MAROMU 4

Mufano wa Iɓrahima na uaminifu wahe

1V̄av̄o rirongowe trini ɓasi yahusu Iɓrahima, mudzaɗe watru uv̄andre wa shiuɓinadamu? Trini ɗe aipara? 2Na djeli Iɓrahima aka ahakishiha mbeli za Mungu ha siɓaɓu ya zitrendro, atsokana trongo ya udzisifu, ɓadi tsi mbeli za Mungu. 3Mana uMuangishio usurongoa trini? Amba: «Iɓrahima amuamini Mungu, na iyo itsongesha muhakisho wahe mbeli za Mungu.»

4Ne mutru afanyao hazi ata aliv̄wa, ziliv̄o zahe kazionehana amba zema, ɓadi zimulazimu. 5Na mutru alio amba katria uaminifu wahe hari mwa zitrendro, ɓadi ɗe ha Mungu Monyewe ahakishao waovu, uaminifu wahe urengwa amba muhakisho. 6iHeli Daudu ajudzao ifuraha ya mutru alio amba ahakishiha mbeli za Mungu, wala tsi ha zitrendro, tsini:

7«Furaha ha wao mahosa yawo yaswamihiwa,

na walio amba yamadhambi yazimwa;

8furaha ha mutru alio amba Mola kasuangiha dhambi lahe.»

9Hali furaha ini v̄anu, ɗe ha watru watahiriwa|utahiri tu, au ata ha wao kawatahiriwa? Ne madza rirongoa amba uaminifu wa Iɓrahima ɗe warengwa amba muhakisho mbeli za Mungu. 10Ɓasi muhakisho wahe uwo uja lini? Uja ɓaanda, au kaɓula ya waye utahiriwa? Tsi ɗe ɓaanda, ɓadi kaɓula ya waye utahiriwa. 11Ne apara iãlama ya utahiri amba ike muhuri ushadidishao muhakisho wahe mbeli za Mungu ha siɓaɓu ya uaminifu wahe rangu raha kaka atahiriwa. Ha izo afanyiha ɓaɓa wa piya wao waaminio ɓila utahiriwa, ile wapare muhakisho mbeli za Mungu wajau. 12Na tsena, ɓaɓa wa wao watahiriwa, wala tsi tu amba watahiriwa, ɓadi tsena waɗungao maendreleo ya uaminifu wa ɓaɓatru Iɓrahima rangu raha kaka atahiriwa.

Wahadi wa Mungu ha wao waaminio

13Kweli amba tsi ha ndzia ya iSharia ɗe uwahadi wa uwarithi ulemengu wav̄olwa Iɓrahima na zilembwe zahe, ɓadi wahadi uwo av̄olwawo ha umuhakisho wahe mbeli za Mungu ha siɓaɓu ya uaminifu wahe. 14Mana neka umwaratha uja ha uɗunga iSharia, v̄av̄o uaminifu kauna mana na uwahadi ufuɓia. 15Mana iSharia isuv̄inga ihadhaɓu ya Mungu, na v̄ahali kav̄u Sharia, v̄av̄o kav̄u uvundzifu.

16Iyo ɗe imana amba wahadi uwo uja ha uaminifu, pare ike amba neema ya Mungu, tsena utsimidzihe ha piya zizilembwe za Iɓrahima, wala tsi tu amba ha wao walio hari mwa iSharia, ɓadi wajau ha wao waliona uaminifu mauri ɗe Iɓrahima, mudzaɗe watru piyasi. 17Mauri ɗe inamuna yaangihwa moni na uMuangishio: «Tsihufanya ɓaɓa wa nishani ha uwengi.» Waye a ɓaɓatru mbeli za Uwo alio amba amuamini, Mungu av̄ao uhayati uwafu, tsena ajisao iyo kaisi.

18Ata ha iv̄o kav̄waka dalili itsokao yotsi amba imuv̄e tama, ne Iɓrahima akana tama, tsena aamini; ɓasi na ha izo arendreha ɓaɓa wa nishani ha uwengi, ulingana na zile aka aambilwazo, amba: «Ɗe ha inamuna iyo ɗe zitsokao zilembwe zaho#4:18 zilembwe zaho: Namuangaliye Mwandro 15:5..» 19Wala uaminifu wahe kawakopuha ɓari ufikiri yahe amba umwili wahe madza uka mauri ufu ha iv̄o aka kariɓu na utsimidza maha miya, na Sara kakana madzazi. 20Ɓadi mbeli za uwahadi wa Mungu kakana taradudu amba kakoamini, ɓadi ahodarishiha na uaminifu wahe, amutukuza Mungu, 21ha iv̄o awafiku amba Mungu ushindra atsimidze izo amutolea wahadi. 22Iyo ɗe yamuv̄ingia umuhakisho mbeli za Mungu. 23Ɓadi tsi ha siɓaɓu ya waye tu ɗe yaangihwa amba: «Iyo ɗe yamuv̄ingia umuhakisho», 24ɗe ha siɓaɓu ya wasi wajau ilio amba ritsohakishiha, wasi riaminio Uwo amuregeza hayi ulawa ha uwafu, Insa Raɓi watru, 25alio amba av̄elehwa aulawe ha siɓaɓu ya maãswi yatru, tsena aregezewa hayi ile rihakishihe mbeli za Mungu.

Currently Selected:

MAROMU 4: swb

Highlight

Copy