MARKUSI 4
4
Mufano wa mutru ayelao ha utsanya
(Mat 13:1-9; Luk 8:4-8)
1Suku, Insa aandrisa raha usomedza wangoni na iɓahari#4:1 iɓahari: Yaãni, iƁahari ya Galilaya, au liDzia la Maji la Galilaya.. Dunia nyengi ya wanadamu ingulidzana ha umuzingidzia ata andre apashia, aketsi hari mwa laka ɓaharini v̄ale. Na piya idunia ile ika tsandzaleni mwa yamaji. 2Akowasomedza trongo nyengi ha urumia mifano; ɓas, hari mwa yimisomo yahe yile, awaambia zini: 3«Namuvulishiye! Mutsanyizi-maela alawa, akondrotsanya. 4Utsanya yahe v̄ale, ɓaãdhwi ya maela yapuliha ndziani; nyunyi zija, ziyaɗyi. 5Ɓaãdhwi yangina yapuliha hari mwa shiv̄andre ya tsi kawe kav̄waka trotro nyengi. Yaroso kamwe, mana kayaka yapara trotro kiasi. 6Ata jua uhea yalo, livudzu mimea yale, yahumu, mana kayasisa mizi. 7Ɓaãdhwi yangina yapuliha hari mwa malavu yendza miɓa. Malavu yale yahuwu, yaɓala pumu mimea yile, ata kayadza shitru. 8Yangina iv̄o yapuliha hari mwa trotro ndjema, yameye, yatrendre, ata yadza mavuna: v̄wa yadza thalathini, yangina sitini, na yasalia miya.»
9Amwesa arongoa: «Mutru aliona makio ya ukia, nakiye.»
iMana ata Insa akosomedza ha urumia mifano
(Mat 13:10-17; Luk 8:9-10)
10Wakati Insa alawia idunia ile, watru waka wamuzingidzia v̄ale v̄umoja na kumi na waili wahe wale wamutafiti hari mwa yimifano yile. 11Ɓas, awaambia: «Wanyu ɗe mwadjaãliwa ujua isiri ya Utawalizi wa Mungu, ɓadi wao walio v̄ondze wajudziwazo piya ha mifano, 12ile,
‹wamoangalia, waangaliye, ɓila uona,
na wamokia, wakiye,
ɓadi wasuelewe,
ile wasuzingise roho zawo
ha Mungu, asuwaswamihi!› »
iMana ya umufano wa mutsanyizi-maela
(Mat 13:18-23; Luk 8:11-15)
13V̄ale Insa awadzisa: «Wanyu kamusuelewa imana ya mufano unu? Ɓasi mutsoelewa jeje imana ya piya yimifano yasalia? 14Mutsanyizi-maela ule utsanya urongozi wa Mungu. 15Ɓaãdhwi ya watru uka mauri ɗe wakati yamaela yapulihao ndziani. Uyakia yawo, Shetwani uja, uwatolea urongozi ule waka watrilwawo. 16Ɗe ha inamuna iyo raha, wasalia uka mauri ɗe wakati yamaela yapulihao hari mwa ziv̄andre za tsi kawe. Wamokia urongozi wa Mungu, wao uurenga ha furaha. 17Ɓadi rangu kausisi mizi moni hawo, uwo uẽshi mwana muda tu, ɓadi wakati v̄ujao taãɓu au matreso ha siɓaɓu ya urongozi wa Mungu, wao ukwala kamwe. 18Wasalia tsena uka mauri ɗe wakati maela yapulihao hari mwa miɓa. Watru wao ukia urongozi wa Mungu, 19ɓadi mifikirisho ya lidunia lini na ushauku wa utadjirifu udanganyao, iv̄o na ngushauku zasalia za kula namuna, izo uɓala pumu urongozi wa Mungu, ata uwo kautoa mavuna. 20Amwesa v̄wa wasalia walio mauri ɗe wakati maela yapulihao hari mwa trotro ndjema. Wao ukia urongozi wa Mungu, uukuɓali, amwesa uwo utoa mavuna: v̄wa utoa thalathini, wangina sitini, na wasalia tsena miya.»
Mufano wa kombe la matra
(Luk 8:16-18)
21Wakati ule Insa awaambia raha: «Hali mutru amov̄inga kombe la upatsa, waye ulitria utsini na garando, au vuvuni na shitrandra? Hali kalitrilwa hari mwa shihetsi-kombe? 22Mana kav̄usi yadzama kaitsov̄enulwa, wala ya siri kaitsotolwa heuni. 23Mutru aliona makio ya ukia, nakiye.»
24Awaambia raha: «Namudzifahamishe na zizo muzikiao. iShiv̄imo muiv̄imiao ɗe mutsov̄imiwaoyo, tsena mutsoengedzewa. 25Mana mutru aliona, atsov̄olwa; ɓadi uwo kasina, ata alionayo, ne atsorengewayo.»
Mufano wa mbia imeao dzayo tu
26Insa arongoa tsena: «Utawalizi wa Mungu, uwo mauri ɗe wakati mutru atsanya maela shiv̄andreju mwa tsi. 27Amolala au amohima uku na mutsana, maela yale urosa na umea, ɓila waye ujua amba ha namuna jeje. 28iShiv̄andre ya tsi isudza wiyo-wiyo mavuna: raɓuzi troɓwa, iv̄o ke ɓitsi, amwesa ikwindzi yadzinya hari mwa like. 29Wakati zimbia zaiva, mutru ule utria ishombo yahe hazini, mana mavuna yaja.»
Mufano wa mbia titi rahana zititi
(Mat 13:31-32,34; Luk 13:18-19)
30Insa arongoa tsena: «Ha trini ɗe ritsofanisao Utawalizi wa Mungu? Ha mufano trini ɗe ritsoueledzao? 31Uwo ufana na mbia titi#4:31 mbia titi: iShigiriki v̄anu isurongoa aina ya mbia titi rahana zititi. Shifarantsa iyo uhiriwa moutarde. rahana zititi. Mutru amoitaɓu shiv̄andreju mwa tsi, iyo uka titi rahana piya maela yalio duniani. 32Ɓadi yamotaɓilwa, iyo uhua, ufanyiha ɓole rahana piya yimimea, utoa na marahi maɓole, ha namuna amba zinyunyi za hawani ushindra zifanye mahara yazo muvuliju hayo.»
33Ɗe ha mifano mengi mauri ɗe yini, ɗe Insa akowasomedza urongozi wa Mungu, ha ikiasi ya wale wakomuvulishia. 34Kakolagua na wao neka tsi ha mifano, ɓadi amoka weke na wao, akoeledza maswihaɓa yahe piya zile.
Insa asuɗaridza pev̄o kali
(Mat 8:23-27; Luk 8:22-25)
35Mahariɓi ya isuku ile kamwe, Insa aambia maswihaɓa yahe: «Narishiye nyambo ya lidzia.» 36Ɓas, ɓaanda warudisa idunia ile, maswihaɓa yahe yamuv̄ingi hari mwa djahazi lile aka. V̄uka tsena madjahazi yangina v̄umoja na waye. 37Sa ile v̄uhimi pev̄o ɓole; maluja yakongia moni na lidjahazi ata madza lakojaya. 38Insa aka alala hari mwa mutsao kutru ya nyuma ya lidjahazi. Maswihaɓa yahe yamumidzi, yamuambia: «Fundi, kwashanga amba risondroangamia?»
39Insa amaruha, alagulia pev̄o ile, amwesa aambia iɓahari: «Ɗaria, utruliye!» Ɓas, ipev̄o izia, na shiwari ilala.
40Amwesa awaambia: «Manatrini muriao namuna iyo? Ha namuna jeje ata kamusina uaminifu?»
41Ɓasi v̄ale waremwa na faza ɓole, ata wakoambiana wao na wao: «Unu mutru trini ata pev̄o na ɓahari zimutuĩo?»
Currently Selected:
MARKUSI 4: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
