मत्ती 13
13
को़न्ज्योक्की ज्यागक्की ढीक्ल ॱस्येप्पे ॱलीङ्दम् घयेत् १३:१–१३:५१
ॱसो़न् तोबे ढीक्ल ॱलीङ्दम् च्यीक् १-९
1ॱनी येशु हुगी ङीन् दीरङ् हुनी थो़न्न छो़ छीगल फीन्न हुदु ॱसल देप्प बेत्। 2ॱनी हुदु खोङ् च्येल्ल मी छेत्मीत् जोम्न युङ बेत्। ॱनी मी मङ् ढानी, खोङ् छो़ थोक्तु ढुल स्युन देप्प बेत्। मी घयेत् दी छो़ छीगदु देप्प बेत्। 3ॱनी हुदु खोङ्गी मी घयेत् दील केच्च्य गज्येन् पी तो़न्न ॱस्येत्न टेप्प बेत्। गोम दी हीन्दुक् सीन्न येशुगी ॱस्येप्प बेत्। ॱसो़न् तोप्तु ॱसो़म्म च्यीक् डोगेन् बेत्। 4-8ॱनी ॱसो़न् दी तोप्कील्ल फीन्नी, ॱसो़न् यरी लङ्गक्ल, यरी ॱस ओ़दोरोक्ल, यरी नेसोरोक्ल, यरी ॱस गा ॱसदीक्ल खीब बेत्। ॱनी लम्ल खीब दी झ्यज्युङ्म घयेक्की डुन से तङ बेत्। ॱनी ॱस ओ़दोरोक्ल खीब दी हुगो ज्योक्पा कीब बेत्। ॱनी ङीम तङ्नी, हुल ॱस गक् मीप्पल ढा च्योङ् ॱमत् छुब, ङीमे छीक्न ॱस्यीनर बेत्। ॱनी नेसोरोक्ल खीब दी चङ्गी दोङ्बी़ तुम्नी, हुगो ज्ये ॱमत् छुब बेत्। ॱनी ॱस गा ॱसदीक्ल खीब दी क हस्सो़त् गङ्ज्येन् कीन ज्येन युङ्नी, हुनी क यरीनी ज्यगोर्, यरीनी ढुक्च्युगोर्, यरीनी ॱसुम्ज्युगोर् युङ्गेन् बेत्। 9खीत्रङ् ॱसुल आम्ज्योक् यो़दङ् हुगी हीगो नेन्ज्यीत् सीन्न ॱसुङ बेत्।
ॱलीङ्दम्ल ॱस्यो़त् गोगेङ्गी धो़न् १०-१७
10तीङ्ला ॱलोप्टुक् दीबे येशुल नीज्यरङ्गी केच्च्य ॱस्यो़प्पे यङ्ल मी घयेत्ल ॱलीङ्दम्ल च्यङ्ज्यङ् ॱस्यो़क्कुक् न। हुगो घन्डे धो़ल्ल बेक्क? सीन्न ढीब बेत्। 11हीगी लेल्ल येशुगी तेङ् यी़गी ज्यागक्की धो़ङ्गी ॱङीङ्बु घयेत् खीत्रङ्लरङ् तो़न्न टेप्प बेत्। हुब घयेत्ल ॱमीत् तो़ङ्गेन् बेत्। 12हीगो झ्यीनी मी ॱसुल दुक्क हुल ॱल्हक्मु बीन्न मो़त् छ्यीली युङ्गेन् बेत्। ॱनी यङ् ॱसुल मीन्दुक्क हुगो च्यानी रोरङ्ल घङ् यो़प्प दी इक् ठो डोगेन् बेत्। 13हीगो झ्यीनी ङे हुब घयेत्ल ॱलीङ्दम्ल मेन्द, ॱमीत् ॱस्यो़प्प यो़त्। हुबे तेन आक्, ॱमीत् थोङ्गेन् बेत्। हुबे नेन्न अक्, मीत् घोगेन् बेत्। 14यशैयागी ॱङो़स्स्यील थो़ङ्गेङ्गी केच्च्य हीगो हुबे ढीक्ल डुप्केन् बेत्।
खीत्रङ्गी नेम्ब दी त नेङ्गेन् बेत्। ॱनी मीत् घोगेन् बेत्। ॱनी तय दी त तगेन् बेत्। ॱनी ॱमीत् थोङ्गेन् बेत्। 15हीगी मीमङ् हीबे ॱसीम् दी म दीरङ् गट्टक्प खुर्नी, हीबे आम्ज्योक् दी इक् गानर, ॱमीक् दी इक् छुमीय यो़क्केन् बेत्। हीबे ॱसीम् दी गट्टक्प मीत्न ॱनी, स्येन् हीबे ॱमीक्की थोङेत् क ॱनी। हीबे आम्ज्योक्की नेम्ब दी इक् ॱह घोयेत् क ॱनी। हुनी हीब ङ च्याल लोक्न युङ्न ङे हीब ढक्तु ची़प्पेत् क ॱनी सीन्न को़न्ज्योक्की ॱस्येप्प थो़ङ्गेन् बेत्। (यशैया ६:९-१०)
16ॱनी खीत्रङ् हुब डस्सी मेम्ब, खीत्रङ्गी ॱमीक्की थोङ्गेन् बेत्। खीत्रङ्गी आम्ज्योक्की इक् घोगेन् बेत्। हुगो झ्यीनी खीत्रङ् ॱसोदी छ्यीम्मु बेगो।
17ङे खीत्रङ्ल गन्दीय ॱस्येत् योङ्। खीत्रङ्गी घङ् थोङ धङ् घङ् घोव घयेत् हीगो धङ्बी़ कलुङ् ॱस्यो़क्केन् घयेत् धङ् को़न्ज्योक्की मी ढङ्बु घयेक्की इक् दो़न्दो़त् तगीन् थेप्प धङ् नेङ्गीन् थेप्प झ्युङ बेत्। ॱनी हुबल तज्ये एक् ॱमत् ॱनोङ, नेन्ज्ये एक् ॱमत् ॱनोङ बेत्।
ॱसो़म्मे ॱलीङ्दम्गी धो़न् १८-२३
18ॱसो़न् तोप्केङ्गी ॱलीङ्दम्गी धो़न् दी खीत्रङ्सो नेन्। 19लङ्गक्ल ॱसो़न् खीबे धो़न् दी को़न्ज्योक्की ज्यागक्की केच्च्य नेम्ब त नेङ्गेन् बेत्। ॱनी नेन्न अक्, हुगी ॱह मीत् घोगेन् बेत्। हुनी दी़त्ङेन् युङ्न हुगी ॱसीम्ल तबे ॱसो़न् दी तो़न्न पुर् तोङ्गेन् बेत्। 20ॱस ओ़दोरोक्ल ॱसो़न् खीबे धो़न् दी केच्च्य दी गोम ॱह घोवे यङ्ल ॱस्यर्च्यक् हुगी हुल गेस लङ्न ॱसम्गेन् बेत्। 21ॱनी हुगी चव ढादक् दी डम्ज्ये मीप्पल हुगो धोबा च्यीक्नी हीगी केच्च्ये ढीक्ल दुक्प अयेक्प धङ् दुक्स्यी नोङ्नी ॱनी, हुगो ॱस्यरी ॱएङ्गी लम् दीलरङ् लोक् डोगेन् बेत्। 22नेसोरोक्ल खीबे धो़न् दी केच्च्य नेम्ब दी त नेङ्गेन् बेत्। ॱनी हुगी रोरङ्गी मीजील च्युगा धङ् नोर् ॱसक्पे लोप्ल ॱसोङ्नी, केच्च्य दी ॱनङ्ज्युङ्ल ॱस्योर्न डेबु छ्या ॱमीत् छुगेन् बेत्। 23ॱस गा ॱसदीक्ल खीबे धो़न् दी केच्च्य दी नेन्नी, हुनी हुगी धो़न् दी ॱह घोगेन् बेत्। हुनी हस्सो़त् डेबु छ्यान यरीनी ज्यगोर्, यरीनी ढुक्च्युगोर्, यरीनी ॱसुम्ज्युगोर् युङ्गेन् बेत् झ्यीब बेत्।
ढ धङ् युप्पी़ ॱलीङ्दम् २४-३०
24हीनी यङ् येशुगी ॱलीङ्दम् च्यीक्लरङ् हीन्दुक् सीन्न ॱस्येप्प बेत्। तेङ् यी़गी ज्यागक्की लेमु हीगो डस्सी युङ्गेन् बेत्। मी च्यीक्की रोरङ्गी स्यीङ्गल ॱसो़न् गङ्ज्येन् तप्न स्यक्प बेत्। 25ॱनी छेम्मु मी घयेत् ॱङीत्ल ॱसोङ् देप्पल हुगी ड दी युङ्न स्यीङ्ग दील ढे ॱसो़ङ्गी थोक्ल युप्पु अयेक्प युङ्ज्येल युप्पी़ ॱसो़न् च्यीक् तप्न स्यक्न टप्नर बेत्। 26ॱनी ढ दीदङ् मुल युप्पु दी इक् अज्यु भोङ्न कङ्ज्यीक्ल डस्सी डस्सी कीन युङ बेत्। ॱङीम थो़म्बे यङ्ल क हुगो युप्पु हीम्ब दी ॱह घोव बेत्।
27हुनी स्यीङ्गे दक्पी़ ॱयोक्पु दीबे दक्पु दील नीज्यरङ्गी स्यीङ्गल ॱसो़न् गङ्ज्येन् तब हीन्न ॱनी, हुगी युप्पु हुगो घन्दुक् झ्यीन कीब बेक्क? सीन्न झ्यीब बेत्। 28हीगी लेल्ल दक्पु दीगी हुगो ङे ड घयेक्की झ्यीबे ले बेत् झ्यीब बेत्। ॱयोक्पु दीबे यङ् हुगो हीन्न, युप्पु हुगो ङीक्की पीक्न पुर् तोङ्ज्ये न? सीन्न ढीब बेत्। 29ॱनी दक्पु दीगी ॱमत् पीक्। घन्ड हीन् सीन्न खीत्रङ्गी युप्पी़ दल ढ अक् पीक् तोङ्गेन् बेत्। 30नम् ॱङीम तोक् तोक् थुक्ल ॱङीक्कर् स्योक्लोङ्। ॱनी ॱङीम तोक्पे यङ्ल हस्सो़त् ङे लेमीय घयेत्ल हुगी युप्पु हुगो एल्ला पीक्न बीच्च्यक् बीच्च्यक् दम्न मील पुर्न ॱहेलोङ्। हुनी हस्सो़त् ढ दी तोन ङे जो़त्ल ॱलुक् सीन्न ॱङक्केन् झ्यीब बेत्।
तोरीगी ॱसो़ङ्गी पी धङ् च्युर्की केच्च्ये पी च्यीक् ३१-३५
31हीनी यङ् येशुगी पी च्यीक्लरङ् हीन्दुक् सीन्न ॱस्येप्प बेत्। तेङ् यी़गी ज्यागक्की लेमु मी च्यीक्की स्यीङ्गल तोरीगी ॱसो़न् ॱसो़न्दोक् च्यीक् तब डस्सी युङ्गेन् बेत्। 32हुगो ॱसो़न् घयेक्की छीक्नी ठस्स्यो बेत्। ॱनी हीन्न अक्, हुगो कीनी स्यीङ्गल कीबे ॱङोमक् ॱयोङ्म घयेत्ले हुगो छ्यीया दोङ्बु डस्सी युङ्गेन् बेत्। हुगी यल्लक् घयेत्ल ॱनम्गी झ्यज्युङ्म घयेक्की इक् छङ् सो़न दो़क्केन् बेत् झ्यीब बेत्।
33हीनी येशुगी पी ॱयोङ् च्यीक्ल हीन्दुक् सीन्न ॱस्येप्प बेत्। तेङ् यी़गी ज्यागक्की लेमु हीगो डस्सी युङ्गेन् बेत्। भुमु च्यीक्की चम्ब खेगुर् च्युक्सुम्जो़त् च्यीक्ल च्युर् ज्यप्न ढोप्ची जीनी, हुगो जेङ् च्युर्ल ॱसोङ्न बो़गेन् बेत्।
34हुगी मी घयेत् दील येशुगी हुन्दुक् झ्यीन ॱलीङ्दम्ल कोर्न ॱस्येप्प बेत्। ॱलीङ्दम्ल ॱमत् कोरे केच्च्य च्यीक्तङ् ॱमत् ॱस्येप्प बेत्। 35ॱनी हीगो धङ्बु कलुङ् ॱस्यो़क्केन् च्यीक्की ॱस्येप्पे केच्च्य हीगो डुबल झ्युङ बेत्।
ङ ॱलीङ्दम्ल गज्येन् ॱस्यो़क्केन्। ॱस धङ् ॱनम् छ्यादु ची़प्पनी झ्यीनी ॱमत् तो़म्बे केच्च्य घयेत् ङे तो़न्न ॱस्यो़क्केन् सीर थो़ङ्गेन् बेत्। (ॱसुङ्रप्की गुल्लु ७८:२)
ढ धङ् युप्पी़ ॱलीङ्दम्गी धो़न् ३६-४३
36हुनी येशुगी हुगी मी घयेत् दी पीद तङ्नी हुनी खोङ् युङ्न खीम् च्यीक्ल स्युन देप्प बेत्। ॱनी हुदु ॱलोप्टुक् दीबे खोङ्ल स्यीङ्गल युप्पु कीबे ॱलीङ्दम्गी धो़न् दी नीज्यरङ्गी ङीत्ल ॱस्यो़त्रो झ्यी सीन्न स्यी़ब बेत्। 37ॱनी हुगी लेल्ल येशुगी ॱसो़न् गङ्ज्येन् तोप्केन् दी कोलीमीगी ॱरेबु बेत्। 38स्यीङ्ग दी जम्बुलीङ् बेत्। ॱसो़न् गङ्ज्येन् हुगो को़न्ज्योक्की ज्यागक्की मीस्सीर् घयेत् बेत्। युप्पु हुगो दी़त्ङेन् हुगो ङो़गी मी घयेत् बेत्। 39युप्पी़ ॱसो़न् तोप्केन् दी दी़क्की चो बेत्। तो़न्दोक् दी़प्पे ले दी स्युक् थमे ङीङ्गी यङ्ल बेत्। ॱनी हुगी लेमीय दीब तेङ् यी़गी भङ्ज्येम्ब घयेत् बेत्। 40युप्पु घयेत् दी दी़न मील ॱहेब डस्सी स्युक् थमे ङीङ्गी यङ्ल युङ्गेन् बेत्। 41कोलीमीगी ॱरेबी़ खोङ् रोरङ्गी भङ्ज्येम्ब घयेत् इगीनी मल्ल तङ्न खोङ् रोरङ्गी ज्यागक्तु दीक्प झ्यीत्तु ची़क्केन् धङ् चीने मीप्प ङीब झ्यीक्केन् घयेत् दी़न 42मी बर्सल पुर्केन् बेत्। ॱनी हुदु ङुजी ज्यक्केन् धङ् ॱसोन्जीन् डीक्केन् युङ्गेन् बेत्। 43ॱनी हुगी यङ्ल को़न्ज्योक्की मी ढङ्बु घयेत् रोरङ्सो़ यप्की ज्यागक्तु ङीमे टक् डस्सी झ्युङ्न दो़क्केन् बेत्। खीत्रङ् ॱसुल आम्ज्योक् यो़दङ् हुगी हीगो नेन्ज्यीत्।
तीर् धङ् मुदीक्की ॱलीङ्दम् ४४-४६
44ॱनी यङ् तेङ् यी़गी ज्यागक्की लेमु हीगोदङ् छ्येत्मीत् च्यीक् युङ्गेन् बेत्। स्यीङ्गल तीर् च्यीक् बेन स्यक्न यो़क्केन् बेत्। ॱनी हुगी तीर् दी मी च्यीक्की थोङ्नी, गेस लङ्न यङ् बेक्ले झ्यीन स्योक्केन् बेत्। ॱनी हुगो रोरङ्ल थोप्च्येल रोरङ्गी घङ् यो़प्प घयेत् दी चोङ्नी हुगी स्यीङ्ग दी नोगेन् बेत्।
45ॱनी यङ् तेङ् यी़गी ज्यागक्की लेमु हीगोदङ् छ्येत्मीत् च्यीक् युङ्गेन् बेत्। मुदीक् गङ्ज्येन् ॱयेङ्गेन् छोङ्बा च्यीक् युङ्गेन् बेत्। 46घोङ् छ्यीम्मु च्येम्मे मुदीक् च्यीक् यो़प्प थोङ्नी, हुनी हुगी रोरङ्ल घङ् यो़प्प घयेत् दी चोङ्नी हुगी मुदीक् दी नोगेन् बेत्।
जालील न सीम्बे ॱलीङ्दम् ४७-५०
47ॱनी यङ् तेङ् यी़गी ज्यागक्की लेमु छोल जाली टम्न न ॱनम्ब गज्येन् सीम्ब डस्सी च्यीक् युङ्गेन् बेत्। 48ॱनी नबा दीबे उन न थीप्न यो़प्प ॱह घोनी, जाली दी छीगल थीन्न हुनी न गा घयेत् दी नगो़ल्ल ॱलुक्केन् बेत्। ॱनी न आक्पा घयेत् दी पुर् तोङ्गेन् बेत्। 49हीगो डस्सी दी क स्युक् थमे ङीङ्गी यङ्ल तेङ् यी़गी भङ्ज्येम्ब घयेत् युङ्न को़न्ज्योक्की मी ढङ्बु घयेत् धङ् मी ङेम्ब घयेत् ॱयुव पीक्केन् बेत्। 50हुनी ङेम्ब घयेत् दी मी बर्सल पुर्केन् बेत्। हुदु ङुजी ज्यक्केन् धङ् ॱसोन्जीन् डीक्केन् युङ्गेन् बेत्।
तेङ् यी़गी ज्यागक्की ॱलोप्टुक् ५१-५२
51ङे घङ् ॱस्येप्प हीगो खीक्की ॱह घोज्युङक्? सीन्न ॱलोप्टुक् दीबल ढीब बेत्। हुबे लेल्ल घोज्युङ् झ्यीब बेत्। 52हीनी येशुगी हुबल यङ् छ्यो़डीम्गी चयेलम ॱसु तेङ् यी़गी ज्यागक्की ॱलोप्टुक्ल स्युक्कुक्क हुगो खीम्गी दक्पु डस्सी युङ्गेन् बेत्। हुगी रोरङ्गी जो़त्ल ॱलुक्न स्यक्पनी ॱसम्ब आक् तो़ङ्गेन्, ॱङीङ्ब आक् तो़ङ्गेन् बेत् झ्यीब बेत्।
येशुसो गालीलाल गीरे केच्च्य १३:५३–१७:२७
येशुल रोरङ्गी युगी मी छ्यप्स्यक् मत् स्यक्प ५३-५८
53येशुगी हुन्दुक् झ्यीन ॱलीङ्दम् घयेत् ॱस्येत् छर्नी हुनी खोङ् रोरङ्गी फयुल लोक्प बेत्। 54ॱनी यहुदीगी छ्यो़गी छोगङ्ल फीन्न हुदु मी जोम्न युङ घयेत्ल खोङ्गी ॱलोप्स ज्यब बेत्। ॱनी हुगी मी घयेत् दी ॱह लेन हुबे रोरङ्सो नङ्दु हुगी मी हुल नुक्मे झ्यी़रीक् खेब धङ् ॱस्यीक् छ्यीम्मी़ ले झ्यीच्च्येम घयेत् घनी झ्युङ ब अक्? 55हीगो सोबो़ङ्गी भु मेम्बेक्क ॱनी? हीगी आम दी मरीयम् मेम्बेक्क ॱनी? पी़न् दीब याकुब्, युसुफ्, शीमोन्, यहुदा झ्यीब मेम्बेक्क ॱनी? 56हुगी नुमु दीब हीनरङ् यो़क्केन् मेम्बेक्क ॱनी? ॱनी हुगी मी हुल हुन्दुक् झ्यीच्च्येम घनी झ्युङ ब अक्? सीन्न झ्यीब बेत्। 57हुब म दी खोङ्ल गज्ये ॱमत् छोर बेत्। ॱनी येशुगी हुब घयेत्ल कलुङ् ॱस्यो़क्केङ्गी मील तो़प्प मीत् झ्यीक्केन् दी रोरङ्गी फयुगी मी धङ् रोरङ्गी ढोङ्बे मीजङ् घयेत्रङ् युङ्गेन् बेत् सीन्न ॱसुङ बेत्। 58हुगी मी घयेक्की येशुल छ्य मत् स्यक्पल खोङ्गी हुदु ॱस्यीक् छ्यीम्मी़ ले गक् मत् झ्यीब बेत्।
Currently Selected:
मत्ती 13: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
