লুক 19

চক্কেয়নি মন তালায়ঙি

1জিখৗমায় উম্রা যিৰীহোৱাং দাংমৗন নগৰনি মাজাৰতিয়া লৗইতা। 2আৰা চৗই, চক্কেয় মুঙায় সাকসা মাৰাব তৱা; উম্রা সাকসা খাজানা পায়চোকঙি সৰদাৰ আৰা ধনী মাৰাব। 3আৰা যীশু চাং উৱো চৗই গৗমৗন দাক্রায়তা, নাত্নে মাৰাব পালান গৗমৗন নৗক মাঞ্চৌ, আতাঙা উম্রা বান্দলকসৗন। 4উনান গৗমৗন উম্রা অৗগচাক তলোকনাংমৗন উৱো চৗই গৗমৗন ফাংসা ডিমিৰ ফাঙায় দুঙৗয়ৌ। আতাঙা যীশুৱা উ লামতিয়া লৗইতা। 5জিখৗমায় জেলা যীশুৱা উ হাদামায় সকায়ৌ, পিৰাঙা কাতাওমৗন চৗইমৗন উৱো ব্রাকৌ, “অৗ চক্কেয় মামাৰ বৗৰৗইমৗন ফৗই, আতাঙা আং তিনিং নিনি নৗগৌৱায় ফাৰ পাং নিগা।”

6উম্প্রিং উম্রা মামাৰ বৗৰৗইমৗন ফৗয়ৌ, আৰা খুসী মানমৗন উৱো জুখু বুজৗয়ৌ। 7উৱো নৗকৗইমৗন বেবাকৗন ব্রাকজিনৌ, “ই মাৰাবা পাপী মাৰাবনি নৗগৌৱায় ফাৰ পাং গৗমৗন লৗয়ৌ!”

8উম্প্রিং চক্কেয়ৱা চাপৗইমৗন ব্রাকৌ, “অৗ প্রভু ইনি সম্পতিংপ্রিং তাপ্রাক আং গৰীৱদোনা দান লাওঙা; আৰা আং যুদি গশ্লায়মৗন চানিবা উতুং লান মান্তানাৰৗন, উনা ব্রিকায় গুণ দাবাল লাওঙা।”

9উম্প্রিং যীশু ব্রাকৌ, “তিনিং ই নৗগৌৱায় মুক্তি সকফৗয়ৌ; আতাঙা ইম্রাবান অব্রাহামনি স্বা। 10#মথি 18:11 আতাংনা, যিয়ো মায়তানা, উৱো লামমৗন মুক্তি লাও গৗমৗন মাৰাবনি স্বা ফৗইতানা।”

সাছি-কায় সোনানি পৗশিমৗন তিমলৗইঙি

(মথি ২৫:১৪-৩০)

11জেলা মাৰাবদো ই ক্রৌ নৗতৗমতা, উ সময় উম্রা গসা তিমলৗইমৗন ব্রাকৌ, উম্রা যিৰূশালেম খৗতৗয়ায় সকৌ; আৰা অনোক মনায় গাসায়তানা যে ঈশ্বৰনি ৰাজ্য উ সময়ৗন তৗনৗং সায়ঙা। 12উম্রা ব্রাকৌ, “সাকসা গদা হৗসুগৱায়ঙি মাৰাবা অৗপিন গৗমৗন ৰাজ আসন লায়মৗন ফৗইঙা ব্রাকৗইমৗন পিজান হাসঙা লৗয়ৌ। 13উম্রা উনি সাছি-কায় চৗকিৰদো ক্লাংমৗন সাছি-কায় সোনানি পৗশি লাওমৗন ব্রাকৌ, ‘আং যি লাগেত বালফাচা উ লাগেত ফালাংগি গাসায়মৗন পাং।’ 14নাত্নে উনি প্রজাদো উৱো হিংসা গাসায়মৗন, উনি জিখৗমায় অনোক খবৰ লাওঙি মাৰাব বেসেতৗইমৗন ব্রাকৌ, ‘উ মাৰাবা নিঙি ৰাজা সায়ঙি নিং লামচা।’

15 “জিখৗমায় উম্রা জেলা ৰাজা পদ মানমৗন বালফাঔ, উ সময় যি মাৰাবদোনা ফংকাৰ লাওঙি সায়তানা, উ চৗকিৰদো উম্রা নাঙা কালাং গৗমৗন দিমসেতৌ, যাতে অনোক ফালাংগি গাসায়মৗন বিপাংকায় লাভ গাসায়ৌ উৱো দাসামানা। 16উম্প্রিং অৗগচাক মাৰাবা ফৗইমৗন ব্রাকৌ, ‘মানায়নাং, অৗপিনি পৗশিমৗন আং সাছি-কায় পৗশি লাভ গাসায়ৌ।’ 17উম্রা উৱো ব্রাকৌ, ‘সাবাস পেনেম চৗকিৰ, নৗং আপৗইসা বিষিনায় বিশ্বাসী সায়ৌ; উনান গৗমৗন সাছি-কায় নগৰায়ঙি তাংগাম সায়।’ 18উম্প্রিং মৗংনিঙা ফৗইমৗন ব্রাকৌ, ‘মানায়নাং, আং অৗপিনি পৗশিমৗন বৗঙাকায় পৗশি লাভ গাসায়ৌ।’ 19উম্রা উৱোবান ব্রাকৌ, ‘নৗংবান বৗঙাকায় নগৰায়ঙি তাংগাম সায়।’ 20জিখৗমায় সাকসাৱা ফৗইমৗন ব্রাকফৗয়ৌ, ‘মানায়নাং, ইয়ৗন অৗপিনি পৗশিয়ো; আং ইয়ো গামচামৗন হায়মৗন তান্তানা। 21আং নৗনা খিৰৌ, আতাঙা নৗং ৰংতেং মাৰাব, যিয়ো তানৗইচান, উৱোন হৗনৗইমৗন লাআ আৰা যিয়ো ফুতৗইচান, উৱোন হানা।’ 22উম্রা উৱো ব্রাকৌ, ‘অৗ লঙ্গৰ চৗকিৰ, আং নিনি হতঙায়ঙি ক্রৌমৗনৗন নিনি বিচাৰ গাসায়ঙা নৗং দাসমানতা যে আং ৰংতেং মাৰাব, যিয়ো তানায়চান উৱোন পায়চোকৗইমৗন লাআ, যিয়ো ফুতৗইচান উৱোন হানা। 23উগুৰৗন ইনি ফংকাৰো আতাঙা মাহাজন নাঙায় তানৗইচান? উৱো তৗৰৗইৰৗনতু আং সুদমৗন উৱো পিন মানমৗন!’ 24উম্প্রিং যি ম্রাদো খৗতৗয়ায় চাপৗইমৗন তয়তা, উম্রা অনোকো ব্রাকৌ, ‘ইম্রা নাঙায়প্রিং উ পৗশি লায়মৗন যি মাৰাবনায় সাছি-কায় ফংকাৰ তৱা উনা লাও।’ 25অনোক উৱো ব্রাকৌ, ‘অৗ মানায়নাং, উনায়ৗন সাছি-কায় পৗশি তৱা!’ 26#মথি 13:12; মার্ক 4:25; লুক 8:18 আং ননোকো ব্রাকাং, ‘যিনায় তৱা উনা লাও সায়ঙা; নাত্নে যিনায় তংচা, উনায় যা তৱা উৱোন উনায়প্রিং লান সায়ঙা। 27#মথি 25:14-30 নাত্নে ইনি যা শুতুৰদো অনোঙি পিৰায় চলায় গৗমৗন নিগচা ব্রাকতানা, অনোকো ইঙা লাহায়মৗন ইনি মাহাঙায়ৗন গাথাত!’ ”

যিৰূশালেমাঙা খুসীমৗন দাঙি

(মথি ২১:১-১১; মার্ক ১১:১-১১; যো ১২:১২-১৯)

28ই ক্রৌদো ব্রাঙি জিখৗমায়, যীশু অনোঙি অৗগচাক অৗগচাক যিৰূশালেমাঙা চৗবৗতনাংতা। 29জিখৗমায় জেলা জৈতুন মুঙায়ঙি হৗচুৰ দাকানায় বৈৎফগী আৰা বৈৎনিয়া খৗতৗয়ায় সকায়ৌ, উ সময় উম্রা মৗংনিং শিষ্য দিমসেতৌ, 30ব্রাকৌ, “উ কৗতৗইঙি সঙাং ননোক লৗই; উবায় দাংমৗন নৗং মাংসা গাধাস্বা হায়তানি নৗকঙা, যিয়ো সাকসানবান হেঙান দুঙৗইচান; উৱো দেঙায়মৗন লাফা। 31আৰা চাংবা যুদি ননোকো সৗঙা, ইয়ো আতাং গৗমৗন দেঙৗইতা ব্রাকৗইমৗন? উগুৰৗন ব্রাক, ইয়ো প্রভুনি গৗমৗন নিগতা।”

32উম্প্রিং যি ম্রাদো দিমসেতৌ, অনোক লৗইমৗন, উম্রা যেগেনা দুনতানা উগুনান নৗকৗয়ৌ। 33জেলা অনোক গাধাস্বাৱো দেংতা, উ সময় গিৰদো অনোকো ব্রাকৌ, “গাধাস্বাৱো আতাং গৗমৗন দেংতা?”

34অনোক ব্রাকৌ, “ইয়ো প্রভুনি গৗমৗন নিগতা।” 35জিখৗমায় অনোক উৱো উম্রা নাঙায় লাহায়মৗন আৰা উনি পিৰায় অৗপিন আপানি গামচা দানমৗন যীশুৱো উনি পিৰায় আম্বাকতিনৌ। 36জিখৗমায় উম্রা লৗইতোঙায়, ম্রাদো অৗপিন আপানি গামচা লামায় দান লাৱৌ।

37জিখৗমায় উম্রা যিৰূশালেম খৗতৗয়ায় সকায়মৗন, জৈতুন হৗচুৰায়প্রিং বৗৰনি হাদামায় বেবাক শিষ্যদো যি ম্রাদো বৗলনাং কৗম তৗৰৗইঙি নৗকতানা উ বেবাকৗন খুসী মানায়মৗন হত্রাকৗইমৗন ঈশ্বৰ প্রশংসা গাসায়মৗন ব্রাকৌ: 38#চায় 118:26 “প্রভুনি মুঙায় যি ৰাজা ফৗইতা, উ ৰাজা সাবাস; স্বৗর্গায় শান্তি সায়ৗন, আৰা পিৰাং প্রশংসা সায়ৗন!”

39উম্প্রিং মাৰাবদোনি মাজাৰায়প্রিং মৗংনিং মিকথাম ফৰীশীদো ব্রাকৌ, “অৗ গুৰু, নিনি শিষ্যদো অৗকৗৰচৗপ তং দিমি!”

40উম্রা অনোকো জবাব লাওমৗন ব্রাকৌ, “আং ননোকো ব্রাকাং, এনোক অৗকৗৰচৗপ তৱাৰৗন, লহংদোন হত্রাঙা।”

যীশু যিৰূশালেমনি গৗমৗন দুঃখ মানি

41জিখৗমায় উম্রা কৗতৗয়াং ফৗইমৗন নগৰ নৗকৗইমৗন, উনি গৗমৗন হেপৗইমৗন 42ব্রাকৌ, “হায়! হায়! নৗং ই দিনায় শান্তিয়ো উতুং উৱো দাসমানৰৗন! নাত্নে তি উৱো নিনি মৗকৗৰায়প্রিং গাবাঙি সায়ৌ। 43আতাঙা নিনি পিৰায় ইগিনা সময় সকফৗইঙা, যি সময় নিনি শুতুৰদো দিগ্রৗইমৗন দেৱাল বানায়মৗন কৰনা। 44আৰা পুমায় তয়তোঙি নিনি স্বাদোমৗন নৗঙো হাʼমৗন সমান তাকৗইমৗন, নিনি মাজাৰায় লহংনি পিৰায় লহং পাংনা লাওচানা; আতাঙা নিনি দয়ানি সময়ো নৗং দাসমাঞ্চৌ।”

যীশুৱা মন্দিৰাং লৗইঙি

(মথি ২১:১২-১৭; মার্ক ১১:১৫-১৯; যো ২:১৩-২২)

45জিখৗমায় উম্রা ধৰম মন্দিৰায় দাংমৗন, উবায় ফালমৗন পাংতোঙি বাৰাৱো গুদুন লাও চংমৗন 46#যি 56:7; যিৰি 7:11 ব্রাকৌ, “সুকতানি তৱা, ইনি নৗগৌ, সেওহেপমি নৗগৌ সায়ঙা; নাত্নে ননোক ইয়ো ডাকেতনি হৗম্বুং বানায়তা!”

47 # লুক 21:37 আৰা উম্রা নিৰিখৗন মন্দিৰায় দেপ্রেংলাওমৗন তয়তা, উম্প্রিং তাংগিৰ আৰা আইনগিৰদো আৰা মাৰাবদোনি তাংগামদো উৱো গাথান গৗমৗন কায়দা লামৌ; 48নাত্নে বেবাক মাৰাবোন উনি ক্রৌ নৗতৗমি খৗব মন লাওমৗন পাংতোঙি গৗমৗন, অনোক উতুং তাংমান্না, উৱো গসনান ঠিক গাসায় মাঞ্চৌ।

Currently Selected:

লুক 19: RABHBSI

Highlight

Copy