Ja̰ 8

Tama di woy dan̰ bara gɨ da mɨgaa

1[Bɨ Jesu say or a cay garma gɨ Olibɨye gɨŋ. 2Ɗaŋdo dan̰ te jogɨɗu cururu na, ban jogɨ duroy ƴaa-di-da-Kumu dɨŋ. Bɨ kalaŋ nɔm ɨrgage gusi ɨni na, ban som dugo bɨ ay te gɨlge hɨnga. 3Ɨni na, ka-gɨlɨn̰ kalaŋ gasɨn̰-kɔl gɨ da Moyis bɨ, Parɨsɨn̰an̰əŋ bɨ, ɨrgan̰ge dan̰ tama di pɨna wo̰ di kan ƴɔmɔɔge cay yɔyɛ dan̰ bara gɨ da mɨgaa. Bɨ kan sooge duroyge, 4bɨ yen̰ge Jesu hɨn̰: «Ba-gɨlni hɨnga, ni ƴom tama di kɛ le, a cay yɔyɛ dan̰ bara gɨ da mɨgaa gɨŋ. 5Moyis yeni a duroy magtubu gasɨn̰-kɔl gɨŋ, gɨ ni na wɨrɨn̰a kandɨ ga hɨn̰ wo̰ le dan̰ oru dɨɗɨge coŋ. Kɛ ji ye kon̰ na mɨna cay nee bɨ ga?»

6Kan yege kɔl gɨ nee le na dan̰ ɨrɨme gɨ ni gɨybi age na wan̰ gɨyəŋ gɨ ni si kɔl cayi. Ama Jesu lɨnge dugo bɨ, ay te kayɨde hɨnga cay gɨsəŋ gaŋ dan̰ karɨn̰ kobi. 7Kɨɗɨn̰ ga kan ɨngɨriige kɔl le nee nee ɨni na, Jesu say dor cayi daa bɨ, yege hɨn̰: «Duroygɨŋ, ungo gɨ na laa ɨsɨna cay pɨna naŋ na, kuɗa gɨ ban aya garma dɨgaa wase.» 8Bɨ ban jogɨ dɔgɛ cay dugo ɗaŋ, ay te kayɨde hɨnga cay gɨsəŋ gaŋ. 9Kɨɗɨn̰ ga kan jege kɔl gɨ nee le ɨni na, kan torge gusɨge coŋ pɨna pɨna, ayɨn̰ toy a cay kan ga əsɨdəŋ gaŋ bɨrɨŋ andɨn̰ a cay kan ga n̰əŋdəŋ, lee gɨ na Jesu dan̰ tama di kan sooge duroyge le ba bɔɔge kan̰dɨge hage. 10Jesu dor cay daa bɨ yo hɨn̰: «Tama, ka-ɗɔ kɔl cɛɛ le ba anige ga? Kɛ ungo pɨna wo̰ ya gɨ kɔl na ƴɨma cɛɛ naŋ ga?» 11Tama le jɨga dɨbii cay nee yeyi hɨn̰: «Ba-gulɔŋ ungo unɔ.» Ɨni na, Jesu yo hɨn̰: «Ɨŋ-bandi kalɨn̰ ma ɨŋ dɨbɨ kɔl cɛɛ naŋ ɨra hɛɛ ɨni, ama jɔgɛ lɔɔ ɨsɨna naŋ bɨrɨŋ].»

Jesu na asɨn̰a gɨ da kalaŋ ga cay gɨsəŋ

12Jesu jɨga yen̰ dɨmdɨrdi kalaŋ ɗaŋ coŋ yege hɨn̰: «Ɨŋ na asɨn̰a gɨ da kalaŋ ga cay gɨsəŋ gaŋ. Ungo gɨ na kɨba karɨnɨ na, kɨya gɔrɛ duroy dɨlɨm dɨŋ naŋ bɨ, kɨya wɔɔ asɨn̰a gɨ or a kɨɗɨn̰ sɔmɛ-bɨra gɨ dan̰ cɨndi gɨŋ bɨ.» 13Ɨni na, Parɨsɨn̰an̰əŋ yeyige hɨn̰: «Ji ba lɔɔ tɨmon̰ ton̰ dan̰ kɨbɨn̰ gaŋ na, tɨmon̰ ton̰ le, na dan̰ gɨyəŋdo naŋ.» 14Jesu jɨga dɨbɨge cay nee yege hɨn̰: «Hɨn̰ gɨ ɨŋ na laa tɨmon̰ dan̰ canɨ tɨnge kalɨn̰ ma, tɨmon̰ tɨnge di ɨŋ lee le, na gɨyəŋdo gɨŋ. Kɨya wa ɨŋ sol kɨɗɨn̰ ga ɨŋ saygan̰ nee bɨ, kɨɗɨn̰ ga ɨŋ kɨya orɨn̰ nee bɨ. Ama kɨŋ-gandi na, kɨŋ sɨla kɨɗɨn̰ ga ɨŋ saygan̰ nee gaŋ naŋ bɨ, kɨɗɨn̰ ga ɨŋ kɨya orɨn̰ nee gaŋ naŋ bɨ. 15Kɨŋ-gandi, kɨŋ boy kɔl na dan̰ gɨyəŋ gɨ da ɨrɨme gɨ da ungo. Ama Ɨŋ-bandi na, ɨŋ bɨya kɔl cay ungo pɨna naŋ 16Bɨ hɨn̰ gɨ ɨŋ na bɨya kɔl kalɨn̰ ma, kɔl gɨ ɨŋ boy le or pɨna dan̰ kɔl gɨ cɨndi. Kɨya wa ɨŋ na kan̰nɨ naŋ, ama Banɨ gɨ gɨyigəŋ le woy danaŋ. 17Duroy magtubu gasɨn̰-kɔl kogɨŋ gɨŋ, kan walge boy nee gɨ tɨmon̰ di kalaŋ sɔɔ na laage na naa dan̰ gɨyəŋdo. 18Ɨŋ-bandi, ɨŋ lee tɨmon̰ cay gusɨnɨ gɨŋ gaŋ bɨ, Banɨ gɨ ba gɨyigəŋ le kalɨn̰ ma, lee tɨmon̰ kɔl canɨ bɨ.»

19Kan sayge yeyige hɨn̰: «Kɛ, Ban̰i kon̰ le woy na a ani ga?» Jesu jɨga dɨbɨge cay nee yege hɨn̰: «Kɨŋ sɨlaŋ naŋ bɨ, kɨŋ sɨla Banɨ naŋ nee bɨ. Hɨn̰ gɨ kɨŋ ni na sɨlaŋ na, kɨŋ ni kɨya sɔlɛ Banɨ bɨ.»

20Jesu ye kɔl gɨ nee le, na kɨɗɨn̰ ga ban ɨre gɨlɨn̰ kalaŋ kɔl duroy ƴaa-di-da-Kumu dɨŋ, mɨnde dan̰ hɨnga ga kan been̰ gursu nee bɨn̰ Kumu. Ungo ɓala ƴɔmii naŋ kɨya wa tɨwa toyii di Kumu ojɨ le ɨre naŋ ƴee.

Ungo gɨ ɓale ɔrɛ kɨɗɨn̰ ga Jesu or jɨn̰ nee naŋ

21Jesu yege ɗaŋ coŋ hɨn̰: «Ɨŋ kɨya ɔrɛ bɨ, kɨŋ kɨya malaŋ. Ama kɨŋ kɨya mare boy ɨsɨna kogɨŋ nɔm. Kɨɗɨn̰ ga ɨŋ ba or jɨn̰ nee le, kɨŋ ɓala bugoŋ nee naŋ.» 22A cay kɔl gɨ nee le, Jubɨn̰əŋ yege hɨn̰: «Kɛ, ban gɨ orɨn̰ dan̰ ɨrɨme gɨ ni dɨɗɨn̰ gusi coŋ ga?» Kɨya wa ban ye hɨn̰: «Kɨɗɨn̰ ga ɨŋ ba or jɨn̰ nee le, kɨŋ ɓala bugoŋ nee naŋ.» 23Jesu dɨbɨge cay nee yege hɨn̰: «Kɨŋ-gandi, kɨŋ na kalaŋ ga dugo, ɨŋ-bandi, ɨŋ na gɨ daa nii. Kɨŋ-gandi, kɨŋ na kalaŋ ga da cay gɨsəŋ kɛ, ɨŋ-bandi, ɨŋ na gɨ da cay gɨsəŋ kɛ naŋ.» 24Na toy di hɨn̰ wo̰ ma ɨŋ naa yəgɨŋ hɨn̰: «Kɨŋ kɨya mare boy ɨsɨna kogɨŋ gɨŋ nɔm. Hɨn̰ gɨ kɨŋ na bɨga kuduroyigɨŋ canɨ, gɨ “Ɨŋ-bandi, Ɨŋ woy nee”#8:24 Kumu gɨl gusi bɨn̰ Moyis na dan̰ gusoŋ gɨ nee le boy Exode 3:14-15. naŋ na, əw kɨŋ kɨya mare boy ɨsɨna kogɨŋ gɨŋ nɔm.» 25Kan jɨgage yeyige hɨn̰: «Ji-bandi le, ji na waŋ ga?» Jesu dɨbɨge cay nee yege hɨn̰: «Ɨŋ na ban gɨ ɨŋ naa yəgɨŋ koldi daa daa ayɨn̰ toyi dɨŋ jɨne le.» 26Gɨ ojɨ caygɨŋ kɨŋ-gandi na, ɨŋ orɨn̰ dan̰ kɔl kondɨ gɨ ni yɔ bɨ, bɔyɛ nee bɨ. Ama ban gɨ ba gɨyigəŋ le, na ba yɔ kɔl gɨ cɨndi bɨ, na hɨnga ga ɨŋ ba je koldɨge a gusii le ma maŋ yen̰ kalaŋ ga a cay gɨsəŋ gaŋ.

27Kɔl gɨ ban yege le kan sɨlage gɨ ban na ya ujan̰ naa cay Bayi naŋ. 28Ɨni na, Jesu yege hɨn̰: «Kɨɗɨn̰ ga kɨŋ kɨya gagɨle Kurɨn̰-ungo a daa na, kɨŋ kɨya sɔlɛ gɨ ɨŋ naa ban le bɨ, gɨ ɨŋ na laa hɨnga pɨna wo̰ dan̰ cay gusɨnɨ hɨnge naŋ bɨ. Ama ɨŋ ye na kɔl gɨ Banɨ ba gɨləŋ. 29Ban gɨ ba gɨyigəŋ le ɨre danaŋ, ban ɗaŋ kan̰nɨ naŋ. Kɨya wa ɨŋ lee hɨnga ga ƴee cɨndi dan̰ wɔlɛ pɨna pɨna.» 30Kɨɗɨn̰ ga Jesu yege kɔl hɨn̰ wo̰ ɨni na, kalaŋ kondɨ beege kuduroyige cayi.

Kalaŋ ga somge cayge kalɨn̰ bɨ, gɔyɔŋ bɨ

31Jesu yen̰ Jubɨn̰əŋ ga ba beege kuduroyge cayi le, yege hɨn̰: «Hɨn̰ gɨ kɨŋ na ɨr cay kɔl hɨnge na, kɨŋ na ka-aye-cay-tɨbanɨ ga cɨndi. 32Hɨn̰ wo̰ na, kɨŋ kɨya sɔlɛ kɔl gɨ cɨndi gɨ ojɨ cay Kumu bɨ, kɔl gɨ cɨndi kɨya lɔɔ gɨ kɨŋ kɨya bɨləŋ kalaŋ ga ka-sɔmɛ cayge kalɨn̰ bɨ.» 33Kan jɨga dɨbige cay nee yeyige hɨn̰: «Hay! Ni na kongɨn̰i Abɨraham, ni laa guyɔŋdu da ungo cay pɨna naŋ bɨrɨŋ. Na mɨna ma, mɨn̰ ye gɨ ni na kɨya bɨle ka-sɔmɛ cayni kalɨn̰ ga?» 34Jesu jɨga dɨbɨge cay nee yege hɨn̰: «Jagɨŋ! Aŋ yəgɨŋ daa waŋ na cɨndi, waŋ waŋ gɨ na laa ɨsɨna na, na guyɔŋ gɨ da ɨsɨna.» 35Guyɔŋ le sɨma a da ka-ƴaadi dan̰ cɨndi naŋ, ama kɨye ba-ƴaa ba-sɔmɛ dan̰ cɨndi. 36Hɨn̰ gɨ kurɨn̰ Kumu na ɗa caygɨŋ wɨya kalɨn̰ na, kɨŋ kɨya bɨle kalaŋ ga cayge woy kalɨn̰ leen̰ cɨndi. 37Ɨŋ sol gɨ kɨŋ na kongɨn̰i Abɨraham, ama kɨŋ mal gɨyəŋ gɨ ni dɨɗəŋ, kɨya wa kɔl hɨnge gaya-kɨɗɨn̰ andaŋ kuduroygɨŋ naŋ. 38Ɨŋ-bandi, ɨŋ ye na kol hɨnga ga ɨŋ sol a gusi Banɨ bɨ, kɨŋ-gandi kalɨn̰ ma, kɨŋ lee na hɨnga ga kɨŋ je koldɨge a gusi baygɨŋ bɨ.

39Kan dege kɔl kɨbi coŋ yeyige hɨn̰: «Bayni na mon̰dɨni gɨ jɨne Abɨraham!» Jesu yege hɨn̰: «Hɨn̰ gɨ kɨŋ naa karɨn̰ Abɨraham na, laagɨŋ gɨye-lɔɔ gɨ da Abɨraham. 40Sɨlagɨŋ haw kɛ, kɨŋ mal gɨyəŋ gɨ ni dɨɗəŋ, ɨŋ-bandi gɨ ba yəgɨŋ kɔl gɨ cɨndi gɨ ɨŋ je gusi Kumu le. Hɨnga ga nee le Abɨraham laa naŋ. 41Ama kɨŋ-gandi kɨŋ lee na gɨye-lɔɔ gɨ da baygɨŋ.» Kan jɨga dɨbiige cay nee yeyge hɨn̰: «Ni na karɨn̰ lawɨne naŋ. Bayni na pɨna hayi ƴɔbɨ, ban na Kumu.» 42Jesu jɨga dɨbɨge cay nee yege hɨn̰: «Hɨn̰ gɨ baygɨŋ ni naa Kumu na, kɨŋ ni kɨya geyəŋ, kɨya wa ɨŋ andɨgaŋ na gusi Kumu maŋ ɨrga. Ɨŋ ɨre na dan̰ cay gusɨnɨ hɨnge naŋ, na ban ba gɨyigəŋ.» 43Kɨya wa ma magɨŋ sɨla duroy kɔl hɨnge naŋ ga? Kɨŋ sɨla duroyi naŋ, na kɨya gɨ kɨŋ tɨgɨya kɔl hɨnge gɨ ni ƴon̰ loon̰ gɨye naŋ. 44Baygɨŋ na Haban̰ bɨ, kɨŋ gey lɔɔ na hɨnga ga kuduroy baygɨŋ gey le bɨ. Ayɨn̰ toy gɨ Kumu ɗen̰ cay gɨsəŋ le, Haban̰ na ba dɨɗe kɨɗɨn̰. Dɨlay dan̰ kɔl gɨ cɨndi naŋ. Kɨya wa kɔl gɨ cɨndi unɔ gusi. Kɨɗɨn̰ ga ban ye kɔl gɨ ni poyi na, ban ye na kɔl gɨ ojɨ cayi toyi. Kɨya wa ban na ba-poyi bɨ, poy baa bɨ. 45Ama ɨŋ-bandi, ɨŋ ye na kɔl gɨ cɨndi. Na toy di hɨn̰ wo̰ ma, kɨŋ bɨga kuduroyigɨŋ canɨ naŋ. 46Na waŋ duroygɨŋ ba kɨya ɓale gɨləŋ ɨsɨna gɨ ɨŋ lee le ga? Hɨn̰ gɨ ɨŋ na yagɨŋ naa kɔl gɨ cɨndi na, na kɨya wa ma magɨŋ bɨga kuduroyigɨŋ canɨ naŋ ga? 47Ungo gɨ da Kumu le, je na kɔl gɨ da Kumu nɔm. Ama kɨŋ-gandi kɨŋ ja naŋ kɨya wa kɨŋ na ga da Kumu naŋ.

Jesu bɨ Abɨraham bɨ

48Jubɨn̰əŋ jɨgage dɨbɨn̰ge Jesu cay nee yeyige hɨn̰: «Kɔl gɨ ni ba ye tumɔ ye hɨn̰, ji na ungo gɨ Samari bɨ, turnɔ di ɨsɨni woy kuduron̰ bɨ le, kɛ ni ya na dan̰ gɨyəŋdi naŋ ga?» 49Jesu jɨga dɨbɨge cay nee yege hɨn̰: «Turnɔ di ɨsɨni unɔ kuduronɨ. Ama ɨŋ ay na cayi Banɨ daa, ama kɨŋ-gandi na, kɨŋ dɨbɨ na dasi canɨ. 50Ɨŋ mala na mɨlawe gɨ ojɨ canɨ naŋ. Ama ungo gɨ pɨna wo̰ woy nee gɨ malii kol canɨ, ban kɨya bɔyɛ kɔl bɨ. 51Jagɨŋ! Aŋ yəgɨŋ daa waŋ na cɨndi, waŋ waŋ gɨ na aya kɔl hɨnge nɔm laan̰ gɨye na, ban kɨya mare naŋ bɨrɨŋ.» 52Ɨni na, Jubɨn̰əŋ yeyige hɨn̰: «Haw kɛ na, ni sol gɨ turnɔ di ɨsɨni woy a kuduron̰. Abɨraham ma bɨ, ka-yɔɔ-kɔl-gɨ-Kumu-ba-yɔɔ kalɨn̰ ma mage bɨ, ama ji-bandi ji ye haw kɛ hɨn̰: “Hɨn̰ gɨ ungo na aya kɔl hɨnge laan̰ gɨye na, tɨma na kɨya cɨlii naŋ bɨrɨŋ”. 53Kɛ, ji gumu ɗɨn̰ mon̰dɨni gɨ jɨne Abɨraham gɨ ma le ga? Ka-yɔɔ-kɔl-gɨ-Kumu-ba-yɔɔ kalɨn̰ ma mage bɨ. Ama kɛ, ji lee gusɨn̰ leen̰ na waŋ ga?» 54Jesu jɨga dɨbɨge cay nee yege hɨn̰: «Hɨn̰ gɨ ɨŋ-bandi na ba mɨlawa gusɨnɨ hɨnge na, mɨlawe hɨnge na hɨnga ga kalɨn̰ wo̰ dugo. Ungo gɨ ba mɨlawaŋ le, na Banɨ gɨ kɨŋ ye naa Kumu kogɨŋ le. 55Kɨŋ na, kɨŋ sɨlayi naŋ, ama ɨŋ-bandi na, ɨŋ solii. Hɨn̰ gɨ ɨŋ na ya gɨ ɨŋ na sɨlayi naŋ na, ɨŋ na ba-poyi hɨn̰ kɨŋ wo̰ bɨ. Ama ɨŋ solii bɨ, ɨŋ ay kɔl koyi leen̰ gɨye bɨ. 56Mon̰dɨgɨŋ gɨ jɨne Abɨraham kɨɗɨn̰ ga ban ɨrɨm a cay wɔlɛ gɨ ɨŋ kɨya cagan̰ le ban te pɨre. Ban sol hɨnga nɔm ga ba kɨya lɔɔ gusɨge ga nee le dan̰ cɨndi bɨ, ban lee gusi-mɔwa.» 57Ɨni na, Jubɨn̰əŋ yeyige hɨn̰: «Ɨlgedɨn̰ ɓala toyi-bayi naŋ ƴee bɨ, ma man̰ sol Abɨraham dan̰ cɨndɨn̰ ga?» 58Jesu jɨga dɨbɨge cay nee yege hɨn̰: «Jagɨŋ! Aŋ yəgɨŋ daa waŋ na cɨndi, tumɔ pa dɨm ma woon̰ge Abɨraham ƴee na, “Ɨŋ woy nee”#8:58 A duroy magtubu di dan̰ kɨbɨ Gɨrɛg na, na gusoŋ gɨ pɨna gɨ nee le ba wɔyɛ boy Ja̰ 8:24 bɨ. ɨni.» 59A cay kɔl nɔm gɨ nee le, kan lobɨge gujulu oru age na worɨn̰iige. Ama Jesu wosɨ gusi bɨ, andaŋ doŋ duroy ƴaa-di-da-Kumu dɨŋ coŋ.

Currently Selected:

Ja̰ 8: gab

Highlight

Copy