ZECHARIAH 14
14
Ampeu Tsala Chekeu
1Julo, nongu launo xuleluve keu pesü nongu küa lono kijeluve kepu, Ampeu ghenguno atsala cheni. 2Kughengu Jerusalem sasü aghüshi penike I no shiye kümtsü hekütsü nani, eno mishighüna ye leluve nani, akiqo xulepuwuve nani, eno totimiqo shipüthave nani. Mishighüna lo küami tüxa ye akughu lo sawuve nani, ikemu achili thaqhü ye mishighüna qhimo nani. 3Tithiu Ampeu no aghüshi tsala lo küpüghü cheke toi wuno shiye hupaqo küpüghü nani. 4Tipa tsalani Pa pukhu no Jerusalem kipelau akeu Olive Toghi lo nepe puthugho nani, eno Olive Toghi ye akhila kije lakhino kikije kini shi kipelau kulolau shivetsü nani, tishikeu lono Atoghi tüxa no ahuu iqe iqho eno tüxa no apeu iqe iqive nani. 5Eno nongu no Iw naghuto khila lo pove nani, kughengu tipa khila ye Azal kutolo wu anike. Eno nongu no Judah kükau Uzziah ghuloki lo ayeghi küghütha lono pove ketoi itaghi ponani. Tileno Ampeu I Lhou, eno Pa gholo akimthemi no ighi nani.
6Tipa tsalani aküvü, akumko, momu avü küha nani. 7Ti ye Ampeu likhino ithi akeu akimchi tsala shinani, putho mu pucho mu kumokeu tsala, ikemu avelau no aküvü ighive nani.
8Tipa tsalani aküxüpu zü no Jerusalem lono qoipeghi no tüxa no kipelau züghi lo qoilo nani eno tüxa no kulolau züghi lo qoilo nani. Tipau ye mütsü eno süsü tusho kupuju qowu anani.
9 Ampeu no ayeghiqha kümtsü shou akükau shive nani. Tipa tsalani Ampeu ye lakhi eno Pa je ye lakhi shive nani.
10Geba lono Jerusalem apeu Rimmon kutolo ayeghi kuchopu külaqave nani. Ikemu Jerusalem ye Benjamin khagho lono azüu khagho-a, Acheku Khagho kutolo, eno Hananel qoghe lono akükau tsaithi qocheke-a kutolo, chuqumghai pa-a lo anani. 11Eno timi no tile küghünauve nani, kughengu itaghi shishe kütsave peni keu xaküthaza ye khilemu ighi kithemo nani. Jerusalem ye sükusho auve nani.
12Khuno shiaye no Jerusalem sasü aghü shini keno tipaqo lau püsa hipau ighi nani: panongu no puthugho apülaghi pano phiashi ye tsüle nani, pano nhethi no anhebo lono tsüle eno pano mili no akichi lono tsüle nani.
13Tipa tsalani Ampeu launo phiküghüzü keu kije panoqo shou ikughi nani, tishikeu lono lakhino lakhi u tsüqü luve nani, eno lakhino lakhi mjochile thuve nani. 14Judah ghi Jerusalem lo aghüshi nani. Eno sükümxa lo akeu shiyeqo küakini ameshoyi, ghükayi eno tiphimini kütsasa qhakütsü luve nani. 15Püsa lakhi no khurshi, khurgha, sayeshi, khurha, eno kiukiu lhoxü mu hupaqo ghazü lo akeqo kümtsü shou ikughive nani.
16Tishino Jerusalem mjochile ighikeu shiye lo ghülu kemi no ampe atsütsü Akükau, aqokitikhi Mpeu mllani ke eno Apusho lo Ghulhu ikhiluni ke ighi nani. 17Ayeghi lo khuno shiaye no Jerusalem lo Akükau, aqokitikhi Mpeu mllani ke ighi moni keno, pano lau tsütsüghu ighi move nani. 18Tsala Egypt shiaye no Jerusalem lo ighi no panongu ju piye move aye, pano shou tsütsüghu ighi move nani; eno Ampeu no püsa khipau pesü Apusho lo Ghulhu ikhilumo keu shiyeqo ghime cheni keno tipau pesü ghimeqhi nani. 19Egypt eno shiye khunoqo no Apusho lo Ghulhu pinini ke wumoni keno aghime hipau tsü nani.
20Tipa tsalani, “Ampeu lau Akimthe” ipi khurshi mqübo lo yepuku nani. Eno Ampeu kilo aliqo ghi akiptia lo akhuqo toi akimthe shinani. 21Jerusalem eno Judah lo ali kümtsü aqokitikhi Mpeu lau akimthe shi nani, tishianguno aghashi mlla kemi kümtsü no ighi no tipaqo lono ghiqhi mlla keu shi be-lho nani. Tipa ghuloki lo Aqokitikhi Mpeu kilo kilhikishimi kühave nani.
Currently Selected:
ZECHARIAH 14: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
