मत्ती 16
16
यीक् छ्यीम्मी़ ता ॱयेङ्दु युङ १-४
1हुनी हुदु येशु च्येल्ल फरीसी धङ् सदुकी यरी युङ बेत्। युङ्नी, हुबे खोङ्ल छो़त्लीन् तज्येल ङीत्ल इगीनी मक्की यीक् छ्यीम्मी़ लेगी ता च्यीक् तो़न्दे सीन्न झ्यीब बेत्। 2हीगी लेल्ल येशुगी गोङ्मु ॱनम्ल टीङ्मर् छ्येप्प थोङ्न ॱनी, हुल खीत्रङ्गी नेम्बेत् ह ॱनम्सङ् तोङेत् सीक्केन् बेत्। 3ॱनी यङ् ॱङेट्टो थोर्च्याल ॱनम् टीङ्मर्की ॱयोब थोङ्न ॱनी, यङ् हरीङ् छ्यल्ला ॱलुङ्जुप् ज्यक्पेत् सीक्केन् बेत्। ॱनी हुन्दुक् झ्यीन ॱनम्स्यी गा धङ् आक्पा युङ खीत्रङ्गी नम् च्यो़त् ॱस्यीगेन् बेत्। ॱनी यङ् धी़ ॱलीत् छरे ढीक्की ता घयेत् नम् च्यो़त् ॱमीत् ॱस्यीगेन् बेत्। 4हीगी धीङ्सङ्गी मी ङेम्ब, ॱयोङ्दङ् ङीगेन् घयेत् हीबे यीक् छ्यीम्मी़ ता तो़ल्लेत् सीक्केन् बेत्। हुन्दुक् झ्यीब घयेत्ल योनाल झ्युङे ता हुगो डस्सी मेन्द, ॱयोङ् ॱमीत् तो़ङ्गेन् बेत् सीन्न हुनी खोङ् हुबदङ् घीन टप्नर बेत्।
ढोप्चीगी च्युर्नी ॱस्येप्पे ॱलीङ्दम् ५-१२
5हीनी येशुसो ढुल स्युन फीन्नी पारी दीदु ॱलीबे यङ्ल ॱलोप्टुक् दीबे ढोप्ची खुर्च्ये दी टोक् ज्यीप्नर हीम्ब ॱह घोव बेत्। 6ॱनी येशुगी ॱलोप्टुक् दीबल तेदे फरीसी धङ् सदुकी घयेक्की ढोप्चीगी च्युर् हुनी खीत्रङ् तोक्स्यीप् झ्यीन च्यङ् जीम्न दो़च्च्यीत् सीन्न ॱङाब बेत्। 7ॱनी ॱलोप्टुक् दीब रोरङ्सो नङ्दु खोङ्गी हीगो हज्यरङ्ल ढोप्ची ॱमत् खुरे ढीक्ल सीक्केन् हीम्ब न घन्ड ब अक्? झ्यीब बेत्। 8ॱनी हुगो येशुगी ॱह घोनी हुबल छ्य गन्दीक्म मीत् स्योक्केन्सो, खीत् घन्डल ढोप्ची मीप्पे ढीक्ल केच्च्य लप्को़प्प? 9हुन्दो ओक् खीक्की ॱह मीत् घोयेक्क? खीक्की हुन्दो हीगो ढेङ्गी ॱमीत् ॱसो़बेक्क? मी तोङ्डक् ॱङल ढोप्ची ॱङ च्यक्न टेत्नी, हुदु स ॱमत् छुबे ॱल्हक्टो़ घयेत् दी खीक्की डालो घजो़त् च्यीक् डुब? 10मी तोङ्डक् स्यील ढोप्ची दी़न् टेत्नी, हुदु स ॱमत् छुबे ॱल्हक्टो़ फरक् फीरुक् घयेत् दी डालो घजो़त् च्यीक् डुब? 11हीगो हीन्न ॱनी, घन्दुक् झ्यीन खीक्की ङे केच्च्य हीगो ढोप्ची मीप्पे ढीक्ल सीक्केन् ब अक् ॱनो़ब ॱसम्गेन्? खीत्रङ्ल ङे फरीसी धङ् सदुकी घयेक्की च्युर् दीनी धोजीम् झ्यीन दो़च्च्यीत् झ्यीब मेन्द झ्यीब बेत्। 12हीगो सीन्नी क, ॱलोप्टुक् दीबे येशुगी केच्च्य हुगो ढोप्चील ॱरीक् ज्यक्च्येमे च्युर्नी धोजीम् झ्यीन दो़त् झ्यीब मेम्ब, फरीसी धङ् सदुकी घयेक्की ॱलोप्सनी धोजीम् झ्यीन दो़च्च्यीत् सीत्तुक् व ॱनो़ब ॱह घोव बेत्।
येशुल ख्रीष्ट् बेत् झ्यीब १३-२०
13हीनी येशुसो सीजरीया फीलीप्पीगी लुङ्बल फीम्ब बेत्। ॱनी हुदु खोङ्गी रोरङ्गी ॱलोप्टुक् दीबल कोलीमीगी ॱरेबुल मी घयेक्की ॱसु बेत् सीन्न सीगुक्क? सीन्न ढीब बेत्। 14ॱनी हीगी लेल्ल हुबे मी यरीबे युहन्ना बप्तीस् हीङ्गो़प्पेत् सीगुक्। ॱनी यरीबे एलीया हीङ्गो़प्पेत् सीगुक्। ॱनी यरीबे यङ् यर्मीया हीङ्गो़प्पेत् सीगुक्। यरीबे धङ्बी़ कलुङ् ॱस्यो़क्केन् च्यीक् हीङ्गो़प्पेत् सीगुक् झ्यीब बेत्। 15ॱनी खोङ्गी हुबल खीक्की हीगी ढीक्ल ङल ॱसु बेत् सीगो़प्प ॱनी? 16ॱनी हीगी लेल्ल शीमोन् पत्रुस्की नीज्यरङ् ॱसोम्बु हीम्बे को़न्ज्योक्की ॱरेबु च्यप्को़न् ख्रीष्ट् बेत् झ्यीब बेत्। 17हीगो सीन्नी, येशुगी ॱवे योनागी भु शीमोन् रङ् ॱसोदी च्येम्मे मी बेत्। घन्ड हीन् सीन्न रङ्गी केच्च्य हीगो कोलीमी ॱसीम्नी ॱनो़न थो़म्ब मेम्ब, तेङ् यी़न स्युगेन् ङे यप्की रङ्ल तो़म्ब बेत्। 18ङे रङ्ल ॱस्येत् योङ्। पत्रुस् रङ्गी मीङ्गी धो़न् दी दो तीङ्दो बेत्। ॱनी हीगी दो तीङ्दो हीगी थोक्ल ङे ङरङ्गी छ्यो़ छो सोगेन्। ॱनी ॱस्यीवे ॱस्यीक् हीगोले ज्यला थो़न् ॱमीत् छुगेन् बेत्। 19तेङ् यी़गी ज्यागक्की दीमीक्की च्यी दी ङे रङ्गी लक्ल टो़क्केन्। ॱस जम्बुलीङ्दु रङ्गी घन्ड मीत् युङेत् सीक्को़दङ् ॱनी हुगो तेङ् यी़दु उक् हुन्दुक् दीरङ् युङ्गेन् बेत्। ॱनी ॱस जम्बुलीङ्दु रङ्गी घन्ड युङेत् सीक्को़दङ् हुगो तेङ् यी़दु उक् हुन्दुक् दीरङ् युङ्गेन् बेत् झ्यीब बेत्। 20हुनी खोङ्गी ॱलोप्टुक् दीब कुरीक्ल ङ को़न्ज्योक्की को़बे च्यप्को़न् ख्रीष्ट् बेत् सीन्न खीत्रङ्गी मी ॱसुल आक् ॱमत् ॱस्यो़च्च्यीत् सीन्न गन्दीक्म ॱङाब बेत्।
येशु ढोङे ढीक्ल पत्रुस्की केच्च्य २१-२३
21हीनी झ्यीब दी येशुगी रोरङ्गी ॱलोप्टुक् दीबल हीन्दुक् झ्यीबे केच्च्य ॱस्येत्न युङ बेत्। ङ यरुशलेम्ल डो गोगेन् बेत्। ॱनी हुगी लुङ्बे गेम्बा चो छ्यीया घयेक्की, छ्यो़प्पो़न् चो छ्यीया घयेक्की धङ् छ्यो़डीम्गी चयेलम घयेक्की ङल दुक्प तङ्न ॱसो़क्केन् बेत्। हुनी स्यक्पु ॱसुम् ॱसोङे ङीन् दी यङ् ङ ॱसोम्बुल लोङ्गेन् सीन्न ॱस्येप्प बेत्।
22ॱनी पत्रुस्की येशु फच्चो़त् च्यीक्ल ठीक्न खोङ्ल चोव ज्यीन्दक्, हीगो डस्सीगी लेमु नीज्यरङ्ल युङ् ॱमीत् ॱस्यीगेन् बेत्। नीज्यरङ्ल हीन्दुक् झ्यीब नम् नम्ल अक् युङ्ज्ये मीप्प तोङ् सीन्न लप्स्यागी लेमुनी झ्यीब बेत्। 23हुनी येशु तक्ल लोक्न तेन पत्रुस्ल ॱवे शैतान्, ङ च्यानी रङ् फल्ल ज्युक्। रङ् ङल हीदु भर्च्येत् तोङ्गेन् च्यीक् दुक्। रङ्गी ॱनो़बे केच्च्य हुगो को़न्ज्योक् च्यागी मेम्ब, कोलीमी ङो़नी युङे केच्च्य बेत् सीन्न झ्यीब बेत्।
येशुगी लम्ल युङ्गेङ्गी ढीक्ल २४-२८
24हुनी ॱलोप्टुक् ॱयोङ्म दीबल ङे लम्ल मी ॱसु युङ्गीन् थेक्को़दङ् हुगी रोरङ्गी धेच्च्यो घयेत् फङ्न रोरङ्गी कुरुस् खुर्न युङ् गोगेन् बेत्। 25ॱनी मी ॱसी़ रोरङ्गी छी दी तोर् योङ् ॱनो़न फङ झ्यीगुक्क हुगी छी दी तोर् डोगेन् बेत्। ॱनी यङ् ॱसी़ ङे धो़ल्ल रोरङ्गी छील फङ मीप्प झ्यीगुक्क हुल ॱङीत्न थोप्केन् बेत्। 26जम्लीङ् की़न् दीरङ् लक्ल झ्युङ्ज्यङ्, रोरङ्गी छी दी मीत्तल ॱसोङ्न ॱनी, हुल घन्डे फेन्दो दी युङ्गेन्? हुगी रोरङ्गी छी दी घन्दुक्मे रीर्रङ् टेत्न आक्, हुगो ॱलु ॱमीत् छुगेन् बेत्। 27तीङ्ला कोलीमीगी ॱरेबुल रोरङ्गी यप्की तो़त्वङ् झ्युङ्न रोरङ्गी तेङ् यी़गी भङ्ज्येम्ब घयेत्तङ् दल युङ्गेन् बेत्। हुगी यङ्ल
मी रीदङ् रील ॱसोस्सोरङ्गी घङ् झ्यीबे लेगी लेन् टो़क्केन् बेत्। (ॱसुङ्रप्की गुल्लु ६२:१२)
28ङे खीत्रङ्ल गन्दीय ॱस्येत् योङ्। हुन्दो हीन यो़क्केन् खीत्रङ् यरी ॱमत् ॱस्यीयलरङ् कोलीमीगी ॱरेबु रोरङ्गी ज्यागक् च्योङ्दु युङ थोङ्गेन् बेत् झ्यीब बेत्।
Currently Selected:
मत्ती 16: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
