मर्कुस् 16
16
येशु ॱसोम्बुल लोङे तम् १-८
1हीनी स पीम्बल ङीत्तुव दी यो़नी, मरीयम् मग्दलीनी धङ् याकुब्गी आम मरीयम् दी धङ् सलोमी झ्यीबे येशुगी कुबुर्ल ॱही़न्ज्येगी ढीक्ल ढीम स्यीम्बोक्म ॱहीक्केङ्गी ॱनुम् ॱनम्ब गज्येन् नो़ब बेत्। 2ॱनी हुब स ङीमे ॱङेट्टो दी नम् लोङ्जो़त्ल रो बेक्स दील युङ बेत्। 3ॱनी लम्ल युङे यङ्ल हुब ॱसुम्बी़ हज्यरङ्ल हुदु रो बेक्सल च्योरे दोलोक्प दी ॱसी़ टीन टो़क्केन्? सीन्न लप्कील्ल युङ बेत्। हुगी दो दी गर्चम यो़प्प बेत्। 4ॱनी हुब रो बेक्स दील ॱलीत्नी हुगी दो दी सुर्ल टी स्यक्प थोङ बेत्। 5हुनी हुगी रो बेक्से नङ् दील स्युन फीन्न उन ॱये छ्यो दीन घो़ कप्पु घो़म्बे मी स्यो़म्ब डस्सी च्यीक् दो़प्प थोङ बेत्। हुगो थोङ्नी, हुब गन्दीक्म टक्प सेप्प बेत्। 6ॱनी भुमु दीबल हुगी ज्यीब मत् झ्यीत्। खीत्रङ् कुरुस्ल ताबे नासरत्की येशु ॱयेङ्दु युङ बेत्। खोङ् ॱसोम्बुल लोङ् छर बेत्। हीन मीप्प बेत्। खोङ्गी कुबुर् स्योक्स दील तो़। 7ह खीत्रङ् लोक्ल ज्युक्ल खोङ्गी ॱलोप्टुक्प दीब धङ् पत्रुस्ल हीन्दुक् सीन्न ॱस्यो़त्। खोङ्गी खीत्रङ्ल एल्लादु ॱस्येप्पल पीब खोङ् खीत्रङ्ले एल्ला गालीलाल डोगेन् बेत्। ॱनी हुदु खीत्रङ्ल ठेक्केन् बेत् सीन्न ॱङाब बेत्। 8हीनी भुमु ॱसुम्बु दी ज्यीबे दर्कीन् दर्कीन् छ्यील थो़न्न ढो़नर बेत्। हुब ज्यीबे मी ॱसुल आक् घन्डे तम् ॱमत् ॱस्येप्प बेत्।
येशु मरीयम् मग्दलीनील ठेप्पे तम् ९-११
9[स ङीमे ॱङेट्टो दी येशु ॱसोम्बुल लोङ्नी, गोम ॱएन्स्युक्ल मरीयम् मग्दलीनील थो़न्न ठेप्प बेत्। हीगी मरीयम् मग्दलीनी हीगो च्येन्नी खोङ्गी एल्ला ॱनो़प्प अयेक्प दी़न् तो़न्न दीप्प हीङ्गो़प्प बेत्। 10ॱनी हुगो फीन्नी येशुदङ् दल एल्ला दो़क्केन् घयेत् दीबल हीगी केच्च्य हीगो ॱस्येत्न टेप्प बेत्। हुब उन नङेल्ल स्युन ङुगीन् यो़प्प बेत्। 11ॱनी मरीयम्गी येशु ॱसोम्बुल लोङ्दुक्। ङदङ् ठेच्च्युङ् सीन्न ॱस्येप्पे केच्च्य दील हुबे छ्य मत् स्यक्प बेत्।
12हुनी तीङ्ला हुबे छीक्नी मीरङ् ॱङी सार्नी छ्यील थो़न्न डोये यङ्ल लम्दु येशुगी ङोरी दी ॱयोङ् डस्सील ज्युर्न हुब च्याल थो़न्न ठेप्प बेत्। 13ॱनी यङ् हुब ॱङीबु लोक्न युङ्नी दगु ॱयोङ्म दीबल येशु ठेप्पे केच्च्य ॱस्येत्न टेप्प बेत्। ॱनी हुबे हुल छ्य मत् स्यक्प बेत्।
येशु थो़न्न ॱलोप्टुक् च्युज्यीक्पुल ॱस्येप्पे तम् १४-२०
14हुनी तीङ्ला ॱलोप्टुक् च्युज्यीक्पु दी सम सये यङ् च्यीक्ल येशु हुबे च्यादु थो़न्न युङ बेत्। थो़न्नी खोङ्गी हुबल लप्स्य तङ बेत्। घन्ड हीन् सीन्न हुबे खोङ् ॱसोम्बुल लोङ हीम्ब थोङे केच्च्य मी ॱयोङ्मागी ॱस्येत्न टेप्पल छ्य मत् स्यक्प, ॱअप्स्यी़त् दीरङ् मत् झ्यीब हीङ्गो़प्प बेत्। 15हुनी खोङ्गी हुबल खीत्रङ् जम्लीङ् की़ल्ल ज्युक्ल घङ् छ्यादु ची़प्प घयेत्ल केच्च्य ॱनेम्बु ॱस्यो़त्लेत्। 16ॱनी ॱसी़ छ्य स्यक्न बप्तीस्ल स्युक्कुक्क हुल छी थर्व युङ्गेन् बेत्। ॱनी ॱसी़ छ्य मीत् स्योक्पेक्क हुल छ्येप्प फोक्केन् बेत्। 17ॱनी छ्य स्योक्केन् घयेत्ल हीन्दुक् झ्यीबे ता युङ्गेन् बेत्। हुबे ङे मीङ्नी ॱनो़प्प अयेक्प घयेत् तो़न्न दीक्केन् बेत्। हुबे केच्च्योक् ॱसम्ब ॱसम्बल तम् लप्केन् बेत्। 18हुबे लक्पे डी़ घयेत् सुङ्गेन् बेत्। ॱनी धुक् थुङ्न आक्, च्यो़न् घन्ड अक् मीत् युङ्गेन् बेत्। ॱनी नेप्प घयेत्ल लक्पे ॱवङ् केन ढक्तु ची़क्केन् बेत् सीन्न ॱस्येप्प बेत्।
19हीन्दुक् सीन्न चोव ज्यीन्दक् येशुगी हुबल ॱस्येत्न स्यक्नी, हुनी खोङ् इगी तेङ् यी़ल ठीक्नर बेत्। हुनी को़न्ज्योक्की छ्यक् ॱये छ्योन स्युन यो़क्केन् बेत्। 20हीनी हुब घल अक् फीन्न ॱसोस्सोल केच्च्य ॱनेम्बु ॱस्येप्प बेत्। ॱनी हुबल चोव ज्यीन्दक्की दगु जेत्न हुबे ॱस्येप्पे केच्च्य दी धक्पर् हीम्ब युङ्ज्येल यीक् छ्यीम्मी़ लेगी ता घयेत् झ्युङ बेत्।]
Currently Selected:
मर्कुस् 16: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
