ZECHARIAH 7
7
Kuchou Xakütha eno Küpükini
1Akükau Darius yepe mpe abidiu lo, atsala abidiu, aqhi atokuu, ti ye Kislev qhi shi akelo,#7:1 Hi ye Ahunaqhi eno Liphiqhi dolo. Ampeu tsa Zechariah lau ighi. 2Bethelmi no Ampeuw kükümgha khutsü penike Sharezer eno Regem-melekh ngo pano timi puwu, 3eno aqokitikhi Mpeu chineki lo achinemi ngo tungkupmi vilo pipe, “I no ampe kutomo shi ighive ketoi ni ye aqhi apunguu lo mloqa eno kümvü akepu kemo kea?”
4Tile aqokitikhi Mpeu tsa I lau ighi: 5“Aghakhu lo timi eno achinemi vilo pilo, ‘Kughou nongu no ampe lhotsüni kutolo aqhi apunguu eno akütsüniu lo kümvü eno mloqa keno, nongu ye I ghenguno kümvü keshea? 6Eno kughou nongu no chusho keno ti ye nongu ampi ghenguno chusho ake kumo keshea? 7Atsa hipaqo ye Jerusalem lo timi no küghüna eno kinikülü shi mishighünaqo no vehope, eno Apeu ngo aqa yeghi lo küghüna cheke ghuloki lono Ampeu no azüu tungkupmi vecheo sheshuve keqo kekumo keshea?’”
8 Ampeu tsa Zechariah lau ishi ighi, 9“Aqokitikhi Mpeu no hitoi piani, Kuchou xakütha tsülo, lakhino lakhi lau kimiyeqhiyi keu eno küpükini piyelo, 10chimemi, mighimi, shoinami momu kumlhomi nedaqoda kevilo, eno nongu dolo khunomu amlo lono lakhino lakhi shou alhoksa kuchughu kevilo.” 11Ikemu panongu no amlo tsümove eno tsatsai ngove no ini moniye pano kini kiyikha luve. 12Panongu no pano mlo pesü atu kümka toive, tikumo aye aqokitikhi Mpeu no Pa Ghungu vecheo azüu tungkupmi launo ayezah eno atsape tsükeu panongu no chiluve nosa kehue. Tighenguno aqokitikhi Mpeu launo axukighide kije ighive. 13“I no ku akeghi panongu ye chilu move, ikehu panongu no ku kemu I no chilu tsümove,” ipi aqokitikhi Mpeu no pi, 14“I no miyitsü lono panongu pesü pano no mthakeu shiyeqo dolo kutholeve ke. Ikehu panongu no qhive keu yeghi ye küghüküghaleive, tishikeu lono khunomu tile nesü move, eno aghüche kivi yeghi ye küghüküghaleive.”
Currently Selected:
ZECHARIAH 7: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
