MAV̄INGIZI-RISALA 15

Mungulidzano wa waɓole wa iDjama Ndziwaminifu ɗagoni Yerusalemu

1V̄uja watru waka walawa Yudeya, wakosomedza uwananya wa shi uaminifu ha uwaambia: «Neka kamwatahiriwa ha uɗunga imila ya Musa, kamushindri mwahuyiwa.» 2Wakati ule Ɓaulusu na Ɓarnaɓasi wangia na mahadisi na mashindrano ya kusudi v̄umoja na wao. Ha izo, uwananya warenge ãzima amba Ɓaulusu na Ɓarnaɓasi v̄umoja na ɓaãdhwi ya wanyawo, waheye Yerusalemu ha yaMav̄ingizi-Risala|Mav̄ingizi-Risala na yamadhwamana ya iDjama Ndziwaminifu, wandre watwaliye itrongo ile. 3Ɓas, wav̄elehwa na iDjama Ndziwaminifu, wav̄iria iFonikiya na Samariya ha ujudza umuzingio wa roho wa zinishani zangina, ata wafurahisha halisi piya uwananya wa shi uaminifu. 4Uwaswili yawo Yerusalemu, warengwa na iDjama Ndziwaminifu, yaMav̄ingizi-Risala na yamadhwamana; na wao wajudza piya trongo Mungu akozifanya v̄umoja na wao.

5Ɓas, ɓaãdhwi ya maaminifu waka ha yaMafarisayo|Mafarisayo wahimi, warongoa amba yakolazimu watru wa zinishani zangina watahiriwe, amwesa wafarudhwishiwe waɗunge iSharia ya Musa.

6Wakati ule yaMav̄ingizi-Risala na yamadhwamana waangulidzana pare watwaliye itrongo ile. 7Ɓaanda ya muda mwengi wa marongozi, Monye ahimi, awaambia: «Wananyangu, musujua amba rangu zisuku za handra, Mungu anitsahua hari mwanyu; arenge satua amba ha ihanyo yangu, watru wa zinishani zangina wakiye urongozi wa iHaɓari Ndjema, amwesa waamini. 8Na Mungu ajuao ziroho, adhiɓitisha amba awakuɓali ha uwav̄a iRoho Ndzitwaharifu, mauri ɗe wasi. 9Kafanya tafauti itsokao yotsi ɓaina ya wasi na wao, awarahatsa ziroho zawo ha uaminifu. 10Ɓasi av̄asav̄anu, manatrini mumudjereɓuo Mungu ha utrihisa maaminifu mudzo ulio amba rangu yamaɓaɓatru, ata uwaswili hatru, karashindra rauv̄inga? 11Tsi jau, ɓadi risuamini amba ɗe ha ineema ya Raɓi Insa|Raɓi ɗe rihuyiwao, mauri ɗe wao.»

12Piya djama yangulidzana v̄ale iɓuriha, yakomuvulishia Ɓarnaɓasi na Ɓaulusu iv̄o wakotoa hadisi ya piya ziãlama za midjuza na zitrongo za ãdjaɓu Mungu azifanya ha ndzia yawo mbeli na zinishani zangina zile. 13Wakati wahisa ulagua, Yakoɓu arenge umurongo, arongoa: «Wananyangu, namunivulishiye. 14Simoni aeledza ha namuna jeje rangu mwandro, Mungu adzishuhulisa zinishani zangina ha utsahua watru mengoni mwawo wake umati wahe. 15Na zini zisulingana na yamarongozi ya yimitrume, mauri ɗe iheli v̄waangihwa:

16‹Ɓaanda ya zizo nitsoregea,

nije nimidze inyumba ya haima ya Daudu yaka yawa.

Nitsorengeledza inyumba yahe yakomolwa,

amwesa niimidze raha.

17Ɓas, piya wanadamu waɓaki watsomuzunguha Mola,

piya zinishani zangina zahiriwa na lidzina langu.

18Zini ɗe zitrongo Mola azirongoa,

waye alio amba ɗe azijudza rangu zamani.›

19Iyo ɗe imana nifikirio amba karalazimu ratria taãɓu ha watru wa zinishani zangina wazingisa roho zawo ha Mungu. 20Ɓadi nariwaangishiye amba wadziziye udzinagisisha na yotsi ilio amba ihusu masanamwe, wadziziye na zitaɓia mbi za shahawa, wasuɗye zinyama zaulawa ha uɓalwa pumu, wala damu. 21Mana rangu zizama za hale, hari mwa kula ɗago, wanadamu wasujudza iSharia ya Musa na uisoma moni na ziNyumba za Uswali kula Suku ya Uv̄umuzi.»

Ɓarua lav̄elehwa ha uwatru waaminifu tsi Mayahudi

22Ɓas, yaMav̄ingizi-Risala na yamadhwamana ya iDjama Ndziwaminifu, v̄umoja na piya iDjama, waono amba itsoka fetre ya umutsahua hari mwawo Yudasi akohiriwa Ɓarsaɓa, na Silasi, wakostehiwa na wanyawo waaminifu, wawav̄elehe Antiyokiya v̄umoja na Ɓaulusu na Ɓarnaɓasi. 23Wawadhwaminisha liɓarua lini:

yaMav̄ingizi-Risala na yamadhwamana ya iDjama Ndziwaminifu wamusalimuni, wanyu wananyatru waaminifu wa zinishani zangina mulio ɗagoni Antiyokiya ya Siriya na itsi ya Silisiya.

24Rijudzwa amba v̄urilawia watru hunu, wala tsi ha iãmuri yatru, waja wamutashaushini zifikira zanyu ha yamarongozi yawo, wamumenyeni ziroho zanyu. 25Iyo ɗe imana, ha nia moja, ritsahua watru rimuv̄elesheyeniwo v̄umoja na wananya wa roho watru, Ɓarnaɓasi na Ɓaulusu, 26watru walio amba watria roho zawo hari mwa hatwari ha siɓaɓu ya lidzina la Raɓi watru Insa-Kristi. 27Ɓasi ha izo, rimuv̄eleha Yudasi na Silasi, watsomujudzani ha zihanyo zawo trongo ɗe wizo-wizo. 28Mana iRoho Ndzitwaharifu na wasi riono amba itsoka fetre neka karamutrihisani mudzo wangina neka tsi ɗe uwo walazimu, 29ne ɗe wanyu udzizia uɗya nyama zatolewa sadaka masanamwe, na damu, na zinyama zaulawa ha uɓalwa pumu, na wanyu udzizia na zitaɓia mbi za shahawa. Mutsofanya ndjema neka mudzizia na trongo zizo.

Namukwaheri.

30Ɓas, watru wale walaga wanyawo, washuku Antiyokiya; hule wangulidza iDjama, wawav̄a liɓarua lile. 31Lisomwa, na piyawo wafurahi na iɓari lawatria. 32Yudasi na Silasi, waka wao-wao watru wakoshukidziwa marongozi wayajudze, watria ɓari wanyawo waaminifu na uwahodarisha ha marongozi mengi. 33Ɓaanda wav̄itsa mwana muda hule, wanyawo wawalishi waregeye ha salama ha wale wawav̄eleha. [34Ɓadi Silasi aono ɓorwa aɓaki.] 35Ɓaulusu na Ɓarnaɓasi waɓaki Antiyokiya, wakosomedza na ujudza v̄umoja na watru wengi wasalia iHaɓari Ndjema ya Urongozi wa Mola.

Ɓaulusu na Ɓarnaɓasi wasutsapushiana

36Ɓaanda ya wana suku, Ɓaulusu amuambia Ɓarnaɓasi: «Nariregeye riangaliye wanyatru hari mwa piya yamalago rajudza Urongozi wa Mola, pare rijuwe hali zawo.» 37Ɓarnaɓasi akotsaha amuv̄inge wajau Yuhani akohiriwa Markusi. 38Ɓadi Ɓaulusu akoona amba kayaka yalazimu wav̄inga mutru aka awaɓaushia rangu Pamufiliya, kaka awaɗunga hari mwa urumishi wawo. 39Mashindrano yawo yale yaka madziro ata watsapushiana. Ɓarnaɓasi amurenge Markusi, watreke wandre hari mwa ishisiwa ya Kupro. 40Ɓadi Ɓaulusu waye amutsahua Silasi, alawa ɓaanda adhwaminishiwa na uwananya wa shi uaminifu ha ineema ya Mola. 41Av̄iria iSiriya na iSilisiya ha uhodarisha ziDjama Ndziwaminifu.

Currently Selected:

MAV̄INGIZI-RISALA 15: swb

Highlight

Copy