MAV̄INGIZI-RISALA 20

Ɓaulusu asuregea Makadoniya na Giriki

1Wakati umutsutsuho waɗaria, Ɓaulusu ahiri yamaswihaɓa, awatria ɓari na uwalaga, amwesa afungu musafara andre Makadoniya. 2Av̄iria ɓavu lile na uv̄a yamaaminifu marongozi mengi ya uwatria ɓari, amwesa andre Giriki, 3av̄itsi mezi miraru oho. Akodzitayarisha upashia andre Siriya, ɓadi rangu yaMayahudi|Mayahudi yakofanya mupango kinyume na waye, arenge ãzima ya urudi ha uv̄iria Makadoniya. 4Na waye aka aɗungana na Suɓatura, mwana wa Ɓirusu wa shi Ɓeriya, Aristarkusa na Sekundusu wa shi Tesalonika, Djayusu wa shi Derɓi na Timutausu, v̄umoja na Tihikusa na Trofimusu wa shi Aziya. 5Watru wao warikilia mbeli, wandre warilindri Troasi. 6Wasi v̄atru, ɓaanda ya uMusherehio wa Madipe kayatrilwa Lalive, ritreke ulawa ɗagoni Filipi, ata hari mwa suku tsano rendre riwapara Troasi, riv̄itsi suku saɓa hule.

Yutikusa asuregezewa hayi na Ɓaulusu ɗagoni Troasi

7Mufumov̄ili#20:7 Mufumov̄ili: iShigiriki isurongoa isuku ya handra ya mufumo, yaãni, isuku ɓaanda ya iSuku ya Uv̄umuzi ilio amba yakofanyiwa kula Mufumotsi. rika ringulidzana ha ukutrua lidipe la Unahanizi. Ɓaulusu akosomedza yamaswihaɓa, na ɓaanda akolawa isuku ya v̄ili, aendrelea na musomo wahe ata hari-hari ya uku. 8V̄uka mahombe mengi hari mwa lifuko la dari, v̄ahanu raka rangulidzana. 9Na v̄ale, v̄uka shaɓaɓi mutruɓaɓa akohiriwa Yutikusa, aka aketsi hari mwa idirisha. Aka aremwa na tsindzi wakati wa ihutuɓa ndrile ya Ɓaulusu ile ata mwiso, tsindzi zimuv̄ingi, apuliha rangu lidari la raru. Watru wamupara amba afu. 10Ɓadi Ɓaulusu ashuku, amunyamia, amurenge mihononi hahe, amwesa arongoa: «Mwasukane hamu, mana raha ana roho.» 11Ulawa v̄ale aregea uju hule, andre akutrua lidipe la Unahanizi, aɗyi. Ɓaanda ya v̄ale aendrelea na misomo yahe ata alifadjiri, amwesa alawa. 12Mwanahirimu ule av̄ingwa ɗagoni amba a hayi. Na itrongo ini itria ɓari halisi watru wale.

Ɓaulusu asufanya musafara ulawa Troasi uendra Miletu

13Wasi v̄atru rikia mbeli, rendre ripashia djahazi ha ulekedza Asusa; oho rakwendra ramurenge Ɓaulusu, mauri ɗe inamuna aka ariambia, mana waye akotsaha andre ha mindru. 14Wakati aja aripara Asusa, rimuv̄ahidza v̄umoja na wasi, rendre Mitileni. 15Rangu v̄ale riendrelea na umusafara watru uv̄ira ɓaharini, ata isuku ya v̄ili, riwaswili maswa na Shiyosi. iSuku yaɗunga riv̄iria Samosi, ata isuku ya v̄ili tsena, riwaswili Miletu. 16Ɓaulusu aka aãzimia uv̄ira maji male na Efeso wala asuziye, pare asumenye wakati Aziya hule, mana akosimamia neka trongo mukinishiha, ake Yerusalemu isuku ya Pentikoti#20:16 Pentikoti: Ɓaanda ya uUnahanizi wa Mutupio, ata yamopara suku hamsini, isuku ya hamsini ile uhiriwa Pentikoti..

Ɓaulusu asulaga yamadhwamana ya iDjama Ndziwaminifu ya Efeso

17Rangu Miletu hule, Ɓaulusu av̄eleha watru wandre Efeso, warenge yamadhwamana ya iDjama Ndziwaminifu, waje wamupare. 18Umuwaswilia yawo, awaambia: «Musujua inamuna yangu nakodziv̄inga mbeli zanyu kula sa, rangu isuku ya handra natria karo langu Aziya. 19Nakomurumishia Raɓi ha uwekevu na utungu moni na yamatreso yakonipara ha yimipango ya Mayahudi. 20Musujua amba, wala tsi ha umutsitsiani trongo itsokao yotsi, tsimujudzani na umusomedzani piya zakomufayidishani, ha hadhwira na hari mwa yimiraɓa yanyu, 21ha uhira rangu yaMayahudi ata tsi Mayahudi, wazingise roho zawo ha Mungu na umuamini Raɓi watru Insa-Kristi.

22Na tsini av̄asav̄anu, ha inamuna niendresewao na iRoho, nisendra Yerusalemu, wala tsi ha ujua izo zitsoniparao oho. 23Nisujua tu amba ɗago ha ɗago, iRoho Ndzitwaharifu isunifahamisha amba zifungo na matungu ɗe zinilindrao. 24Ɓadi tsisuona uhayati wangu amba muhimu au na faida itsokao yotsi na wami, neka tsi ɗe wami utsimidza umwendro wangu, nendre ata nimalidze ihazi nadhwaminishiwayo na Raɓi Insa, ɗe ujudza iHaɓari Ndjema ya ineema ya Mungu.

25Ulawa v̄anu nisujua amba kamutsoona tsena isura yangu, wanyu piyanyu mulio amba tsiv̄iri hari mwanyu ha ujudza uUtawalizi wa Mungu. 26Ha izo, nisumushadidishani ileo ini, tsirahatsiha na lidjukuma la idamu yanyu. 27Mana tsimujudzani piya mav̄endzeleo ya Mungu, wala tsi ha udzamisa trongo itsokao yotsi. 28Ɓasi namudzifahamishe wanyu na liɓangwe piya la maaminifu iRoho Ndzitwaharifu yamudhwaminishanilo; namutsunge iDjama Ndziwaminifu ya Mungu aipara ha idamu yahe monyewe. 29Nisujua amba ɓaanda itsokao amba tsilawa, mbwa nyeha kali za watru zitsongia hari mwanyu, watru walio amba kawatsov̄oreha ata hata liɓangwe. 30Na ata hari mwanyu v̄anu, ne v̄utsohima watru watsov̄ao misomo kayaɗunga ndzia, ile wagogore yamaswihaɓa wawaɗunge. 31Ɓas namuke hashiri, munahane amba pandza la maha miraru, tsazia uku wala mutsana ya wami umufahamishani ha matsozi, kula moja hari mwanyu.

32Ɓas av̄asav̄anu nisumudhwaminishani ha Mungu, na ha urongozi wa neema wahe uliona ushindzi wa umuhodarishani, na umuv̄ani mwaratha v̄umoja na piya watwaharishiwa. 33Tsakotumaini fedha, wala dhahaɓu, wala nguo ya mutru atsokao yotsi. 34Musuzijua wanyu-wanyu amba yimihono yangu yini ɗe yakoniparia zizo zakonilela, wami na wanyangu waka v̄umoja na wami. 35Hari mwa piyazo tsimuonesani amba ha udziruma namuna ini ɗe ralazimu risaidiye wao kawasudzishindra, na unahana yamarongozi ya Raɓi Insa ayarongoa waye ha waye: ‹Uv̄a ina furaha zaidi rahana upara.› »

36Ɓaanda arongoa zile, avundzu malondro na umia Mungu v̄umoja na wao piyawo. 37Piyawo washukiwa na matsozi, wakomuɓara ha umuɓusu na umulaga. 38Wakoremwa na hamu hususwani na itrongo aka airongoa amba kawatsoona tsena isura yahe. Amwesa wamuɗungu ata djahazini.

Currently Selected:

MAV̄INGIZI-RISALA 20: swb

Highlight

Copy