Obadiah 1
1
1Obadiahw kungunhetsü.
Edom ye Kuchunive nani
Ampeu Alhou no Edom ghenguno pitsü:
nino Ampeu launo atsape chiluvae,
atsapeu lakhi shiyeqo gholo puwuvae:
“Ithulo! Ningu li mjochile aghü shini nolo!”
2Julo, I no o pesü shiyeqo dolo aghulo shive tsüni;
eno o jukünatha peni.
3O mlo lo aqheküza no o pishiqhivae,
no khuu atuki qhemghai keu lo
xü acheni keno,
nono o mlo lono ishi pi cheni,
“khuu no ayeghi lo I saiqighi kulupu kea?”
4Nono alhuqu toi kunguu yecheghi na,
ayepuqo gholo o püsü shipüaghi namu,
tilauno I no o sünhe saiqighive nani,
Ampeu no shuphevae.
5Tsala küpkami no o lau ighi aye,
xulepuwuve chekemi no putho lono ighi aye,
no ye kishi kütsaveni chekela!
Panongu ye pano sala likhi püka luveni cheke kumo?
Atsaithi xoni kemi no o lau ighi aye,
panongu ye xokhakumo qhiveni cheke kumo?
6Esau küakini pekütsü püakeu,
kishi hakho luve tsü kelae!
7O ngulami kümtsü no o lughi kutolo o haphe puwuvae;
o sasü külashi ache kemi no o pishiqhivae;
panongu no o mhoqhivae;
o sho chuche kemi no o zülo alichhe kuto püanie—
no ye vethakulu kühavae.
8 Ampeu no pi ani, tipa tsalani,
Ni ye Edom lo alokütsümi eno
Esau Naghuto lono vethakulumi kütsave moni keshea?
9Eno ow akumtomi ye aghüthi süve nani, O Teman,
tishino Esau Naghuto lo timi kümtsü ghiqhi khave nani.
Edom no Jacob shou Kütsakungo
10O thiküzüu Jacob shou kütsakungo ke ghenguno,
akukujo no o küzüluve nani,
eno pülhapuju ghenguno o sasü ayigheve nani.
11Nono qhemghai ake ghuloki lo,
inami no khagho lo iloghi no
Jerusalem ghenguno asaqhike tsalani,
eno inami no pa küakini pewuve
akelo no ghi panongu toiveke.
12Ikemu o thiküzüu nguküsa tsala lo
pa ju anheshu kelauno alovi kevilo;
Judah timi shou kütsakungo keu
tsala lo alokivi shi akevilo;
aghime tsala lo qheza kevilo.
13Iw timi mhekiqi tsala lo
panow khagho lo ilo kevilo;
pa mhekiqi tsala lo, paw küsakusho
jupe anhekushu lono alovi kevilo;
pa mhekiqi tsala lo
pa küakini lepuwuve kevilo.
14Aghime tsala lo ghükulumi
küghaluve tsü kevilo;
pokichemi lakha luve niye
alapa lo ngokhe kevilo.
Ampeu Tsala ye Kupunuvae
15Kughengu Ampeu tsala ye shiye kümtsü kupunuvae.
Nono mlake toi o lau mla nani;
o kümla ye o kütsü lo ideikughi nani.
16Kughengu I kimthe toghi lono nono shomzü
ikehu shiye kümtsü no shomzü kibe nani;
panongu no shopusü munove no
khilemu tishimo ketoi nani.
17Ikemu khunoqo no pokalu keno Zion toghi lo anani,
eno ti ye akimthe shi nani,
Jacob laghami ye pano mheghi ithuluve nani.
18Jacob laghami ye ami toi nani,
Joseph limi no amiküqü toi nani,
eno Esau kibolomi no aghijini;
panongu no tipaqo piti pühave nani,
eno Esau kibolomi ye ghükulumi kühave nani,
kughengu Ampeu no piqhivae.
Ampeu Kükaqha
19Negebmi no Esau toghi qhasü luve nani,
eno Shephelahmi no Philistiami yeghi qhasü luve nani;
panongu no Ephraim ngo Samaria yeghi qhasü luve nani,
eno Benjamin no Gilead yeghi qhasü luve nani.
20Haküghütsüve kemi Israelmi aqokitikhi no
Canaanmi yeghi Zarephath kutolo qhasü luve nani,
eno Jerusalemmi haküghütsüve kemi Sepharad lo akeqo no
Negeb phughiqo qhasü luve nani.
21Xaluve kemi no Esau Toghi lo
ayepe nike Zion Toghi lo iku nani,
eno kükaqha ye Ampeuw shive nani.
Currently Selected:
Obadiah 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
