युहन्ना 10
10
येशु गोच्च हीम्बे ढीक्ल पीदम् च्यीक् १-६
1येशुगी हुब घयेत्ल ङे खीत्रङ्ल गन्दीय ॱस्येत् योङ्। लुक्की खोर्चङ्गी गोच्चनल मेम्ब, सुर्नी छुल्ल गोम्न खोर्चङ्ल स्युक्केन् दी हुगो की़न्ज्येन् धङ् झ्यक्पा बेत्। 2खोर्चङ्गी गोच्चनी यल्ल स्युक्केन् दीरङ् लुक्चीब दी बेत्। 3हुल हुगी गोराब दीगी गोच्च पीक्न तीक्केन् बेत्। हुनी लुक्चीब दीगी रोरङ्गी लुक् घयेत् दील मीङ् तो़न्न केत् ज्यक्केन् बेत्। ॱनी लुक् दीबे रोरङ्गी दक्पी़ केत् दील नेन्न कुरीक् छ्यील थो़न्न युङ्गेन् बेत्। 4हुनी लुक्चीब दी एल्ला एल्ला फीन्न चगल ठीक्केन् बेत्। ॱनी लुक् घयेत् दीगी लुक्चीबे केत् दी ङु ॱस्यीनी, तीङ् दीत्न युङ्गेन् बेत्। 5ॱनी मी ॱयोङ्गी ठीक्पे लम्ल लुक् घयेत् दी मीत् डोव, सुर्ल ढो़ डोगेन् बेत्। घन्ड हीन् सीन्न हुगी केत् दी लुक् घयेत् दीगी ङु ॱमीत् ॱस्यीगेन् बेत् झ्यीब बेत्। 6ॱनी हुबे येशुगी ॱस्येप्पे पीदम् हीगी धो़न् दी ॱह मत् घोव बेत्।
येशु लुक्चीब गङ्ज्येन् हीम्ब ७-२१
7हुनी येशुगी हुबल यङ् ङे खीत्रङ्ल गन्दीय ॱस्येत् योङ्। खोर्चङ्ल स्युक्से गोच्च दी ॱनी ङ हीन्। 8ङले एल्ला युङ्गेन् घयेत् हुब की़न्ज्येन् धङ् झ्यक्पा बेत्। हुबे केत्ल लुक् घयेत् मत् नेम्ब बेत्। 9गोच्च दी ॱनी ङ हीन्। ङ च्येन्नी झ्यीन नङ्ल स्युक्केन् दील छी थर्व युङ्गेन् बेत्। ॱनी हुगो छ्यील थो़न्, नङ्ल स्यु झ्यीत् छुगेन् बेत्। हुनी हुल चग ठेक्केन् बेत्। 10ॱनी ङ हुब घयेत्ल ॱमेल्लम् च्येम्मे छी थोप्च्ये यो़प्पल टो़त्तु सीन्न युङ हीन्। की़न्ज्येन् घयेत् कुदु, ॱसो़त्तु धङ् खरप्ल तोङ्दु सीन्नरङ् युङ्गेन् बेत्।
11लुक्चीब गङ्ज्येन् दी ङ हीन्। लुक् घयेक्की ढीक्ल ङ ङरङ्गी ॱरोक् दीरङ् च्यो़गेन्। 12ॱनी ॱलल देत्न लुक् तगेङ्गी लुक्चीब हुगो दक्पु ॱङो़म मेम्बल लुक्ल च्यङ्गु ज्यप्न, हुगो रोरङ् ढो़बल ॱसोङ्नी, लुक्ल ॱमीत् तगेन् बेत्। हुनी लुक् घयेत् दी च्यङ्गी़ लक्ल ढी़त् डोगेन् बेत्। ॱनी मज्यु दी थीदोर्ल थोर् डोगेन् बेत्। 13हुगो ॱलल दो़क्केङ्गी लुक्चीब झ्यीनी, लुक्ल हुगी घन्डे फङा आक् मीत् झ्यीक्केन् बेत्। 14-15लुक्चीब गङ्ज्येन् दी ङ हीन्। यप्की ङ ङु ॱस्यीब धङ् ङे यप् ङु ॱस्यीब डस्सी ङे ङरङ्गी लुक् घयेत् ङु ॱस्यीगो़त्। ॱनी लुक् घयेक्की इक् ङ ङु ॱस्यीगेन् बेत्। ॱनी लुक् घयेक्की ढीक्ल ङ ङरङ्गी ॱरोक् दीरङ् च्यो़गेन्। 16हीगी खोर्चङ् हीन मीप्पे ङल लुक् ॱयोङ्म आक् यो़त्। ॱनी हुब अक् ठीक् गोगो़त्। ङे केत्ल हुबे एक् नेङ्गेन् बेत्। हुनी हुब कुरीक् मुजङ् च्यीक्ल झ्युङ्न, हुबे लुक्चीब दी इक् च्यीक्रङ् युङ्गेन् बेत्।
17यप्की ङल झ्यम्ब जेक्केन् बेत्। घन्ड हीन् सीन्न ङे ॱरोक् हीगो यङ् फीच्च्य ङरङ्गीरङ् लीन्ज्ये यो़प्पल च्यो़गेन् हीन्। 18ॱयोङ् ॱसी़ इक् ङे ॱरोक् हीगो च्यो़त् ॱमीत् छुगेन् बेत्। हीगो ङ ङरङ्गी ॱलो़लङ्गी च्यो़गेन् हीन्। हीगो च्यो़ज्येमे ॱवङ् ङल यो़त्। यङ् लीन्ज्येमे ॱवङ् ॱअङ् ङल यो़त्। हीन्दुक् झ्यीच्च्येमे क ङल यप्की ॱनङ्न यो़त् झ्यीब बेत्।
19ॱनी हीगी ढीक्ल उन यो़प्पे यहुदी छ्यीया घयेत् दीब गो ॱङील भीनर बेत्। 20हुब यरीगी हुगी मी हुल ॱनो़प्प अयेक्प स्यीन्न ॱनोनर बेत्। खीत् हुगी तम्ल घन्डल नेङ्गेन् झ्यीब बेत्। 21ॱनी यरीगी यङ् हीगो ॱनो़प्प अयेक्प स्यीम्बे तम् मेम्बेत्। ॱनो़प्प स्यीम्बे मी घन्दुक् झ्यीन स्यर्च्योक्की ॱमीक् थोङ्गेल्ल सो छुगेन्? झ्यीब बेत्।
यहुदी छ्यीया घयेक्की येशुल छ्य मत् स्यक्प २२-३९
22हीनी यरुशलेम्गी छ्यो़गङ् को़न्ज्योक्ल ॱमीबे धी़रीम्गी ङीन् दी ॱलीब बेत्। हीगो गी़म्बु हीङ्गो़प्प बेत्। 23ॱनी येशु छ्यो़गङ्गी च्यारीगी नङ्ल यो़क्केन् सोलोमन्गी छोगङ् का गज्येन् च्येम्मे खीम् डस्सी झ्यीस्स दीदु स्युन गीरे यङ्ल 24यहुदी छ्यीया घयेत् दीबे येशु हुदु तीक् खीरी तुम्ब बेत्। हुनी हुबे येशुल खोक्की घजो़त् च्यीक् थुक् ङीक्की ॱसीम्ब ची ॱङील तङ्न स्योक्केन्? को़न्ज्योक्की को़बे च्यप्को़न् ख्रीष्ट् दीरङ् हीन्न ॱनी, ङीत्ल स्युङ्ज्योङ् ॱस्यो़त्रो झ्यी झ्यीब बेत्। 25ॱनी येशुगी लेम्बुल ङे खीत्रङ्ल एल्लादु ॱस्येत् छरेन्, खीत्रङ्गी छ्य दीरङ् मीत् स्योक्पे। यप्की छेन्नी ङे घन्डे ले झ्यीगुक्क हुगी ले दीगीरङ् ङ ॱसु बेक्क हुगो धक्पर् तो़ङ्गेन् बेत्। 26ॱनी खीत्रङ् ङे लुक् मेम्बल ङे केच्च्यल छ्य मीत् स्योक्केन् बेत्। 27ङे लुक् घयेत् दीबेरङ् ङे केत्ल नेन्न ङे तीङ्ल युङ्गेन् बेत्। ॱनी हुब ङे ङु ॱस्यीगेन् बेत्। 28ॱनी हुबल ङे फु तक्पे छी तीक्केन्। हुनी हुब नम्ल अक् खरप्ल मीत् डोगेन् बेत्। ॱनी ङे लक्नी इक् ॱसी़ इक् ठोन मीत् डोगेन् बेत्। 29हुब ङे यप्की ङे गेल्ल स्यक्न यो़क्केन् बेत्। ङे यप् कुरीक्ले ज्यीक्स्यो यो़क्केन् बेत्। खोङ्गी लक्नी ॱसी़ इक् ठोन डो ॱमीत् छुगेन् बेत्। 30ङ धङ् यप् च्यीक्प हीन् झ्यीब बेत्। 31हीगो ॱह घोनी, यहुदी छ्यीया दीबे येशु ॱसो़च्च्येमल दोर्तुङ् बेन्ज्येम डुब बेत्। 32ॱनी येशुगी हुबल यप्की ॱङाबे गये ले गज्येन् खीत्रङ्गी थोङ्सदु ङे झ्यीबेन्। ॱनी हुगो घङ्गो दीगी ढीक्ल खीक्की ङल दोर्तुङ् तर्केन् सीक्केन्? सीन्न ढीब बेत्। 33ॱनी हुबे लेम्बुल रङ्गी गये ले झ्यीबे ढीक्ल तर्केन् मेन्। रङ् मी झ्यीनी इक्, को़न्ज्योक् हीम्ब डस्सी ॱसम्गुक्। हीगो को़न्ज्योक्ल ॱमो़म्बी़त् तोङ्गेङ्गी केच्च्य बेत् सीन्न झ्यीब बेत्। 34ॱनी येशुगी लेल्ल को़न्ज्योक्की ॱस्येप्प खीत्रङ्गी छ्यो़डीम्ल हीन्दुक् सीर थो़ङ्गेन् बेत्।
खीत्रङ् घयेत् को़न्ज्योक्तङ् डव यो़क्केन् बेत् सीन्न दुक् न ॱनी। (ॱसुङ्रप्की गुल्लु ८२:६)
35को़न्ज्योक्की ॱसुङ्रप् हीगो धो़म्मीक्की केच्च्य मेम्बेत्। छ्यो़डीम् थोबे मी घयेत्ल खोङ्गी को़न्ज्योक्तङ् डव सीक्को़त्न ॱनी, 36ङ ॱसुम्ब यप्की थुल ॱमीन, जम्बुलीङ्ल को़न तङ्न युङ बेत्। हुगो झ्यीनी, ङ को़न्ज्योक्की ॱरेबु हीन् झ्यीबल खीक्की घन्दुक् झ्यीन ङे को़न्ज्योक्ल ॱमो़म्बी़त् तङ्सोङ् सीक्केन्? 37ॱनी यप्की को़बे ले ङे मीत् झ्यीक्को़त्न, खीत्रङ्गी ङल छ्य मत् स्योक्। 38यप्की को़बे ले ङे झ्यीक्को़त्न ॱनी, खीत्रङ्गी ङल स्युङ्ज्योङ् छ्य मत् स्यक्न अक्, ङे झ्यीबे ले घयेत् दील त छ्य स्योक्। हुनी क यप् ङदङ्, ङ यप्तङ् मत् ढेब यो़प्प दी खीत्रङ्गी ॱह घो छुगेन् बेत् झ्यीब बेत्। 39हुनी हुबे यङ् येशु सुङ्ज्येम झ्यीब बेत्। हुनी हुब घयेक्की घुङ्नी खोङ् ॱसीर् थो़न्न टप्नर बेत्।
यर्दन् पारीगी मी गज्येङ्गी येशुल छ्य स्यक्प ४०-४२
40हुनी येशु फीच्च्य यङ् यर्दन् पारीदु फीन्न देप्प बेत्। हुदु एल्ला युहन्ना बप्तीस्की मी घयेत् बप्तीस्ल ॱलुक्प हीङ्गो़प्प बेत्। 41ॱनी हुदु येशु च्येल्ल मी गज्येन् युङ बेत्। ॱनी हुबे रोरङ्सो ॱनम्बु युहन्नागी यीक् छ्यीम्मी़ लेगी ता घन्ड अक् मत् झ्यीसोङ्। ॱनी हीन्न अक्, येशुगी ढीक्ल हुगी घङ् ॱस्येप्प घयेत् दी खुङ्देन् धक्सोङ् सीन्न च्योर बेत्। 42हुनी हुगी मी घयेत् दीगी गज्येङ्गी येशुल छ्य स्यक्प बेत्।
Currently Selected:
युहन्ना 10: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
