लुका 21
21
मी मोरेङ्मु च्यीक्की च्यीप्टे ॱङी पुबे तम् १-४
1हुनी छ्यो़गङ्ल पयीसक् पुस दील येशुगी तेनी मी छ्युक्पु घयेक्की हुदु पयीसक् पुब थोङ बेत्। 2ॱनी मोरेङ्मु टङ्बु च्यीक्की च्यीप्टे ॱङीरङ् पुब खोङ्गी थोङ बेत्। 3हुनी येशुगी हुगी मी घयेत् दील ङे खीत्रङ्ल गन्दीय ॱस्येत् योङ्। हुदु कुरीक्ले मङ्स्योल पयीसक् दी मोरेङ्मु टङ्बु हुगी पुसोङ्। 4ॱयोङ्म घयेक्की रोरङ्सो़ ॱल्हक्टो़रङ् क पुसोङ्। मोरेङ्मु हुगी रोरङ् टङ्बु हीम्बे ॱमत् छ्योक्, रोरङ्ल गो़सी यो़त्न अक्, घङ् यो़प्प दीरङ् कुरीक् पुसोङ् सीन्न ॱसुङ बेत्।
स्युक् थमे धी़गी यङ्गी केच्च्य घयेत् २१:५–२१:३८
स्युक् थम ॱलीबे धी़गी ता घयेत् ५-१९
5ॱनी मी यरीगी हीगी छ्यो़गङ् हीगी दो हीब घन्डे लेब धङ् गा बेक्क। मी घयेक्की को़न्ज्योक्ल पुबे यप्च्य हुब अक् घन्डे लेब बेक्क सीन्न झ्यीब बेत्। 6ॱनी खोङ्गी हुबल धी़ च्यीक् ॱलीक्केन् बेत्। हुगी यङ्ल खीत्रङ्गी हुन्दो घङ् थोङ घयेत् हुगो दोलोक्प च्यीगी च्यीक् इक् थोक्चेत् मीप्प, कुरीक् ॱरुम् तोङ्गेन् बेत् सीन्न ॱसुङ बेत्।
7ॱनी हुबे खोङ्ल चयेलम नीज्यरङ्गी ॱसुङ्गेन् हीगो नम् युङ्गेन् बेक्क? ङीक्की हुगो घन्दुक् झ्यीन ज्यी़ छोर्केन्? सीन्न ढीब बेत्। 8हीगी लेल्ल खोङ्गी च्यङ्जो़त् झ्यीन दो़च्च्यीत्। स्येन् खीत्रङ् ॱयोङ्गोर्ल छ्यी़गेन् बेगो। ङे मीङ् खुर्न युङ्गेन् मी गज्येन् थो़न्न युङ्न हुबे ङ ह हुगो हीन्। ह धी़ ॱस्यच्चल ॱलीस्सोङ् सीक्केन् बेत्। हुबे तीङ्ल मत् डोज्यीत्। 9खीत्रङ्गी ॱमक् थुक्पे केत् धङ् हुट्ट लङे केच्च्य घयेत् ॱह घोगेन् बेत्। ॱनी हुल खीत्रङ् ज्यीक्टक् मत् झ्यीज्यीत्। गोम ॱअल हुगो युङ् गोगेन् बेत्। ॱनी स्युक् थमे धी़ दी हुगी यङ्ल ॱस्यर्च्यक् मीत् युङ्गेन् बेत् सीन्न ॱसुङ बेत्। 10खोङ्गी हरुङ्द हुबल ज्यी़त् च्यीक्की डल ज्यी़त् च्यीक् धङ् ज्यागक् च्यीक्की डल ज्यागक् च्यीक् लोङ्गेन् बेत्। 11जम्बुलीङ्ल घल अक् ॱसेर छ्यीम्मु ज्यक्केन् बेत्। घल अक् तोरी ॱस्योर्केन् बेत्। घल अक् नज छ्यीम्मु ज्यक्केन् बेत्। ॱनी जम्बुलीङ्गी मील ज्यीक्टक् छ्यीम्मु युङ्गेन् बेत्। ॱनी ॱनम्दु ता छ्यीम्मु थो़ङ्गेन् बेत्। 12ॱनी ॱअल हीब कुरीक् युङले एल्ला मी घयेक्की खीत्रङ् घयेत् सुङ्न ॱसने घल अक् यहुदीगी छ्यो़गी छोगङ्ल ठीक्न ठीम् च्यो़क्केन्, चो़ल्ल ॱलुक्केन्, ज्याबु घयेत् धङ् पेम्बु छ्यीम्मु घयेत् च्याल च्येन ङे मीङ्गी ढीक्ल दुक्प अयेक्प तोङ्गेन् बेत्। 13हुन्दुक् झ्यीन ठीक्पे यङ्ल खीत्रङ् ङे ढीक्ल दीम्बरङ् बेत् सीन्न केच्च्य ॱस्यो़च्च्ये ॱनोङ्गेन् बेत्। 14हुगी यङ्ल घन्दुक् झ्यीबे लेम्बु ॱलोक् गोगेन् बेक्क हुगी ढीक्ल खीत्रङ्गी एल्लानी ॱनोक्सम् ॱमत् तोङ्। हीगो ॱसीम्ल ङाब झ्यीज्यीत्। 15घन्ड हीन् सीन्न खीत्रङ्गी ड ॱसी़ इक् खीत्रङ्ल लेन् दीरङ् ॱमीत् थीप्केन्, लेम्बु दीरङ् ॱलोक् ॱमीत् ॱस्यीगेङ्गी झ्यी़रीक्की केच्च्य ङे खीत्रङ्ल टेत् योङ्। 16खीत्रङ्गी फम, पी़न्, ङीया रीङा धङ् दगु ॱनम्बु घयेक्की इक् खीत्रङ् पेम्बुल ची ज्यक्केन् बेत्। हुनी खीत्रङ् यरी ॱसो़क्केन् बेत्। 17ङे मीङ्गी ढीक्ल मी घयेत् कुरीक् खीत्रङ्गी डल लोङ्गेन् बेत्। 18ॱनी हीन्न अक्, म दी खीत्रङ्गी गो़ टत्तोक् च्यीक् इक् ॱमीत् तोर्केन् बेत्। 19खीत्रङ्गी हुन्दुक् झ्यीब गुर्न थीरी देत्न ॱनी, हस्सो़त् हुनी खीत्रङ्ल छी थर्व थोप्केन् बेत्।
यरुशलेम् ॱरुम् तोङ्गेङ्गी केच्च्य २०-२४
20यरुशलेम् ॱमक्कक्की तीक् खीरी तुम्ब खीत्रङ्गी थोङ्गेन् बेत्। हुनी हुगो ह ज्योक्पु ॱरुम् तोङ्गेन् बेत् ॱनो़ब खीत्रङ्गी ॱह घो छुगेन् बेत्। 21हुगी यङ्ल यहुदीयागी मी घयेत् लदोक् लदोक्ल ढो़ज्यीत्। हुगी सार्की नङ्ल यो़क्केन् घयेत् छ्यील थो़न्न ढो़ज्यीत्। ॱनी सार्की छ्यील यो़प्प घयेत् नङ्ल मत् स्युक्च्यीत्। 22हीगो ॱसुङ्रप्ल ढीन यो़प्प घयेत् डुप्च्येगी ढीक्ल ङेल्लेन् च्यो़गेङ्गी धी़ बेत्। 23हुगी यङ्ल भुमु भुजीम धङ् नुन्दुङ् च्येम्मे आम घयेत्ल घन्डे दुक्प। हुगी यङ्ल मी घयेत्ल को़न्ज्योक्की खोङ्डोक् पो़त्न, लुङ्बल दुक्प छ्यीम्मु नोङ्गेन् बेत्। 24मी यरी ढी पदङ्गी लक्ल ॱस्यीगेन् बेत्। मी यरी ज्यी़त् ॱयोङ् ॱयोङ्गी लुङ्बल सुङ्न ठीक्केन् बेत्। ॱनी ज्यी़त् ॱयोङ् ॱयोङ्गी मी घयेक्की ढीक्ल स्यक्पे धी़ दी नम् जो जो थुक्ल यरुशलेम् हीगो हुबे कङ्लीप् दोलीप् झ्यीक्केन् बेत्।
ॱनम्ल ॱमीत् च्यीक्पे ता थो़ङ्गेन् २५-२८
25हुनी ङीम, दच्च्य धङ् कर्म घयेत्ल ॱमीत् च्यीक्पे ता थो़ङ्गेन् बेत्। छ्यु ज्यम्जो छ्यीम्मी़ भजुप्की हुट्ट लङल जम्बुलीङ्गी ज्यी़त् ज्यी़त् घयेत् ज्यीबे ॱसीम्दुक्की ओ़न् थोम्गेन् बेत्। 26जम्बुलीङ्ल घन्ड युङ्गो़दङ् ॱनो़न मी घयेत् ज्यीक्टक् धङ् ॱङङ्डक्की ॱस्यीगेन् बेत्। घन्ड हीन् सीन्न ॱनम्ल यो़प्पे यप्च्य घयेत् ङी डोगेन् बेत्। 27हुनी कोलीमीगी ॱरेबु ॱवङ् खुर्न तो़त्वङ् छ्यीम्मी़ ओ़च्च्य च्येम्मल ॱमुबल स्यो़न्न युङ्गेन् बेत्। ॱनी हुगो मी कुरीक्की थोङ्गेन् बेत्। 28ॱनी हुन्दुक् झ्यीबे लेमु घयेत् युङ्ज्येम ॱयेङे यङ्ल खीत्रङ् ह हीनी थरे धी़ दी ॱस्यच्चल ॱलीत् छर बेत् ॱनो़ब ॱसम्न खीत्रङ् ॱहोक् लोङ्न दोङ्ब यल्ल थोसेङ् झ्यीज्यीत् सीन्न ॱसुङ बेत्।
अप्ले दोङ्बुनी पी च्यीक् ॱस्येप्प २९-३३
29हीनी खोङ्गी हुबल हीन्दुक् झ्यीबे पी च्यीक् ॱस्येप्प बेत्। अप्ले दोङ्बु धङ् दोङ्बु ॱयोङ्म घयेत्ल तो़ज्यीत्। 30ॱनी हुगी लेक्मक् घयेत् स्यीक्प खीत्रङ्गी थोङ्नी हुनी यप्पु ॱस्यर्च्येम ॱयेङ्सोङ् ॱनो़ब ॱस्यीगेन् बेत्। 31हीगो डस्सी हुगी लेमु घयेत् हुगो झ्युङ थोङ्नी हुनी खीत्रङ्गी ह को़न्ज्योक्की ज्यागक् ॱस्यच्चल ॱलीस्सोङ् ॱनो़ब ॱह घोगेन् बेत्। 32ङे खीत्रङ्ल गन्दीय ॱस्येत् योङ्। हीगो कुरीक् धीङ्सङ्गी मी हीबे ङोलरङ् डुप्केन् बेत्। 33तेङ् यी़ धङ् ॱस जम्बुलीङ् हीगो ये डोगेन् बेत्। ॱनी ङे ॱस्येप्पे केच्च्य घयेत् नम्ल अक् मीत् येगेन् बेत्।
च्यङ्जो़त् झ्यीन दो़त् गोगेन् ३४-३८
34खीत्रङ् च्यङ्जो़त् झ्यीन दो़च्च्यीत्। सय, थुङ, सीय धङ् च्युगागी ॱवङ्ल ॱस्योर्न येङ्न मत् दो़च्च्यीत्। स्येन् हुगी ङीन् हुगो खीत्रङ्ल थोप्तक् मीत्ल 35ॱङीङ्ल सीम्ब डस्सी युङ्गेन् बेत्। हुगी ङीन् हुगो जम्बुलीङ्गी मी कुरीक्की ढीक्ल युङ्गेन् बेत्। 36खीत्रङ् छीगङ् तोक्स्यीप् झ्यीन दो़च्च्यीत्। हुन्दुक् झ्यीब घयेत्नी खीत्रङ् थर् छुज्ये यो़प्पल धङ् कोलीमीगी ॱरेबी़ ढुङ्दु थो़म्बल ॱलोप्स्यीक् ॱङीच्च्ये यो़प्पल ॱसुव तप् तब झ्यीन दो़च्च्यीत् सीन्न ॱसुङ बेत्।
37येशुगी ङीन् रीम फो़स्स्यी छ्यो़गङ्गी च्यारीदु मी घयेत्ल ॱलोप्स ज्यप्न टेप्प बेत्। ॱनी गोङ्मी़ ढे दील खोङ् छीगङ् ओलीप्की लदोक् दील झ्यो़ङ्गो़प्प बेत्। 38ॱनी ॱङेट्टो ॱङेन्ज्यानी मी घयेत् खोङ्गी केच्च्यल नेन्दु छ्यो़गङ्गी च्यारीदु जोम्न युङ्गो़प्प बेत्।
Currently Selected:
लुका 21: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
