Gɨye-lɔɔ 3

Ba-modo gɨ ɨra daa naŋ tɨbay osɨdəŋ kəŋ kəŋ

1Wɔlɛ gɨ pɨna wo̰, Pɨyɛr dan̰ Ja̰ ɨre nayge kɨya ɔrɛ boy duroy gulɔŋ ƴaa-di-da-Kumu dɨŋ, kɨya olɨn̰ Kumu dan̰ tɨwa sɨbɨ di ni borundo. 2Ɨni na, kalaŋ ɨrgan̰ge dan̰ ungo gɨ pɨna wo̰ gɨ kan wooyge na ba-modo, siige kɨbɨ-ƴaa gɨ ni andɨn̰ boy duroy gulɔŋ ƴaa-di-da-Kumu dɨŋ, gɨ kan teege «Kɨbɨ-ƴaa gɨ lee marɨna.» Kan ɨdɨrgan̰ge danayi siige nee dan̰ wɔlɛ pɨna pɨna ɗe gɨ ban na olɨn̰ kalaŋ ga ka-ɔrɛ boy duroy gulɔŋ ƴaa-di-da-Kumu dɨŋ le hɨnga. 3Kɨɗɨn̰ ga ban sol Pɨyɛr dan̰ Ja̰ andaŋge ƴen̰ na, ban olge gursu. 4Ɨni na, Pɨyɛr dan̰ Ja̰ soliige gəɗəɗə bɨ, yeyge hɨn̰: «Sɨlani kuɗa!» 5Ungo le solge ɗɛr, kɨya gɨ ban ɗe kuduroy cayge gɨ ɗi na kɨya wɔɔ hɨnga kobɨge. 6Kɨɗɨn̰di ga nee gaŋ le bɨ, Pɨyɛr yeyi hɨn̰: «Ɨŋ ɨran̰ dan̰ gursu naŋ bɨ, lɔr naŋ bɨ. Ama hɨnga ga ɨŋ orɨn̰ le, aŋ bɨn̰: Dan̰ guson̰ Jesu-Kɨris gɨ Najarɛt le, saa daa ɨra daa!»

7Bɨ ban ƴom kobi gɨ bara ayi daa, ɨni na kɨɗɨn̰di ga nee gaŋ le bɨ, tɨbayi bɨ, tɔngɨlin̰əŋ bɨ, osɨdəŋ kəŋ kəŋ. 8Ban say hɨngɨɗɨ ɨre daa cɨgɨragɨ bɨ, ay te ɔrɛ daa. Ban andaŋ danage boy duroy gulɔŋ ƴaa-di-da-Kumu dɨŋ orɨn̰ daa bɨ, hɨŋɗɨdɨn̰ bɨ, hɨramdɨn̰ Kumu bɨ. 9Kalaŋ nɔm soliige te ɔrɛ daa bɨ, te hɨrame Kumu bɨ. 10Kɨɗɨn̰ ga kan solge gɨ naa ungo gɨ ba-sɔmɛ ɔlɛ hɨnga a kɨbɨ ƴaa-di-da-Kumu di tooge: «Kɨbɨ ƴaa gɨ lee marɨna» le ɨni na, hundɔrɔ leege bɨ, kɔl kayge yɔd bɨ, kɨya cay hɨnga ga ba andaŋ cay ungo le.

Tɔgɛ bɛrnɛ di da Pɨyɛr boy duroy gulɔŋ ƴaa-di-da-Kumu dɨŋ

11Ungo le, ɗa kardi Pɨyɛr dan̰ Ja̰ coŋ naŋ. Kalaŋ nɔm turnoyge gɨre kayaŋ. Ɨni na, kan hɨɗɨbəŋge huɓɔgɨ dan̰ gɨre kɨya ɔrɛ gusɨge boy duroy gulɔŋ ƴaa-di-da-Kumu di kan tooge «dabaŋ gɨ da Salomo» gɨ kan leege dan̰ garma le. 12Kɨɗɨn̰ ga Pɨyɛr ba sol hɨn̰ wo̰ na, ban yen̰ dɨmdɨrdi kalaŋ le hɨn̰: «Kalaŋ ga Ɨsɨrayɛl, na kɨya wa ma kɔl kaygɨŋ sɛl sɛl kɨya cay pɔɗɛ gɨ da ba-modo le ga? Kɨya wa ma magɨŋ solni gəɗəɗə hɨn̰ gɨ ni na ba looyi ɗoy sɔ ɔrɛ daa dan̰ tɔgɨ toni bɨ, dan̰ gɨyəŋ ɔrɛ di ni gɨ bugoŋ pɨna dan̰ Kumu bɨ wo̰ ga? 13Kumu gɨ da mon̰inagɨŋ le, na Kumu gɨ da Abɨraham bɨ, Isag bɨ, Jagob bɨ,#3:13 Sɨlagɨŋ: Exode 3:15. ban dɨbɨ gusoŋ-tɔgɛ cay marɨna ba-gɨye koyi Jesu, ban gɨ kɨŋ ba dobii kobɨ Piladɨ bɨ, kɨŋ kan̰ii tumoy Piladɨ kɨɗɨn̰ ga Piladɨ ba gey ɗoyi daa le. 14Kɨŋ-gandi kɨŋ kan̰ ungo gɨ woy dan̰ cɨndi bɨ, gɨ dan̰ durɔ ɗɨngar bɨ, ama kɨŋ ɨngɨrɨn̰ Piladɨ na ɗaa ba-dɨɗe kalaŋ daa bɨgɨŋ. 15Kɨŋ dɨɗii ban gɨ ba ɗɔɔ te habe gɨ ni somɨn̰-bɨra, ama Kumu boyi lɨbii duroy kalaŋ ga madɨrdaŋ gaŋ lee gɨ ni na tɨmon̰ kayi. 16Ungo gɨ kɨŋ ba solii dan̰ cindɨgɨŋ nɔm kɛ bɨ, gɨ kɨŋ ba solii kuɗa bɨ le, na guson̰ Jesu gɨ ban bee kuduroyi cay nee, ba lɔɔ ma tɨbay osɨdəŋ kəŋ kəŋ. Aye kudurɔ gɨ ban ay bɨn̰ Jesu jaŋ ƴɔbɨ, ba bii dan̰ pɔɗɛ gɨ ni kuyoŋdi-gusi caŋ caŋ tumoygɨŋ nɔm kɛ.

17«Ama haw kɛ, karmɨnɨ ga ban̰aŋ dan̰ ga kandɨ, ɨŋ sol gɨ na sɔlɛ di naŋ ma, kɨŋ-gandi bɨ, kɨrɨmbɛlɛŋ kagɨŋ bɨ, ba leen̰ hɨnga ga nee le. 18Kumu ye tumɔ dan̰ noy ka-yɔɔ-kɔl-gɨ-Kumu-ba-yɔɔ nɔm, gɨ Kɨris ban gɨ Kumu dorii le, na kɨya wɔɔ cɨn̰-gɨle-cɨn̰. Na hɨnga ga nee le ma ban lee ɗe or kɨɗɨn̰dɨge gaŋ. 19Naa hɨn̰ wo̰ na, bɨlgɨŋ gɨye-lɔɔdɨgɨŋ bɨ, jɨgegɨŋ gusi Kumu ɗe ban yɨde ɨsɨna kogɨŋ nɔm coŋ. 20Ɨni na, Ba-gulɔŋ kɨya bɨgɨŋ wɔlɛ gɨ ni dorɨn̰ gɨlale, kɨɗɨn̰ ga ban kɨya gɨygɨn̰ dan̰ Jesu-Kɨris gɨ ban naa dorii tumɔ ojɨn̰ caygɨŋ le. 21Pa dɨm ma ɗe wɔlɛ gɨ nee le na ɨrga ƴee na, naa wa wa kalɨn̰ ma Jesu kɨya sɔmɛ a daa nii bɨrɨŋ gɨsɨn̰ wɔlɛ gɨ Kumu kɨya bɨlɨn̰ hɨnga nɔm leen̰ ga hɨrɨwa, hɨn̰ gɨ ban ba ye jɨne hayi dan̰ te tumɔ di da ka-yɔɔ-kɔl-gɨ-Kumu-ba-yɔɔ ga woyge dan̰ cɨndɨge le. 22Kɨya wa tumɔ Moyis ye hɨn̰:

“Ba-gulɔŋ Kumu kɨya gɨygɨn̰,

Dan̰ ba-yɔɔ-kɔl-gɨ-Kumu-ba-yɔɔ,

Gɨ hɨn̰ ɨŋ-bandi wo̰ bɨgɨŋ.

Ban na ungo gɨ pɨna duroygɨŋ.

Kɨŋ kɨya jɔɔ kɔl nɔm gɨ ban kɨya yogɨŋ,

Agɨŋ na leen̰ hɨngadɨge.

23Waŋ waŋ gɨ na ja kɔl kɨbɨ,

Ba-yɔɔ-kɔl-gɨ-Kumu-ba-yɔɔ gɨ nee le naŋ na,

Kan kɨya dorii duroy kalaŋ ga da Kumu gaŋ coŋ dɨɗiige.”#3:23 Sɨlagɨŋ: Deutéronome 18:15,18,19.

24«Na toy di hɨn̰ wo̰ ma, ka-yɔɔ-kɔl-gɨ-Kumu-ba-yɔɔ nɔm yege koldi wɔlɛ gɨ na ba somɨn̰gɨŋ boy nee labɨde, ayɨn̰ toy a cay ba-yɔɔ-kɔl-gɨ-Kumu-ba-yɔɔ Samɨyɛl dan̰ ka-yɔɔ-kɔl-gɨ-Kumu-ba-yɔɔ nɔm ga ɨrgage kardi. 25Hɨnga ga Kumu ye gɨ ɗi na kɨya lɔɔ dan̰ gɨyəŋ gɨ da ka-yɔɔ-kɔl-gɨ-Kumu-ba-yɔɔ le, woy ojɨ na caygɨŋ kɨŋ-gandi bɨ, kɨŋ orɨn̰ dan̰ hɨnga ga ni ban̰di-gulɔŋ a boy saɗe kɨbɨ pɨna ɓɨse gusu gɨ Kumu lee dan̰ ban̰an̰gɨŋ, kɨɗɨn̰ ga ban yen̰ Abɨraham hɨn̰: “Ɨŋ kɨya tɔrɛ-kɨbɨnɨ cay kalaŋ ga a cay gɨsəŋ gaŋ nɔm na kɨya cay kongɨn̰ɨn̰.”#3:25 Ayge na duroy: Genèse 22:18. 26Na kɨya caygɨŋ ma Kumu dor marɨna ba-gɨye koyi gɨygi kɨya caygɨŋ pa dɨm ma kɨya torɨn̰-kɨbi caygɨŋ bɨ, kɨya bɨlɨn̰ waŋ waŋ kalɨn̰ ma a kɨbɨ gɨye-lɔɔdi gɨ ɨsɨni gɨŋ coŋ bɨ.»

Currently Selected:

Gɨye-lɔɔ 3: gab

Highlight

Copy