लुका 23
23
येशु पीलातस्की दोङ्दु १-५
1हुनी हुगी छोक्तेन् छ्यीम्मी़ मी घयेत् दी कुरीक् लोङ्न हुबे येशु पीलातस् च्याल च्येब बेत्। 2हुदु हुबे येशुल ङीब गज्येन् हीन्दुक् सीन्न कब बेत्। हीगी मी हीगी ङीक्की मीस्सीर् घयेत् लम् फीलोक्ल छ्यी़दु ची़क्कुक्। सीजर् ज्याबुल ठेम जप्च्ये मीत् युङ्गेन् बेत् सीगुक्। ॱनी रोरङ् यङ् को़न्ज्योक्की को़बे च्यप्को़न् ख्रीष्ट् ज्याबु दी हीन् सीगुक् झ्यीब बेत्। 3ॱनी पीलातस्की येशुल खो़त् म दी यहुदी घयेक्की ज्याबु हीम्ब ॱनी? सीन्न ढीब बेत्। ॱनी हीगी लेल्ल खोङ्गी नीज्यरङ्गी सीक्केन् दीरङ् हीन् झ्यीब बेत्। 4हुनी पीलातस्की छ्यो़प्पो़न् चो छ्यीया घयेत् धङ् मी घयेत् दील हीगी मी हील ङीब च्यो़न् घन्ड अक् मीन्दुक् झ्यीब बेत्। 5ॱनी मी घयेत् दीगी लेल्ल हीगी गालीलानी झ्यीनी, यहुदीयागी नङ्ल घल अक् केच्च्य ॱस्येत्न टम्न मी घयेत् ॱस खो़दु ची़क्कुक् सीन्न खेत् गेन्न लब बेत्। 6ॱनी पीलातस्की हीगो ॱह घोनी हीगी मी हीगो गालीलागी मी बेक्क? सीन्न ढीब बेत्। 7हुनी येशु हेरोद्गी ॱवङ्यो़क्की ॱसनेगी मी हीम्ब पीलातस्की ॱह घोनी खोङ् हेरोद् च्याल तङ बेत्। हेरोद् हीगी यङ्ल यरुशलेम्न यो़प्प बेत्।
येशु हेरोद्गी दोङ्दु ८-१२
8ॱनी हेरोद्ल येशु ठेत्नी, हेरोद् गेस छ्यीम्मु झ्युङ बेत्। घन्ड हीन् सीन्न येशुगी ढीक्की केच्च्य घयेत् ॱह घोनी हेरोद्ल येशु ठेक्कीन् थेस्सी झ्युङ्नी, गज्येन् ॱसोङ हीङ्गो़प्प बेत्। ॱनी हुन्दो ओक् यीक् छ्यीम्मी़ लेगी ता च्यीक् तो़ङ्गो़ट्टो ॱनो़न रीगो झ्यीब बेत्। 9हुगो झ्यीनी हेरोद्गी येशुल तम् गज्येन् ढीब बेत्। ॱनी खोङ्गी लेम्बु छीक् च्यीक् इक् ॱमत् ॱलोक्प बेत्। 10छ्यो़प्पो़न् चो छ्यीया धङ् छ्यो़डीम्गी चयेलम घयेत् दीब अक् युङ्न उन यो़प्प बेत्। ॱनी हुगी यङ्ल हुब कीरी ठङी देत्न येशुल ङीब गन्दीक्म कब बेत्। 11हेरोद् धङ् हेरोद्गी ॱमक्मी घयेत् दीबे येशु आक्तोक्ल तङ्न ॱङीन्जीन् ज्यब बेत्। हुनी खोङ्ल घो़ गस्सी लेसी च्यीक् को़न्न पीलातस् च्यालरङ् तङ बेत्। 12हेरोद् धङ् पीलातस् एल्ला ड हीङ्गो़प्प बेत्। ॱनी हीगी ङीन् दी क डीक्च्या झ्युङ्न छ्यम्ब बेत्।
पीलातस्की येशुल छ्येप्प केब १३-२५
13हीनी पीलातस्की छ्यो़प्पो़न् चो छ्यीया घयेत्, लुङ्बे ॱवङ् च्येम्म चो छ्यीया घयेत् धङ् मी ॱयोङ्म घयेत् एत् भो़ब बेत्। 14हुनी मी घयेत् दील हीगी मी हीगी मी घयेत् लम् फीलोक्ल च्युगुक् सीन्न खीत्रङ्गी हीगो ङ च्याल च्येज्युङ्। ॱनी ङे हील खीत्रङ् घयेक्की दोङ्दुरङ् ठीम् च्येत्न तेनी खीत्रङ्गी ङीब कब घयेत् दी ङे ॱनी हील ङीब च्यीगी च्यीक् इक् थोङ्मोङ्। 15ॱनी हेरोद्गी इक् घन्ड अक् ॱमत् थोङल क ङ च्याल तङ्ज्युङ्। हीगो ॱसो़त् गोगेङ्गी छ्येप्परङ् फोक्पे ङीब हीगी घन्ड अक् मत् झ्यीबेत्। 16हीगो झ्यीनी हील डेङ्ज्यक् बेन्दु ची़त्न हुनी तोङ्गेन् सीन्न झ्यीब बेत्। 17[ॱनी यहुदी घयेत् छ्यीबे धी़रीम्गी यङ्ल पीलातस्की चो़म्बा च्यीक् तोङ् गोगो़प्प बेत्।] 18ॱनी मी घयेत् दी कुरीक्की ख च्यीक्नी थो़न् थो़न् हीन्दुक् सीन्न केत् ज्यब बेत्। हुगी मी हुगो थीम्सङ्ल तोङ्रो झ्यी। बोर ङीत्ल बारब्बा तोङ्रो झ्यी झ्यीब बेत्। 19हुगी बारब्बा हुगी स्युङ्गी डल लोङ्न सार्तु मी घयेत् हुट्ट छुबे यङ्ल मी च्यीक् ॱसेत्नी, चो़ल्ल ॱस्योर्न यो़प्प बेत्। 20ॱनी पीलातस्की येशु तोङ्ज्ये ॱनो़न फीच्च्य यङ् मी घयेत् दील तम् ॱस्येप्प बेत्। 21ॱनी हुल मी घयेत् दी मत् नेम्ब, हुबे केत् छ्यीम्मु तो़न्न हुगो कुरुस्ल तक्रो झ्यी। कुरुस्ल तान ॱसो़त्रो झ्यी सीन्न केत् ज्यब बेत्। 22ॱनी पीलातस्की हीगोदङ् लेम्म ॱसुम् मी घयेत् दील तम् ॱस्येप्प बेत्। घन्डल ॱसो़त् सीक्केन्? हीगी घन्डे ङीब झ्यीदुक्क? हीगो ॱसो़त् गोगेङ्गी छ्येप्परङ् फोक्पे ङीब ङे घन्ड अक् थोङ्मोङ्। हील डेङ्ज्यक् बेन्दु ची़त्न हुनी तोङ्गेन् सीन्न ॱस्येप्प बेत्। 23हुनी मी घयेत् दीगी केत् छ्यीम्मु ज्यप्न हुगो कुरुस्ल तक्रो झ्यी सीन्न खेरक् तङ बेत्। हुनी मी घयेत् दी ज्यला थो़न्नर बेत्। 24हीनी मी घयेत् दीगी झ्यीब दील पीलातस्की हुन्दुक् दीरङ् झ्यीन टेप्प बेत्। 25हुबे लीम्बे मी दी स्युङ्गी डल लोङ्न हुट्ट छुबे यङ्ल मी च्यीक् ॱसेत्नी चो़ल्ल ॱस्योर्न यो़प्प दी तङ बेत्। ॱनी येशु हुब घयेक्की ॱनो़ब दी झ्यीच्च्येल तङ बेत्।
येशु कुरुस्ल तक्तु ठीक्प २६-३१
26ॱनी येशु कुरुस्ल तक्तु ॱमक्मी घयेक्की ठीक्न डोये यङ्ल सैरेनीगी मी शीमोन् सीक्केन् च्यीक् स्यीङ्गनी लोक्न युङदङ् लम्दु ठेप्प बेत्। ॱनी ठेत्नी, येशुगी कुरुस् दी हुबे हुल केन येशुगी तीङ्ल दीप्प बेत्। 27ॱनी तीङ्ल मी छेत्मीत् युङ्गो़प्प बेत्। ॱनी भुमु घयेत् दी खोङ्गी ढीक्ल ङुज्योङ् धङ् बेज्योङ् ज्यक्कील्ल युङ्गो़प्प बेत्। 28हुनी येशुगी तक्ल लोक्न हुब घयेत्ल ॱवे यरुशलेम्गी भुमु घयेस्सो, ङे ढीक्ल मत् ङुव, बोर खीत्रङ् धङ् खीत्रङ्गी भीज घयेक्की ढीक्ल ङी़। 29घन्ड हीन् सीन्न तीङ्ला धी़ च्यीक् ॱलीक्केन् बेत्। हुगी यङ्ल भुमु कम्डेङ्म, भुजीम मत् युङ, नुम टेत् ॱमत् ॱनोङ घयेत्ल मी घयेक्की घन्डे ॱसोदी छ्यीय बक् आ सीन्न सीक्केन् बेत्। 30हुगी यङ्ल मी घयेक्की लदोक् घयेत्ल ङीक्की थोक्ल खीरो झ्यी। पोर्तोक् घयेत्ल ङीत् घयेत् रङ्गी होक्ल बेन स्योक्रो झ्यी सीन्न सीक्केन् बेत्। 31हीगी मी घयेत् हीबे हुन्दो हीन दोङ्बु ॱङोम्बुल आक् त हीन्दुक् झ्यीक्केल्ल ॱनी कम्बुल ॱसुम्ब घन्दुक् झ्यीबे छ्येप्प छ्यीय फोक्को़दङ् सीन्न ॱसुङ बेत्।
येशु कुरुस्ल ताब ३२-४३
32ॱनी नक्पो़न् मीरङ् ॱङी इक् खोङ्दङ् दल ॱसो़त्तु ठीक्प बेत्। 33ॱनी हुब कुरीक् मी गो डस्सी सीक्केङ्गी ॱसने च्यीक्ल ॱलीब बेत्। ॱनी हुदु खोङ् कुरुस्ल ॱनम्ल ताब बेत्। ॱनी नक्पो़न् ॱङीबु दी इक् च्यीक् खोङ्गी ॱये छ्योदु धङ् च्यीक् ॱयेन् छ्योदु कुरुस् रीदङ् रील ताब बेत्। 34हुनी येशुगी को़न्ज्योक्ल ॱवे पब, हीबे हीन झ्यीक्केङ्गी ले हीगो हीबे ॱह मीत् घोगेन् बेत्। हीगो धक्तु ची़त्रो झ्यी सीन्न ॱसुङ बेत्। ॱनी हुदु ॱमक्मी दीबे खोङ्गी ली़ज्ये दी ॱसु ॱसुल थोप् हुबे रोरङ्सो नङ्दु ज्येन् पुर्न गो़ब बेत्।
35ॱनी फच्चो़त्नी छुल्ल मी घयेत् दी तगीन् यो़प्प बेत्। ॱनी लुङ्बे ॱवङ् च्येम्म चो छ्यीया घयेत् दीबे खोङ्गी ढीक्ल छ्यस्सी़क्की केच्च्यल हुगी ॱयोङ्माल त छ्यीदुक्। ॱनी रोरङ् को़न्ज्योक्की दम्न को़बे च्यप्को़न् ख्रीष्ट् दी हीन्न ॱनी, रोरङ्गी रोरङ् या ढेन युङ्गो़ट्टो झ्यीब बेत्। 36ॱनी ॱमक्मी घयेत् दीबे एक् खोङ्गी लोल फीन्न छ्यस्सी़त् ज्यब बेत्। हुनी हुबे खोङ्ल गोङ्ज्यङ् खीया च्यीक् बीन्न 37रङ् यहुदी घयेक्की ज्याबु दी हीन्न ॱनी, रङ्गी रङ् या ढेन ॱस्योक् सीन्न झ्यीब बेत्। 38खोङ्गी कुरुस्की गो दीदु हीगो यहुदी घयेक्की ज्याबु बेत् सीन्न ढीन ज्यर्न स्यक्प बेत्।
39ॱनी उन कुरुस्ल तान यो़प्पे नक्पो़न् च्यीक्की इक् खोङ्ल खो़त् को़न्ज्योक्की को़बे च्यप्को़न् ख्रीष्ट् दी मेम्ब ॱनी? हीन्न ॱनी, रङ्गी झ्यीन हज्यरङ्सो छ्यीलेत् न ॱनी सीन्न ॱमो़म्बी़त् तङ बेत्। 40ॱनी हीगोल नक्पो़न् च्यीक्पु दीगी खो़त् को़न्ज्योक्ल आक् ज्यीब मीत् झ्यीक्केन्? रङ्ल अक् त छ्येप्प च्यीक्प फोक्न यो़क्केन् बेत्। 41ॱनी हज्यरङ् ॱङीबुल त हज्यरङ्गी घङ् झ्यीबे लेगी लेल्ल छ्येप्प फोक्न यो़क्केन् बेत्। ॱनी हीगी मी हीगी घन्डे ङीब दी झ्यीदुक् सीक्केन्? सीन्न झ्यीब बेत्। 42हुनी हुगी येशुल व येशु, नीज्यरङ्ल नीज्यरङ्गी ज्यागक् च्योङ्ज्येमे ॱवङ् दी झ्युङ्न स्युबे यङ्ल ङ मत् ज्यीब, ढेन्सो़ झ्यीत्रो झ्यी सीन्न झ्यीब बेत्। 43हुल खोङ्गी रङ्ल ङे गन्दीय ॱस्येत् योङ्। रङ् हरीङ्रङ् ङदङ् दल तेङ् यी़गी ॱस्यीङ्ना झ्यीस्से ॱसज्यल ॱलीक्केन् बेत् सीन्न ॱसुङ बेत्।
येशु ढोङे तम् ४४-४९
44ॱनी हीगी यङ्ल ङीम घुङ् ॱलीब बेत्। हुनी झ्यीनी छ्युजो़त् ॱसुम् थुक्ल हुगी लुङ्ब जेङ्ल नम् ॱरो़नर डस्सी ॱनक् थीङीय झ्युङ्नर बेत्। 45ङीमल ओ़त् मीप्पल टप्नर बेत्। हुनी छ्यो़गङ्गी नङ्गी योल दी फीस्स्याल टेक् रानर बेत्। 46हुनी येशुगी केत् छ्यीम्मु तो़न्न ॱवे पब ङे छीरोक् हीगो नीज्यरङ्गी छ्यक्ल ची टो़क्केन् सीन्न ॱसुङ बेत्। हुनी उ ठोक् छ्येत्नर बेत्।
47उन यो़क्केन् ॱमक्पो़न् च्यीक्की हुदु झ्युङे लेमु घयेत् दी थोङ्नी हुगी को़न्ज्योक्ल तो़प्प पुन हीगी मी हीगो गन्दीय ढङ्बु दीरङ् हीङ्गो़प्पेत् व सीन्न झ्यीब बेत्। 48ॱनी हुदु तेक्मु तगीन् दो़क्केङ्गी मी घयेत् दीबे एक् हुदु झ्युङे लेमु घयेत् दी थोङ्नी, हुब नङेन् झ्युङ्न ढङ्गोक् दुङ्गील्ल खीम्ल लोक्नर बेत्। 49ॱनी येशु ङु ॱस्यीगेन् घयेत् धङ् खोङ्दङ् दल गालीलानी युङे भुमु घयेत् दीब अक् फच्चो़त्नी हुदु झ्युङे लेमु घयेत् दील तगीन् यो़प्प बेत्।
येशुगी कुबुर् रो बेक्सल ॱलुक्प ५०-५६
50-51हुगी यङ्ल यरुशलेम्न युसुफ् सीक्केन् मी च्यीक् यो़प्प बेत्। हुगो यहुदीयागी अरीमथीया सार्की मी हीङ्गो़प्प बेत्। हुगो मी गङ्ज्येन् ढङ्बु, को़न्ज्योक्की ज्यागक् नम् युङ्गो़दङ् ॱनो़न गुन दो़क्केङ्गी मी च्यीक् हीङ्गो़प्प बेत्। हुगो छ्यो़गी छोक्तेन् छ्यीम्मी़ सदस्यीय च्यीक् हीङ्गो़प्प बेत्। ॱनी हुगो रोरङ्गी दगु ॱनम्बी़ ढो़गी लेमु दील ॱमत् थी़म्ब हीङ्गो़प्प बेत्। 52हुगो पीलातस् च्याल फीन्न येशुगी कुबुर् दी ङल ॱनङ्रो झ्यी सीन्न लीम्ब बेत्। 53हुनी हुगी येशुगी कुबुर् दी कुरुस्नी पप्न खुर्न रे गङ्ज्येन् च्यीक्की तुम्न खुर्न ढक्ल ढी़न स्यक्पे रो बेक्स च्यीक्ल ॱलुक्न स्यक्प बेत्। हुल एल्ला नम्ल अक् रो ॱमत् ॱलुक्प हीङ्गो़प्प बेत्। 54हीगी ङीन् हीगो ङीत्तुवे यङ्ल गो़बे योज्येत् घयेत् ॱसाम ॱसुत्त डीक्पे ङीन् हीङ्गो़प्प बेत्। ॱनी गोङ्ज्यो ॱलीच्च्येम ॱयेङ बेत्। ॱनी गोङ्ज्यो दीनी ङीत्तुव दी ॱस्यको़र्प्प बेत्।
55ॱनी युसुफ्की खोङ्गी कुबुर् रो बेक्सल ॱलुक्पे यङ्ल येशुदङ् दल गालीलानी गीर्न युङे भुमु घयेत् दीब अक् तगीन् यो़प्प बेत्। 56हुनी हुब खीम्ल लोक्न फीन्नी हुगी यङ्लरङ् रोल ॱही़न्ज्येमे ॱनुम् ढीम स्यीम्बो़त्म ॱहीक्केन् ॱनम्ब गज्येन् दी़न ठोक्क सो़ब बेत्। ॱनी हुगी गोङ् दीनी ङीत्तुव ॱस्यर्नी, हुब डो ॱमत् छुब, ङीत्तुवे कल चीन दो़त् गो़ ॱस्यर बेत्।
Currently Selected:
लुका 23: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
