मर्कुस् 6
6
येशुसो गालीलाल गीर ६:१–८:२६
येशुल खोङ् रोरङ्गी युगी मी छ्य मत् स्यक्प १-६
1येशु हुनी थो़न्नी खोङ् रोरङ्गी फयुल ॱलोप्टुक् घयेत् दी इक् ठीक्न फीम्ब बेत्। 2हुनी ङीत्तुवे ङीन् दी ॱलीत्नी, खोङ् हुगी छ्यो़गी छोगङ्ल फीन्न हुदु मी जोम्न युङ घयेत्ल ॱलोप्स ज्यब बेत्। ॱनी उन नेङ्गेङ्गी मी घयेत् दी ॱह लेन हुबे रोरङ्सो नङ्दु हुगी मी हुल हीन्दुक् झ्यीब घनी झ्युङ ब अक्? हील हीन्दुक्मे झ्यी़रीक् खेब धङ् हीगी लक्नी नुक्मे ॱस्यीक् छ्यीम्मी़ ले झ्यीक्केन् घयेत् हीगो घनी झ्युङ ब अक्? 3हीगो मरीयम्गी भु सोबो़न् दी मेम्बेक्क ॱनी? हीगो याकुब्, युसुफ्, यहुदा, शीमोन् झ्यीबे पी़न् मेम्बेक्क ॱनी? हीगी नुमु दीब ॱनी हीनरङ् यो़क्केन् मेम्बेक्क ॱनी? सीन्न हुब येशुल गज्ये ॱमत् छोर बेत्। 4हुनी येशुगी हुब घयेत्ल कलुङ् ॱस्यो़क्केङ्गी मील तो़प्प मीत् झ्यीक्केन् दी रोरङ्गी फयुगी मी, ङीया छेङ्गोर् धङ् रोरङ्गी ढोङ्बे मीजङ् घयेत्रङ् युङ्गेन् बेत् सीन्न ॱसुङ बेत्। 5खोङ्गी हुदु नेप्प यरी यरीलरङ् छ्यक्वङ् केन ढक्तु ची़प्प बेत्। ॱनी ॱस्यीक् छ्यीम्मी़ ले ॱयोङ्म झ्यीत् ॱमत् छुब बेत्। 6हुब घयेक्की छ्य मीत् स्योक्पल खोङ् ॱह लेब बेत्। हीनी खोङ् युगङ् घयेत्ल गीर्न ॱलोप्स ज्यब बेत्।
ॱलोप्टुक् च्युन्नीबुल ॱङान तङे तम् ७-१३
7हीनी ॱलोप्टुक् च्युन्नीबु दी खोङ् रोरङ्गी लोल भो़न हुबल ॱनो़प्प स्यीलोक्पोक्म घयेत् तो़न्न दीत् छुज्ये यो़प्पे कवङ् ॱनङ्न मीरङ् ॱङी ॱङी छ्य झ्यीन ज्युक् सीन्न केच्च्य ॱङान तङ बेत्। 8लम्ल डोये यङ्ल खीत्रङ्गी तोक्लङ् च्यीक् मेन्द, स्येन् ॱयोङ् घन्ड अक् ॱमत् खुर्च्यीत्। सम ॱमत् खुर्च्यीत्। जप्पेक् ॱमत् खुर्च्यीत्। कीप्पल पयीसक् ॱमत् खुर्च्यीत्। 9कङ्बल जुत्त घो़न्। घो़ ङीबक् ज्यप्न मत् घो़न्ज्यीत्। 10खीत्रङ् युगङ्ल स्युनी मी ॱसी़ खीम्दु देत्न अक्, हुगी यु दीनी नम् थो़न् थो़न् थुक्ल हुदुरङ् ॱसने च्यीक्तु दो़च्च्यीत्। 11खीत्रङ् लुङ्ब घदु स्युक्को़दङ् हुगी मी घयेत् दीगी खीत्रङ्ल थोङ् मत् झ्यीब, खीत्रङ्गी तम्ल मत् नेम्ब झ्युङ्न ॱनी, हुगी लुङ्ब दीनी थो़न्न डोये यङ्ल हुबल छ्येप्प फोक्केन् हीम्बे ढीक्ल खीत्रङ्गी जुत्तल ज्यरे थल दी हुबे थोङ्सदु दप्ल स्योक्च्यीत् सीन्न ॱङाब बेत्। 12हुनी हुब घयेत् फीन्न घल अक् गीर्न मी घयेत्ल ह ॱएङ्गी लम्नी ॱसीम् ज्युर् गोगेन् बेत् सीन्न ॱस्येप्प बेत्। 13हुनी हुबे ॱनो़प्प अयेक्प गज्येन् तो़न्न दीप्प बेत्। नेप्प गज्येल्ल गोल ॱनुम् ॱही़न्न ढक्तु ची़प्प बेत्।
युहन्ना बप्तीस्की गो दुम् तङे तम् १४-२९
14येशुगी छेन् छ्यीम्मु घल अक् धर्न खुर्नी, ज्याबु हेरोद्गी इक् खोङ्गी ढीक्ल ॱह घोव बेत्। ॱनी मी यरीबे हुगी मी हुगो युहन्ना बप्तीस् ॱस्यीन खुर दी यङ् ॱसोम्बुल लोङ हीङ्गो़प्पेत्। हुगो झ्यीनी हुगी ॱस्यीक् छ्यीम्मी़ ले घयेत् झ्यीक्केन् हीङ्गो़प्पेत् सीन्न झ्यीब बेत्। 15ॱनी यङ् मी यरीबे हुगो एलीया हीङ्गो़प्पेत् सीन्न झ्यीब बेत्। ॱनी यरीबे यङ् हुगो धङ्बी़ कलुङ् ॱस्यो़क्केन् डस्सी च्यीक् हीङ्गो़प्पेत् सीन्न झ्यीब बेत्।
16ॱनी हीगो हेरोद्गी ॱह घोनी हुगी सीक्को़त्ल हुगी मी हुगो ङे गो दुम्दु ची़प्पे युहन्ना दी ॱसोम्बुल लोङ हीङ्गो़प्पेत् सीन्न झ्यीब बेत्। 17-18हेरोद्गी म दी रोरङ्गी पी़न् फीलीप्की नङ्जङ् हेरोदीयस् दी ठोन ॱनमल ठीक्प हीङ्गो़प्प बेत्। हुगो झ्यीनी युहन्नागी हेरोद्ल हुन्दुक् झ्यीन रङ्गी पी़ङ्गी नङ्जङ् ॱनमल ठीक्च्ये मीत् युङ्गेन् बेत् झ्यीबल, हेरोद्गी युहन्ना सुङ्न कीङ्न चो़ल्ल ॱलुक् तङ हीङ्गो़प्प बेत्। 19ॱनी हुगी ढीक्ल हेरोदीयस् दी युहन्नाल ॱङीङ्मदुक् लङ्न ॱसो़च्च्ये ॱनो़ब बेत्। ॱनी हीन्न अक्, ॱसो़त् ॱमत् छुब बेत्। 20घन्ड हीन् सीन्न हेरोद्गी युहन्ना को़न्ज्योक्की मी ढङ्बु धङ् चङ्म हीम्ब ॱह घोनी ज्यीब झ्युङ्न ॱमत् ॱसेप्प छ्योप्न स्यक्प बेत्। ॱनी युहन्नागी ॱस्येप्पे तम् दी हेरोद्गी हीगो दीम्बरङ् हीम्ब न, घन्ड च्यीक् ब अक्? ॱनो़ब छ्यर बेत्। ॱनी हीन्न अक्, हुल ॱनेम्बोक्म छोर्न नेङ्गो़प्प बेत्।
21हुनी हेरोदीयस्ल ॱङेत्तो ॱङीब बेत्। हेरोद्गी रोरङ् कीये कीजी़गी ङीन् दी ॱलीत्नी, हुगो ॱसम्ज्येगी ढीक्ल रोरङ्गी पेम्बु घयेत्, ॱमक्पो़न् छ्यीया घयेत् धङ् गालीलागी मी छ्यीया छ्यीया घयेत् स्यालक्ल भो़ब बेत्। 22ॱनी हेरोदीयस्की भुमु दी युङ्न हुगी डोम्बु घयेत् दीगी दोङ्दु स्यप्र फक्न टेप्प बेत्। ॱनी हुल हेरोद् धङ् हुगी डोम्बु घयेत् दी गन्दीक्म गुव बेत्। ॱनी ज्याबु हेरोद् दीगी हुगी भुमु दील रङ्गी घङ् ॱनङ् झ्यीब घयेत् दी ङे रङ्ल टेत् योङ् 23सीन्न ॱमीत् टो़त् रीगी ॱन झ्यीब बेत्। रङ्गी घङ् ॱनङ् झ्यीब ङे टेत् योङ्। ङे ज्यागक् छ्यीक्करङ् हीन्न अक्, टेत् योङ् सीन्न झ्यीब बेत्।
24हुनी भुमु दी छ्यील थो़न्न रोरङ्गी आम दी च्याल फीन्न ङे घन्ड ॱनङ् सीन्न सीच्च्ये ब अक्? सीन्न ढीब बेत्। ॱनी आम दीगी लेल्ल युहन्ना बप्तीस्की गो दी ॱनङ् झ्यी सीन्न ॱङान तङ बेत्।
25हुनी भुमु दी यङ् ज्योक्सी झ्यीन फीन्न ज्याबु हेरोद् दील ङल युहन्ना बप्तीस्की गो दी हुन्दो थारल ॱलुक्न ॱनङ् सीन्न झ्यीब बेत्। 26हुनी ज्याबु हेरोद् दील घङ् झ्यीबे च्यीरक् झ्युङ बेत्। ॱनी हीन्न अक्, डोम्बु घयेत् दीबे दोङ्दु ॱमीत् टो़त् रीगी ॱन झ्यीनी, टो़त् गो़ ॱस्यर बेत्। 27हुनी ज्याबु हेरोद्गी ॱमक्मी च्यीक्ल युहन्नागी गो दी दुम्न खुर्लेत् सीन्न क टेत्न तङ बेत्। हुनी हुगी ॱमक्मी दी चो़ङ्गङ्ल फीन्न युहन्नागी गो दी दुम्ब बेत्। 28दुम्नी गो दी थारल ॱलुक्न खुर्न युङ्न हुनी हुगी भुमु दील टेप्प बेत्। भुमु दीगी यङ् रोरङ्गी आम दील खुर्न टेप्प बेत्। 29हीगो ॱह घोनी युहन्नागी ॱलोप्टुक् दीब युङ्न हुबे खोङ्गी कुबुर् दी खुर्न रो बेक्सल ॱलुक्न स्यक्प बेत्।
मी तोङ्डक् ॱङल सम टेप्प ३०-४४
30हुनी येशुगी ठीक्नल घयेत् दी कुरीक् खोङ् च्याल लोक्न युङ्नी हुबे रोरङ्सो़ घन्ड झ्यीब बेक्क घन्ड घन्डे ॱलोप्से केच्च्य ॱस्येप्प बेक्क हुगो कुरीक् खोङ्ल ॱस्येत्न टेप्प बेत्। 31हीनी येशुगी हुब घयेत्ल ह हज्यरङ् मी मीस्से ॱसने च्यीक्ल फीन्न हुदु ङे ॱसो़दोङ् झ्यीब बेत्। घन्ड हीन् सीन्न हुदु मी छेत्मीत् युङ्गेन् धङ् डोगेन् झ्यीनी, खोङ्जोसोल सम सलोङ् ओङ् मत् युङ बेत्। 32हीनी खोङ्जोसोरङ् ढुल स्युन ॱयोङ्ल मी मीस्से ॱसने च्यीक्ल फीम्ब बेत्। 33हुनी मी घयेत् दीगी खोङ्जोसो ढुल स्युन डोव थोङ्न खोङ् ङु ॱस्यीनी, हुनी सार् घयेत्नी मी गज्येन् युङ्न हुब कङ्दङ् छो़ छीगनी फल्ल ज्युन फीन्न हुगी ॱसने दील खोङ्जोसोले मी घयेत् दी एल्ला ॱलीब बेत्।
34ॱनी येशुसो पारीगी हुगी ॱसने दील ॱलीत्न ढु दीनी छ्यील थो़न्न युङ्न उन मी छेत्मीत् ॱलीत्न यो़प्प ठेप्प बेत्। हुगी मी घयेत् दी लुक्चीब मीप्पे लुक् डस्सी यो़प्प येशुगी थोङ्नी खोङ् हुबल ॱङीङ् छय बेत्। हुनी खोङ्गी हुगी मी घयेत् दील ॱलोप्से केच्च्य गज्येन् ॱस्येत्न टेप्प बेत्।
35गोङ्ज्यो ॱलीच्च्येम ॱयेङे यङ्ल ॱलोप्टुक् दीब खोङ्गी लोल फीन्न हीन्दुक् झ्यीब बेत्। ह ङीम गज्येन् यो़सोङ्। 36हीगो मी मीस्से ॱसने बेत्। हीगी मी घयेत् हीब रोरङ्सोल गो़बे सम नो़न सदु हीगी लुङ्बे युगङ् धङ् खीम् छ्यीक्कीरीक्प यो़स्स घयेत्ल तोङ्रो झ्यी सीन्न झ्यीब बेत्। 37हीगी लेल्ल खोङ्गी हीब घयेत्ल गो़बे सम खीत्रङ्गी टो़त् सीन्न ॱसुङ बेत्। ॱनी हुबे खोङ्ल ङीत् फीन्न हीब घयेत्ल टङ्ग दीनार् ज्यब ॱङीगी सम नो़न बीन् सीक्केन्? सीन्न झ्यीब बेत्। 38खोङ्गी हुबल खीत्ल ढोप्ची घजो़त् च्यीक् यो़प्प? तो़लेत् झ्यीब बेत्। ॱनी हुबे तेन युङ्नी ढोप्ची ॱङ धङ् न ॱङीरङ् दुक् सीन्न ॱस्येप्प बेत्।
39हीनी खोङ्गी हुगी मी घयेत् दील पङ्ज ॱङोम्बु हुगी थोक्ल पोङ्ज पोङ्ज भीन दो़त् झ्यी सीक्केङ्गी खक्को़ ज्यब बेत्। 40हुनी हुगी मी घयेत् दी ज्य ज्य धङ् ॱङप्च्यु ॱङप्च्यी़ पोङ्ज झ्यीन देप्प बेत्। 41हुनी खोङ्गी ढोप्ची ॱङबु दी धङ् न ॱङीबु दी छ्यक्ल ॱनम्न इगी तेङ् यी़ ङो़ल तेन को़न्ज्योक्ल थु छ्यी पुब बेत्। हुनी ढोप्ची दी च्यक्न मी घयेत् दील गो़न टो़त्लेत् सीन्न ॱलोप्टुक् दीबे लक्ल टेप्प बेत्। हुनी न ॱङीबु दी इक् गो़न टो़त् सीन्न टेप्प बेत्। 42ॱनी कुरीक्की हुगो ढोप्प डङ् डङ् सेब बेत्। 43ॱनी स ॱमत् छुबे ॱल्हक्टो़ ढोप्ची धङ् न फरक् फीरुक् घयेत् दी ॱलोप्टुक् दीबे डुनी, हुगो डालो च्युन्नी घेङ बेत्। 44तोम्दु उन ढोप्ची सगेन् छ्योगो घयेत् दीरङ् तोङ्डक् ॱङजो़त् च्यीक्की ची यो़प्प बेत्।
येशु छो़ थोक्नी छुल्ल कङ्दङ् युङे तम् ४५-५२
45हीनी ॱलोप्टुक् दीब येशुगी ढुल ॱलुक्न फल्ल बेथ्सेदा ङो़लरङ् ॱलोक्न तङ बेत्। ॱनी खोङ् रोरङ् हुदुरङ् देत्न हुगी मी घयेत् दी पीद तङ्नी, 46हुनी खोङ् रोरङ्रङ् च्यीक्पु लदोक् च्यीक्ल ॱसुव तोप्तु जेन फीम्ब बेत्। 47ॱनी गोङ्मु ॱलीबे यङ्ल येशु हुदुरङ् च्यीगी च्यीक्पु स्युब बेत्। ॱनी ढु दी छो़ थोक्नी फल्ल डोगीन् यो़प्प बेत्। 48ॱनी ॱलोप्टुक् दीबल छो़ थोक्नी छुल्ल ॱलुङ्बु ज्यप्न युङ्नी, ढु ज्यप्न डोव दील घासी झ्युङ खोङ्गी थोङ बेत्। ॱनी छेङ्गी घुङ् यो़जो़त्ल येशु ढु झ्यीस्सल छो़ थोक्नी छुल्ल कङ्दङ् झ्यो़म्ब बेत्। ॱनी हीन्न अक्, खोङ् ढु दीगी सुर्नी फल्ल डोगेन् डस्सी झ्यीब बेत्। 49हुगी यङ्ल ॱलोप्टुक् दीबे खोङ् छो़ थोक्नी छुल्ल झ्यो़म्ब थोङ्नी, हुबे ॱल्हेन्डी बेत् ॱनो़न ओ़लोक् ॱस्योर बेत्। 50घन्ड हीन् सीन्न हुब कुरीक्की खोङ् थोङ्नी, ज्यीबे हुब टक्प सेप्प बेत्। ॱनी खोङ्गी ॱस्यरी हुबल खीत्रङ् ज्यीक्टक् मत् झ्यीत्। ङ हीन्। ॱलो दीरी झ्यी झ्यीब बेत्। 51हुनी खोङ् ढु दील स्युनी, ॱलुङ्बु दी छ्यक्नर बेत्। हीनी ॱलोप्टुक् दीब गन्दीक्म ॱह लेब बेत्। 52हुबे ॱसीम्बे ॱमीक् दी मत् भीयल ढोप्चीगी केच्च्य दी इक् ॱह मत् घोव बेत्।
येशुगी मी नेप्प घयेत् ढक्तु ची़प्प ५३-५६
53हुनी खोङ्जोसो़ ढु दी गनेसरेत्की ॱसनेल ॱलीब बेत्। 54ॱनी खोङ्जोसो ढु दीनी थो़न्नी, थो़ल्लोङ् मीक्ल हुगी मी घयेत् दीगी खोङ् ङु ॱस्यीब बेत्। 55हुनी हुगी मी घयेत् दी घल अक् ख ख ॱसोस्सोल ज्युन फीन्न केच्च्य ॱस्येप्प बेत्। हुनी हुगी लुङ्बन यो़प्पे नेप्प घयेत् दी तेन्दङ् डक्च्यक् खुर्न युङ्न येशु घन यो़त् ॱयेङ्न खोङ् झ्यीस्सल च्येब बेत्। 56येशु युगङ्ल, सार्ल, खीम् छ्यीक्कीरीक्प यो़स्सल घल फीन्न आक्, खोङ् घङ् डोस्सल हुगी मी घयेत् दीबे ठोम् छुसदु नेप्प गज्येन् स्यक्न खोङ्ल नीज्यरङ्गी ली़गी छ्यी घो़गी थी़च्ची च्यीक्ल हीन्न अक्, रेक्तु ची़त्रो झ्यी सीन्न स्युव पुब बेत्। ॱनी खोङ्ल रेक्प घयेत् दी कुरीक् ढक्नर बेत्।
Currently Selected:
मर्कुस् 6: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
