मत्ती 11
11
येशु खोङ् रोरङ् ॱसु हीन् तो़ङ्गेन् हीम्ब ११:१–१२:५०
युहन्ना बप्तीस्की ढीक्ल १-१९
1ॱलोप्टुक् च्युन्नीबु दील येशुगी हुन्दुक् सीन्न केच्च्य ॱङान तङ्नी हुनी खोङ् हुगी लुङ्बे सार् घयेत्ल ॱलोप्स ज्यक्कीन् धङ् केच्च्य ॱस्यो़क्कील्ल गीर बेत्।
2युहन्ना बप्तीस् चो़ल्ल यो़प्पे यङ्ल ख्रीष्ट्की जेप्पे लेमु घयेत् दी चो़न्दु ॱह घोव बेत्। हुनी रोरङ्गी ॱलोप्टुक् दीब येशु च्येल्ल तम् ढीदु तङ बेत्। 3ॱनी हुबे खोङ्ल तीङ्ला झ्यो़ङ्गेन् बेत् सीक्केन् दी नीज्यरङ्रङ् हीम्ब न, न ङीत् ॱयोङ्म च्यीक्ल गुक् गोगेन् बेक्क? सीन्न ढीब बेत्। 4ॱनी हीगी लेल्ल येशुगी खीत्रङ् लोक्ल ज्युक्ल खीत्रङ्गी घङ् घोव धङ् घङ् थोङ घयेत् दी युहन्नाल ॱस्येत्न टो़त्लेत्। 5स्यरीय घयेत् थोङ्गेल्ल सोगुक्। घोङ्रीय घयेत् लोङ्न छ्यम्गुक्। जीस्सो़ घयेत् ढक्न चङ्मल सोगुक्। ओ़न्ज्यङ घयेक्की घो डोगुक्। ॱस्यीनर घयेत् ॱसोम्बुल ॱलोङ्गुक्। मी दुक्च्या घयेत्ल केच्च्य ॱनेम्बु ॱस्यो़क्कुक्। 6ॱसु ङे ढीक्ल ॱहब दुब मीप्प झ्यीन युङ्गुक्क हुगो ॱसोदी च्येम्म युङ्गेन् बेगो सीन्न ॱस्येत्न तङ बेत्।
7ॱनी हुब ॱसोङ्नी, उन यो़प्पे मी घयेत् दील येशुगी युहन्नागी ढीक्ल हीन्दुक् सीन्न केच्च्य ॱस्येप्प बेत्। पक्क झ्यङ्दङ्ल तदु फीन्नी खीत् घयेक्की घन्ड थोङ्ज्युङ? ॱलुङ्ल ॱनुक्म योक् योक् झ्यीप्प च्यीक् थोङ्ज्युङ? 8न घन्ड च्यीक् थोङ्ज्युङ? न घो़ गङ्ज्येन् घो़म्ब च्यीक् थोङ्ज्युङ? मेम्बेत्। घो़ गङ्ज्येन् घो़न्न सप्केन् ज्यागङ्गी नङ्लरङ् युङ्गेन् बेत्। 9ॱनी हीगो ओक् मेन्न ॱनी, घन्ड च्यीक् थोङ्ज्युङ? कलुङ् ॱस्यो़क्केन् च्यीक् थोङ्ज्युङ? ङे ॱस्येत् योङ्। हुगो कलुङ् ॱस्यो़क्केल्ले एक् छ्यीया बेत्। 10हुगी ढीक्ल ॱसुङ्रप्ल हीन्दुक् सीर को़न्ज्योक्की ॱस्येत्न यो़क्केन् बेत्।
ङे लो़न् टो़क्केन् च्यीक् रङ्गी एल्ला लम् ॱसेदु तोङ्गेन्। (मलाकी ३:१)
11खीत्रङ्ल ङे गन्दीय ॱस्येत् योङ्। कोलीमील कीब घयेक्की छीक्नी छ्यीस्स्योल युहन्ना बप्तीस् हुगो ॱनेगेन् बेत्। ॱनी हीन्न अक्, तेङ् यी़गी ज्यागक्तु यङ् युहन्नाले त हुगी ज्यागक्की च्युङ्स्यो च्यीक् छ्यीया युङ्गेन् बेत्। 12युहन्ना बप्तीस्की ङोनी झ्यीनी हजो़त् थुक्ल मी ज्यीक्पा घयेक्की खेरक्की तेङ् यी़गी ज्यागक्की ॱवङ् दी ठोक् छुन ठोक्च्ये ॱनो़ब झ्यीब बेत्। 13हीगी ज्यागक्की ढीक्ल धङ्बुनी झ्यीनी युहन्नागी ङो थुक्ल कलुङ् ॱस्यो़क्केन् घयेक्की ॱङो़स्स्यी गज्येन् ॱस्येत्न युङ बेत्। ॱनी छ्यो़डीम्ल आक् गज्येन् यो़क्केन् बेत्। 14ॱनी हुल थो़ङ्गेन् एलीया च्यीक् युङ्गेन् बेत् सीक्केन् दी युहन्ना हुगो बेत्। म दी खीत्रङ् छ्य स्योक्कीन् थेत्न, हुगो बेत्। 15खीत्रङ् ॱसुल आम्ज्योक् यो़दङ् हुगी हीगो नेन्ज्यीत्।
16हीगी धी़ धीङ्सङ्गी मी हीबे ढीक्ल घन्दुक् झ्यीबे पी च्यीक् ॱस्यो़च्च्ये ब अक्? हीब भीज ठोम्दु जोम्न च्यीक्तङ् च्यीक्ल हीन्दुक् सीक्केन्दङ् डगेङ्गी मी बेत्। 17ङीक्की ॱलीमु ज्युर्न बीन्न अक्, खीत् गेस लङ्न स्यप्र अक् ॱमीत् फक्केन्। ॱनी च्योलु लीन्न बीन्न अक्, खीत् ङुच्च्यङ् ॱमीत् ॱस्योर्केन्। 18हीगोदङ् छ्येत्मीत् दी क युहन्ना थो़न्न युङ्नी, हुगी गोङ्ज्यङ् ॱमीत् थुङ धङ् सम गज्येन् च्यो़ट्टम् झ्यीप्प ॱस्यीनी मी घयेक्की हुल हुगी मी हुगो ॱनो़प्प अयेक्प स्यीन्नरे मी हीङ्गो़प्पेत् सीगुक्। 19ॱनी कोलीमीगी ॱरेबु सगीन् धङ् थुङ्गील्ल युङ थोङ्नी, मी घयेक्की यङ् हुगी मी हुगो सदोङ, च्युक्कोङ, हुगो गोलदर् धङ् दीक्च्येन् ॱयोङ्म घयेक्की छ्यीट्टो बेत् सीन्न सीक्केन् बेत्। ॱनी म दी ङीक्की मीजीगी लेमु दी झ्यी़रीक् च्येम्म हीन् धङ् मेन् ङीक्की डेबु दीगी धक्पर् तो़ङ्गेन् बेत्।
ॱसीम् ज्युर्न मत् युङे सार् घयेक्की ढीक्ल लप्स्य २०-२४
20ॱनी येशुगी हुगी लुङ्बे सार् घयेत्ल गीर्न ॱस्यीक् छ्यीम्मी़ ले गज्येन् झ्यीन तो़न्न आक्, हुगी मी घयेक्की ॱसीम् दी ॱएङ्गी लम्नी मत् ज्युर बेत्। हीगो झ्यीनी येशुगी हीन्दुक् सीन्न लप्स्य तङ बेत्। 21खोराजीन् सार् खो़त् घन्डे दुक्प। बेथ्सेदा सार् खो़त् घन्डे दुक्प। घन्ड हीन् सीन्न खीत्रङ्गी घुङ्दु तो़म्बे ॱस्यीक् छ्यीम्मी़ ले घयेत् हुगो टायर् सार् धङ् सीदोन् सार्तु तो़म्ब हीन्न, बोर हुगी मी हुब एल्ला ॱएङ्गी लम्नी ॱसीम् ज्युर्न हुगी ढीक्ल बोरागी घो़ घो़न्न गोल घोदा कप्न देत् यो़ट्टो। 22सार् ॱङीबु खीत्रङ्ल ङे ॱस्येत् योङ्। ठीम् च्यो़प्पे ङीङ्गी यङ्ल खीत्रङ्ल नोङ्गेङ्गी दुक्प हुले त टायर् धङ् सीदोन्ल फोक्पे छ्येप्प हुगो गुर् थेक्पा युङ्गेन् बेत्।
23ॱवे कफर्नहुम्, खो़त् तेङ् यी़ल ते च्यो़गेन् बेत् ॱनो़ब ॱसम्गो़प्प? रङ् ॱस्यीवे यी़ल तोङ्गेन् बेत्। घन्ड हीन् सीन्न रङ्गी घुङ्दु तो़म्बे ॱस्यीक् छ्यीम्मी़ ले घयेत् हुगो धङ्बु सदोम् सार्तु तो़म्ब हीन्न, बोर हुगो हजो़त् थुक् देत् यो़ट्टो। 24ङे रङ्ल ॱस्येत् योङ्। ठीम् च्यो़प्पे ङीङ्गी यङ्ल रङ्ल नोङ्गेङ्गी दुक्पले त सदोम्ल फोक्पे छ्येप्प हुगो गुर् थेक्पा युङ्गेन् बेत् झ्यीब बेत्।
25हीगो सीन्नी येशुगी को़न्ज्योक्ल हीन्दुक् ॱसुङ बेत्। तेङ् यी़ धङ् ॱस जम्बुलीङ्गी चोव ज्यीन्दक्, पब, नीज्यरङ्गी हीगो मी खेबा धङ् ॱस्यीब च्येम्म घयेत्ल ॱमत् तो़म्ब, भीज डस्सी झ्यीबे मी घयेत्ल तो़न्न युङ बेत्। हीगी ढीक्ल नीज्यरङ्ल थु छ्यी, थु छ्यी। 26हीगो पब नीज्यरङ्गी थुल ॱसोङ्न यो़क्केन् बेत्।
27छङ्म थम्ज्येत् कुरीक् ङे लक्ल ङे यप्की टेत्न यो़क्केन् बेत्। ॱनी ॱरेबु दीम्बरङ् ङु ॱस्यीगेन् दी यप् मेन्द, ॱयोङ् ॱसु उक् मीप्प बेत्। ॱनी यङ् यप् दीम्बरङ् ङु ॱस्यीगेन् दी इक् ॱरेबु धङ् ॱरेबी़ ॱसुल ङोस्स्यीन् टो़च्च्ये ॱनो़न टेत् यो़दङ् हुगी मेन्द, ॱयोङ् ॱसी़ इक् ङु ॱमीत् ॱस्यीगेन् बेत् सीन्न ॱसुङ बेत्।
थङ् छ्येत्नर घयेत्ल २८-३०
28खीत्रङ् खेदे होक्ल ॱस्योर्नर घयेस्सो, ङ च्याल ॱस्योक्। ङे थङ् ॱसो़दु ची़त् योङ्। 29ङ ॱनी ॱसीम्ज्युङ् धङ् ॱनोम्ज्युङ् यो़त्। ङे ॱनेक्स्यीङ् दी खीत्रङ्गी ज्यी़त्न खुर्न ङे पी हुल तेन झ्यी। हुनी क खीत्रङ्गी ॱसीम्ल थङ् ॱसो़गेन् बेत्। 30घन्ड हीन् सीन्न ङे टो़क्केङ्गी ॱनेक्स्यीङ् हुगो धो दीन्दीक्म धङ् खेद दी यङ्बोक्म यो़क्केन् बेत् झ्यीब बेत्।
Currently Selected:
मत्ती 11: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
