लुका 20
20
येशुल घन्डे ॱवङ् यो़त् सीक्केन् १-८
1हीनी ङीन् च्यीक् येशु छ्यो़गङ्गी च्यारीगी नङ्दु मी घयेत्ल ॱलोप्स ज्यप्न केच्च्य ॱनेम्बु ॱस्यो़प्पे यङ्ल छ्यो़प्पो़न् चो छ्यीया घयेत्, छ्यो़डीम्गी चयेलम घयेत् धङ् लुङ्बे गेम्बा चो छ्यीया घयेत् खोङ् च्येल्ल युङ्न 2हुबे खोङ्ल खो़त्ल घन्डे ॱवङ् यो़त् सीन्न हुन्दुक् झ्यीब झ्यीक्केन्? हुन्दुक् झ्यीन दीच्च्येमे ॱहक् खो़त्ल ॱसी़ बीन्ज्युङ? ङीत्ल ॱस्यो़त्ते त सीन्न ढीब बेत्। 3हीगी लेल्ल खोङ्गी ङ अक् खीत्रङ्ल केच्च्य च्यीक् ढीगेन्। 4युहन्ना बप्तीस्की बप्तीस्ल ॱलुक्केङ्गी लेमु हुगो तेङ् यी़ ङो़नी मल्ल झ्युङ बेक्क न, न कोलीमी ङो़नी झ्युङ बेक्क? ङल हीगो ॱस्यो़त्ते त झ्यीब बेत्। 5ॱनी हुबे रोरङ्सो नङ्दु हज्यरङ्गी तेङ् यी़नी सीन्न ॱनी, हुगी यङ् हज्यरङ्ल हुगो हीन्न, खीक्की घन्डल युहन्नाल छ्य मत् स्यक्प सीच्च्ये बेत्। 6ॱनी यङ् कोलीमी ङो़नी सीन्न ॱनी, मी घयेक्की हज्यरङ्ल दोर्तुङ् बेन्न ॱसेत् योङ्। घन्ड हीन् सीन्न मी घयेक्की ॱनी युहन्ना कलुङ् ॱस्यो़क्केन् ॱङो़न्ने बेत् सीन्न छ्य स्यक्न यो़क्केन् बेत् सीन्न लप्री चीय बेत्। 7हुनी हुबे लेन् दील ङीत्ल हुगो ॱस्यो़च्च्ये मीत् झ्यीब बेत्। 8ॱनी येशुगी लेल्ल हुगो हीन्न, ङे एक् घन्डे ॱवङ्गी ले झ्यीगुक्क हुगो ओक् ङ ॱमीत् ॱस्यो़त् झ्यीब बेत्।
गोङ्गोङ्गी स्यीङ्ग सगेल्ल ॱलीङ्दम् ९-१९
9हुनी खोङ्गी हुगी मी घयेत् दील हीन्दुक् सीन्न ॱलीङ्दम् च्यीक् ॱसुङ बेत्। मी च्यीक्की रोरङ्गी स्यीङ्ग दील गोङ्गोङ् चुन स्योक्केन् बेत्। ॱनी हुगी स्यीङ्ग दी मी ॱयोङ्म घयेत्ल फीस्सोल टेत्न रोरङ् लुङ्ब स्येल्ल लोङ गज्येन् दो़त्तु डोगेन् बेत्। 10ॱनी गोङ्गोङ् दी छो़बे धी़जो़त्ल ॱसप्तक्प दीगी रोरङ्गी फक् दी लीन्दु सीन्न ॱयोक्पु च्यीक् तोङ्गेन् बेत्। ॱनी ॱस सगेन् दीबे हुगी ॱयोक्पु दील दुङ्न तोङ्सीरी ॱलोक्न तङ बेत्। 11ॱनी यङ् ॱसप्तक्प दीगी ॱयोक्पु ॱयोङ्म च्यीक् तङ बेत्। ॱनी हुल अक् ॱस सगेन् दीबे दुङ्न ॱम पप्न तोङ्सीरी ॱलोक्न तङ् तङ बेत्। 12हुनी थङ्म ॱसुम्बल आक् ॱसप्तक्प दीगी ॱयोक्पु च्यीक् तङ बेत्। ॱनी हुल अक् हुबे ठक्तो़न् ॱमदो़न् सो़न दीत् तङ बेत्। 13ॱनी गोङ्गोङ्गी स्यीङ्गे दक्पु दीगी ॱसीम्ल ह ङ घन्दुक् च्यीक् झ्यीत् गो़ न? ह ङ ङरङ्गी झ्यम्बे भु दी तोङ्गेन्। हुल त हुबे घन्ड अक् मीत् झ्यीप्प, थोङ् झ्यीक्को़ट्टो ॱनो़न भु दी तङ बेत्। 14ॱनी ॱस सगेन् दीबे ॱसप्तक्पे भु दी युङ थोङ्नी, हुबे रोरङ्सो नङ्दु हन्देन् त ॱसप्तक्पे भु दीरङ् ॱलीच्च्युङ्। ह हुगो ॱसेत्तोङ्। ॱनी हुगी फस्स्यी मस्स्यी घयेत् दी हज्यरङ् झ्यीदोङ् सीन्न ढो़ झ्यीब बेत्। 15हुनी ॱसप्तक्पे भु दी हुबे सुङ्न स्यीङ्गे नङ् दीनी ढी़त्न तो़न्न ॱसेत् तङ बेत्। ॱनी हुबे हुन्दुक् झ्यीनी ॱनी, गोङ्गोङ्गी स्यीङ्गे दक्पु दीगी हुबल घन्ड झ्यीक्केन् बेक्क ॱनी? 16ॱसप्तक्प दी युङ्न ॱस सगेन् घयेत् दी ॱसेत्न गोङ्गोङ्गी स्यीङ्ग दी ॱयोङ्म घयेक्की लक्ल टो़क्केन् बेत् सीन्न ॱसुङ बेत्। ॱनी हुगी मी घयेत् दीगी हीगो ॱह घोनी हुबे हीन्दुक् झ्यीबे लेमु झ्युङ्रो मत् झ्यीज्यीत् सीन्न झ्यीब बेत्। 17हुनी येशुगी हुबल फोरी तेन हुगो मेम्ब, ॱसुङ्रप्ल हीन्दुक् सीर थो़ङ्गेन् बेत्।
सोबो़न् घयेक्की घो ॱमीत् छ्यो़त्ल ॱसम्न पुर् तङे दो दी यङ् सुर्की दो घो छ्यो़स्स्योल झ्युङ्न युङ बेत्। (ॱसुङ्रप्की गुल्लु ११८:२२)
18ॱनी हुगी दो हुल मी ॱसु ॱनत्त दुगुक्क हुल च्यो़न् छ्यीम्मु युङ्गेन् बेत्। ॱनी हुगी दो हुगो मी ॱसी़ गोल फोक्कुक्क हुगी मी दी चम्रुक्ल डोगेन् बेत् सीन्न ॱसुङ बेत्।
19ॱनी छ्यो़डीम्गी चयेलम घयेत् धङ् छ्यो़प्पो़न् चो छ्यीया घयेत् दीबे हुगी यङ्लरङ् हुबे येशु सुङ्ज्ये ॱनो़ब झ्यीब बेत्। ॱनी हीन्न अक्, हुब मी घयेत्ल ज्यीब बेत्। खोङ्गी ॱलीङ्दम् हुगो हुबे रोरङ्सो़ ढीक्ल ॱस्येच्च्युङ् ॱनो़ब ॱह घोव बेत्।
सीजर्ल ठेम जब धङ् मीत् जबे ढीक्ल २०-२६
20छ्यो़डीम्गी चयेलम धङ् छ्यो़प्पो़न् चो छ्यीया घयेत् दीबे येशु घन्दुक् झ्यीन सुङ्ज्ये ब अक्? ॱनो़बे झ्यी़ तेब बेत्। ॱनी हुबे येशु सुङ्न ॱवङ् च्येम्म, लुङ्बे पेम्बु छ्यीम्मी़ लक्ल ची टो़च्च्येल येशुगी तम्ल सील्लुङ् तान ॱङेत्तो ॱयेङ्दु मी घयेत् तङ बेत्। ॱनी हुब ढङ्बु हीन्दोक्पल म दी च्यीव झ्यीक्केङ्गी मी बेत्। 21ॱनी हुनी युङे मी दीबे खोङ्ल चयेलम नीज्यरङ् मी खल ॱमीत् तय, दीम्बे केच्च्य ॱस्यो़क्केन् धङ् दीम्बे ॱलोप्स ज्यप्न को़न्ज्योक्की लम् दीम्बरङ् तो़ङ्गेन् हीम्ब ङीत्ल ॱस्यो़च्च्ये यो़त्। 22हज्यरङ्गी छ्यो़डीम्ल रोम्गी सीजर् ज्याबुल हज्यरङ्गी ठेम जप्न डीक्केन् बेक्क न मत् जप्न डीक्केन् बेक्क? सीन्न ढीब बेत्। 23हुबे झ्यी़ अयेक्प डेन्न युङ दी खोङ्गी ॱह घोनी हुनी हुबल खोङ्गी 24ङल टङ्ग दीनार् च्यीक् तो़ल्लेत्ते त। हुगी टङ्गे पर् हुगो धङ् हुगी यीगी दी ॱसी़ बेक्क? सीन्न ढीब बेत्। ॱनी हुबे लेल्ल सीजर् ज्याबी़ बेत् झ्यीब बेत्। 25ॱनी येशुगी हुबल हुगो हीन्न, सीजर् ज्याबी़ घङ् हीम्ब दी सीजर्लरङ् टो़त्। को़न्ज्योक्की घङ् हीम्ब घयेत् दी को़न्ज्योक्लरङ् टो़त् झ्यीब बेत्। 26ॱनी हुदु मी घयेक्की घुङ्दु हुबल येशुगी तम्ल सील्लुङ् तक्पल लुङ्दक् घन्ड अक् ॱमत् ॱङीबल हुब खोङ्गी लेम्बु दील ॱह लेन ॱसीङ् थागी लेनर बेत्।
ॱसोम्बुल लोङ धङ् मीत् लोङे ढीक्ल २७-४०
27हीनी सदुकी छ्योगी मी यरी येशु च्याल तम् च्यीक् ढीदु युङ बेत्। सदुकी घयेक्की लुल मी ॱस्यीनर यङ् ॱसोम्बुल मीत् लोङ्गेन् बेत् सीगो़प्प बेत्। 28ॱनी हुबे येशुल चयेलम हज्यरङ्गी ढीक्ल मोशागी ढीन यो़प्पे कल
मी छ्योगो पी़न् च्यीक् भीज मीप्पल ॱस्यीन ॱनी, हुगी नङ्जङ् दी हुगी होक्की पी़न् दीगी ॱनमल ठीक्न रोरङ्गी अज्यो ॱस्यीगेन् दीगी ढीक्ल ज्यी़त् सो़न स्योक् गोगेन् बेत् सीर थो़ङ्गुक्। (ठीम्लु २५:५)
29ॱनी पी़न् दी़न् च्येम्मे ढोङ्ब च्यीक्तु पी़न् छ्यीस्स्यो दीगी ॱनम ठीक्नी, हुगो भीज मीप्पल ॱस्यीनर बेत्। 30ॱनी हुगी नङ्जङ् दी हुगी पी़न् होक्मा दीगी ठीक्प बेत्। 31हुनी इक् यङ् हुगो पी़न् होक्मा दीगी ठीक्प बेत्। ॱनी हुब घयेक्की हुन्दुक् झ्यीन ॱएन्दीङ् ॱस्यीक् ॱस्यीक् कुरीक्की हुगो ॱनमल ठीक्न, हुब पी़न् दी़ङ्गर् भीज मत् युङल ॱस्यीनर बेत्। 32हुनी स्युक्ला हुगी भुमु दी इक् ॱस्यीनर बेत्। 33ॱनी स्युक् थमल ॱस्यीनर घयेत् कुरीक् ॱसोम्बुल लोङ्न ॱनी, पी़न् दी़ङ्गर्की ॱनमल गीरे भुमु हुगो हुगी यङ्ल पी़न् घन् दीगी नङ्जङ्ल युङ्गेन् बेक्क? सीन्न ढीब बेत्।
34ॱनी येशुगी हुबल दङ् हरीङ् हीदुरङ् क ॱनम ठीक्केन् धङ् ॱनमल डोगेङ्गी लेमु युङ्गेन् बेत्। 35ॱस्यीनरनी ॱसोम्बुल लोङल ओ़ब यो़प्प च्येम्म घयेत् फत्तेङ्गी धी़दु हीगो डस्सी ॱनम ठीक्केन् धङ् ॱनमल डोगेङ्गी लेमु मीत् युङ्गेन् बेत्। 36हुब इगीदु तेङ् यी़गी भङ्ज्येम्ब डस्सी युङ्गेन् बेत्। हुब इगीदु ॱस्यीव छ्येप्प मीप्प युङ्गेन् बेत्। हुब ॱसोम्बुल लोङ् छर झ्यीनी, हुब को़न्ज्योक्की भीज हीम्बल डोगेन् बेत्। 37ॱस्यीनर घयेत् ॱसोम्बुल दीम्बरङ् लोङ्गेन् हीम्बे ढीक्ल मोशागी इक् ढीन स्यक्न यो़क्केन् बेत्। चङ्गी दोङ्बुल मी बर्न युङे यङ्गी केच्च्यल चोव ज्यीन्दक्की हीन्दुक् ॱसुङ थो़ङ्गेन् बेत्।
ङ अब्राहाम्गी को़न्ज्योक्, इसहाक्की को़न्ज्योक्, याकुब्गी को़न्ज्योक् हीन्। (थो़म्ब ३:६)
38खोङ् ॱस्यीनर घयेक्की को़न्ज्योक् मेम्ब, ॱसोम्बु घयेक्की को़न्ज्योक् बेत्। इगीन खोङ् च्येन्न कुरीक् ॱसोम्बु च्यङ्ज्यङ् यो़क्केन् बेत् सीन्न ॱसुङ बेत्।
39हील छ्यो़डीम्गी चयेलम यरीगी खोङ्ल चयेलम नीज्यरङ्गी केच्च्य हुगो गस्सी ॱसुङ्सोङ् सीन्न झ्यीब बेत्। 40हीनी झ्यीनी हुब घन् दील अक् खोङ्ल तम् ढीयल ॱआर् मत् युङ बेत्।
ख्रीष्ट् घन्दुक् झ्यीन दाऊद्गी ज्यी़त् युङ्गेन् ४१-४४
41हुनी येशुगी हुब घयेत्ल को़न्ज्योक्की को़बे च्यप्को़न् ख्रीष्ट् दाऊद्गी ज्यी़त् बेत् सीन्न सीगुक्। ॱनी हुगो घन्दुक् झ्यीन युङ्गेन् बेक्क? 42-43ॱसुङ्रप्की गुल्लुल दाऊद् रोरङ्गीरङ् हीन्दुक् सीगुक् न ॱनी।
चोव ज्यीन्दक्की ङे चोव ज्यीन्दक्ल हीन्दुक् ॱसुङ बेत्। रङ्गी ड घयेत् रङ्गी कङ्बे होक्ल ङे नम् ॱलुक्न स्योक् स्योक् थुक्ल रङ् ङे ॱये छ्योदु दो़त् सीन्न ॱसुङ बेत्। (ॱसुङ्रप्की गुल्लु ११०:१)
44ॱनी हुन्दुक् झ्यीन दाऊद्गी ख्रीष्ट्ल चोव ज्यीन्दक् सीक्को़त्न ॱनी, खोङ् यङ् घन्दुक् झ्यीन दाऊद्गी ज्यी़त् युङ् छुगेन्? सीन्न खोङ्गी ॱसुङ बेत्।
फरीसीगी छ्यलुनी धोजीम् झ्यीत् गोगेन् ४५-४७
45ॱनी मी घयेत् दी खोङ्गी केच्च्य हुल नेङ्गीन् यो़प्पे यङ्ल खोङ्गी रोरङ्गी ॱलोप्टुक् दीबल हीन्दुक् ॱसुङ बेत्। 46छ्यो़डीम्गी चयेलम घयेत्ल खीत्रङ् धोजीम् झ्यीज्यीत्। हुबे घो़ रीङ्मु घो़ङ्गेन् बेत्। ठोम् छुसदु मी घयेक्की ॱसे स्यी़न युङल हुब मो़सी झ्यीक्केन् बेत्। यहुदीगी छ्यो़गी छोगङ्दु धङ् मी डो़न् तोङ्सदु हुब ढे तेङ्ल दो़च्च्येल मो़सी झ्यीक्केन् बेत्। 47हुबे मोरेङ्मु घयेक्की ढोङ्ब लुप्केन् बेत्। मील तो़न्ज्येल हुबे ॱसुव रीङ्मु तोप्कीन् दो़क्केन् बेत्। हुन्दुक् झ्यीबल तीङ्ला छ्येप्प ॱल्हक्मु फोक्केन् बेत् सीन्न ॱस्येप्प बेत्।
Currently Selected:
लुका 20: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
