मर्कुस् 11
11
येशुगी यरुशलेम्दु घङ् जेप्प घयेत् ११:१–१२:४४
येशु भोङ्गुल स्यो़न्न यरुशलेम्ल फीम्ब १-११
1हुनी खोङ्जोसो यरुशलेम्गी छीगल यो़क्केन् ओलीप्की लदोक्की थप्स्यीगी युगङ् बेथ्फागे धङ् बेथानील ॱलीच्च्येम झ्यीनी, खोङ्गी ॱलोप्टुक् ॱङील हीन्दुक् सीन्न तङ बेत्। 2खीत्रङ् ॱङीबु फागी युगङ् फाल ज्युक्। हुगी युगङ् हुल स्युनी, हुदु ॱसु उक् नम्ल अक् मत् स्यो़म्बे भोङ्गु स्यो़म्बोक्म च्यीक् तान स्यक्प खीत्रङ्ल ठेक्केन् बेत्। ॱनी हुगो खीत्रङ्गी तङ्न हीदु ठीक्लेत्। 3ॱनी मी ॱसी़ खीत्रङ्ल हुगो घन्डल तङ्न ठीक्केन्? सीन्न ढीज्युङ्न ॱनी, हुल हीगो चोव ज्यीन्दक्ल गो़ब झ्युङ्सोङ्। हीगो खोङ्गी ज्योक्पु ॱलोक्न तोङ्गेन् बेत् सीन्न ॱस्यो़च्च्यीत्।
4हीनी ॱलोप्टुक् ॱङीबु दी फीन्नी, भोङ्गु स्यो़म्बोक्म दी लङ्गक्न खीम् च्यीक्की गोच्चे लोन तान स्यक्पदङ् ठेप्प बेत्। ठेत्नी, हुबे हुगो तङ बेत्। 5ॱनी उन यो़क्केङ्गी मी यरीबे घन्ड झ्यीच्च्ये, भोङ्गु तङ्न ठीक्केन्? सीन्न ढीब बेत्। 6ॱनी हुब ॱङीबी़ येशुगी घङ् ॱसुङ दी ॱस्येत्न टेप्प बेत्। हुनी हुगी मी दीबे हुगो तङ बेत्। 7हुनी हुबे भोङ्गु दी ठीक्न युङ्नी, रोरङ्सो़ घो़ घयेत् दी भोङ्गु दीगी थोक्ल ज्यप्तेल्ल ज्यप्नी, हुनी हुगोल खोङ् स्यो़न्न फीम्ब बेत्। 8ॱनी मी ॱयोङ्म घयेत् दीगी रोरङ्सो़ घो़ घयेत् दी पीक्न लम्ल एल्ला तीङ्न फीम्ब बेत्। ॱनी यङ् यरीबे स्यीङ्गे दोङ्बी़ ॱस्यवुल चप्न लङ्गक्ल एल्ला एल्ला तीङ्न फीम्ब बेत्। 9ॱनी खोङ्गी एल्ला डोगेन् धङ् तीङ्ल युङ्गेन् घयेत् दीबे केत् छ्यीम्मुल
होसन्ना। चोव ज्यीन्दक्की छेन्नी झ्यो़ङ्गेन् दी ॱमेल्लम् च्येम्म हीनो। 10हुन्दो हज्यरङ्गी पुबु दाऊद्गी ज्यागक् युङ्गेन् हुगो ॱमेल्लम् च्येम्म हीनो। इगी थोरी चीदु स्युगेल्ल होसन्ना सीन्न पुब बेत्। (ॱसुङ्रप्की गुल्लु ११८:२५-२६)
11हुनी येशु यरुशलेम्ल ॱलीत्न छ्यो़गङ्गी च्यारीगी नङ्ल स्युब बेत्। ॱनी हुदु घल अक् च्यील आक् तेनी, हुगी यङ्ल नम् ॱरो़ज्येम झ्यीनी, ॱलोप्टुक् च्युन्नीबु दी ठीक्न बेथानी युगङ्ल दो़त्तु फीम्ब बेत्।
अप्ले दोङ्बुल डलु मीप्प १२-१४
12हुनी नेम्बेत् दी खोङ्जोसो बेथानी दीनी यरुशलेम्ल फीम्ब बेत्। ॱनी लम्ल डोये यङ्ल येशु ढोप्प तोब बेत्। 13ॱनी अप्ले दोङ्बु लेक्मक् स्यीक्न यो़प्प च्यीक् फच्चो़त्नी थोङ्नी खोङ् हुल डलु यो़दङ् ॱनो़न तदु फीम्ब बेत्। फीन्नी, हुल दप्लोक् मेन्द, डलु घन्ड अक् मीप्प थोङ बेत्। घन्ड हीन् सीन्न हुगी यङ्ल अप्ले डलु छ्याबे धी़ ॱमत् ॱलीब हीङ्गो़प्प बेत्। 14हीनी हुगी दोङ्बु दील खोङ्गी ह हीनी झ्यीब दी मी ॱसी़ इक् नम्ल अक् रङ्गी डलु सज्ये मीप्पल ज्युक्च्यीत् सीन्न ॱसुङ बेत्। ॱलोप्टुक् दीबे हीगो ॱह घोव बेत्।
छ्यो़गङ्दु चोङ्गेन् धङ् नोगेन् दीप्प १५-१९
15हुनी खोङ्जोसो यरुशलेम्ल ॱलीत्नी, येशु छ्यो़गङ्गी च्यारीगी नङ्ल स्युन फीन्नी, उन चोङ्गेन् धङ् नोगेन् घयेत् दी कुरीक् दीत् तङ बेत्। पयीसक् ज्यीस्से ढज्योक् दीब, पुक्मु ॱरोक्ल चोङ्गेन् दीबे कुर्सी दीब कुरीक् दप् तङ बेत्। 16मी ॱसुल आक् च्यारीगी धङ्रनी फल्ल छुल्ल यप्च्य घन्ड अक् खुर्तु ॱमत् ची़प्प बेत्। 17ॱनी खोङ्गी उन यो़प्पे मी घयेत् दील हीन्दुक् सीन्न ॱलोप्स ज्यब बेत्। ॱसुङ्रप्ल हीन्दुक् सीन्न ढीन मीन्दुक्क ॱनी?
ङे खीम् हीगो ज्यी़त् ज्यी़त् घयेक्की मी ॱसुव तोप्स बेत् सीन्न को़न्ज्योक्की ॱस्येप्प थो़ङ्गेन् बेत्। (यशैया ५६:७)
ॱनी हीन्न अक्, खीत्रङ् घयेक्की हीगो झ्यक्पागी छङ्ल सो़दुक् सीन्न ॱसुङ बेत्।
18हीगी केच्च्य हीगो छ्यो़प्पो़न् चो छ्यीया धङ् छ्यो़डीम्गी चयेलम घयेक्की ॱह घोनी हुबे येशु ॱसो़च्च्येमे झ्यी़ तेब बेत्। ॱनी यङ् खोङ्ल ज्यीब बेत्। घन्ड हीन् सीन्न मीमङ् घयेत् दी खोङ्गी ॱलोप्स ज्यबल गन्दीक्म ॱह लेसी छोको़र्प्प बेत्। 19ॱनी गोङ्ज्यो ॱलीत्नी, खोङ्जोसो हुगी सार् दीनी थो़न्न छ्यील टप्नर बेत्।
ॱसुव तोबे यङ्ल छ्य स्योक्ली़ लेमु २०-२५
20हुनी नेम्बेत् ॱङेट्टो दी खोङ्जोसो छुल्ल युङे यङ्ल अप्ले दोङ्बु दी ॱमीगी चवनी जेङ् कम्नर यो़प्प थोङ बेत्। 21हुनी दङ् दी झ्युङे केच्च्य दी पत्रुस्की ढेम्ब ॱसो़न येशुल रब्बी तो़दे। नीज्यरङ्गी दङ् ॱमो़त्मु ज्यबे दोङ्बु दी कम्नत्तुक् झ्यीब बेत्। 22हीगी लेल्ल येशुगी खीत्रङ् को़न्ज्योक्ल छ्य स्योक्च्यीत्। 23ङे खीत्रङ्ल गन्दीय ॱस्येत् योङ्। मी ॱसी़ हीन्न अक्, लदोक् हुल रङ् डोप् भीक्ल छ्यु ज्यम्जो छ्यीम्मुल छर्ल ज्युक् सील्लोङ्दे हुगो युङ्गेन् बेत्। ॱनी रङ्गी झ्यीब दील ॱसीम्नी मीत् युङ्गो़ट्टो ॱनो़ब ॱमत् खुर छ्य थीरी स्योक्ते। हुनी रङ्गी ढीक्ल हुगो डुप्न युङ्गेन् बेत्। 24हीगो झ्यीनी ङे खीत्रङ्ल ॱस्येत् योङ्। खीत्रङ्गी ॱसुव तोबे यङ्ल घन्ड स्यी़न अक्, हुगो थोप्च्युङ् ॱनो़न छ्य स्योक् गोगेन् बेत्। हुनी खीत्रङ्ल हुगो थोप्केन् बेत्। 25खीत्रङ् टङ् टङ्ल लोङ्न ॱसुव तोबे यङ्ल ॱयोङ्मागी खीत्रङ्ल मत् ओ़ब झ्यीबे ॱसम्ल छ्यर्न ॱनी, हुगो धक्तु ची़त्। हुनी क तेङ् यी़न स्युगेन् खीत्रङ्गी यप्की इक् खीत्रङ्गी ङीब घयेत् धक्तु ची़क्केन् बेत्। 26[खीत्रङ्गी हुगो धक्तु ॱमत् ची़त्न ॱनी, तेङ् यी़न स्युगेन् खीत्रङ्गी यप्की इक् खीत्रङ्गी ङीब दी धक्तु ॱमीत् ची़क्केन् बेत्।]
येशुल घन्डे ॱवङ्गी ले झ्यीक्केन्? सीन्न ढीब २७-३३
27हीनी खोङ्जोसो यरुशलेम्ल ॱलीब बेत्। ॱलीत्नी, येशु छ्यो़गङ्गी च्यारीगी नङ्दु गीरे यङ्ल छ्यो़प्पो़न् चो छ्यीया घयेत्, छ्यो़डीम्गी चयेलम घयेत् धङ् लुङ्बे गेम्बा चो छ्यीया घयेत् हुदु खोङ् च्याल युङ्न हुबे खोङ्ल 28खो़त्ल घन्डे ॱवङ् यो़त् सीन्न हुन्दुक् झ्यीब झ्यीक्केन्? हुन्दुक् झ्यीन दीच्च्येमे ॱहक् खो़त्ल ॱसी़ बीन्ज्युङ? सीन्न ढीब बेत्। 29ॱनी हीगी लेल्ल येशुगी ङ अक् खीत्रङ्ल केच्च्य च्यीक् ढीगेन्। हुल लेम्बु ॱलोक्न ॱनी, हुनी ङे एक् घन्डे ॱहक्की हीन्दुक् झ्यीब झ्यीगुक्क हुगी लेन् दी ङे खीत्रङ्ल ॱस्येत् योङ्। 30युहन्ना बप्तीस्की बप्तीस्ल ॱलुक्केङ्गी लेमु हुगो तेङ् यी़नी मल्ल झ्युङ बेक्क न, न कोलीमी ङो़नी झ्युङ बेक्क? हीगी लेन् दी ॱलोक्लेत् सीन्न ढीब बेत्। 31ॱनी हुबे रोरङ्सो नङ्दु हज्यरङ्गी तेङ् यी़नी सीन्न ॱनी, हुगी यङ् हज्यरङ्ल हुगो हीन्न, खीक्की घन्डल युहन्नाल छ्य मत् स्यक्प? सीन्न सीच्च्ये बेत्। 32ॱनी यङ् कोलीमी ङो़नी सीन्न सीर् गोगो़प्प न? हुगो सीन्न ॱनी, मी घयेक्की युहन्ना ॱङो़न्ने कलुङ् ॱस्यो़क्केन् बेत् सीन्न ॱसम्गेन् बेत्। हुगो झ्यीनी, हुब मी घयेत्ल ज्यीब बेत्। 33हुनी हुबे लेन् दील ङीत्ल हुगो ॱस्यो़च्च्ये मीत् झ्यीब बेत्। ॱनी येशुगी लेल्ल हुगो हीन्न, ङे एक् घन्डे ॱहक्की ले झ्यीगुक्क हुगो ङ ॱमीत् ॱस्यो़त् झ्यीब बेत्।
Currently Selected:
मर्कुस् 11: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
