Mark 8

Myar te kte nyer tebyan betamyee mōn, te Iyesu te lol hane vanten lol ge nyer le, te te rrwene bagō hu ne betamyee krinen myaalo.

1Ran wobung hu mōn, vanten te e lol err me kru mōn. Bone ge le meyee te rranga rru ge vanten ge nyer le he ene ngne. Ngate Iyesu te je mwenan vanten nyer me, te te fe byane nyer ge,

2 “Nam rrō lol hane vanten ge nyer a, em ho krine ni wobung be sul burr, te meyee mwe rranga ge he efe ngne.

3 “He na hutam mōle nyer krinen myar jejerr, bung eba melemleng goro metar to hal, tebyan ge worhu e nyer ema me hatin ge hatin.”

4Ngate, mwenan vanten nyer, err fe byanen ge, “Eyi homne meyee be nge, eba ngrengre nyer en ōrr bwilbwil ge a?”

5Te Iyesu te whu nyer ge, “Betamyee be vii nge mim teya ho?” Mwenan vanten nyer err fe byanen ge, “Betamyee be liuru.”

6Ngate, Iyesu te fe byanen vanten ge err ve yel ho le ge he en tataa bya fyan. Te te rrya betamyee ge te e liuru ho le, te te fe siba byane Yafukon tebyan. Te te kbwikbwiti nyer, te te sene byanen mwenan vanten nyer ge efe fifine byanen vanten ge err ve yel ho le. Te mwenan vanten nyer ete rrwene te yen.

7Te ete rrya myaalo kakae wa te ru ho mōn krine nyer. Iyesu te fe siba mōn tebyan myaalo ge nyerō le, te te fe byanen mwenan vanten nyer ge efe fifine mōn byanen vanten nyer.

8Vanten bonga err yen te ngrengre mwenar temelolean. Ngate, vanten mwena Iyesu nyer err fwelkuru rru meyee ge te mang ho, te a lon arrbol te e liuru ge te fwer sisiu.

9Vanten bonga ge err yen err ve 4,000. Ngate Iyesu te hutam mōle nyer bya bsaō.

10Ngate, nge krinen mwenan vanten nyer, err vya ran afloo kakae, te err vya ran vere nyer ne ōrr Talmanuta.

Farrasi worhu te vanten ne ōman mwena Iyesu nyer, lolor te hel ge te hel. Te rrwene ge err rrlōn rrō rrinkete ge Iyesu te e Genti Yafukon.

11 # Mat 12:38; Luk 11:16 Ngate ran wobung hu mōn, Farrasi worhu err sau Iyesu. Te err me rrō tublirral krinen tebyan ge lor te jeene ge he ene rrwekya Iyesu. Ete whu ge ne rrwene myarrmyarr te hu ge ne hubsine helan ge mu rru ran be mwena Yafukon.

12 # Mat 12:39; Luk 11:29 Iyesu te rongtane te myaō lon lolon. Te te fe byane nyer, “Tebyan ha nge langlang vanten ge lonle ge a ema rrmelole mwe lam ten ge efe lhe myarrmyarr te hu? Fetinan ten, nam rrō fe byane gimi, myarrmyarr te hu eb lōne rrwe lon metami ge eb hubsine ge ni, na metene Yafukon.”

13Ngate, te totor metenen Farrasi ge nyer le, te te la mōl bya ran afloo kakae krinen mwenan vanten nyer bya en tahi tee kakre.

14Ngate ete mku ran afloo kakae ge a te vanten mwena Iyesu nyer err rrumyune ge he ene rrya betamyee te ru mōn krine nyer, betamyee te nga e hu nga rru ran afloo kakae.

15 # Luk 12:1 Te Iyesu te hwōōwōne nyer ge, “Emi rrmerrme is mwenan Farrasi nyer te mwena Herrot.”

16Ngate mwenan vanten nyer err rrō susur e nyer. Err rrō fe, “Hen, yirr rrlō rrya betamyee te ru.”

17Te Iyesu te yekya mwenar susuran, te te whu nyer ge, “Tebyan ha nge mim rrō susur e gimi, ge betamyee mwe rranga rru? Mwi yi be, mirr rrlō yekya bwe? Mirr rrlō rrinfyaara bwe? Bwetemi mwe hel ten!

18-19 # Jer 5:21; Esi 12:2; Mak 4:12 “Metami mo ho, te mirr rrlō rrō lhe. Rralnyemi mo ho, te mirr rrlō rrō rongtakya. Mirr rrlō nga rrme burr bone ge nate kbwiti betamyee te e lim tebyan vanten te e 5,000? Arrbol te vii te fwefwere rrurru meyee ge mirr nga fwelkurukru?” Vanten mwena Iyesu err fe, “Te 12.”

20Te Iyesu te whu mōn ge, “Bone ge nate kbwiti betamyee te e liuru tebyan vanten ge te e 4,000, arrbol te e vii mōn nge te fwefwere rrurru meyee ge mirr nga fwelkuru?” Ngate err surmōl, err fe, “Te liuru.”

21Te Iyesu te whu nyer ge, “Lo ge mwi yi rru be, ma mha nge mirr rrlō rrō yekya sese ge a bwe?”

Iyesu be Mesaya te be Halkuan ge Yafukon te hrene!

22Ngate ete flo bya en tahi Betsaeta. En ōrr ge le, vanten worhu err limhi vanten hu ge te rrol rru me ne Iyesu. Te err rrō wuu vetune Iyesu ge ne tongve vanten nan.

23Ngate, Iyesu te halen veran vanten ge te e rrol rru a, te te limhi bya vre metenen ōrr besaō. Te te kiibi metan vanten ge a, te te lngi veran ran metan, te te whu vanten ge a, te fe, “Ōm lehe sese te hu?”

24Vanten ge a te teter bya mre, te te fe, “Teha, nam rrō lhe vanten nyer, te em yen liye ge em rrō yeyel.”

25Iyesu te wre mōle veran ran metan vanten ge a. Te vanten ge a te rrleōne metan, te te teter. Te lhe sese bonga te mhar.

26Ngate Iyesu te semōle bya bsaō ne nge, te te surgoro byanen ge, “Fō lōn nga vya bsaō ne gimi, te fō yel knon nga bya lon mam im.”

27Ngate Iyesu te mwenan vanten nyer err yel, err vya bsaō worhu ne ōrr Sisarria Filibae. Bone ge err rrō rrutōn hal bya, Iyesu te whu nyer ge, “Mi fe me ne ni, vanten nyer em rrō fe ge ni nam be si?”

28 # Mak 6:14, 15; Luk 9:7-8 Mwenan vanten nyer, err surmōl byanen, err fe, “Vanten worhu em rrō fe neng ōm be Jon Babtaes, a worhu em rrō fe neng ōm be Elaeja, te nyer rrute lo em rrō fe ge neng ōm be brrofet ta myarin hu.”

29 # Jon 6:68-69 Ngate te whu nyer te fe, “Lo gimi, mwi yi be, mim fe ni nam be si?” Bita te surmōl te fe, “Neng ōm be Mesaya ge Yafukon te hrene rru myarin.”

30Ngate Iyesu te surgoro nyer te hel, te fe, “Mirr rrlōn nga fe ni ge ni nam be Halkuan ge Yafukon te hrene ni.”

Iyesu te fe ge efe toō kabnu nge, te ran wobung sul, eb myur mōl, te eb totor.

31Ngate Iyesu te tang bari mwenan wuhuran ne mwenan jenjenan byanen mwenan vanten nyer. Te te fe byane nyer ge, “Ni nam be Terere Mleng Gentin Vanten, te ena yel tere jenjenan eb lam ten. Elta nyer, te hae brris, te vanten ne wuhuran ne lingsenean, efe wliwli ni. Efe toō kabnu ni, te ran wobung sul nan, ena myur mōl mōn, te ena totor.”

32Te rrwene susuran ge le te mhar byanen mwenan vanten nyer. Ngate Bita te halmehare, te te rrō sur te hel ge non te hel byanen.

33Ngate Iyesu te tang mōl byanen mwenan vanten nyer, te te sur te hel ge non te hel byane Bita ge, “Ō roō metene ni, ōm rrō susur mwe ye Setan. Mwenam rrinrrinan ge le, tōlō me metenen temelolean mwena Yafukon. A mwenam rrinrrinan ge le, ma me tere temelolean mwenan vanten nga.”

He vanten hu eba rrmelole ge eb rrutō Iyesu, nge eb rrumyune nge hobōn, te eb hamne mwenan liye bolbol eb ye Iyesu, te eb rrutōn.

34 # Mat 10:38; Luk 14:27 Ngate, Iyesu te je bang ne vanten ge nyer a krinen mwenan vanten nyer me ne nge. Te te fe byane nyer ge, “He gimi hu eba rrmelole ge eb rrutōng, nge eb rrumyune nge hobōn, te eb hamne mwenan liye bolbol te eba me rrutōng.

35 # Mat 10:39; Luk 17:33; Jon 12:25 “Bu ten ne ge emi yekya, he hu e gimi te rrme mwenan myuran ge nga rru, mwenan myuran eba hlal. Te he gimi hu ge mwenan myuran eba hlal tebyang, a tebyan rral ge rrwu ne Iyesu, nge mwenan myuran eb nga rru kii krine Yafukon ngamto nga.

36 “Mwi yi be, he vanten hu eb hol bonga sese ne tan ge fyan ge li, te he eb myarr, mwenan myuran tōlō ngrengre eb rru krine ni. Te he ge hu ge nge rrō rrutōng ran tan ge fyan ge li, nge eb nga rru krine ni ngamto nga.

37 “Sese mwe rranga rru ge ma kya eb segye mwenan #8:37 Tablin vanten eb nong, te myuran mwenan vanten eb rru ngamto. Bone ge vanten eb myarr, tablin eba me e tan, te mwenan myuran eb rru biiri Yafukon, o eb rru lon bulubul ne fyang tebyan ge telōn rrinkete Iyesu. Ma rrwene ge bone ge eb myarr, temyarr nan mwe rranga rru. Nge tōlō ngrengre eb nga rru ran tan ge fyan ge li. Tōlō yekya eb nga yeyel lon ōrr lonōrr, te tōlō yekya eb nga ta liye te eb nga ii tebyan ge tōlō nga rru ran tan ge fyan. Ge he vanten hu e fe ge ma lhe temyarr ne vanten hu ge me myarr, nge rrō konkon nga, o te lhe sōnhal nga ge rrō konkone nge. Sōnhal ma rrmelole ge vanten eb lōn rrinkete Iyesu, te eb rrinkete nge nga. myuran ne. Mwe rranga ten!

38 “Vanten nyer ne lonle ge a, em rrō rrwene rruan hakbe. Lor tōlō jeene Yafukon, te ema lngilngi nge burr mwe yen vehen hu ge ma lngilngi man faim te bya rrō ktuktu vanten ge te mnii. Te he ge hu ne langlang ne vanten hakbe ne lonle ge a, eb rrō myomyo ge e fe ge be mweneng vanten, a eb myomyone tolong, ni mōn, Terere Mleng Gentin Vanten, bone ge ena rrō la mōl krine helan te ōrr renren ge mo kor ge mo kor ge mwena Temyang, krinen abhyobhyorkon nyer, ena myomyone ge ena fe vanten ge le be mweneng ge.”

Currently Selected:

Mark 8: mmg

Highlight

Copy