युहन्ना 12
12
बेथानीदु येशुल मरीयम्गी ॱनुम् ॱही़म्ब १-११
1ॱनी येशुसो हुगी धी़रीम् हुगोले स्यक्पु ढुक्की एल्ला बेथानी युगङ्ल युङ बेत्। उन एल्ला ॱस्यीन खुरे मी येशुगी ॱसोम्बुल ॱलोङे लाजरस् दी यो़प्प बेत्। 2ॱनी हुदु येशुसो स्यालक्ल भो़ब बेत्। ॱनी मार्था दीगी स्यप्च्यी़ पुब बेत्। ॱनी लाजरस् येशुसो धङ् डोम्बु दीबे दल देत्न सेब बेत्।
3ॱनी हुदु मरीयम्गी नर् सीक्केङ्गी ॱनुम् चङ्म फम्बोक्म ढीम स्यीम्बो़त्म ॱहीक्केन् मान घङ्जो़त् च्यीक् येशुगी कङ्बल ॱही़न्न रोरङ्गी ट दीगी फीब बेत्। हुनी खीम् दीरङ् हुगी ढीमे घेङ्न खुर बेत्। 4-5ॱनी ॱलोप्टुक् यहुदा इस्करीयोत् दीगी हुगी मी घयेत् दील हुगो चोङ्न, दीनार् ज्यब ॱसुम् सीङ्गेन् बेत्। बोर हुगो घन्डल टङ्बु घयेत्ल ॱमीत् टो़क्केन् बेक्क? झ्यीब बेत्। हुगी म दी स्युक्तु येशु डलक्ल तङ बेत्। 6हुगी टङ्बुल फेम्बे तम् लब मेम्ब, हुगो की़न्ज्येन् झ्यीनी, हीगो लब बेत्। घन्ड हीन् सीन्न हुगी ङीत् कङ्ज्यीक्पे पयीसक्की बेक् दी हुगी खुर्नी, हुगी हुनी अच्च्येत् री कुगो़प्प बेत्। 7ॱनी येशुगी लेल्ल टुङी स्योक्लोङ्। घन्ड अक् मत् सीर्। हीगो ङे रो बेक्सल ॱलुक्च्येगी ढीक्ल रोगी ॱएन्सोनी ॱही़म्ब बेत्। 8टङ्बु घयेत् हुब खीत्रङ्दङ् दल छीगङ् दो़क्केन् बेत्। ॱनी ङ छीगङ् मीत् दो़क्केन् बेत् झ्यीब बेत्।
9ॱनी येशु उन यो़प्प ॱह घोनी, यरुशलेम्नी मी छेत्मीत् हुदु खोङ् च्येल्ल युङ बेत्। ॱनी येशुल छ्युवक् मेम्ब, ॱस्यीन खुरनी खोङ्गी ॱसोम्बुल ॱलोङे लाजरस् दील थम्ज्येत् तदु सीन्न युङ बेत्। 10ॱनी हीगो झ्यीनी, छ्यो़प्पो़न् चो छ्यीया घयेत् दीब जोम्न हुबे लाजरस् थम्ज्येत् ॱसेत्तोङ् सीन्न ढो़ झ्यीब बेत्। 11घन्ड हीन् सीन्न लाजरस् हुगी झ्यीत् झ्यीक्की मी गज्येन् हुबे दनी भीन येशुल छ्य स्यक्प हीङ्गो़प्प बेत्।
येशु यरुशलेम्ल भोङ्गुल स्यो़न्न फीम्ब १२-१९
12ॱनी हीगी नेम्बेत् दी हुगी धी़रीम् दी ॱसम्दु यरुशलेम्ल छ्योनी युङे मी छेत्मीक्की येशु बेथानीनी यरुशलेम्ल युङ्गुक् सीर ॱह घोनी, 13हुबे ॱस्यीङ् तलेलोमे लेक्मक् खुर्न येशुल ॱसुमी़ झ्यीत्तु युङ बेत्। ॱनी येशु ठेत्नी, हुब कुरीक्की केत् तो़न्न
होसन्ना। इगी चोव ज्यीन्दक्की छेन्नी झ्यो़ङ्गेन् इस्राएल्की ज्याबु हीगो ॱमेल्लम् च्येम्म हीनो सीन्न केत् ज्यक्कील्ल फीम्ब बेत्। (ॱसुङ्रप्की गुल्लु ११८:२५-२६)
14ॱनी भोङ्गु स्यो़म्बो़त्म च्यीक् झ्युङ्नी, येशु हुल स्यो़न्न फीम्ब बेत्। 15ॱनी हीगी ढीक्ल ॱसुङ्रप्ल
ॱवे सीयोन्गी मी घयेस्सो, ज्यीब मत् झ्यीत्। खीत्रङ्गी ज्याबु भोङ्गु स्यो़म्बो़त्म च्यीक्ल स्यो़न्न युङ्गेन् बेत् सीर थो़ङ्गेन् बेत्। (जकरीया ९:९)
16हुगी यङ्ल हीगी केच्च्ये धो़न् हीगो ङीत् ॱलोप्टुक् घयेक्की ॱह घोमोङ्। हुगी यङ्ल खोङ्गी ढीक्ल घङ् झ्युङ घयेत् धङ् ॱसुङ्रप्की केच्च्ये धो़न् हुगो तीङ्ला येशु खोङ् रोरङ्गी तो़त्वङ् च्येम्मे ओ़च्च्य झ्यीस्सल लोक्न खुर्नी क, हुगी केच्च्य हुगो ङीक्की ढेन्सो़ झ्युङ्न हुगी धो़न् दी ॱह घोज्युङ्। 17लाजरस् रो बेक्सनी ॱसोम्बुल ॱलोङ्न युङ थोङ्गेन् घयेत् दीगी हुगी केच्च्य घयेत् दी मी कुरीक्ल ॱस्येत्न टेप्प हीङ्गो़प्प बेत्। 18ॱनी हुन्दुक्मे यीक् छ्यीम्मी़ लेगी ता तो़म्ब ॱह घोनी, हुनी मी घयेत् येशुल ॱसुमी़ झ्यीत्तु युङ हीङ्गो़प्प बेत्। 19ॱनी यङ् फरीसी घयेत् दीब रोरङ्सो ॱनम्बु घन ॱनी, हज्यरङ्गी ढो़ झ्यीब दी? ह थोङ्गुक्कक्? ह तो़दे। जम्बुलीङ् दीरङ् जेङ् हुगी तीङ्ल टप् डोगुक् झ्यीब बेत्।
येशु रोरङ् ढोङे ढीक्ल ॱस्येप्प २०-३६
20हुगी धी़रीम्गी यङ्ल ॱमेल्लम् स्युदु यरुशलेम्ल ज्यी़त् ॱयोङ् ग्रीक्की मी इक् युङ्न यो़प्प बेत्। 21ॱनी हुबे ॱलोप्टुक् फीलीप् दील ङीत् येशु ठेत्तु डोगेन्। नीज्यरङ्गी ङीत् च्यो़रो झ्यी सीन्न स्युव ज्यब बेत्। फीलीप् हुगो गालीला लुङ्बे बेथ्सेदागी मी हीङ्गो़प्प बेत्।
22ॱनी फीलीप्की हुगी केच्च्य दी यङ् ॱलोप्टुक् अन्द्रीयस् दील ॱस्येत्न, हुनी हुब ॱङीक्कर् फीन्न येशुल ॱस्येप्प बेत्। 23ॱनी येशुगी लेल्ल कोलीमीगी ॱरेबुल तो़त्वङ् छ्यीम्मु युङे धी़ ॱलीस्सोङ्। 24हीगी ढीक्ल ङे खीत्रङ्ल गन्दीय ॱस्येत् योङ्। ढे ॱसो़न् ॱसल ॱमत् तब स्यक्न, हुगो रोरङ् च्यीगी च्यीक्रङ् युङ्गेन् बेत्। ॱनी हुगो ॱसल तप्न, ॱसो़न् आम दी ॱस्यीनी क, हस्सो़त् तो़न्दोक् ॱसम्ब गज्येन् युङ्गेन् बेत्। 25मी ॱसी़ रोरङ्गी छील फङा झ्यीगुक्क हुगी छी दी तोर् डोगेन् बेत्। हीगी जम्बुलीङ् हीदु मी ॱसी़ रोरङ्गी छील फङा मीत् झ्यीप्पेक्क हुगी छी दी फुगी ढीक्ल युङ्गेन् बेत्। 26ङे ॱयोक्पी़ ले झ्यीक्केन् ॱसु हीन्न अक्, हुगो ङे लम्ल युङ् गोगेन् बेत्। ॱनी ङ घल फीन्न आक्, ङे ॱयोक्पु हुगो ङदङ् कङ्ज्यीक्ल युङ् गोगेन् बेत्। ॱनी ङल ॱसी़ स्यप्च्यी़ ज्युक्कुक्क हुल यप्की तो़प्प झ्यीक्केन् बेत्।
27ङल ह ॱसीम्डागी दुक्ङा युङ्गुक्। ह ङ घन्ड सीच्च्ये? पब, नीज्यरङ्गी हीगी धी़ हीगो ङल युङ्दु ची़त्रो मत् झ्यीत्। ॱनी हीम्ब त, म दी ङ हीगी ढीक्ल क युङ हीन्। 28पब, नीज्यरङ्गी छेल्ल तो़प्प युङ जेत्रो ॱनङ् झ्यीब बेत्। ॱनी हीगी लेल्ल इगी तेङ् यी़नी मल्ल ङे मीङ्ल तो़प्प युङ एल्ला आक् झ्यीबेन्। ॱनी हुन्दो ओक् झ्यीक्केन् सीरे केत् च्यीक् युङ बेत्। 29ॱनी उन यो़प्पे मी यरीगी हीगो डुक्की केत् हीङ्गो़प्पेत्। ॱनी यरीगी यङ् तेङ् यी़गी भङ्ज्येम्बे खोङ्ल तम् ॱस्येप्प हीङ्गो़प्पेत् सीन्न झ्यीब बेत्। 30ॱनी येशुगी हुब घयेत्ल हीगी केत् हीगो ङल मेम्ब, खीत्रङ्गी ढीक्ल युङ बेत्। 31हीगी जम्बुलीङ् हील को़न्ज्योक्की ठीम् च्यो़प्पे धी़ ॱलीस्सोङ्। हीगी जम्बुलीङ् हीगी चोबो़न् दी ह रोरङ्गी ॱवङ् च्येम्मे ठी दीनी पुर्केन् बेत्। 32ॱनी ङ ॱनम्ल तासोङ्न ॱनी, हुनी मी घयेत् कुरीक् ङरङ् छ्योल थीङ्गेन् झ्यीब बेत्। 33हीगो येशुगी खोङ् रोरङ् घन्दुक् झ्यीन ढोङ् गो़ ॱस्यर्केन् बेक्क हुगी ढीक्ल ॱस्येप्प बेत्।
34ॱनी हुगी मी दीबे खोङ्ल हज्यरङ्गी छ्यो़डीम्ल ॱनी को़न्ज्योक्की को़बे च्यप्को़न् ख्रीष्ट् दी युङ्न ॱनी, हुगो धी़ ज्यी़न्दु दो़क्केन् बेत् सीगुक् न ॱनी। ॱनी नीज्यरङ्गी ॱनम्ल तान ॱस्यी गोगेन् सीक्केन् कोलीमीगी ॱरेबु दी ॱसु बेक्क ॱनी? सीन्न ढीब बेत्। 35ॱनी येशुगी हुबल ह ॱरीप्चो़त् च्यीक् थुक्रङ् मेङ्ग खीत्रङ्दङ् दल दो़क्केन् बेत्। मेङ्ग यो़स्स्यीङ् भोर्ल खीत्रङ् मेङ्गे लम्ल डो गोगेन् बेत्। स्येन् नम् ॱरो़न मेन्नक्ल लेगेन् बेत्। हुनी मेन्नक्ल लम् ॱमीत् ॱङीब, घल हीन्न हीन् डोगेन् बेत्। 36हुन्दो मेङ्ग यो़स्स्यीङ् भोर्ल खीत्रङ् मेङ्गे ज्यी़त् युङ्ज्येल मेङ्गल छ्य स्योक् झ्यीब बेत्। हीन्दुक् सीन्न ॱस्येत्नी, येशु हुबे दनी भीन ॱयोङ्ल फीन्न गोङ्न देप्प बेत्।
छ्य मीत् स्योक्केन् घयेक्की ढीक्ल ३७-५०
37मी घयेक्की थोङ्सल येशुगी यीक् छ्यीम्मी़ लेगी ता गज्येन् झ्यीन तो़न्न आक्, हुब गज्येङ्गी खोङ्ल छ्य मत् स्यक्प बेत्। 38ॱनी हीगी ढीक्ल कलुङ् ॱस्यो़क्केन् यशैयागी केच्च्यल थो़ङ्गेन् बेत्।
चोव ज्यीन्दक् ङीक्की ॱस्येप्पे तम्ल ॱसी़ छ्य स्योक्केन्? चोव ज्यीन्दक् नीज्यरङ्गी ॱस्यीक्की ले तो़म्ब थोङ्न आक्, ॱसु दीगी छ्य स्योक्केन्? सीक्केन् हीगो ताब बेत्। (यशैया ५३:१)
39यहुदी घयेक्की छ्य स्योक् ॱमीत् छुज्येगी ढीक्ल यशैयागी हरुङ्द ॱस्येप्प थो़ङ्गेन् बेत्।
40हुबे ॱसीम् दी को़न्ज्योक्की भीदु ॱमत् ची़प्प, गट्टक्पल सो़ तङ बेत्। स्येन् हुबे ॱमीक्की थोङेत् क ॱनी। हुबे ॱसीम्बे ॱह घोयेत् क ॱनी। हुनी ङ च्येल्ल लोक्न युङ्न, ङे हुब ढक्तु ची़प्पेत् क ॱनी। (यशैया ६:१०)
41हीगो यशैयागी ख्रीष्ट्की तो़त्वङ्गी ओ़च्च्य थोङ्नी, खोङ्गी ढीक्ल हीगो ॱस्येत्न स्यक्प बेत्।
42ॱनी म दी यहुदीगी ॱवङ् च्येम्म चो छ्यीया घयेत्नी इक् गज्येङ्गी येशुल छ्य स्यक्प बेत्। ॱनी हुब म दी फरीसी घयेक्की यहुदीगी छ्यो़ छोनी पी़त्न दीक्केन् झ्यीनी, हुल ज्यीबे, हुबे छ्य स्यक्प दी ॱसीम्बे नङ्ल खुर्न देप्प बेत्। 43घन्ड हीन् सीन्न हुबे को़न्ज्योक् च्यानी युङे तो़प्प दीले मी च्यानी युङे तो़प्प दी दम्बा झ्यीब बेत्।
44हीनी येशुगी मी कुरीक्की ॱह घोवल ॱसी़ ङल छ्य स्योक्कुक्क हुगी छ्य दी ङल छ्युवक् मेम्ब, ङ तोङ्गेल्ल आक् स्यक्पल डोगेन् बेत्। 45ॱनी ङ थोङ् छरे मी ङ तोङ्गेन् दी इक् थोङ् छर युङ्गेन् बेत्। 46ङल छ्य स्योक्केन् दी ॱसु हीन्न अक्, हुगो मेन्नक्ल दो़त् मीत् गो़ब, हुल मेङ्ग युङे ढीक्ल ङ जम्बुलीङ्ल युङ हीन्। 47ङे केच्च्य ॱह घोनी इक्, हुल मी ॱसी़ मीत् नेम्बेक्क हुगोल हुन्दो ङ ठीम् ॱमीत् च्यो़त्। ङ जम्बुलीङ्ल ठीम् च्यो़त्तु युङ मेम्ब, जम्बुलीङ्गी मी घयेत् छी थर्वल तो़न्दु युङ हीन्। 48ॱनी ङे केच्च्यल मीत् नेङ्गेन् धङ् ङल गज्ये ॱमीत् छोर्केन् दील स्युक् थमे धी़गी यङ्ल ङे एल्लादु ॱस्येप्पे तम् दीगी हुल ठीम् च्येत्न छ्येप्प को़गेन् बेत्। 49घन्ड हीन् सीन्न ङे ॱस्येप्पे तम् घयेत् हीगो ङे नुक्रङ् ॱलो़लङ्गी ॱस्येप्प मेन्। ङ तोङ्गेन् यप्की कगो़त् ॱनङे तम् बेत्। 50हीगो मी घयेत्ल फु तक्पे छी थोप्च्ये यो़प्पल सीन्न खोङ्गी ङल ॱङाब बेत्। हीगो ङल ॱस्यो़च्च्ये यो़त्। ङे ॱस्यो़क्केङ्गी केच्च्य घयेत् हुगो कुरीक् यप्की ॱङाबे केच्च्य बेत् झ्यीब बेत्।
Currently Selected:
युहन्ना 12: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
