ZECHARIAH 1
1
Ampeu lau Ideighi penike Ku
1Darius yepe mpe akiniu, aqhi akütacheu shi akelo, Ampeu tsa Iddo nu, Berekhiah nu, tungkupu Zechariah lau ighi, eno pi, 2“Ampeu ye nongu puasüqo shou shishe amloideve ke. 3Tighenguno panoqo vilo pilo, aqokitikhi Mpeu no shuphe: I lau ideighilo, aqokitikhi Mpeu no piani, eno I no nongu lau ideighini. 4No puasüqo toi kevilo, azüu tungkupmi no panoqo vilo igha pi, ‘Aqokitikhi Mpeu no piani, Nonguw küsakügha laghi eno küsakügha kümla lono ideighive lo.’ Ikemu panongu no chiluke kumono I lau amlo tsümoe, ipi Ampeu no asheshu. 5No puasüqo ye khilehi ani kea? Eno tungkupmiqo ye pülhapuju xü acheni keshea? 6Ikemu I tsa eno I yezah khikhi I no I qemi tungkupmi azah tsü keno tipaqo no nongu puasüqo züthave ke kumo? Tileno panongu no xaide no pi, ‘Aqokitikhi Mpeu no ni laghi eno ni kümlaqo ghenguno ningu lau kiu shiniye akeno Pa kimji kiqi lono shivae.’”
Khurshimi Kungunhetsü
7Atsala muku abidiu, aqhi chighiaqhaqhiu, ti ye Shebat qhi shi akelo, Darius yepe mpe akiniu lo, Ampeu tsa Iddo nu, Berekhiah nu tungkupu Zechariah lau ighi no pi, 8“Julo, timi lakhi khurshi huchuyi sacheghi keu I no putho lono ithulue! Pa ye atuxu lo axokütsüngü boqo dolo puthugho ae, eno pa thiu huchuyi, hughai eno metsüghoi keu khurshiqo ae. 9Ikehu I no pi, ‘Hipaqo ye kiu kea, I mpeu?’ Kungumi khuu I pütsa akeno pa no I vilo pi, ‘Hipaqo ye kiu keno I no o piyeni.’ 10Tile timi khuu axokütsüngü boqo dolo puthugho akeno pa no khochile, ‘Hipaqo ye Ampeu no ayeghiqha xuju penike puwu keqoe.’ 11Eno panongu no Ampeuw kungumi khuu axokütsüngü boqo dolo puthugho akeno pa khochile, ‘Ningu ye ayeghiqha xüjuvae, julo, ayeghiqha kümtsü iqünhei anie.’ 12Ikehu Ampeuu kungumi no pi, ‘O aqokitikhi Mpeu, No ye Jerusalem eno Judah phughiqo shou ampe lhotsüni amloideve ake itaghi khitohi küpükini piye mono ani kea?’ 13Eno Ampeu no kimiyeqhiyi eno amlo vepiqi tsükeu tsa lono kungumi khuu I pütsa akeno khochileve. 14Ikehu kungumi khuu I pütsa akeno pa no I vilo pi, ‘Ighamku lo, aqokitikhi Mpeu no piani: Ni ye Jerusalem eno Zion ghenguno shishe anheshu ani. 15Eno Ni ye ililai akeqo shiye jupe shishe amloide ani; Ni ye kitila likhi amloide akemu panongu no ihulo ghimeve ake. 16Tighenguno, Ampeu no pi, Ni ye küpükini pesü Jerusalem lo ideighivae; I ki ye tileno shiqhe pukuni, eno akimghi süta pesü Jerusalem kuchopu mighi nani, aqokitikhi Mpeu no asheshu. 17Itaghi ighamku lo, aqokitikhi Mpeu no piani: Iw mishighünaqo ye itaghi küakini no qole nani, Ampeu no itaghi Zion lokughunotsü nani eno itaghi Jerusalem kisheluve nani.’”
Akibo Kungunhetsü
18I no I nhethi tsükhope jukelo akibo bidi ithulu! 19Eno I no kungumi khuu I pütsa akeno pa vilo pi, “Hipaqo ye kiu kea?” Pa no I vilo pi, “Hipaqo ye akibo, Judah, Israel eno Jerusalem qha apanaghave tsükeu ke.” 20Ikehu Ampeu no ayikiyiqimi bidi I piye. 21I no iniju, “Hipaqo ye kiu shiniye cheni kea?” Pa no pi, “Hipaqo ye Judah apanaghave tsükeu kibo ke, tishikeu lono khunomu akütsü peqhelu pemo niye ke. Hipaqo ye shiye khipaqo no pano kibo peqhepe Judah yeghi apanaghave tsü keno tipaqo mjochile eno shithüghüi nike ighivae.”
Currently Selected:
ZECHARIAH 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
