MAV̄INGIZI-RISALA 3

Monye asuzihira shirewe

1Suku, Monye na Yuhani wakohea hari mwa iNyumba Ndzitwaharifu sa ya shendra ya jio, wakati wa mamilio. 2Wakati ule v̄uv̄ingwa mutru adzalwa na shifeli ya trewe. Kula suku akoladzwa mulongoju mwa iNyumba Ndzitwaharifu, mulongo wakohiriwa Muzuri, pare afanye akrimasikini ha watru wangiao moni na iNyumba. 3Umuona yahe Monye na Yuhani iv̄o wakongia, awamia marike. 4Ɓasi Monye, v̄umoja na Yuhani, amureme matso, amwesa amuambia: «Riangaliye.» 5Ɓas, awastamia ha uzuri ha uwalindria na shitru.

6Sa ile Monye amuambia: «Tsisina fedha, wala dhahaɓu; ɓadi iyo nilionayo, nisuhuv̄ayo. Ha lidzina la Insa-Kristi wa Nazareti, hima wendre.» 7Amwesa amusiki umuhono wa hume, amumidzi. Sa na isa ile yimindru yahe na zizifungo zayo zihodarishiha. 8Alimbala ha uwaruka, amwesa andre ha yimindru. Angia na wao moni na iNyumba Ndzitwaharifu; akwendra ha uwaruka na umusifu Mungu. 9Umati ule piya umuono amba asendra ha mindru na umusifu Mungu. 10Wamujua amba ule ɗe mutru akoka hari mwa umulongo ule uhiriwao Muzuri ha ufanya akrimasikini. Ɓas, waremwa na ushangavu na utaãdjaɓu ha itrongo ile yamuhidjiria.

11Ɓaanda mutru ule kakolisha umuɗunga Monye na Yuhani piya uwatru, ha ushangavu muɓole, wakorema mbio ondrowapara v̄ahanu v̄ale v̄ulio mustari wa ngidzo v̄uhiriwao Ɓaraza la Sulaimana.

Hutuɓa ya Monye moni mwa iNyumba Ndzitwaharifu

12Monye uona yahe zile, aambia idunia ile: «He wanyu Maisraila|Israila, manatrini ata mudzishangidzao na itrongo iyo? Manatrini ata muriremao matso, mauri amba ɗe ha ushindzi watru, au ha utuĩvu watru, ɗe ramuendresa mutru unu? 13Mungu wa Iɓrahima, Isiaka na Yaãkuɓu, Mungu wa maɓaɓatru, atukuza umurumishi wahe Insa, ule mwamuv̄eleha aulawe na umuhara mbeli za Ɓilatusa, alio amba waye aka arenge ãzima amujeledze. 14Ɓadi wanyu muhara uMutwaharifu Mwendza Haki, amwesa mumia mujeledzewe muula. 15Muulu likoho la uhayati, Monyewe uka amba Mungu amuregeza hayi ha ulawia ufa, na wasi ra mazahidi. 16Ɗe lidzina lahe, ha uaminifu na lidzina lilo, ɗe lahodarisha mutru uwo mumuonao tsena mumujuao. Ɗe uaminifu na waye ɗe watsongesha mutru ule apara unono watsimu mbeli zanyu.

17Ɓadi av̄asav̄anu wananyangu, nisujua amba zile muzirendre ɓila wanyu ujua, mauri ɗe makizi-mbeli yanyu. 18Ɓadi ɗe ha inamuna iyo zitrongo Mungu aka azijudza rangu kaɓula ha yamarongozi ya piya yimitrume zitsimidziha, ne ɗe itrongo amba Kristi wahe aka alazimu aondeshehe. 19Ɓasi namwendre toɓa, muparane na Mungu, ile madhambi yanyu yazimwe, 20pare wakati wa uv̄umuzi wa ziroho zanyu ulawao ha Mwalatru umujiliyeni, amuv̄elesheyeni Kristi wahe mwatsahuliwawo rangu kaɓula, ne ɗe Insa. 21Waye Uwo ɗe alazimu aɓaki pev̄oni ata mupaka ɗe wakati wa umurengeledzeo mukamilifu wa zitrongo, ule Mungu aujudza ha yamarongozi ya yimitrume mitwaharifu yahe. 22Musa aka arongoa: ‹Mwalanyu Monyezi Mungu atsomuv̄elesheani ulawa hanyuju mutrume mauri ɗe wami. Mutsomuvulishia na piya zitrongo atsomuambiaonizo. 23Kula nafusi kaitsovulishia umutrume uwo, itsozimwa hatwi hari mwa umati.›

24Piya yimitrume yakorongoa rangu Samueli ata wao wamuɗunga, wajudza wajau zisuku zizo. 25Wanyu ɗe uwana wa yimitrume na wa umukataɓa Mungu aufanya na wadzaɗe watru ha umuambia Iɓrahima: ‹Na hari mwa zilembwe zaho, piya zinishani za shiv̄andreju mwa tsi zitsoɓarikishiha.› 26Ɗe hanyuju kadimu ɗe Mungu av̄enusa umurumishi wahe, amuv̄eleha amuɓarikini ha uzingisa kula moja hari mwanyu na zimbovu zahe.»

Currently Selected:

MAV̄INGIZI-RISALA 3: swb

Highlight

Copy