NAHUM 3
3
Nineveh Haküsapu
1Ajikuqo mishighüna haküsapue,
akimki eno aküpka no chhitoi—
thechu keu no ashekha kühae!
2Akighikipili no hekeu ngo kuluho no qhoqhoshi ilu,
khurshi ngo khurkulu no kokoshi!
3Khurshimi no kite, azütakikihi
eno angu no kulo phaphashi,
ghiqhive kemi no aqokitikhi jehi,
akumo no amoqhe,
akithi kumo no ashekha kühae—
timiqo no akumo küpxalu!
4Hi kümtsü kütüqhalimi loji no jukivi eno akithipu gha
pesü kütüqha keu ghenguno ke,
li no kütüqha keu eno züküghüzü keu gha
pesü shiye eno timiqo thechuvae.
5Julo, Ni ye o mjochile ani,
ipi aqokitikhi Mpeu no sheshu,
o mini xapukupe o gi nha tsüni;
I no shiyeqo pelo o phikümsa ithulu peni
eno kükaqhaqo pelo o kukujopu lo jupuku peni.
6I no xine-xigha o shou lepukuni,
o jukünatha peni
eno kutuxoxo o jupe nani.
7Eno o ju akeqo kümtsü no o launo tsüghüve no pi nani,
“Nineveh ye ixapinyivae; khuu no li ghenguno mloni kea?”
Ni ye o lokughuno tsüni kemi khile phuwuni kea?
8No ye Nile phivilo achekeu,
azü no bothape achekeu,
azüghi no aliwo shipe achekeu
Thebes nguno akiviu keshea?
9Cush eno Egypt ghi kihikütha
kühano li kumtopu lakhi shiche;
Put ngo Libyami ye li kukuphumi shiche.
10Ikemu li ye haküghütsüve kemi
shive no akughu lo sawuve;
li nga kughunuqo ye alapa kümtsü lo
aleqhi shi heqhi khave tsüe;
liw gihuküzümi ghenguno asaqhi,
eno akhotomiqo ye ayikichhe no tshü sawuve.
11No ghi shomzüve nani;
eno no ye itshüuve nani;
o ghümi lau sükusho phuwu nani.
12Ow sükusho-aqo ye mububoqo toi
sükini kelo mubuthi amsüu no
ikiqi chu akeu kichi lo iloveke toike.
13Julo, ow ghüshimiqo ye
topumiqo toike.
O yeghi lo khaghoqo ye
o ghümi lau khaqhi püani;
ami no o khaduqo pitive tsüae.
14Lenike ghenguno azü shophe lo;
o liwoqo shikumto lo;
aghani-a lo wulo; achepo qodalo;
pititu mla chekeu bohu kuto lo!
15Tilauno ami no o pitiqhive nani;
azütakikihi no o micheve nani.
Tino tülhaqu toi o munove nani.
Tülhaqu toi eno atikha toi
nongu likhi nongu kughuko lo!
16Ow kilhikishimi nono atsütsü lo
ayepuqo nguno akichiu kughukoe.
Tülhaqu no pa chishibo xakhope yewuve.
17Ow kükapumiqo ye atikha toi,
o yezah kükütsümiqo ye tülhaqu loji toi
akumko tsala lo aghutu kuptu lo
ake toi— kughou khetsünhe
ipeghi keno, panoqo ye yewuve;
panongu ye khile ani keno khunomu mthae.
18O mbekhemi ye zü auvae,
O Assyria kükau;
ow yepemi ye ingu auvae.
Ow timiqo ye naghutoqo lo hakiphivae
khunomu panoqo hekütsüni kemi kühae.
19O ghüzaku khatsüni kemi kühae;
o zaku ye akithipu shi anie.
O sütsa chilu kemi kümtsü no
panoqo u kukhu o tsü ani.
Kughengu ow ashe küha keu
küsakügha no khuu shou ikughimo keu ania?
Currently Selected:
NAHUM 3: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
