मत्ती 18
18
छ्यो़ छोगी नङ्दु युङ् गोगेङ्गी लेमु धङ् छ्यलु १८:१–१८:३५
तेङ् यी़गी ज्यागक्तु ॱसु छ्यीया युङ्गेन् १-५
1हीनी हुगी यङ्ल ॱलोप्टुक् दीबे येशुल तेङ् यी़गी ज्यागक्तु छ्यीस्स्योल ॱसु युङ्गेन् बेक्क? सीन्न ढीब बेत्। 2ॱनी खोङ्गी भीज च्यीक् भो़न ॱलोप्टुक् दीबे घुङ्दु टङील स्यक्न 3खोङ्गी हुबल ङे खीत्रङ्ल गन्दीय ॱस्येत् योङ्। खीत्रङ् ॱसीम् ज्युर्न भीज घयेत् डस्सील झ्युङ्न मेन्द, तेङ् यी़गी ज्यागक्ल स्युक् ॱमीत् छुगेन् बेत्। 4मी ॱसु भीज हीगो डस्सी ॱनोम्ज्युङ् झ्यीगुक्क हुगो तेङ् यी़गी ज्यागक्तु छ्यीस्स्योल युङ्गेन् बेत्। 5ङे मीङ्गी ढीक्ल हीगी भीज हीगो डस्सील मी ॱसी़ थोङ् झ्यीगुक्क हुगी ङल झ्यीबल डोगेन् बेत्।
दीक्पल छ्यी़दु ची़क्केन् घयेक्की ढीक्ल ६-९
6ॱनी ङल छ्य स्योक्केन् हीगो डस्सीगी मी च्युङेत्मु च्यीक् मी ॱसी़ ङे लम्नी दीक्पल छ्यी़दु ची़क्कुक्क हुगोल बोर ओक्म दील लागोर् गर्चम च्यीक् डान छ्यु ज्यम्जो छ्यीम्मु तीङ्रीङ्मुल पुर् तङ्न, गा युङ्गो़ट्टो।
7जम्बुलीङ् हीगो घन्डे दुक्प। हीन ङे लम्नी दीक्पल च्युगेङ्गी ढङ् घयेत् यो़क्केन् बेत्। हुगो युङ त युङ् गोगेन् बेत्। ॱनी हुगो मी हीन्न, घन्डे दुक्प। 8रङ्गी कङ्लक् यालक्की झ्यीत् झ्यीक्की रङ् ङे लम्नी छ्यी़दु ची़क्को़त्न, हुगो दुम्न पुर्लोङ्। रङ् कङ्लक् यालक् च्यप् झ्यीन फुगी मी बर्सल छरले त कङ्ब लक्प ॱमत् छङ, रङ् फु तक्पे छी थोप्सल स्युब गा युङ्गेन् बेत्। 9यङ् रङ्गी ॱमीक् च्यीक्की झ्यीत् झ्यीक्की रङ् ङे लम्नी छ्यी़दु ची़क्को़त्न, हुगो तो़न्न पुर्लोङ्। रङ् ॱमीक् ॱङीक्कर् झ्युङ्न, मी बर्से ॱनलल छरले त बोर रङ् ॱमीक् च्यीक् मीप्प फु तक्पे छी थोप्सल स्युब गा युङ्गेन् बेत्।
10ॱनी हीगी भीज हीब डस्सी मी च्युङेत्मु च्यीगी च्यीक्ल आक् खीत्रङ्गी हुगो ॱनङ्ज्युङ्ल ॱमत् तोङ्ज्यीत्। तोक्स्यीप् झ्यीज्यीत्। घन्ड हीन् सीन्न हीबे ढीक्ल को़न यो़प्पे तेङ् यी़गी भङ्ज्येम्ब घयेत् तेङ् यी़न स्युगेन् ङे यप्की ढुङ्दु छीगङ् दो़क्केन् बेत्। 11[कोलीमीगी ॱरेबु मी तोर्नर घयेत् छी थर्वल तो़न्दु युङ बेत्।]
लुक् तोर्नरे पीदम् १२-१४
12खीत्रङ्गी ॱसीम्ल आक् हीगो डस्सी युङ्गेन् मेम्बेक्क ॱनी? मी च्यीक्ल लुक् ज्य च्यीक् यो़क्केन् बेत्। ॱनी हुगी मज्यु दीनी लुक् च्यीक् तोर्न खुर्न ॱनी, हुनी हुगी लुक् गुप्च्यु घोर्कुब दी पक्कल स्यक्नी दक्पु दी हुगी च्यीक्पु दी ॱयेङ्दु डोगेन् मेम्बेक्क ॱनी? 13ङे खीत्रङ्ल गन्दीय ॱस्येत् योङ्। हुगी तोर्नर दी ॱङीत्नी, उन ॱमत् तोर यो़क्केन् गुप्च्यु घोर्कुब दीले हुगी च्यीगी च्यीक्पु ॱङीब दील गेस छ्यीया झ्यीक्केन् बेत्। 14हीगो डस्सीरङ् तेङ् यी़न स्युगेन् खीत्रङ्गी यप्की थुल हीगी च्युङेत्मु हीब घयेक्की छीक्नी च्यीगी च्यीक् इक् ॱमत् तोर्न आक् ॱनो़बे गोङ्ब जेक्केन् बेत्।
छ्यो़ छो नङ्दु डीक्च्या झ्यीप्पे लेमु १५-२०
15रङ्ल रङ्गी पी़न्ज्यागी दीक्प झ्यीज्युङ्न ॱनी, हुगो च्याल रङ् ज्युक्ल ॱयोङ् मीप्पे कप्ल रङ्गी हुगी दीक्प दी तो़न्न हुल केच्च्य ॱस्यो़त्। ॱनी रङ्गी खल हुगो नेन्न ॱनी, हुगो फीच्च्य यङ् रङ्गी ॱलोक्न युङल डोगेन् बेत्। 16हुगो मत् नेम्ब झ्युङ्न ॱनी, रङ्गी यङ् मी च्यीक् ॱङी च्यीक् ठीक्न हुगो च्याल ज्युक्।
केच्च्य घङ्गो दी इक् धक्पर् झ्यीप्पल छीगङ् पङ्बु ॱङी ॱसुम् च्यीक् गो़गेन् बेत्। (ठीम्लु १९:१५)
17ॱनी खीत्रङ् उजो़त् च्यीक्की खल आक् हुगो मत् नेम्ब झ्युङ्न ॱनी, हुगी केच्च्य दी छ्यो़ छोल ॱस्यो़त्। ॱनी छ्यो़ छोगी मी घयेक्की खल आक् हुगो मत् नेम्ब झ्युङ्न ॱनी, हुगो को़न्ज्योक् ॱस्यो़च्च्ये मीप्पे ज्यी़त् ॱयोङ्गी मी धङ् गोलदर् डस्सील ॱसम्न स्योक्।
18हीगी ढीक्ल ङे खीत्रङ्ल गन्दीय ॱस्येत् योङ्। ॱस जम्बुलीङ्दु खीत्रङ्गी घन्ड मीत् युङेत् सीक्को़दङ् हुगो तेङ् यी़दु उक् हुन्दुक् दीरङ् युङ्गेन् बेत्। ॱनी ॱस जम्बुलीङ्दु खीत्रङ्गी घन्ड युङेत् सीक्को़दङ् हुगो तेङ् यी़दु उक् हुन्दुक् दीरङ् युङ्गेन् बेत्। 19ङे हरुङ्द खीत्रङ्ल गन्दीय ॱस्येत् योङ्। ॱस जम्बुलीङ् हीदु खीत्रङ् ॱसु हीन्न अक्, मीरङ् ॱङी थी़न्न घन्ड लीङ्गो़दङ् हुगो तेङ् यी़न स्युगेन् ङे यप्की खीत्रङ्ल ॱनङ्गेन् बेत्। 20ॱनी मीरङ् ॱङी ॱसुम् च्यीक् घदु ङे मीङ्गी धो़न्दु जोम्गो़दङ् हुबे घुङ्दु ङ युङ्गेन् झ्यीब बेत्।
ॱङीङ्ज्यी मीप्पे ॱयोक्पी़ पीदम् २१-३५
21हुनी पत्रुस्की येशुल चोव ज्यीन्दक् ङे पी़न्ज्यागी ङल ङीबे दीक्प झ्यीन ॱनी, हुल लेम्म घजो़त् च्यीक् धक्तु ची़च्च्ये? लेम्म दी़न् थुक् धक्तु ची़च्च्ये न? सीन्न ढीब बेत्।
22हीगी लेल्ल येशुगी ङे रङ्ल ॱस्येत् योङ्। लेम्म दी़न् मेम्ब, लेम्म दी़न्ज्युब दी़न् थुक् धक्सोङ् सीर् गोगेन् बेत् झ्यीब बेत्। 23हीगी ढीक्ल तेङ् यी़गी ज्यागक्की लेमु हीगो डस्सी युङ्गेन् बेत्। ज्याबु च्यीक्की रोरङ्गी ॱयोक्पु घयेत्ल भुलीन् तङे चीदोङ् लीङ्गेन् बेत्। 24ॱनी ॱयोक्पु च्यीक्ल भुलीन् टङ्ग दीनार् ठी बुम्गी ढङ्ज्युक् यो़प्प थोङ्नी हुगो ठीक्तु तङ बेत्। 25ॱनी हुगी भुलीन् दी जप् ॱमत् छुबल ज्याबु दीगी हुगी ॱयोक्पु दी धङ् हुगी मीजङ् घयेत् दी ॱयोङ्ल चोङ्लोङ्। ॱनी हुल यो़प्पे नोर् घयेत् दी इक् कुरीक् चोङ्लोङ् सीक्केङ्गी क टेप्प बेत्। 26हुनी ॱयोक्पु दी हुगी ज्याबु दीगी दोङ्दु छ्यक् छेन नीज्यरङ् गोङ्ब चोङ्रो मत् झ्यीत्। नीज्यरङ्गी भुलीन् ङे कुरीक् जप्केन् सीन्न स्यी़ब बेत्। 27ॱनी हील ज्याबु दी ॱङीङ् छन, हुगी भुलीन् दी जेङ् ॱलो़ तङ्न ॱयोक्पु दी तङ् तङ बेत्।
28तङ्नी, हुगो छ्यील थो़न्न फीन्नी ॱनी, हुल रोरङ्गी छ्यीट्टो ॱयोक्पु च्यीक् ठेप्प बेत्। ॱनी छ्यीट्टो दील हुगी भुलीन् टङ्ग दीनार् ज्य च्यीक् लीन्ज्ये यो़प्प बेत्। ॱनी हुगो लीन्ज्येल हुगी रोरङ्गी छ्यीट्टो दीगी ओ़न्दोक्पनी सुङ्न ढीम्बु ङे भुलीन् जेङ् जप्केन् न मीत् जप्केन्? सीन्न ॱसो़च्च्येम ॱयेङ बेत्। 29ॱनी छ्यीट्टो दीगी हुगी दोङ्दु पीमुङ् चुन गोङ्ब चोङ्रो मत् झ्यीत्। नीज्यरङ्गी भुलीन् ङे कुरीक् जप्केन् सीन्न स्यी़ब बेत्। 30ॱनी हील मत् नेम्ब, हुगी भुलीन् दी नम् जप् जप् थुक्ल छ्यीट्टो दी हुगी चो़ल्ल ॱलुक् तङ बेत्।
31ॱनी हीन्दुक् झ्यीप्प हुगी छ्यीट्टो ॱयोङ्म दीबे थोङ्नी हुब मक्का लङ्न हीगी केच्च्य हीगो जेङ् हुगी ज्याबु दील ॱस्येप्प बेत्। 32हुनी ज्याबु दीगी हुगी ॱयोक्पु दी ठीक्तु तङ्न हुल रङ् दी़त्ङेङ्गी ॱयोक्पु च्यीक् दुक्। रङ्गी स्युव ज्यप्नी, ङे रङ्गी भुलीन् घयेत् जेङ् ॱलो़ तङेन्। 33ङे रङ्ल ॱङीङ्ज्यी झ्यीब डस्सी रङ्गी इक् रङ्गी छ्यीट्टोल ॱङीङ्ज्यी झ्यीत् गोगेन् हीन्डो न ॱनी सीन्न 34ज्याबु दी खोङ्डोक् गन्दीक्म लङ्न हुगी भुलीन् दी नम् जप् जप् थुक्ल हुगी ॱयोक्पु दी दुक्स्यी आक्सी नोङ्से चो़ल्ल ॱलुक् तङ बेत्। 35ॱनी हीगो डस्सी खीत्रङ् पी़न्ज्या नङ्दु उक् च्यीक्तङ् च्यीक्की ङीबे दीक्प ॱसीम्बे यीक्नीरङ् धक्तु ॱमत् ची़त्न ॱनी, तेङ् यी़न स्युगेन् ङे यप्की इक् खीत्रङ्ल धक्तु ॱमीत् ची़प्प, हुन्दुक् दीरङ् झ्यीक्केन् बेत् झ्यीब बेत्।
Currently Selected:
मत्ती 18: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
