyge kalɨn̰ caŋ caŋ ba geyege dan̰ ka-gasɨɗe naŋ. Ama na ka-hɔmɨn̰ɛ ba ɔrɛ n̰agedɨge. 32Ɨŋ ɨrga na kɨya tɔgɛ kalaŋ ga ɨrɨm kuduroyge, gɨ ke naa kalaŋ ga dan̰ durɔ ɗɨngar naŋ. Ama Ɨŋ ɨrga na kɨya tɔgɛ kalaŋ ga ɨrɨm gɨ ke naa ka-lɔɔ ɨsɨna, ɗe na bɨlege gɨye-lɔɔdɨge.»

Jesu ye kɔl gɨ ojɨ cay haye-kɨbɨ

(Matɨyo 9:14-17; Marg 2:18-20)

33Parɨsɨn̰an̰əŋ ga pɨna wo̰, yen̰ge Jesu hɨn̰: «Ka-aye-cay-tɨbay Ja̰ ba-lɔɔ batɛm dan̰ kalaŋ kani haydege kɨbɨge bɨ, olge Kumu daa daa bɨ. Na kɨya wa ma ka-aye-cay-tɨban̰ haydage kɨbɨge naŋ ga?» 34Jesu dɨbɨge nee yege hɨn̰: «Kɛ kɨŋ ɓal narɨn̰ kalaŋ ga molgege ɨrga gɔrɛ gɨŋ dɔɔ hɨnga kɨɗɨn̰ ga ba-gɔrɛ ƴaa le, ɨre danage nee ga? 35Ama wɔlɛ kɨya caga gɨ kan kɨya dɔrɛ ba-gɔrɛ ƴaa le duroyge. Na a boy wɔlɛdi gɨ nee gɨŋ le ma kan kɨya haye kɨbɨge ƴee.»

36Jesu jɨga yege kɨradi-kɔl ɗaŋ coŋ. Ban yege hɨn̰, ungo wala kɨbɨ badɨge ga hɨrɨwa dɨbɨn̰ ɓade ga ɨlgi naŋ. Hɨn̰ gɨ ban na dɨbɨn̰ ɓade na, badɨge ga hɨrɨwa le kɨya mundoŋ kalɨn̰ wo̰ bɨ, kɨbɨ badɨge ga ban wal le kɨya bugoŋ dan̰ ga ɨlgi naŋ bɨ. 37Ungo ɓala bɔgɛ cɛrɛ di suru gɨ jali boy idili gɨ ɨlgi gɨŋ naŋ. Naŋ na, cɛrɛ di suru gɨ jali le na sɨbɨn̰ na, kɨya wale idili gɨ ɨlgi le bɨ, cɛrɛ di suru le kɨya bugoŋ coŋ bɨ, idili gɨ ɨlgi le kɨya mundoŋ coŋ bɨrɨŋ bɨ. 38Ama cɛrɛ di suru gɨ jali le kan beege na boy idili gɨ hɨrɨwa gɨŋ. 39Hɨn̰ gɨ ungo na sa cɛrɛ di suru gɨ ɨlgi gɨ man̰i na, ban kɨya geye sɔ cɛrɛ di suru gɨ hɨrɨwa gɨ man̰i naŋ, kɨya wa ban kɨya yɔ hɨn̰ cɛrɛ di suru gɨ man̰i gɨ ɨlgi le, na ba kuɗa!#5:39 Jesu ay hɨnga ga ni gɨle ga kɛ le gɨlɨn̰ na hɨnga ga ni tɨrabe ga hɨrɨwa ama na kɨya osɨwa tɔgɨ gɨ kan na kɨya bɔgɛ kuduroyge cay nee.

Currently Selected:

Lug 5: gab

Highlight

Copy