ZECHARIAH 9
9
Israel Ghümi shou Küghakütha
1 Ampeu tsa no Hadrach yeghi shou ikughi ani
eno Damascus no tipau kulhokiqhi ake.
Kughengu Ampeu nhethi ye timiqo shou eno Israel
shiaye kümtsü shou jupuku ani,
2Israel sasü kughuthu akeu Hamath, eno Tyre ngo Sidon no
ighono alokütsü kemu tipaqo shou ghi jupuku ani.
3Tyre ye qogheki shiqhevae
ghükayi no ayeghimkhu toi, eno ameshoyi kivi no
alaghi lo aniba toi amoqhevae.
4Ikemu julo, Ampeu no li küakini süwuve tsü nani
azüghi lo li küka kütsave tsü nani,
eno li ye ami no pitileve nani.
5Ashkelon no ti ithulupe msa nani;
Gaza ghi amloiju ihi nani;
Ekron ghi, kughengu pa küpkhü ye kübangüvae.
Akükau ye Gaza lono pühave nani;
Ashkelon ye küghüna moae;
6mshomishimi no Ashdod lo küghünauve nani,
eno I no Philistia qheküza kishekhave tsü nani.
7I no pa kichi lono aji luvetsü nani, eno ahu dolono
aphikümqhüpu luvetsü nani;
pa ghi ni Lhouw ghükulumi shive no
Judah lo alagha lakhi toive nani,
eno Ekron ye Jebusimi toive nani.
8Tishino I no aghukhemi toi I kilo ngokhe luve nani,
tishianguno khunomu ipe-ilomo;
nedaqoda kemi khunomu pano qhasü ighi kithemo nani,
kughengu itehi ye I nhethi ampi no ithuluvae.
Zion Kükau Chekeu
9Shishe alovilo, O Zion limi!
Ighamku lo, O Jerusalem limi!
Julo, o kükau ye o lau chenie;
Pa ye achipiu eno xakuluu,
aqhokigheu shi khurha sacheni,
khurhati shou ikuno chenie.
10I no Ephraim launo khurkulu eno Jerusalem launo
aghükishi khurshi ikhive nani;
aghüshi shexilika ikhive nani,
eno pa no shiyeqo lau külakishi tsa pi nani;
pa yekipe no azüghi lono azüghi kutolo eno Aghoki lono
ayeghi shekha kutolo shinani.
11Iw puloshoqhi ji nongu sasü shikeu ghenguno I no
azü kühakeu qokutho lono now akughumi khaqhi pheni.
12Now sükusho-a lo ideighilo, O lajupu akeu kughumiqo;
ishi no I no shuphe anike küghüsü no nongu tsüchileni.
13I süzü toi I no Judah piqevae;
Ephraim pesü tipau piji shivae.
I no o nuli xukutho nani, O Zion,
o nuli lachile nani, O Greece,
ghüshimi zütakikihi toi o peithani.
Ampeu no Paw Timi Xaluni
14Tileno Ampeu no panongu lau ipeghi nani,
Pa piji no tsütsüpha toi ighi nani;
Ampeu Alhou no afuko küigha nani
eno apeu miyitsü lono ighi nani.
15Aqokitikhi Mpeu no panoqo süsho nani, panongu
no kütsale eno akighi lono atu kihi chekemi theqhive nani,
panongu no atsaiji sho nani eno shomzü akeshi igha nani,
akiptia chekuqo pütsüni ye
akhu chhitoi akeshi nani.
16Tipani Ampeu panongu Lhou
huno Paw timi loji xalu nani;
kükakütsüqho lo achiku toi
panoqo no Pa yeghi lo vü nani.
17Kughengu Pa kivi eno Paw jukivi ye kishi kije kelae!
Ashothi no apumiqo eno atsaizü kithe no ilimiqo
pelo nibonilei lupe nani.
Currently Selected:
ZECHARIAH 9: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
