Ja̰ 11

Mare gɨ da Lajar

1Gɨlmi gɨ pɨna wo̰ gusi leeyi. Gusondi na Lajar bɨ, som na a cay gulɔŋ gɨ Betani dɨŋ bɨ. Cay gulɔŋ gɨ nee le, na gɨ da Mari dan̰ tumdo Mart. 2Mari le, na tama di ɗe yoɗɨn̰ Ba-gulɔŋ sɔŋ di ɨdɨr bɨ, ɗe handɨde cay tɨbayi dan̰ tɨɗi caa bɨ le. Na kurɨndo Lajar ba bɔɔ hɔmɨn̰ɛ. 3Na toy di hɨn̰ wo̰ ma, karmii ga kandɨ le, gɨyge gusi Jesu yeyige hɨn̰: «Ba-gulɔŋ, ban gɨ ji geyi le, gusi leeyi.» 4Kɨɗɨn̰ ga Jesu je ƴɔbɛ gɨ nee le na, ban ye hɨn̰: «Hɔmɨn̰ɛ gɨ nee le kɨya dɨɗe kɨbi dan̰ tɨma naŋ, ama woy na kɨya dɨbe gusoŋ-tɔgɛ a cay Kumu ɗe gɨ Kurɨn̰-Kumu kalɨn̰ ma wan̰ gusoŋ-tɔgɛ nee bɨ.»

5Mart bɨ tɨmdo Mari dan̰ kurɨndɨge Lajar bɨ le, Jesu sige a jam cɨndi gaŋ. 6Kardi ƴɔbɛ hɔmɨn̰ɛ gɨ da Lajar na, ban som lee wɔlɛ sɔɔ ɗaŋ a kɨɗɨn̰ ga ban sɔmɨn̰ nee gaŋ. 7Kardi wɔlɛn̰əŋ ga sɔɔ le, ban yen̰ ka-aye-cay-tɨbayi hɨn̰: «Jɨganagɨŋ a cay gɨsəŋ ga Jude gaŋ.» 8Ka-aye-cay-tɨbayi dɨbiige cay nee yege hɨn̰: «Ba-gɨlɨn̰ kalaŋ hɨnga, Jubɨn̰əŋ malge gɨyəŋ haw kɛ gɨ ni worɨn̰ɨn̰ge dan̰ gujulu oru dɨɗɨn̰ kɛ le ma, mɨn̰ gey jɔgɛ nee coŋ ga?» 9Jesu dɨbɨge cay nee yege hɨn̰: «Kɛ, duroy wɔlɛ pɨna le, karɨn̰ tɨwa na mɔjɨ-cayge-sɔɔ nee naŋ ga? Hɨn̰ gɨ ungo na ɨra dan̰ tɨwa di ɨni na, hɨnga kɨya dɔgɛ tɨbayi ɗoyi dandaŋ naŋ, kɨya wa ban sol kɨɗɨn̰ ga asɨn̰ a cay kalaŋ ga cay gɨsəŋ gaŋ kɛ. 10Ama hɨn̰ gɨ ungo na ɨra duroy son̰do dɨŋ na, hɨnga kɨya dɔgɛ tɨbayi ɗoyi dandaŋ kɨya wa ban ɨran̰ dan̰ asɨn̰a naŋ.» 11Kɨɗɨn̰ ga ban dɨɗɨ kɨbɨ kɔl gɨ nee le ɨni na, ban yege ɗaŋ coŋ hɨn̰: «Ba-pogɨynagɨŋ Lajar woy kuŋ, ama ɨŋ kɨya ɔrɛ kɨya lɨbii daa.» 12Ɨni na, ka-aye-cay-tɨbayi yeyige hɨn̰: «Ba-gulɔŋ, hɨn̰ gɨ ban na wɨya naa kuŋ na, kuɗa. Baa mɨnde gɨ ban kɨya pɔɗɛ.» 13Jesu gey yɔ na kɔl gɨ ojɨ cay tɨma da Lajar, ama kan ɨrɨm hɨn̰ gɨ ban na ye naa kɔl gɨ da wɔyɛ kuŋ ga kalɨn̰. 14Ɨni na, Jesu yege pɨraŋ daa yege hɨn̰: «Lajar ma. 15Bɨ gusɨnɨ mɔŋ kol caygɨŋ kɨya wa ɨŋ wɨya a cay tɨma da Lajar dɨŋ le naŋ, ɗe agɨŋ na been̰ kuduroygɨŋ canɨ. Ama haw kɛ na ɨranagɨŋ gusi.» 16Ɨni na, Tomas «gɨ kan teeyige Mɨgɨna le», yen̰ kamdi ka-aye-cay-tɨbay Jesu yege hɨn̰: «Na-gandi kalɨn̰ ma, ɨranagɨŋ ana orgɨŋ mare danayi.»

Jesu na ba bɔyɛ kalaŋ ga mage lɨbe

17Kɨɗɨn̰ ga Jesu bugoŋ a cay gulɔŋ gɨ Betani ɨni na, ban sol gɨ kan dɨbɨge Lajar boy umboŋ kamɨn̰aŋ gaŋ ga kan payge gasɨbi garma gɨŋ, lee wɔlɛ poɗɨn̰ ɨni. 18Betani le, woy mɨnde dan̰ cay ƴaa-di-gumu di Jerusalɛm, sɨngɨɗɨwayi gɨyəŋ le, ɓal kɨlomɛdɨr sɨbɨ. 19Lee gɨ Jubɨn̰əŋ kondɨ ɨrgage gusi Mart dan̰ Mari kɨya jale ɗugoyge ojɨ cay tɨma da kurɨndɨge. 20Kɨɗɨn̰ ga Mart ba je gɨ Jesu na wɨyɨga mɨnde nee na, hɨndi or yale cɨndi, ama Mari ba-sɔmɛ ƴen̰ dugo. 21Mart yen̰ Jesu hɨn̰: «Ba-gulɔŋ, hɨn̰ gɨ ji ni na ɨr nee na, kurɨndɨni ni kɨya mare naŋ.» 22Ama haw kɛ kalɨn̰ ma, ɨŋ sol gɨ hɨnga nɔm ga ji na ɨngɨr na, Kumu kɨya bɨn̰. 23Jesu yoo hɨn̰: «Kurɨnde kɨya bɔyɛ lɨbe a duroy kalaŋ ga mage.» 24Mart dɨbii cay nee yeyi hɨn̰: «Ɨŋ sol gɨ ban kɨya bɔyɛ lɨbe a wɔlɛ kagadi gɨŋ, kɨɗɨn̰ ga kalaŋ ga mage kɨya bɔyɛge lɨbe le.» 25Jesu yoo hɨn̰: «Ɨŋ na bɔyɛ lɨbe gɨ da kalaŋ bɨ, ɨŋ na sɔmɛ-bɨra gɨ dan̰ cɨndi bɨ. Ungo gɨ na bɨga kuduroy canɨ na, ban na mara na mare kalɨn̰ ma, ban kɨya sɔmɛ-bɨra gɨ dan̰ cɨndi. 26Bɨ waŋ waŋ gɨ na sɨma-bɨra bɨ bɨga kuduroy canɨ na, kɨya mare naŋ bɨrɨŋ. Me bee kudurɛɛ a cay kɔl gɨ nee le hɛɛ ga?» 27Mart dɨbi cay nee hɨn̰: «Əw, Ba-gulɔŋ ɨŋ bee kuduronɨ can̰ gɨ ji na Kɨris ban gɨ Kumu dorii, Kurɨn̰-Kumu gɨ ni amii gɨ ba kɨya caga a cay gɨsəŋ gaŋ le.»

Jesu ɨle

28A cay kɔl gɨ nee le, hɨndi or tɔgɛ tɨmdo Mari bɨ yoo dan̰ te tumɔ di dugo yoo hɨn̰: «Ba-gɨlɨn̰ kalaŋ hɨnga caga, ban tene.» 29Kɨɗɨn̰ ga Mari ba je kɔl gɨ nee le ɨni na, hɨndi de say kɨrɛd or jɨn̰ gusi. 30A kɨɗɨn̰ ga nee le, Jesu bugoŋ a cay gulɔŋ gɨŋ naŋ ƴee. Ama ban ɨre na a kɨɗɨn̰ ga Mart ni ba wayi nee gaŋ ƴee. 31Jubɨn̰əŋ ga ba somge danaa duroy ƴaa gɨŋ jalɨn̰ge ɗugɔ le. Kan solge gɨ hɨndi de say daa kɨrɛɗ kɨya andaŋ doŋ na, kan kobɨge kardo. Kɨya wa kan ɨrɨmge gɨ hɨndi na or naa cay kamɨn̰aŋ gaŋ kɨya ɨle. 32Kɨɗɨn̰ ga Mari bugoŋ a kɨɗɨn̰ ga Jesu ba ɨrɨn̰ nee gaŋ ɨni na, hɨndi soli hug bɨ ga ma, ba dugo tumoyi bɨ, yeyi hɨn̰: «Ba-gulɔŋ, hɨn̰ gɨ tumɔ ji ni na ɨr nee na, kurɨnɨ ni kɨya mare naŋ.» 33Kɨɗɨn̰ ga Jesu ba sol kaŋdi cɨndo bɨ, kaŋdi cɨn̰ Jubɨn̰əŋ ga booge bɨ ɨni na, kuduroy-hɔmɛ jɨbii gɔb gɔb bɨ, kuduroy mundoŋ gɨɗaŋ bɨ. 34Ama ban ɨngɨrge yege hɨn̰: «Kɨŋ dɨbii na kɨɗɨn̰ ga ani gaŋ ga?» Ɨni na, kan dɨbige cay nee yeyige hɨn̰: «Ba-gulɔŋ, ɨre sɨla.» 35Jesu ɨle. 36Ɨni na, Jubɨn̰əŋ ga ba ɨrege kɨɗɨn̰ tɨma dɨŋ le, yege hɨn̰: «Sɨlagɨŋ, ban gey Lajar tɔgɨ.» 37Ama kalaŋ ga pɨna yege kɔl duroyge yege hɨn̰: «Hay! Ban gɨ lee gɨ cɨn̰ ka-bɨbe sol kɨɗɨn̰ le, kɛ tumɔ ban ni kɨya ɓale narɨn̰ Lajar mare naŋ ga?»

Lajar gɨ ma le boy lɨbɨ

38Ɨni na, kuduroy-hɔmɛ jɨb Jesu gɔb gɔb ɗaŋ coŋ bɨ, ban or a kɨbɨ umboŋ kamɨn̰aŋ gaŋ. Na umboŋdi garma gɨ lɨgɨge kɨbi dan̰ garma. 39Jesu yege hɨn̰: «Nɨngɨlagɨŋ garma le coŋ.» Ɨni na Mart ba-mare tɨmdi le, yeyi hɨn̰: «Ba-gulɔŋ, gundi ɗo̰ ɨni, kɨya wa ban lee wɔlɛ poɗɨn̰ labɨde.» 40Ama Jesu dɨboo cay nee yoo hɨn̰: «Kɛ ɨŋ yane naŋ ga? Ɨŋ yene hɨn̰: Hɨn̰ gɨ me na bɨga kudurɛɛ canɨ na, me kɨya sɔlɛ gusoŋ-tɔgɛ gɨ da Kumu dan̰ cɨnde.»

41Kɨɗɨn̰ ga nee le, kan nongɨlge garma le coŋ. Ɨni na, Jesu ay cɨndi daa bɨ, ye hɨn̰: «Banɨ, ɨŋ leen̰ ho’o, kɨya gɨ ji je ɔlɛ hɨnge. 42Ɨŋ-bandi le ɨŋ sol leen̰ cɨndi gɨ ji je ɔlɛ hɨnge daa daa han̰, ama ɨŋ ye kɔl na kɨya dɨmdɨrdi kalaŋ ga ba nɨwɨrəŋge kɛ le, ɗe beege kuduroyige cay hɨnga ga nee le: Gɨ ji naa ba gɨyigəŋ.»

43Kɨɗɨn̰ ga ban ye hɨn̰ wo̰ ɨni na, ban ye kɔl dan̰ noyi di daa pəŋ ye hɨn̰: «Lajar, endəŋ.» 44Ɨni na, ba-mare le, andɨgaŋ doŋ. Dan̰ margane ga kan nongɨrɨn̰ge gondii bɨ, kobɨn̰i bɨ, dan̰ kan ga ba beege cɨndi bɨ, ɗɔmɔmɔ. Jesu yege hɨn̰: «Pɨndɨriigɨŋ bɨ, ɗayigɨŋ ɗe or.»

Jubɨn̰əŋ yege kɔl gɨ da dɨɗe Jesu

(Matɨyo 26:1-5; Marg 14:1-2; Lug 22:1-2)

45Jubɨn̰əŋ ga ba ɨrgage gusi Mari, ma ba solge hɨnga ga Jesu ba lee le, kondɨwayge beege kuduroyige cayi. 46Ama ga pɨna duroyge orge wan̰ Parɨsɨn̰an̰əŋ bɨ, dorge te kol hɨnga ga Jesu ba lee le. 47Ɨni na, ka-cay ka-bɔgɛ kɨbar ga gɨmdəŋ bɨ, Parɨsɨn̰an̰əŋ bɨ, dayge cay ka-cay ka-bɔyɛ kɔl kage ga gɨmdəŋ daa bɨ, yege hɨn̰: «Kɛ, na kɨya lɔɔgɨŋ na mɨna ga? Kɨya wa ungo gɨ nee le, lee hɨnga ga ɗɨn̰ cɨn̰-kɨɗɨn̰ dan̰ kondiige. 48Hɨn̰ gɨ na na ɗayigɨŋ laa hɨn̰ wo̰ jɨn̰ tumɔ tumɔ na, kalaŋ nɔm kɨya bɔgɛge kuduroyge cayi. Ɨni na, kalaŋ ga Rɔm kɨya ɨrgage mɔndɛ kɨɗɨn̰ kanagɨŋ ga woy dan̰ cɨndɨge bɨ, te wɔɔ gɨ da kalaŋ kanagɨŋ bɨ.» 49Ungo gɨ pɨna wo̰ duroyge, gɨ gusondi na Kayip, ban na mangɨl gɨ da ka-cay ka-bɔgɛ kɨbar boy ɨlgedi gɨ nee le, ban yege hɨn̰: «Kɨŋ sɨla hɨnga ga lee gusɨge le naŋ.» 50Kɔl gɨ nee le kɨŋ ɨrɨm toy sɨla naŋ, kɨya wa kɨya bɨle na ɗarwa togɨŋ kɨŋ-gandi hagɨŋ. Hɨn̰ gɨ ungo pɨna hayi na mara kɨya dɨmdɨrdi kalaŋ na, golgo ɗɨn̰ gɨ te wɔɔ gɨ da kalaŋ kana nɔm na ba mundoŋge. 51Ban ye kɔl gɨ nee le, na dan̰ cay gusi koyi naŋ. Ama hɨn̰ gɨ ban na mangɨl gɨ da ka-cay ka-bɔgɛ kɨbar boy ɨlgedi gɨ nee gɨŋ le, na toy di hɨn̰ wo̰ ma Kumu ɗey kɔl gɨ nee le kɨbi lee gɨ ban ye gɨ naa wa wa kalɨn̰ ma, na ojɨ gɨ Jesu na kɨya mare kɨya te wɔɔ gɨ da kalaŋ kayi ga ni Jubɨ. 52Bɨ na kɨya cay ɗarwa di da te wɔɔ gɨ da kalaŋ ga na Jubɨn̰əŋ dan̰ kan̰dɨge naŋ. Ama na kɨya cay ɗarwa di da karɨn̰ Kumu ga sugudoŋge, ɗe na dayaŋge daa bɨləŋge kuyoŋ-gusu gɨ pɨna.

53«Na boy wɔlɛdi gɨ nee gɨŋ le ma, kan saɗɨge kɔl gɨ ni dɨɗɨn̰ Jesu.» 54Na toy di hɨn̰ wo̰ ma, Jesu ɗe gɔrɛ koyi gɨ cɨn̰-tɨwa dɨŋ duroy Jubɨn̰əŋ gaŋ le baa bɨ, dor gusi orɨn̰ jɨn̰ cay gɨsəŋ ga woy mɨnde dan̰ dal gɨ teeyige Ipɨrayim bɨ, somɨn̰ nee dan̰ ka-aye-cay-tɨbayi.

55Wɔlɛ gɨ ni leen̰ kɨdɨrɛ Pakɨ gɨ da Jubɨn̰əŋ ba mɨnde. Lee gɨ kalaŋ ga a cay gɨsəŋ ga da Jubɨn̰əŋ kondɨ ɨrgage Jerusalɛm tumɔ, tumoyi kɨdɨrɛ gɨ ni Pakɨ kɨya dorɨn̰ gusɨge mɨra. 56Kalaŋ malge gɨyəŋ gɨ ni sɔlɛ Jesu. Bɨ ayge te ɨngɨre gusɨge a duroy gulɔŋ ƴaa-di-da-Kumu di kan ɨre nee, yen̰ge kɔl duroyge hɨn̰: «Kɛ, ɨrɨmedɨgɨŋ na mɨna ga? Kɛ, ban kɨya ɨrga kɨɗɨn̰ kɨdɨrɛ gɨ ni Pakɨ gɨŋ wala, gɨ ɨrga naŋ ga?» 57Kan yege hɨn̰ wo̰ na kɨya gɨ tumɔ gɨmdəŋ ga da ka-cay ka-bɔgɛ kɨbar bɨ, Parɨsɨn̰an̰əŋ bɨ, ayge noyige bɨn̰ kalaŋ, hɨn̰ gɨ waŋ waŋ gɨ na sɨla kɨɗɨn̰ ga Jesu na somɨn̰ nee na, kuɗa gɨ ban na ɨre yage daa ɗe age na or ƴomii.

Currently Selected:

Ja̰ 11: gab

Highlight

Copy